UKRAINE LAM
Tu sawng teng Ukraine lam thuthak hong om kik leuleu a, Iran kumpi in Ukraine gam energy infrastructure munte leh frontline munte kapna dingin short range Ballistic Missiles a kici, Fath-360 missiles mal 200 kim khawng pia uh hi cih thu kithang hehu leuleu hi. Hi munte hong kap le uh, nautang mipi in thuak kik leuleu ding uh a, phalbi vuklum tawh Ukraine mipite ngak sawm kik leuleu hi leh kilawm hi.
US kumpi in hi thu tawh kisai bang mah ngencianna nei lian nai lo phawt uh a, Iran kumpite a thukzaw in Ukraine buaina-ah hong kigolh sawm hi cih ciangin gen lai phawt uh a, tua banah Ukraine galkapte in Russia gam a matsak, Kursk Region tai 500 square miles (1,300 kilometers) kima zai panin Ukraine galkapte hawlkhiat sawm uh hi ciin gen lai phawt uh hi.
A nihna panin Russia drone-te in NATO gam ahi, Romania leh Latvia huihkhua (airspace) kantan in Ukraine gam Danube River gun geia om, tembaw khawlna munte va susia uh a, bek tham loin Latvia gam leitang nangawnah kiasak (crash) uh hi cih thu hong om kik leuleu hi.
Hih Drone-te pen Belarussian huihkhua (airspace) panin hong kipan uh hi ci uh hi. Gam kumpite in hi thu NATO gam makaite theisak khin uh hi. NATO lamin hong koici malak zel ding uh hiam cih pen bang mah kitel nai lo phawt hi.
NATO gam makaite in lungsim nang bang diahduai in maimangsak lel ding uh hiam cih zong gen theih om lo hi. NATO Deputy Secretary General, Mircea Geoana bel in, bang mah NATO gam khoih sawmna tu ciangciang om nai lo phawt hi ciin melhbawl hi.
Nung deuh in zong Russia galkapte in Ukraine gam nautang mipi mun leh mual (civilian infrastructures) phial kap gawp uh a, ni khat thu in 50 bangin sihlawh khin uh hi.
Western thukante bel in Putin in galvan a nei lai teng leh a mittang a hah lai teng khawl sawm loin mu uh hi.
British defense ministers lui belin Russia galkapte in Ukraine gam nautang mipite a phial kap zel uh leh bel, Russiate meithalpi hong kipatkhiatna munte kapna dingin British khutsuak a gamla kapna meithalpi, Storm Shadow missile phalna piak loh a kiphamawh hun hong tung thei kha ding hi ciin Putin in na theita hen ciin thu tawpdan pian in (ultimatum) vau bawl phawt uh hi.
ISREAL LAM
Isreal galkapte Gaza gam sim lam zau-ah a lom a tangin kikhinsuk leuleu uh a, kihotuahna lam limlim (Communications and internet services) khaktan phawt uh hi.
Lawmte pen a sim a tham in ngongtat sawm kik leuleu uh hi leh kilawm hi.
No comments:
Post a Comment