NUPA KITOT KISEL CIANG KIDOPHUAI KAMMAL

Nupa kikal kitot, kisel ciang a kidop huai kammal.
~~~~~~~~~~~~~~~~~~~~~~~~~~~~~~~~~~~~~~
Lei leh ha zong kipet thei ahih man in, Nupa i cih in a kitawng, a kihau thei mah ahi,hi. A hih hang in tua bang hun ciang in kidop ding leh zatloh ding a kul kammal te hih a nuai a bang ahi hi.

1). Midang te muhna zakna ah ki tawng lo ding.
Pasal pawlkhat te in lengla om khawng ciang in, a zi te uh tawng gawp thei hi, tua bang hun ciang in azi in zong dawng kik a hih man in ki tot na piang hi. tua bang hun ciang in Numei in lengla te ciah ngak in la, kuama om loh ciang in na pasal tung ah na lung kim loh na gen kik in. Innkong khak un la veng le pam te zasak mu sak kei un, bang hang hiam cih leh, Zi lel cih pen pasal te zakdah penpen hi a, a pasal in zothawh cih pen numei te a ding in veng le pam ah guallel maizum lawh uhhi., veng le pam te in tua bang kam hong pau kha uh leh Nupa ki kal ki tot na hong tam semsem ding ahihi.

2). Naupang te zak na ah kitawng ki sel lo ding
Nata te muhna ah kitot ki sel ding pen a hi theizah in kidawm in. Naupang te in Nu le Pa te pen belh le suan a hong nei uh a, a mau a it ding leh tha a pia ding a hong ngaihsun uh ahihan in naupang te lungsim ki sia in lung sim natna ngah thei uhhi.

3). Dam loh hum.
Hehna khat oeuh a om hang in na, nazi napasal a damlo ahih leh ki hauh loh ding thupi hi, bang hang hiam cih leh damloh lai tak in lungsim na baih mahmah hi, tua ahih man in a dam lo khat peuh tawh ki tawng kei in.

4). Kitot sim a , a beisa hun genkik den, na kiten ma a, a zawl lui te tawh tot bawl den, nidang a, a khilh na khat peuh tawh zawh thawh na a nei den, tua bekbek tawh gualzawh sawm den cih te pen, a sauvei ciang in hoih nawn lo hi, innkuan sung ah kilem loh na in hong zui den ding hi.

5). Naupang te guan beh,
Nupa kitawng na hih vua le Nupa kikal bek ah thu om sak un, a kisai lo naupang te hel se kei un. Nanu pen tua cih hi gilo lua, Napa pen tua cih tua cih hi, cih te pen ki dop mahmah ding khat ahihi. tua hi a naupang te hong lawh leh innkuan sung hong nuamlo tektek lel ding hi.

6). Van khat peuhpeuh susia.
Nupa kihau hi na pin innsung van khat peuh peuh susia cih pen gamtat hoih lo khat ahihi. Van khawng lawn gawp veng le pam in hong theih pih hen aci kek mah bang a gamta mawk, innsung van suksiat pen a phat tuam na khat zong omlo hi, tua bek tham loh in thu neu cik pan in thulian pi hong piang thei hi.

7). Khasiat na ding kampau lo ding.
Nupa heh a kitawng a hih nungsang heh na ding kammal pen a kizong tek ahihi. a hih hang in khasiat nading kammal ken ki dop huai mahmah hi. Hehna pen dam pah lel a, khasiatna pen dam pah zo lo hi. tua ahih man in kha siat na ding kammal pen a hi thei zah in ki dop ding a thupi a kisam a hihi.

8). Sih kam pau.
Kitot kihauh sim a hih bang nong bawl sang in hong that zaw vet in, si nuam ing, nang tawh a om khop sang in si nuam zaw ing cih te pen kampau hoih lo hi a, bang mah a kimanna om lo hi.

9). Khut zang
Hih pen bel pasal te a tam zaw hi pian hi, Pasal hoih khat in a it azi tung ah bang hun bang hun ahi zong in a khutlum nga ngei lo hi.

10). Kikhen ding kammal pen baih ngaihsut lo ding.
