NANG HANCIAMNA NA SAKHA HIAM?

NANG HANCIAMNA NA SAKHA HIAM

Tulai nuntakzia ih ettak ciangin A kamsia or atuahsia mi khat, A Daupai mi khat or thupha sang mi khat pen ahang om or ahang khat kingawh ham tang hi. Tuahsia mi khat pen, aw A pate or pute tuadan mi ahi a aive leh, ci-in thu tuamtuam kigen thei a, tuadan mah in A Hampha, ADaupai mikhat pen aw Api le pu, A nule Pate Tua cimi hi, mihoih Pasian um ci-in a tuamtuam kingawh ciat hi.

Tua mah bangin Tuni in Na nuntakna na lungngai ngei hiam? Hih zah a, Na hamphatna, Thupha na sanna, Napilnate Kua thupha hiam cih na lungngai ngei hiam? Tuni in Na lam loh, Na zon loh Hamphatna leh Pilna Na santé Nang i hanciamna  hi, nang I zonzawhna hang hi na ci hiam?

Tuni in Gamdang natunna, tuni in Pilna na neihna, Tuni in Nalawh cinna, Na daupainate Nalung ngaih ciangin Nang hanciamna leh nang zawn zawh hang na sa kha hiam? Hi lo hi Tuni in Na nu leh Pa, Pi leh Pu te lungngai kikin Tua te in Pasian ading na asepna, Pasian ading, apiak khiatna uh leh Khaici hoih a na tuh manun Nang hi ciang tung na hih lam Na phawk kha ngei hiam? Nang ih hanciamna tawh  hih ciang tung mundang tung khawng na kisa khakha lai hiam?

Na phawk ding ah: Na nu leh pa, ahih kei leh Na pi leh pute Thungetna leh Khaici tuh hangin tuni in Nang Thupha sang na hih lam mang ngilh kei in. Pasian in Thupha hong piakna ahang kan le cin nang hoih zawh  hang leh nang thunget zawhman, zonzawh hang hi lo kha ding a, Pi leh pu Nuleh pate sepna gah ah at na hih lam kiphawk in.

Tua mah bangin tuni in, Na tu leh tate in Thupha asan theihna dingin, Na nuntak sungin Khaici na tuh ding kisam mahmah hi. Kha thu, taksa thu  ah thupha nasan theihna ding leh na tu leh tate khang ah nuam asak theihna dingin Tuni akipanin thungenin Pasian adingin Na hihtheih na munmun ah nasem in, Upna khaici akipan sum leh pai tawh Khaici na tuh ding pen kitang sam mahmah hi. LSt sung ah ih et tak ciangin Abraham leh adang2te in khaici hoih atuh manin, Joshua leh Caleb in upna kician Pasian tung anieh mamin, Pasian in tu tan dongin Isrealte kha thu, taksa thu ah thupha nasang sak hi.

Tu mahmahin kipan in Na hoihsep dingpen ziakai cih om ngei lo hi. Na mit leh na khut tawh thupha mu in na sang man kei zongin na ta le tute Thupha ding tu a kipan in Khaici tuh kipan in. Topa in na hihna, sepna, khaici tuh bangbang amawkna suaksak lo hi cih phawk in. Topa mah lian sakin Ihtate leh tute in thupha asan theihna dingin Pasian adingin semkhia Piakhia leng Topan mawkna sak lo in na tunata khang dong a kong thukding hi na ci hi.

Asim kha mimal khat ciat Topa thupha ih san theihna dingin tua kipan in, Na hoih sepding cimtak kei ni. Topa thupha sang akhang2 in hong suak sak ciatta hen, Amen.

By Siam Khaute, date 5/30/14

NU/ZI HOIH LEH NU/ZI HOIHLO ETKAKN

NU/ZI HOIH LEH NU/ZI HOIHLO ETKAKNA

• Nu/zi hoih in, Pasian zahtak in Pasian tawh kizom tawntung a, nu/zi hoih loin Pasian zahtak loin, Pasian tawh zong kizom ngei se lo hi.

• Nu/zi hoih in, a pasal lungkim sakin pahtawi siam a, nu/zi hoih loin a pasal lungkham sakin gensia sia hi.

• Nu/zi hoih in, Pasian thu thupi sakin tawh tate makaih in pantah a, nu/zi hoih loin, Pasian thu tawh tate a makaih loh banah amahmah in Pasian thu thupi ngaihsut lo hi.

• Nu/zi hoih in, tate hoihlohna khat a om leh limtakin thuhilh in sat a kul leh sat a, nu/zi hoih loin tate hoihlohnate phamawh sa loin, thu hilh ngei se lo hi.

• Nu/zi hoih in, a pasal tungah thumanin citak a, nu/zi hoih loin, a pasal tungah thumanna leh cihtakna cihte nei se lo hi.

• Nu/zi hoih in, Pasian ading leh midangte phattuam nadingin piakhia nuam tawntung a, nu/zi hoih loin tua bang piakkhiatnate phawkin zong nei kha lo hi.

• Nu/zi hoih in, inn sung nuntakna khangsak a, nu/zi hoih loin, inn sung susia hi.

• Nu/zi hoih in, itna bulphuh in,gamta kampau a, nu/zi hoih loin muhdahna lamsangah pangin thusia bekbek gen in nei hi.

• Nu/zi hoih in, ama pianna nu leh pate a it mah bangin, a teekte zong it thei a, nu/zi hoih loin, a teekte simmawh hi.

• Nu/zi hoih in a pasal tungah thusia tun ngei lo a, nu/zi hoih in a pasal tungah thusia tun den hi.

• Nu/zi hoih in, thuhoihte ah pangin thusia mudah a, nu/zi hoih loin, thusia lamah pangin thuhoih mudah hi.

• Nu/zi hoih in, nasep hahkat in, inn sung siangtho sak a,nu/zi hoih loin, nasep thadah in,innsung puah lo hi.

• Nu/zi hoih in, nuntak khuasak zia ding lungngai ngai-in, Topa' tungah vai khempeuh ap-a, nu/zi hoih loin, tua bang ngaihsutnate nei kha loin, om milmel lel hi.

• Nu/zi hoih in, a pasal' tungah thuphabawl in, a tate thupha pia den a,nu/zi hoih loin, a pasal hamsiat in, a tate thupha pia ngei lo hi.