Kitot sim a, kikhen ding gen tahpai, kikhen nuam taktak lo pi a na gen kammal khat tawh nang le nang awk kik thei hi teh, tua bang kammal in na khantawn hong ki sik kik sak thei kha ding hi.

~ Job Cinpi

Source :
Zomi laisim nuamte

NUMEI TUNG A KINGA THU HOIH LEH ASIA

NUMEI TE TUNGAH AKINGA ; THU HOIH THU SIAA- #Zongeina leh lstho zui peuh un
************************************
Innkuan sung anuam sak leh Innkuan sung abuai sak Numei te hang ahihi 75% bangbel kei muh na ah maan cingam ingh.

Kikum suk ni Numei te hang a Thupha thusia apian na ..
ZOMI te i kam in Pawlpi in gupna / Vangam ong tun lo ding hi Pawlpi tawh ki khenkhen ding hilo hi ki ci tek hi.tua pen i kampi bek hi a I pawlpi tek i Upna tek mah aki thupi sak hi cih kei muhna tawm ong gensuk ning..

Numei ten na phawk ding uh leh na zuih ding uh thu pawlkhat ong gen nuam ingh. Pasal na neih uh ciang un na Pasal bang pawl bang biakna aihizongin ama athu mangin la ama i deihdan in om zawh sawm in .Pasal na neih khit uh ciang in Na Neutung pan a na zuihsa pawlpi up na mah len tentan khah nuam tuan lo in .ut lo pipi in kamnel leh zawhthawh na tawh na pasal no i pawlpi ah leh kaihsawm naih man un tua hangin na Innkuan sungvuah no hangin Buaina ong om hi .

Na pasal tawh no nih kikal bek ah tua buai na om lo in .na innkuan sungbup uh na teek nu na teek pa tawh zong kilem loh na ong kipan ta a na lawm pa leh na Teek nu na teek pa aki tawngsaksak asutuahtuah na hih lam kiphawk thei hi le cin ong deih sak mahmah ingh..

Tua aih manin Nungak khat in lawm na ngaih uh ciang in na lawmpa Biakna Pawlpi thei masa in la  amau biakna/ Pawlpi na zuihpih zawh ngap kei uh leh ahun lap in kikhen zaw lel un. Zuihpih zawhngap mah ing ci a na khensak ahih takpi ahih leh na kiteen khit uh ciang in Pawlpi Biakna vai ah na Innkuan sung buai sak ken la na Pasal cih bangbang man zawhsawm pah in.Numei te i nasep in Pasal alungkim sak leh Innkuan sung anuam sak ding ahihi.

Etc...Lawm kingai mahmah khat om hi ci .Ahih hangin Abiakna Apawlpi aup na  dan uh kibang lo aih manin .alawmnu in apawlpi kibat loh na hangin alawm ngaih pa kiangah Ken no biakna na pawlpi uh ong zuihpih ngap keng cin ong kikhen uh hi..Hih pen thupi zaw lai hi kingai mahmah na pi un cin Pawlpi tawh aki kang kawmkawm a na ki ten uh sang ahunlap a na zuihpih zawh ngap keh siangtak in gen le cin na Lawm ngaih pa ading in amailam ding hoih zaw pek a nang ading in zong hoih zaw pek hi..

Nupi te kisap na zong tawmcik gensuk ni.Nupi ten ah a Tapa te atanu te uh amau deih sak tawh akiteen loh ciang in heh gawp pong mawk in Atapa khawng mudah gawp om thei hi.na sungpan a piang na Tapa na tanu it na zawhkei leh mi dang te tanu ahi midang te tapa na Monu na Maakpa bangci It theih ding na hiam .tua aih manin na Tapa na tanu mahmah it zawh sawm le cin na Monu na Tapa na itna hangin na maak pa na tanu na itna hangin It zo veve ding hi hiteh..

Hih bangteng naupang no khat in kong at hangin Zi nei zong hi nai lo hing.ahizong in ZOMI te Innkuan sung buai na pen atamzaw Pawlpi Biakna kibat loh na hang in Teek te leh Mo te kilem sa lo lua ka hih man in kei muh na ciang ong at ka hihi .kei Ong ngai ding te inzong thei leh ka ut na kawm hi hee

Hih ka lai at teng na sim khit ciang in Numei na hih leh LST sung aa Esther Kumpi nu bang in ama melhoih na hangin abeh aphung a Mipih te tungah thupha abawl mah bang in nang zong na hoih na hangin Na Innkuan sung anuamsak na na behna phung na Mipih te tungah Thupha abawl thei ding in Topan thupha ong pia suk lai ta hen..Lungdam.
Zomite  ngeina zui peuh vua, Lstho cihdan tawh!
Credit:Nkt Kimpu
Nov2717

Dahpihna thupuak

Dah Huai thu, Nov 21 2017
Nasak pih kahih manin kong post hi.

USA ah gospel ong pai Revd. Khai lian
Mualpi khuami
Galilee AG Kawlpi ah Pasian nasem in Oklahoma City ah tuni in ong nusia ci mawk hi �A dah a kap ta ding thu nget na ah phawk ni ei

Zun khum, Sikhang tawh!
November 21 2017

KUA-IN IH GAMTATZIA DING HONG KHEL HIAM

JESUH KHRIST-IN IH GAMTATZIA DING HONG KIKHELSAK

Efesa 5:1-33; 6:1-9

Gitlohna lamsang kuamah kithuk loin, note khatlekhat tung, mi khempeuh tungah a pha kibawl ding ngaihsutpi-in na nei un. (Thesalonika masa 5:15)

Thuphatna:

Ih it mahmah ih lawm igual khat tawh I kithuah ciangin ahoihna, hoihlohna eizia or amazia pen kizui nuam ham tang hi. Banghang hiam cihleh ah mah itin kithuah mun ihih manin amazia azui kha ihi hi. Tua mah bangin Topa Jesuh itin amah tawh ih kithuah leh ama nuntakzia or ih nuntakzia akikhel loh, I zui loh aphamawh ahi hi. Topa Jesuh tawh omkhawmin ih nuntakna kikhelsak nading ih utna lungsim ineih nakleh ihgamtatzia akikhel loh phamawh hi.

A ithuailo mite I it theihna ding, midangte tungah gamtat hoih ih neih theihna ding, ei hong bawlsia nuamte nangawn ih it theih nadingin Jesuh in hong huh ding hi. Hih bang itna nampen amathu-in hong piang tawm thei hilo a, ei hanciam na tawh zong aneizo ding ihikei hi. Pasian in Jesuh Khrist tungtawnin itna eite tungah ahong pia ahi hi.

Galati 6:10 sung isim ciangin, midangte tungah ahoihin gamta-in, adiakdiakin thu uppih mite tungah ih hoih gamtat ding hon ggen hi. Matt 5:16 Midangte in na gamtatna hoihte uh a muh ciangin vantungah a om na Pa uh min a phat theihna dingun mite mai-ah na gamtat hoihna uh khuavak bangin na kilangsak un.  Khristiante gamtatna pen Khrist gamtatna tawh kibang ahih manin Jesuh Khrist azui lote gamtatna tawh kilamdang mahmah ahi hi. (Efesa 5:1-17)

Midangte tungah Khristiante gamtatzia.

1.      Itna tawh gamta. (Ef 5:2) Khristian ihihmanin Jesuh Khrist gamtatzia ih etteh ding ahi hi. I nuntakna pen a namtui Thu-um mite leh thu umlo mite tungah a kibangin Jesuh pianzia akilangsak ding ihi hi.(2Kor 2:14-17)

2.      Khuavak sung a aom mite bangin gamta ding (Ef 5:3-10) Ih gamtat lohdingte ih gamtat teiteite in gimna angahna ding teltakin hong gen ahih manin kitheih mawh bawl kei ni.

3.      Khuamial gamtatna sukha vetlo ding (Ef 5:11-14). Thu umlo mite tawh nasem khawmlo ding(2Kor 6:14-15) hihbang acih ciangin donvet lo ding cihna hilo-in, amau nasep hoihlo te seppih lo ding cihna hi.(2khg 18:1-3; 19:2-3) Thu umlo mite tawh kiten loh ding zong hoih zaw hi. ahi zongin thu umlote itin  thupha bawl ding ahi hi. Rome 13:8-10.