• Nu/zi hoih in, a pasal leh tate adingin a sepna khat peuh ah a gim mahmah hangin lungkim mahmah a, nu/zi hoih loin, a pasal leh tate adinga a sepna khat peuhpeuh tungah kisialhna in nei-in, agim a tawlnate hehna in nei hi.

• Nu/zi hoih in, Pasian piaksa a pasal leh a tate manpha sa mahmah a, nu/zi hoih loin, Pasian piaksa a pasal leh a tate manpha sa thei lo hi.

* Nu/zi hoih in, khang tampi dongah minphatna leh pahtawina ngah tawntung dinga, nu/zi hoih loin, khang tampi dongah minsiatna leh mindaina ngah tawntung ding hi.

Nu/zi ahi khin te ading leh nu/zi ahi ding nungakte adingin kilambehna leh phattuamna a om khak leh cih deihsakna tawh kong gelh hi. A telsiam dingin, Topa'n thupha hong pia ta hen.Amen.

Khazih sungah, David Tuang

NU LEH PATE THEIH DING KILAWM PAWLKHAT

Nu leh Pate' theih dinga kilawm pawlkhat

• Nu leh pate pen tate pantah in a makaih dingte i hi-a, tate' pattah ding leh tate' makaih ding khawng i hi masa kei hi.

• Na tate ahoih ahi-a, a sia ahi zongin, "a nu leh a pa kua hiam?" ci-in hong kikan masa ding ahihna phawk gige in!

• Na tate Pasian thu tawh hilh in, lim takin pantah in. Pasian' thu tawh a ki pantahte zong kisia thei veve lai ahih leh, a kipantah lo tate kisia thei zaw kan lai ding hi lo ahi hiam?

• Tate limtak/hoihtak in pantah loin, thu ahilh nuamlo nu leh pate' tu leh ta' khang ding pen ahoih lam adingin, lametna tawm mahmah hi.

• Nu leh pate aw, i tate in zong midangte' lakah hong kisaktheihpih nuamin, i hoihna gengen nuam uh hi, cih phawk gige un.

• Nang siat bangin na tate siasak kei in la, nang hoih sanga hoih zaw dingin pantah den in!

• Tate' khan khat zi/pasal ding i buaipih zah leh i lunghimawhpih zahin, tate' khangtawn (Kha) ading buaipih leh lunghimawhpih in i neih loh khak ding dahhuai mahmah hi.

• I tate'n hong it in hong zahtak ding i ut leh, it theih zahtak teih dingin i om ding zong kisam mahmah ding hi.

• Na tate' cih bangbang mang pahpah kei in la, ahi zongin na tate' kisapna bel tel sawm mahmah in!

• Nang ma deihna bang bekin na tate pantah lo zaw-in, na tate' uukna leh lawpna tawh kizui-in pattah siam zaw in!

• A piantheih nak leh tate zak leh tate theihna-ah nu leh pate kitottot, kiselsel khawng hoih het lo hi. (Kitot sim zel, kisel sim zel ding hi zaw mai hi).

• Tate' tung panin thupha i san' nop leh tate' ading limtak ngetsak a, thupha i piak zelzel ding kisam hi.

• Nu leh pa hoih anei nuam lo ta om lo ahih manin nu hoih pa hoih i suahzawh nading hanciam in i kisin kul hi.

• Midangte' lakah i tate'n hong maizumsak ding i ut loh mah bangin, midangte' lakah i tate a maizumsak lo nu leh pate i hih ding zong kisam mahmah hi.

• Tate i it takpi leh tate khangkhat ding bek thupi sak loin, tate' khangtawn ding (A lian mahmah gupna thu) mah a thupipen hi sak den ni. Tua in, tate' nuntakna leitung vantungah nopna tawh kidimsak ding hi.

Itna, zahtakna leh deihsakna lianpi tawh nu leh pate' tungah hong hanthawn nuam ing. A telsiam dingin Topa'n thupha hong pia kim ciat ta hen. Amen.

Khazih sungah, David Tuang

note: 

Nute pen ahoih leh Innsung nuam a Nute ahoih leh Pawlpisung khang in, Nute anop leh gam leh lei minam anuam ahi hi.

Anop kei leh tuateng mah anuamlo hi pah in Tate khantohna dign tawm mahmah hi.

by Siam

PIANNA NU LEH PA KHASIA SAK KEI NI.

PIANNA  NU LEH PA KHASIA SAK KEI NI.

Nu leh Pa lo aa piang leitung mihing omlo ahihman in Ipu Ipa te’n, “Singhawm suanghawm aa piang kuamah omlohi” naci uh aa khat leh khat kithupi simding acihnopna ban ah, tua sang athuk zaw ahi, piansakna (creation), kimawkpianlo hi, ong piangsak Khat (Pasian) omhi cihna hipahhi. Theology Thuthukpi ahihi. Hih lungsim pua, hih lungsim anei, Zomite, ongpiangsak Pa’n minam khat aa ong bawlcil in, tuni tuhun a Laisingtho’ Piansakna ihsung ah ong guankhin ahihlam kilanghi.

Tuadungzui in, leitung mite’n Pate pahtawina ‘NI’ ihneihtheih pen alungdam huai mahmah ahihi. Ipianna Pate pahtawina anei hih leitung leh Vantung gambek hiding aa a angtan huai mahmah ahihi. Leitungdang te in neilo uhhi. Nute pahtawina ahihleh Vantung ah zong kibawllo in leitungbek ahihman in, amanpha mahmah cihna ahihi. 2010, tukum in leitung aa ong kipiansak zawh kum 55 kapha aa, leitungbup tawh igenngam kei zongin Zomite lak ah, kazi kata nangawn in angahloh Pasian tungpan hamphatna Thupha lian angah ci-in kakigen ngamhi. Banghanghiam cihleh kum 55 kaphakdong kaNu leh kaPa in ong nuntaakpih, mit ciim, bilpil, lungsim pil, lai aa, tuabang Thupha mikim in kingahkim khollo hi. Kei sangin ka U pii kum 62 apha pen Thupha ngahzaw hilai ahihi. Topa minthanna hita hen.

Khatvei, Tedim ah khualam papii meltheih khat tawh kaki ho kha aa, “Nang zong nanaupangte, USA aa om khat om hilo ahia?” kacihleh, “Ommah hiven tuate khakuun huai lel, khakham veina hilel ee, genvet ding hikei” ong cihsan aa kakan kikkik leh, asawtnailo lai in India lam tawn in ongciah aa aPa kiang kihillo, baanglo in, azi leh atate’ omna Kawlpi delhsuk suak ci-in katheihi. Khakuun huai takpi kasahi.