4.      Pil gamtat ding (Ef 5:18-20). Eima vai teng bek manlahpihin midangte donlo-in om ding hilo hi. Midangte huh theihna ding hunhoih I neihte valkhongsak ding hilo hi. Pasian deihna bang hi ding hiam ci-in phawk ni.

5.      Kha siangtho tawh kidim ding (ef 5:18-20) Khasiangtho in lungdamna hong pia in la hong sasak thei hi. Thu khempeuh ah lungdam koh ding athubaih lo tawh akibat tei hangin Pasian a itte adingin thukhempeuh ahoihlamin apian nading thuciamna I nei hi. (Rome 8;28). Kha Siangtho in mihing gamtatzia ding hong kikhelsak thei hi. khat leh khat thu I man nading, eimah sangin midang ihthupit ngaihsutna ding, mi dangte demnopna lungsim neih lohna ding, leh midangte huh nopna lungsim neih nadingin hong huh thei hi. (1 Thesalonika 5:11-22)

2. Innkuan sung ah gamtatzia ding

1.      Zi leh Pasal (Ef 5:22-23). Zi-in pasal thu mang ding hi. Khrist in Pawlpi a it bangin pasalin a zi it ding hi. Pasal in azi it peuh leh a zi-in apasal thu man ding haksa hetlo ding hi.

2.      Nu le pa leh tate (Ef 6:5-9). Tate in nulepate thumang ding cihciang, atek aguai uh teh kem in khoiding cihna hi. 1Tim 5:4-8 na ah Nute pate in atate uh Pasian lamah pantah ding uh hi. Mundangsangin inn ah kipattahna pen kipin kho zaw tham hi.

3.      Silate leh Tote (Ef 6:5-9). Nasemte in citaktak in asep ding ahi hi. Inn ah hi-in company, kumpi nasepna ah hita leh Biakna ah hita leh ihsepna peuhpeuh ah citaktak in sep ding ahi hi. ih tung a uliante nuai ah na ihsep ciangin Pasian nasem mah in kingaihsun in ihsep ding ahi hi. Nasepna hun sungteng amawkna in ih beisak ciangin ahong cialte sum aguksak tawh kibang ahi hi. Ei Khristian te peuh mah ihsepna khat peuhpeuh ah citak ding ahi hi. Christiante peuhmah in ih nuai ah minasem aom ciangin ei thutawpna hilo-in, ih tungah Pasian aom lam phawk tawntung ding a, tua hileh a khutnuai mite, nasemte akhasiatna dingin gamta lo ding hi.

3.      Gammi hoih hihna tawh gamtatna

            Khristian ih cihte pen leitung mimah ahih manin amatenna gamin pahtawina angah theihna dingin agamta ding ahi hi(rome 13:1-7). Ukna anaa neite pen Pasian nasem bangin ih ngaihsut ding ahi hi. Phiangsiah akipan Kumpi tung a piak ding khempeuh manman a ih piak ding ahi hi. Ei Khristiante in leitung Kumpi thu neite  ihzahtak ding hi a, ahizongin Pasian thu tawh kilehbulh leh bangbang ahi zongin Peterte bangin Pasian thu ih zuih zawk ding ahi hi. (sawl 5:29)

Phawk ding leh thukhupna

            Thu khempeuh lak panin gamtat hoihna in Pasian thu ah teci (witness)hoihpen ahi hi. Khatvei mikhat in, “ Khristiante gamtatzia ka-et, kamuh na hangin Khristian suak nuam kei ing,” cimawk hi. Gamtat hoihna in Jesuh Khrist apahtawi mah bangin, Christiante gamtat ahoih lohciangin Pasin min adaisak suak hi (Matt 5:16). Eite gamtatna ahoihna dingin, ahong kikhelsak dingin vanglian Pasian ih nei hi. tua ahih manin nisim na Khristian nuntakna en inla, Pasian minthang sak ka hi hiam, adaisak ka hi hiam, ci-in ei mah kisit tawm ciat tawntung ni.

            MIhingte pen na khat peuhpeuh ah apenpen ki-ut tek hi. A hizongin Jesuh Khrist in mihingte lungsim hong khelsak thei a, Tua akhelsakna pen Khristian nuntakna panin kilang thei hi. Midangte in Khristiante nuntakna en in Jesuh Khrist ih cih pen bangci mi hiam, ci-in tua siksan in nei uh hi. Tua ahih manin Ih nisim  nuntakna in Pasian thu agengen ahi hi.

            Ih lungsim hong kikhelna tawh kizui-in ih nuntakna, gamtatna hong kikhel ding ahi hi. Asim kha mimal khat ciatin ih nuntakna tawh Jesuh nungzui ih hihna akilang sak ciat ding in Topa in thupha hong pia ciatta hen, Amen.

Lungdam

Siam Khaute

Nov1917

KAMMAL HOIH PAWLKHAT

 Kammal Hoih Pawlkhat

By, Rev.Job Thawngno


1. Natna in Pasian tawh hong kinaisak a, Sihna in Pasian tawh hong omkhawm sak hi. 

2. A cinghte tungah Pasian cingha, A huaihamte tungah Pasian ciil hi.

3. Thau-muuk sangin laikung kihtaak huai zaw a, Ih galte sangin Ih lawmte kihtaak huai zaw thei hi. 
4. Itna a kiam leh mawhna ki zong a, Itna a khan leh dikna ki zong hi. 

5. Pawisiimna sangin sigaalna hoih zaw a, Sigaalna sangin nat vehna hoih zaw lai hi. 

6. Na khempeuh ah Paulap bei mawh a, A piang khempeuh lungkim leng, Paulap khempeuh bei pah hi. 

7. Thupha ciamteh theihna peen gual zawhna hi a, Thusia ciamteh theihna peen gual lelhna hi. 

8. Mawhsakna pen dikna pulaakna hi thei a, Gensiatna pen Pahtaak piakna hi thei hi. 

9. Thupha simsim le teh Thusia ta zolo diing a, Thusia simsim leteh Thupa ta zolo diing hi. 

10. Guah zukma in huih nung thei den a, Thupha ngah ma in ze-etna ki tuak thei hi. 

11. Pawlpi kimkhat in siate thu dong a, kimkhat in siate thuhilh hi. 

12. Thupi na naaksak mahmah te Pasian a diingin thupilo thei a, Thupi na naaksak het lohte Pasian a diingin Thupi zaw thei hi. 

13. Sahang in mi apeh diing teh ngik masa a, Mihing hong bawl sia diingte in hong paakta masa hi. 
14. Mi ih gensiat leh ei a kiphat pian ih hipah a, Mi ih phat leh ei a kiniamkhiat Ih hipah hi. 

15. Mipil gamah mipoite ki hehpih a, mihai gamah mipoite ki simmoh hi. 

16. Hong ngaite sangin hong itte teenpih huai zaw a, hong itte sangin hong hehpihte teenpih huai zaw lai hi. 

17. Khatvei minthan khantawn ki manglou a, khatvei minsiat khantawn ki mang hi. 

18. Nang deih bang in a pian kei leh, 
Nang deih bang Topa' cipah in. 

19. Nang deih bang Topa' na cih leh, A piang bangbang ah lungkim in. 

20. Na dinmun sanga na kiniamkhiat zawk leh, Na dinmun sangin hong ki tawisang zaw diing hi. 

21. Na dinmun sanga na ki tawisan zawk leh, Na dinmun sangin hong kiniamkhiat zaw ding hi.
 
22. Gualzawh main gual lelhna a om leh, Tua gualzawh na limci thei pan hi. 

23. Tuni mihaupa zing teh khutdawh suakthei a, Tuni mipilpa zing teh mihai suakthei hi.



Credit:Rev.Nangkhawthawng
a.k.s.Job  Thawngno

ZOMITE AW TOPA PHAT UN

ZOMITE KHEMPEUH AW, TOPA PHAT UN (ZOMI PSALMS)

Zomite khempeuh aw, Topa phat un. 

Bang hang hiam cih leh Amah in Carsonte, Lorrainte, William Pettigrewte leh midang tuamtuamte sawlin Gospel Lungdamna Thu hong puak zo hi. 