Khatvei mah Singapore zatopi ah cina gimsimsim khat kaveh leh, kacina vehpa ong gim, ong kipan tawm biangbuangin, abei kuanciang, “KaNu leh kaPa tung nathum sak un, ong ci aa, “Tuni dong sumlepaai bangmah puak zolo hi’ng” ongcihi. Ka lungsim sung ah, gamdang aa sum thalawh aa tutanvei om, NulePa tung dangkasan peekkhat zong puaknailo cihbel thuum aa patvet ding zong hikei, Kawlte’n, “Leitung gik tuamsaklel, kimanna neilo” acihte nahihman in asi hakzaw hiteh kaci simsimhi.

1970 pawlmah in Zomi sumbawl masa khat khanglaipi in ong sivat aa, sigalte kiho sim kazak ciang ahiding mah hi kacihtha ongsuak hi. Amah pen a innkuan sung vuah, sum muthei pen ahihna tawh kizui in aNu, aPa leh asanggam a-u, anaute tung ah kiphasak mahmah, simmawh mahmah hihtuak aa, heh nading zongden in, ahehciang, Zongeina zong ahihetlo Kawlte hehciang aa kisimmawhna aa azat uh azummawh nangawn aNu, aPa mai ah leemngam hihtuakhi. Ipianna iNu, iPa mai aa zummawh lakngam mipa bel iplah huai hetlo mawk mahhi. Hihbang aa thusia theihsunsun, tuahkhak sunsun ikaihkhopna in hici gamtat kha hetkei ni ikicih nopman ahihi.

Khatvei mah Singapore pan aa ciah tangvalno khat, Ygn atunteh, khualzinna tawh gim, ihmut cimlo ahihman in, tutphah zal tung kingam(lum) kawm, mitsi kawm leh akhe khaam hiding hiven akhe asanglam ngato kawm in, innlam aa om aPa phone tawh hopih aa, tua laitak naupang te’n, gamdang pan aa ma’ camera ken mah tawh maan(photo) nala kha uhhi. Innlam aNu leh aPa kiang tung, avanpuakteng leh a maan(photo) puakteng vel ngeingai a om laitak un, Ygn atun ni aa aPa tawh akiho laitak aa a omdan aPa’n amuhteh, “Suan Kim, hih Ygn nong tunni aa kei tawh ihkiho laitak aa na omdan maw?” ci-in dongpah aa maan sung ah ani, anai kigelh himawk ahihman in nialtheih omlo hihtuakhi. A Pa lupna khansung lutpah liana a, aNu aa kipan a unau teng un athuum takteh, “Nidangciang kei kahi aa, na Nu ahi zongin, nagei ah ka om uh aa ka om kei-uh zongin, ihkiho aa, ko tawh kisai kizopna khatpeuh nasep, nabawl uhteh hibang tutdan, khawldan za nuamlo hi’ng, ko, note’ hiciciang aa hopih ding hilo hi-ung, lungsim takpi tawh nong hopih nop kei uhleh ong hopih dah zaw un” kici pah uh hihtuakhi. Hi kasa mahmah hi. NulehPa muhna bek aa kihoihsak ding hizenzen lohi. Nu leh Pa lungkimna sum leh paai zong na hikhin pah khollo mawk mahhi. Avaang uh tanding ahihi.

Ka Upiipa kum 62 aphaak ciang nasep tawlnga aa, “Kei pen ka tate kazon, kavaakna in katha kangal beitahi, Tua ahihman in ka tate ading Pa hoih kakici theihi. Ahihhang kaNu leh kaPa ii tapa hoih kahih nading in ta hoih kaneih kisam hi” ci aa, hi kasa mahmahhi. Pa hoih hihding athupit mahbangin tahoih hihding thupi zaw laihi. Nute, Pate pahtawi icih pen amau pahtawi ihi kei aa ei leh ei kipahtawi ihi zaw hi. Khatguak nasep hilohi.

Khatvei, sang aa sang sia ka sep lai, sangnaupangte khat in ak gualno khat ong puak aa, nuamlua kahihman in kakhawi leh khanih, khathum khitteh ong tui hi. A tui masa nambat “1” ci-in kaciamtehhi. Azingteh khat ong tui leuleu in “2” ci-in kaciamtehhi. Athumna ong tuiteh, akhatna leh anihna la in, kaNu leh kaPa akhatna pia in, ka Panote nupa anihna kapia uhhi. Alungdam dan uh ka mangngilh thei keihi. Aktui tang 100 lei in kapia zongin tua zah in nuamlo ding uhhi. Ne le uh zong khamtaak ahilo aktui pum khat hang aa anuamna uhpen, a aktui hilo in “athu” ahihi.

Tua ahihman in, ZIS kikhopna ah tukum Nute’ Ni in, “INu, iPate pe’n anlim tuilim tawh nungta hizenzen lo-in, “huih” tawh anungta ahihi” kacihi. Ong kinuihsan hi. Ngaihsun kikkik hi lehang NulehPa lungdamna pen, sumlehpaai neih leh lam hikhin khollo in, athu hi aa huih ahihi. Khemna huih hilo in zahtaakna, pii bawlna, itna huih ahihi. Ahamsa hihetlo hi. Kawlte paunaak ah, “Nupa kop khat in ta 1000 vaak zo aa, ta 1000 in Nu leh Pa kop khat vaak zolo uhhi” naci hi.

Zomi ulehnau kong hanthot nop in, “NaNuteek, naPateek neekding nazi nata tawh kisut liang mah in nakhen khiat kei leh bangmah napia zo ngeikei dinghi”. Hihbang kacih ciang ihzi ihta in pia nuamlo, gitloh sakna hilo in tuazah dong aa thupi ngaihsutding kacihnopna ahihi. Zomi pasal pawlkhat in asung, apu(azi’ nu leh pa) pen Nu leh Pa in simlo in etding ngaihsunlo, zi lel akicihding patauh ngaihsutkha uhhi. Ngaihsut khialhna lian mahmah ahihi. Nuteek, Pateek bangmah sem zo nawnlote, ei atu, ata te’n en kei lehang kua’n en aa ummawk ihihiam? Tuate neek ding dawnding, vaihawmsak kei lehang kua’n vaihawm sak aa um ihihiam?

Gamdang ah sum thalawh in ka om aa, kha sum kasan aa kipan kaNu, kaPa kakhakdenhi. Zong akisim thei pian kahihi. Khatvei inn lam ciah in Nuteek, Pateek tawh tawm vei ka omleh, ihNu, ihPa te ateek uhteh agenhak zia uh kigen theilo hi. Ei zong teek in ihkum tamleh akituaci luading ahihi. Anneek ding nanagwn ne nuampaklo in zolzol akuul uh nahimawkhi. Tuatawh kizom in kangaihsutna ong kilamdangsak lianhi. Azenzen in kaNu kaPa in, “Zinkhia nawn ke’nla ko ong ompih in” ongci hileh bangtanvei kithuah in, kangeek bawl zotam ci-in kei leh kei kakidonghi. Kei pen kasanggam numei nih kaNu, kaPa keemding omthei aa, tuate thupitna, alungsim duaiziate uh kei sumkhak sang thupi zaw ahihna kaphawk phaphahi. Tuate hang aa kaNu, kaPa tutanvei anungta na hizaw aa kei sum khak hang nahihetlo zawhi. Kei pen sum thalawh kahihman aa sumkhak kahi aa, kasanggamte pen sum ngah taleh ngah takei leh Nu leh Pa keem ahi uhhi.

Zomi ulehnau, innlam aa ihNuteek, ihPateek ong kepsak, ihsanggam, ihzi, ihta te ei sumzong paaizong tesang thupi zaw kaanlai ahihlam mangngilh kha hetlo ding hihang. Adiakdiak ei pasalte kipasal sakna anuihzaak huaipi nahi mawkhi. Khatvei, nasepna pan ciah, kasung nuamlo, ka awnghawh tha suak kawm in inn katunghi. Ka Nu’n ong dawn aa ka kiho kawmkawm un, ka omdan man sa phalo hiding hiven, “Na dailen tha suak ahia?” ongci aa, “Hidihdih veh aw” kacihi. Ka tate’n lamdangsa mahmah uh aa, “Pi, nang bangci theih nahia?” ci-in dong ngeingai uhhi. Ka Nu’n atute kiang ah, “Leltak, nasuahtung vua kipan, mitkhahlo aa ih ong et gige hiven, na omdan uh en lehang akithei lel veleh” cihsan aa, atu te’n lamdangsa mahmah in, “Pi, nang na tate it taktak ciai” ci-in nui ngeingai uhhi.

Ih Nu i Pa te’n hawmthawhna tawh mitkhahlo aa ong encik gige ahih man in, ong tel mahmah uh himawkhi. Ihihbangbang ong naak tel lua mahmah ahihi. Sum zong paai zongin ih omciang, amau khutsung ah ih-ap lohhang ihngahzah athei lua mahmah uh nahi aa, hop noploh man, piak noploh man aa angahlo kineih khakding hilohi. Thei lua mahmah mawk uhhi. NulehPa ahai mahmah zongin tate khem zawhding hilo aa, atheilo akineihbek uh ahihi. Tua pen akheemsawm tate ading gu suakhi. Khemtawh patkhak vetding nahihetlohi.

Zomi ulehnau in tuni aa kipan ihNuteek, ihPateek zahtaak, thupi bawl, it, khemsawm hetlo in lungkim sakding hanciam ding hihang. Khansauna Thupha ahihi. Adiakdiak gamdang ihtunteh, gamdangte tatzia in ta mawklo in, ihZongeina limcite khahsuah loding hihang. Nu leh Pa ompih aa, vaak aa zawng omnailohi. Nasep manlah in Nu leh Pa ompih manlo, Piteek, Puteek kepna ah puakziau cihte zuaupi hi aa, puaksawm kei peuh lehang tua hangin puuksi hetlo ding hihang. Tuni aa Nuteek, Pateek limbawllo khat in nateekteh ong kilim bawlding lam-en kha kei in. Ihvawh bangtek in atding hihang.

Zongeina ah, Nuteek, Pateek pen upen, innluahte etding vilding kisa kha aa hizenzen tuanlo hi. Nuteek, Pateek pen ta ihihnaakleh etding hi aa, uzaw, innluah cih gengenloh, numei, pasal kikhen ding thu hilohi. Ta ihihnaakleh etding ahihi. Tam ngahte’n tam etzo ding aa tawm ngahte’n tawm etzo dinghi. Thupha akibang ngahciatding ahihi. Etzawhzah athupi hilo aa etnopna lungsim athupi ahihi.

Nu leh Pa akhasia saklo dingin Pasian in ong siamciat tahen.

FROM fACEBOOK

MIN LEH KHUAMIN GELHDAN

THEIH HUAI KASAK Min leh Khuamin atdan PAWL KHAT 

Nang ngaihsutna tawh akituak kei lua hiam? atua cih kei leh  hong na mai sakin.
Zomi te mailam nuntakna a ding in LAI tawh kisai ah angiahsut huai mahmah thu ka sak khat ahih manin hong post pong ning e.

Laibu leh Lai Siangtho let bawl kikkik te in theih huai ka sak keilungsim a a om My Idea hi e.

1. MI HING MIN ATZIA LEH AW SUAH TAWH KISAI.
Hih tawh kisai in Laibu kilet Manglai panin Eipau te ah LST bu ah Minte ih et takciangin aw suah vive tawh kilet tam mahmah hi. hih thu tawh kisai in kei muhn ah, Manglai pan in min eilai ah lai letin min ih at tak ciangin aw suah tawh let lo in min pen original  min mah in at leng cih ken deih mahmah lehka ngaihsutna hi.
     Min ih cihpen akimawk khel theilo min hi a, amal khat khial leng zong  awsuah tuam in a min nei pen hi lo in, mituam suak pah ahih manin minpen atdan ih khel loh ding ken deih mahmah ing.

Genthna: Laisiangtho sung a JOHN pen aw suahin Zawhang ih ciphial zongin ih at teh JOHN cihmah in ih at ding thupi ding hi. Abraham pen awsuah ah Abiahang ih cita zongin ih atteh amal man Abraham ih cih ding thupi hi. 
Kei min pen Ka at ciangin SIAM hi a, pawlkhat te in hong sap teh awsuah pen: Shyam, Sam, Same, Psalm hong ci uh a, ah at uh teh SIAM ci in at uh hi. ah aw suah in ah at uh leh Kei ka hi kei hi. Namin hong ci le uh zong ut lo ding hing.