Lai nei lo minam lai hong guan a, sang nei lo minam sang hong bawlsak a, zato inn zong hong bawlsak zo hi. Tu-in B.A., M.A. tawh kidimin I.A.S. leh I.F.S.-te tawh hong teeng khawmsak a, Vuandok, Mangpi, Menzi leh Vuanzite tawh hong kidimsak zo hi. 

Zomite khempeuh aw, Topa phat un.

Bang hang hiam cih leh Amah in mawhna, haina leh zawn'na pan hong honkhia zo hi. Nuntakna thak tawh sanginn, sik inn leh suang inn sungah hong lumsak hi. Vaimim leh tangcim a kham zo lo minamte Scooter, Gypsy leh Maruti mawtaw tawh hong vaksak a, Zangkong khuapi, Delhi khuapi leh gamdang tuamtuam ah hong teengsak zo hi. 

Zomite khempeuh aw, Topa phat un. 

Bang hang hiam cih leh Amah in dawi leh kau, singbul, suangbul a kihta minamte hong honkhia a, gualzo pente hong suaksak zo hi. Satan khemna tawh tualgal a kineih tawntung mite ki-itna tawh minam khat hong suaksak zo a, Leitung minam khempeuh tungah khuavak a tangsak dingin Ama' teelsa minam hong suaksak zo hi. 

Zomite khempeuh aw, Topa phat un. 

Bang hang hiam cih leh Amah in Zomite hong laamto in minam vanglian khat hong suaksak zo hi. Zam leh dak, khuang leh sialki, phit leh liamlo tum un la, teipi leh namsau lek kawmin Ama' mai-ah tawn un. 
Vokno, akno, sumgum, paigum, ngun leh khamte sit loin gammial leh gam thak nasep na'ngin lawnkhia un la, cil kei un. India, Kawlgam, Bangldesh leh leitung bup-a om 

Zomite khempeuh aw, Topa phat un. 
Amen. 

-Rev. Khup Za Go
  
(LUNGDAMNA AW Vol.XV, No. 11; Nov. 1991 laimai 13-16 pan a kiteikhia ahi hi. Hih thu pen Mizoram ZBC Pawlpi khet "Laitai" sawm cin ni-in kum sawm sunga a kisuaksak thului sung pan-a a hoih pen hi cihna tawh pahtawina laigelhpa, Sia Rev. Khup Za Go' tungah Thuciam Thak bu pia uh hi).

INN NUPI KHATIN ZUIH DING KISAM PAWL KHAT

INN_NUPI_KHAT IN ZUIH_DING A KISAM PAWL KHAT*

Innkuan sung Nupa kikal ah, inn" nupi te zat ding a theih huai thu pawlkhat. hih dan thu te ka gelh tak ciang in pasal te a thupi sak cih dan hilo zaw a, zuih ding a kisam thu leh, a theisa a sinsa te kiang pan, a hoih te hong kihawmsawn ahi zaw hi.

Innkuan sung nupa kikal a nop theih nading in numei te tung ah a tam zaw a om hi. a hih hang in numei te in hanciam mahmah na pin, a nuam thei lo pawlkhat bel om veve hi. tua te pen pasal te kisap na zong hi kha thei hi.
Tua hi'a hih a nuai a thu te i zuih ding ding a kisam a hihi.

1.#Zihoih na suah theih na ding in kisin in.

Pasal te pen i muan ding leh i thupit sak ding pen a lungsim sungah a teng ngiat/ a sisan paizia khat hi ci in gamdang mite in paunak khat in nei hi ci uh hi. tua a hih man in na pasal pen veng le pam muhna ah, thupisak ding zahtak bawl ding. midangte muhna ah, innkuan sungah a mah om kei leh a piang theilo zah ding in pahtawi ding pen a thupi mahmah ahihi. Numei pilte in, pasalte pen bawngtal bang in zang thei uhhi. bawngtal pen hatmahmah ahih hang in a nakpheh pan in lem kha peuh le hang i deihdeih na ah ki kai thei hi. a ma thu lo thu asa lo pasal ahih leh, tua bang pasal te pen a nakpheh khau a to mahmah ahih man in, na zat siam leh nang a ding in ahoih zaw khat ahihi. ( pasal te bawng bang a zang gawp ding cih na hi lo a, pasal te pai zia gen nop na hi zaw hi.)