CIN pen Pawl khat in SIN in sam, suaksak, Pawl khatin Chin in suaksak, Bang2in hong kilo ta leh ah at cianin CIN acih ding amal aman ding thupi sa mahmah ing.

atciang Mathrew, awsuah Mahte or mathai
John at ciang , awsuah Zawhang
Peter at ciang, simciang Pitaa

Mailam ah LST khawng alet te leh abawlte in hong ngaihsun le uh ut huai sa ing. Min pen kikhelsak lo dingin ih lawh ciang awsuah atuam leh tua bel ahi ding mah hi a, ah at ciang atuam loh ding thupi mahmah ding hi. min tawh kisai-in hi zah ciphot ni.


2. KHUA MIN TAWH KISAI.

Khua min tawh kisai in tu a kagen sa Min tawh kibang hi pah lel hi. ih lawh dan atuam leh  zong ih at takciangin original khumin, amal man ih at ding thupi sa mahmah ing.

Gentehna: TEDIM pen at ciang amal man hi a, Pawl khat te in awsuah in Tiddim hong cihsak in, Pawlkhat te in Titing hogn cihsak in, Bang bang in kilo ta leh ih at takciangin amal man TEDIM cih a at tangtang ding thupi hi. awsuah khawng tawh at loh ding thupi mahmah hi.

Rome at dan, sim ciang LST ah ZAWMAH kici kei bang thei lo mai,
Bethlehem at dan Simdan Betlehem 

Kagen nop in ah Mai lam ahmasuan ih hih manin Manglai malin KHuamin leh Mi minte ih khelsak loh ding thupi sa ing. ih sim dan atuam hangin, ih at teh Aman a ih at ding thupi sa ing.

Gentehna: nuikawm leng Teizangte awsuah in THU pen SU ci uh a, ah at ciangin THU in ki at veve hi. tuadan ding hi. Min leh puam, Khuaminte pen ih lawhdan aman kei zongin ih at teh aman, amal man a at ding pen tuni in kihan thawn nuam hang. PAITE te atdan awsuah Paihte.

Nang thupi na sa kei zongin tulai khangnote in thupi kisa ta hi. eipau a atuam midang or Manglai ah atuam hong hihteh Manglai lah ih thudot leh ih etna pi, ih sim or sinpi ahih teh nuambual2 nawnlo ahih manin tuadan in hih thei ta le hang, mailam ah thupi mahmah dinghi, USA bang ah Min mal khat a khialh leh hithei lo, khuamin malkhat ah khialh leh kimu zo lo...

Kenbang Pasian huhna tawh, Laibu "ANSWER FOR YOUR MARRIAGE" NUPA KAL ANOP THEIHNA DINGIN mite tungpan DOTNA LEH DAWNNA' cih ka na leta, amin te uh leh akhua minte uh, eipau in at sak lo hi pah mai ing. amau at dandan in ka at pah hi.

Mailam ah ZOMI te in zang siam leng ut huai mahmah ka sak thu ahih manin hong post hi ing. Zuisiam cit ni. lungdam 

Siam Khaute  May 10, 2014

SAWM AH KHAT KUATE GAMH

ZOMI-TE TUNGAH THUPHA HONG KIP THEIHNA DINGIN SAWM AKHAT.

 Malakhi 3: 8-12

SAWM Ah KHAT tawh kisai ih gending ciangin na lungsung ah bang hong lut hiam? Sawm akhat ih theihsa hi  lomaw bang gengen kul hiam na cikha thei ding hi. Tuni in Zomite tungah bang hangin hauhna khang khat khom ding haksa mahmah mawk hiam? Zomite, Chinte sumzon pen kum 100 lom bang sawt ta hi. Bang hangin Budish-te leh Hindu-te hau thei zaw, Christiante sang cih dotna omthei zel mawk ahi hiam?

Sawmah khat thupen tulai pau in Pastor or siate, tanglai pau in siampite in, gen taktak ngam lo-in thuphasan nading bekin gen in kuamah lah thuphasangin Hidu or Budist or muslimte bang in atu, ata khang ah khom cih pen kigen vangvang lo mawk hi. 

Tuni in sawmah khat thu pen LST lam a Doctor late na ngawnin agen mengmeng ngam loh, siate in gen leh na duhman hi, ci a ih mawhsak uh, Kong vaksa uh hi ih cih uh, atal ih kawk ngam uh, tuni in kiciantak in Zomi khempeuh in ih theih dingin genkhia nuam ing. Sawmah khat kuate adingin kipia hi mawk hiam?

 

SAWMAH KHAT BANG HUN IN HONG KIPAN A KUATE TUNG KIPIA? When it's started.

Sawmah khat pen hunsawt lai pekin hong kipan hikha in cin, adang sut man kei ni in, Abraham in Melchizadek siampi tungah pia hi. Mi khempeuh Pa ahi Abraham tungpanin hong kipan hi. (Piancil 14:20).  

Anih na ah, Moses hunlai in Moses Isreal makai hi na pi-in 10/1 Moses tungah Pasian in na pialo a, Asanggam pa Aaron siampi tungah napia hi. (Gamlak vak na 18: 21-32 sungah)

 

TUN MALAKHI 3: 8-12 ENSUK NI.

8 Keimah in note kong dotnop thu pen, mi khatpeuh in Pasian na guksak ding kilawm ahi hiam? Kilawmlo hinapi-in note in nong guksak uh hi. Ahi zongin note in, 'Bang hong guksak ka hi uh hiam?' na ci uh hi. Sawmah khat piakna leh biakpiaknate-ah nong guksak uh hi.

9 Na minam bupun keima neihsa hong guksak na hih manun note khempeuh tungah samsiatna hong tung hi.

10 Ka biakinn-ah an a om theihna dingin sawmah khat a kimin hong paipih un. Kei hong ze-et un; vantung kongkhakte hongin, note-a' dingin na hoih tampi kong piakna na mu ding uh hi.

11 Lo panin a piang na ante uh, kauphe ka nesak nawn kei ding a, na leenggui uh gahpha mahmah ding hi.

12 Tua ciangin na gam uh, ten'na dingin a hoih mahmah leitang hong suak ding ahih manin, minam dang khempeuh in note pen a nuamsa minam, hong ci ding uh hi," a ci hi.

 

SAWM AH KHAT KUA A HIAM?

            Sawm ah khat pen Pasian a hi. Cih phawk ni in, Pasian deihna ah ih zeksak ding thupi ding hi. Malakhi 3:8,9

Tu-in aneu 10 na en suk ni. KA BIAKINN-AH an a om theihna dingin sawmah khat a kimin hong paipih un.

 

BIAKINN AH CIH KAMMAL EN NI.

Biakinn cih tawh kisai-in na lungsung ah bang hong lut hiam? Biakinn a cihtak ciangin Mipawl khatte in Muhtheih biakinn mahin ngaihsun pah a, aman mahmah bel hi pah hi. Khat ih ngaihsut dingin ah, Biakinn a cihna ah Nidangin Biakinn ah kuate teng or om cih ngaihsut ding thupi mahmah hi. Gentehna: USA Biakinn pawlkhatte ah Inn tawh kizo pah a, tua teng ah Siate ki-om sak, kitengsak pah in, tanglai hun tawh kibang ka sa hi.

Tanglai in ah Biakinn ah kuate teng or om hiam cih ngaihsut kul hi. Siampite/siate om hi cih ih kiphawksak nuam hi. Akithoihding or biakpiakna, mawhsutna ah neih ding uh ciangin Biakinn ah pai uh a, tuateng ah siampi-te in biakpiakna piaksak hi. Gamlakvakna 18:12 pan in sim leng mi maimai kikhopni lo-in Biakinn nai ah apai ding Pasian in deih lo hi. v22

“Ka biakinn-ah an a om theihna dingin sawm ah khat a kimin hong paipih un. Kei hong ze-et un; vantung kongkhakte hongin, note adingin na hoih tampi kong piakna na mu ding uh hi.”

Hih laisiangtho in Biakinn agen nopna pen muhtheih Biakinn a gen hinapi a gen nop khat ah mawhpuak(tavuan) aneihsak siampite or siate agen nuam zong ahi hi. Cih kithei sak hang. Anuai ah en suk lai ni.

 

SAWMAH KHAT KUATE GAMH, OR LUAH DING AKIPIA HIAM?

            Gamlakvakna 18:20-32 ciang ah ih sim suk ciangin kitel mahmah hi. Kuate go, tan ding akipia cih kitel sitset hi. Azatna ding gen kul lo-in kitel pah lai hi.

Aneu 21"Kikhopna buk sungah amaute nasepna thaman dingin Israel sunga sawmah khat khempeuh, Levi mite tungah gamh-in ka pia hi.

Aneu 24Bang hang hiam cih leh amaute in biakna-in Topa tungah a piak uh Israel mite sawmah khat pen Levi mite tungah luah dingin ka pia khin hi. Tua ahih ciangin Israel mite lakah amaute in luah a neihloh ding uh ka gensa ahi hi," a ci hi.

            Hih tangnihte gel ih et takciangin Sawmah khat pen Siampi te or Tulaipau in Siate adingin gam leh luah ding akipia ahih lam kitel  mahmah hi. Tulai Siate in sawmah khat thu agen uh ciangin kawlgam, vaigam leh western gam dong ah om Zomi or Chin mite in a duhman uh hi, ci ihih manin sawm akhat hoihtak inzong hong gen ngam lo uh a, Malakhi 3: 11 leh 12 hong hahtang gen uh a, kuamah in tua hamphatna te kinei tuan lo mawk hi.

Zomite, Christiante in aneu 11 leh 12 ih ngahzawh lohna ahang in, aneu 8 na leh 9 nate ah kinungta lai ahih man ahi hi. Siate kikhasia sakin kizah ko a, kong vaksa peuh uh kici zanzan hi. Siate pen ei vaksa hi lo a, Pasian vak hi. Sawmah khat ei a ahih loh lam kiphawk lo in, ei a mah kisasa a, Siate bang tona in kizang ta zen hi. Pasian a ahih lam ih phawktek ding uh kideihsak hi hang.

 

SAWMAH KHAT PEN MISSION SUM HI DEKTAK LO HI.

            Sawmah khat pen Pasian in kei ahi Biakinn ah hong puak un, siate luahding hi. Siampi/siate gamh hi, pia un acihcih lai tak in eite in, Kha an hong vak Siate kham ding hoihtakin ih piak masak sangin haksa khat peuh huhna leh Building peuh ah kizang masa a, aman mahmah dingin kingaihsun thei hi. Pasian in gamh leh luah ding in siampi or siate apiakhit nungsangin, Pasian a ahih lam leh a ngah ding akilawmte in a ngah masak ding thupi hi, malakhi 3: 8,9 ah hoih takin hong gen khinzo hi. Mundangte ah huhna leh budget in ih neih nop leh zong siate kham ding gel photin akicin lai leh gel ding hi pan hi. Ih hih dan uh leh ngaihsutdan man lo ahih manin Pasian lungtang kinasak hi. Tang lai Moses hun hi leh suanga den lup ding pawl kihi kha ding hi. Hehpihna hun ah ih om manin hong kithukpah lo a, ahizongin mite or namdangte thupha ngah bangin ih ngah thei kei hi. Abraham in Melchizadek Siampipa apiak bangin, Pasian na sem siampi or sia khat  sangin mundangte ah na thupit sak zawk leh a paina ding mun ah a pailo suak ahih manin Pasian sum a zekkhial suak ih hih manin Pasian lungkimna kingah lo ding a lei thupha kisailo thei ding hi.

 

MISSION SUM KISA KHA THEI

Sawmah khat pen mission sum himasa lo a Pasian in apiaksa om hi in, Siampi te an, gamh, luah hi cih phawk ni. Mission na sepna dan in, Mission huhna ah nazat nop leh sawmah khat na lak khiat khitteh 9 pan in pia in. Sawm ah khat leh Mission kisailo hiphot hi. Sawmah khat tawh mission kisai masa hi leh bang hangin Pawlpi  kim ah Mission box ci-in kituam hawm/dong mawk ding ahiam? Ngaihsut huai mahmah thu ahi hi.

Tua ahih manin USA, India, Burma mun tuamtuam a ah omhih lai sim kha khempeuh in Na siate uh akham dingin sawm akhat hoihtak in na pia un tua hi leh thupha kisang pan ding hi. Siate in khasum hongkham zawh loh tak ciangin sumhong zong a, ih gensia lailai uh hi. Na gensiat sangin na sawmah khatte uh akhamding uh napia un. 10/1 tawh siate innkuan kham ding ih piak khit ciangin a kicin lai leh Pawlpi sung kivanna, Mission, Buildingte ah khenzawh zah khen ding hia, Siate a masaklo liangin mudangte ah budget gel ding hilo hi. Tua pen 10/1 tawh kisai pai zia leh zek zia ding ahi hi. Tua hi leh thupha Malakhi3:11-12 sunga ah gente ih tang thei pan ding uh a, Hindu, Buddhist-te bangin tu leh ta khang dong ah ih hauhnate uh ih zek thei ding uh hi.

 

Christian ahilote gentehna a ihgen det kei zong ngaihsun thei leng a namah hi. Christiante ahoih lamin Christian ahilote in hong gen leh ih ut kal ah, a hoihlo-in hong gen det uh pen ngaihsut huai hi.

Sawmah khat pen kawlte nuntakzia atheite in thei ding hi hang, amau zong a phungzi-te tung uh ah nak piak mahmah hi. Zingsang tho baih in, an huan uh a, amau nek ma in a phungzite adingin kuang khat ah thukma sa in pia masa uh hi. Hindute ahih leh an huan uh a amin ciangin innsung innpua a pasian nonote uh pia masa in tua ciangin amau ne pan hi. Bang hangin thupha ngahlohna ding hiam a nungta Pasian bialote in zong a siampu-te leh a pasiante uh zahtak mahmah hi ven. Ei a nungta Pasian biate in ih Pasian ih kihtak mahmah ding hizaw hi. Budishte in a pasian uh sum apiak dinguh ciangin ahoih penpen mah na pia uh hi. Christiante e leh bang ih ci vua, siate gensiat leh cilphih peuh sawmte hi zaw hang ahi na? Sawmah khat pen siate tung ah nang piak bangin na ngaihsut cingin na iplah a Pasian a, Pasian piak ahih lam phawk lecin na hamtam ngam kei ding hi. Tua bek hilo an Pal pen siate ading hi cih na kigen lai hi.

Chin or Zomite Pasian in thupha hong pia nuam napi in eite in ih guk saksak manin thupha kingah theilo a Pasian kikhasia sak zaw hi mawk hi. Tang laidan in hong nitun hi leh suangtawh den lup ding vive hi hang.

 

TANGLAI

Tanglai in sawm akhat leh anpal, gan pal napia tangtang uh a, tuate pen siampite ading hi a, siampite in tuatung panin sawmah khat apiak sawn ding uh pen Moses tung ah na hilh hi. Sawmah khat thupen OT sungah hoihtakin na gen a NT ciangin sawmah khat thu telgen ding in nei nawn lo in, cit piakna na gen hi. OT sungah 10/1 khat vai kiciantak in na gen khin ahih manin NT ah na genthuah nawnlo-in 9 pan piak khiat ding na gen hi. 

Gupna thu tawh kisai in OT a pen NT ah kizang theinawnlo ahih manin kician tak in Jesu thu up ding hong gen hi a, OT ah Sawmah khat thu kiciantak in genkhin ahih manin NT ah hong  genthuah nawnlo in a mite in apiaknate hong genbek hi.

 

SIA TAWH KISAI LEH UKNA ZA,

            Hih tawh kisai in LST sungah hong uk kumpite thu na mang un hong ci a, tua ma in bang gen hiam cih leh kei ma theih loh in Ukna za angah om lo ahih manin hong uk kumpite thu na mang un ci hi. Pasian thu tawh kituaklote man ding cih hituan lo hi.

Tua mah bangin siate pen Pasian theih pih loh in sia za ngah om tuan lo hi. Tua hih manin athu uh ih man ding kisam hi. Tucing pa nung zuih sawm in la, NA nung/mipi nung tuucing pa zui sak kei zaw ni. Upa Tansawm zong onglo khat in Siate pen Eideihdan a ih kaih sawm mawk pen ngaihsun thei hileng kilawm hetlo lua hi. Pasian in ana semte siate kisuan pih, gum mahmah a tua pen Mihau pa leh Mizawngpa(razarus) tung tawn in ih mu thei hi.

            Mizawng pa Abraham ang sungah a om lai-in mihau pa HELL ah om in, tui tak khat anget leh Abraham in phal lo hi. Mihau pa in tua ahih leh Ka sanggam u leh naute kei tunna ah hong tun lohna dingin vagen sakin ci-in athum tak cianin, Abraham in adawn na ah, Leitungah ka na sem Pastorte kamsangte tam mahmah hi. Tuate thugen a up kei leh hih pa hing kik in a vagen hangin um tuan lo ding uh hi cih san hi. Pasian in a nasemte kisuan pih mahmah in, hu hi, cih phawk in. Siampi itten siampi thupha sang ding, kamsang itten kamsang thu pha sang ding hi.

 

Thukhupna

Ka lungsim ah om lua mahmah ahih manin kizom leh lo ngaihsun lo in Pasian hong theihsak bangbangin ka at hi a, atel siam dingin Topa’n thupha hong pia hen. Hih thutawh kisai in nuntak pih leh azui zo dingin Topa in asim mimal khat ciat thupha hong pia hen. Kei tha tang tawh hong pai in gen thei lo ka hih manin hih lai tungtawn in na sim un la, ih Zomi sungah thupha ih ngahna leh Pasian gamtang zaina, ih Pasian nasemte ih itna leh Pasian a a hihna ih telsemsemna dingin Pasian in hong suak sak hen la, tu a kipan in hih lei tungah zong ih hauhnate uh akhangkhang in akip pai suakna leh sawtpi akikhom hong hisak hen la, vangtungah zong thupha tampi ih san na uh, leh Pasian lungtang akhoihkha, Pasian alungkimsak mimal khat ciat asuak ding in hih teng pan in thukong ngetsak hi.

Asimkha mimal khat ciat Topa thupha in akhangkhang in na inn kuan sung ah hong kipna hi ta hen. Amen.

 

Siam Khaute

USA post masa march 2013 nihna edit may, 10, 2014

 

THANGHO LEH LIANDO TE UNAU KIHONA

THANGHO LEH LIANDO TE UNAU KIHONA

 UK gam London a teng Thangho in Germany gam Hamburg aom, a naupa Liando a hopihna

Thangho          :           A nau Liando phone sap kipan….

Liando             :           Hello! Kei Liando hi ing. Hamburg pan hi ing.

Thangho          :           Kei na U Thangho hi ing. Hamburg ah bang thuthu aom a?

Liando             :           Thu lamdang theih nei keng. Maikal ah “Kawlgam” ciahpah sawm  ing.

Thangho:

“The Republic of the Union of Myanmar” a kici Zopau in Kawlgam ih cihi. Khangmasate hunlai 1948 masiah Kawlgam atuam, Zogam a tuam, gamtuam tuaka, a kidinlai-a, Zomi Khangmasate zat kammal tudong azangtosuak lai ih hi hi.

1948 khit Kawlgam, Zogam leh, Kachin, Shangam, Karengam… cih te'n suahtakna ih ngah khit ciangin gammin Union of Burma kici hi. Hih Union of Burma pen ihpu ih pate khanga, akizui kammal zangto suakin Kawlgam ihci hi. Tua Kawlgam ihcihna sungah, Kawl minamte bekhilo in Zomite, Kachin, Karen, Shan,... minamte te'nna gamkhempeuh a huamkiim ahi hi. Tua banghina pi’n Kawlte bek kipia in Kawlgam ih ci a, Kawlte gambek hong suak tawh kibang mawk hi. Ih kammal zat ngaihsun kik leng, Zomite, Kachin, Karen leh Shan mite ihpu, ihpa gampen Kawlgam a suah hi mawk hi hang.

A taktak in Union of Burma/Myanmar - Kawlgam ihcih "Kawlte" gambek hizenzenlo a, Zomite, Kachin, Karen leh Shan.. mite gamzong ahi hi. Tua ahihman in hih ih minlawhzia, ih kampauzia te’n (Terminology) ih lungsim ngaihsutna leh ih concept khat ih theihloh kalin hong zogige nahia, ih pianna gamtakpi ah innteekzolo mawk hi hang. Ih lungsim zong innteeksuahlo hi. A zawdeuh in Myanmar gamsung a om, ih Zomipihte’n a kinaipih mahmah uh, Kawlte sangin a kigamlatpih mahmah uh, Mikangte, Germante  peuh pakta zaw, itzaw hile uh kilawmsa ing.

Union of Myanmar (Burma) a kici Kawlte gambek suaksak kei ni. Kawlte hampha lua ding uh hi. Union of Burma/Myanmar pen ih pu ihpa te’n sisan, naisan tawh aleisa uh, asisan uh hawkbangin a luannasa gam ahihman in, Kawl te gambek  a suahding pammaih lua hi. Kawlte gam bek suaksak nawn kei ni. Kawlgam cinawnlo in, Burma/Myanmar cita ni.

Liando:         Thu hoihtampi nong gen ka lungdam. Tua ahih leh U Thangho Myanmar/Burma gam pen ei Zopau in bang cilawh ding/ bangci sap ding?Kawlgam mah cih ding hilo ding maw? Tualo a dang a omtuanloh pi?

Thangho:     Union of Burma/Myanmar pen Kawlgam na cihleh Kawlte gam a suaksakna hi a, nang Zomi a dingin gamneilo na hi hi. Zogam, Kachin gam, Karen gam na ngawn “Kawlgam” na cih leh, Kawlten amau gam ahih manin a utut un a zat ding mah uh hilo ding hiam? Tu-a kipan in KAWLGAM  cinawnlo in Burma/Myanmar gam ci-in ih kammal zatziate kheltheihding thupisa ing.

Liando:         U Thangho aw, na deihna telsiam ing. Ahizongin Myanmar/Burma pen ei Zopau tawh ih genciang a, “Kawlgam” cihloh ding kammal dang hongomlo mawk ahihman in “Kawlgam” aci kha zel hi mawk mah ing. Kawlgam ka cihte, ih Zogam na ngawn Kawlte gam bek asuah hi zenmawk mah ing ei. A taktak in Kapian na Zogam, Ciimnuai apiang hinapi ing in, kapianna Kawlgam cinuam dekdek zel ing. Ka kammal lawhdan a manloh/ dikloh ahi Kawlgam ka cihciangin Union of Burma/Myanmar mah a gennuam dan a kingaihsun hi ing. Ahizongin ei Zopau in Kawlgam ih cihloh ding a dang om thei mahmah lopi, U Thangho.

Thangho:     Tualeh na omna Germany gam ei Zopau in nong gen thei ding hiam?

Liando:         Aw, Ei pauin zong Germany mah hipah lo ding maw?

Thangho:     Tua ahih leh naciah sawmna gam Kawlte gambek suaknawnlo a, Zomi leh Kachin, Karen, Shan … adangdangte gam a suahna, nakammal mahmah pan akilat na dingin “Kawlgam” ciahding ci nawn kenla Myanmar gam ciahpak ding cizaw tale cin hilo ding ahia?

Liando:         Atua bel, Kawlgam ka cihsa, ka zongsatsa ahih ciang a, a dikloh, amanloh lam ka theih hangin, a kheltheipak lo himai ing. Tua leh Kawlgam kacih diksalo na hih leh tu-a kipan bang ci leng, bangcisap leng nong deihsak a?

Thangho:     Aw, Kawlgam ihcih ciangin Kawl minam ahilo te tawh a kisailo hong bang hi. Ahi zongin ihpu, ihpa khangmasate hunlai a, kizang kammal khat ahi “Kawlgam” cih bel, Kawlte gambek ahihloh hangin tuakammal ih khelpak ding bel thubaihlo ding mah ahi hi. Bangcisap leng, nongdeihsak cina hih man in, tu a kipan in, Kawlgam cinawnlo in Burma/ Myanmar na chiding kong deihsak hi. Tua hi leh tua na cih Burma/Myanmar sungah Kawlte bekhilo in, nang Zomi khat zong a kihel, gamnei gige na hih lam na kammal in hong lak ding hi. Kawlgam cinawnlo in Myanmar ah vaciah pak ni ci thei lecin uthuaisa ing.

Liando:         Aw. Myanmar vaciah pak ning ka cih ding, ka koiteng hiam khat nuam kei si. Ka zatngeikammal ka zongsatman ahi ding hiam bel theisamlo maw.  Tu a kipan in Kawlgam (Kawlmite gambek cinawnlo in) pen Kawlmite gambek suaksak nawnlo in Burma/Myanmar ka cihtheih na ding hong hanciam ning ei. Lungdam.

Thangho:     Cidam in ciahthei in la, Ki thuzazel ni.

Liando:         Aw leh, U Thangho. Lungdam ei, Topa thupha!

Thangho:     Topa thupha!

May 4, 2014

Hamburg

C. S. Khai

Universität Hamburg

Hamburg

Germany