2.#Na kam na uk zawh ding a kisam ahihi.

Na pasal kiang ah midang te hoih loh na gengen lo ding. a Nu le Pa gensiat sak lo ding, a zi ding adang zong kik thei a, Nu le Pa pen a dang laihkik thei lo ahih lam na phawk ding ahihi. Ak taw phun bang lo ding, kamtam lo ding, phun phun ciakciak lo ding, tua bang a, a phunphun te pen, Nupa ki khen na a piangsak thu khat hi ci hi. a diakdiak in pasalte kampau dawng kik saisai cih pen nupa ki khen na a piangsak a bulpi pen ahihi ci in, american laiat siam khat in gen hi.

3.#Annhuan mehhuan dan kisin ding.

Annhuan, mehhuan dan siam ding zong a kisam mahmah a hihi, khualzitna khat peuh a neih ciang in, innkuansung a, ann le meh lunggulh a, a phawk theih nading in, annhuan dan pen kisin ding a kisam a hihi
Laibu sung pan zong kisin thei ahih man in hanciam in la theihsawm in. Pasal te gilpi uk zo le hang a pumpi uh zong ukzawkna khat a hihi. An sai khawng peuh a tutnop pian leh pen, hoih khol lo hi.

4.#Na sep khat nei ding.

Hih pen innnupi khempeuh a ding in a haksa thukhat ahihi. khasum san nading khat sepding pen thupi hi. Khasum a tawm a tam thupi masa kei, inn sungah bang mah sem lo in^ na om hun hong sawt pian tak ciang in,
na cidamna hong sukha thei hi, na ngaihsut theih na hong bei tektek ding a, damloh na hong tam tektek ding hi. bang mah sem kei le teh na thau tektek dingbhi. Na lung mawk tektek ding a hih man in, veng le pam tawh na kizom thei nawn kei ding hi. tua bang hi leh na pasal pen thupi nasa nawn kei ding a, napasal a lung a kia thei ding hi.

5.#Kizep kipuah dan siam ding.

Kizep kipuah siam ding cih ciang in, a khengval pen hoih lo leuleu hi. Nupi ka hih teh kipuah kul kei ci kei in, (muksanza khawng nuih sesa ding cihna hi lo hi.) Sam koih dan, nikten dan a ki pan hih sitset ding a kisam ahihi. Na kipuah kei leh na pasal a nawl khin khin tawh na kibang ding hi.

6.#Kidop ding thu.

Napasal paina khatpeuh a neih ciang in, ensim/ zuisim cih te pen zat loh ding a thupi khat ahihi. A hoih a kilawm ciang khat in suaktasak lel in, a mah zong a lawm agual tawh a utbang in khat veivei om nuam ding cih zong sang siam in. A hih hang in vaikhat peuhpeuh tawh hong ciah hak ding a hih leh phone tawh hong hopih ding pen vaikhak tawntung in.

7.#Nuihmai ding.

Pasal te nasem a hi a, vakna khatpeuh pan hongciah ciang in, kel khuanim mu bang den cih pen hoih het lo hi. Pasal te in bang thu hong pua, thuhoih maw thusia, cih pen thei lo hi teh. A hehsa in hong ciah bang hi leh pen namel hong muh ciang in a hehna khang tektek ding ahih man in, vaiciah ciang in nuihmai tak tawh na dawn theih ding pen kisin in. Vaiciah sim in maigum den le teh hong ciah ding sang in mundang khatpeuh a zantam ding pen lunggulh zaw hamtang ding hi. inn sungah a om ciang in suakta lo a hih man in, kong lak ah a hun beisak zaw ding hi.

8.#Sum zat dan.

Na pasal in sumzong a hih leh, a sumbawm hawmsak ngei kei in, sumzong zong napi'n a ma zon sa sum pen a khut tawh ngenkik cih pen nasa mahmah uhhi. A lawm a gual mai ah, maimial mah mah hi. Nang a ding in a kisam leh zattawm ding hong pia a hih nak a leh, sum le pai pen a ma thu in zeksak lel in. ( muh peuhpeuh a zangkhin pahpah cih te pawl bel a thu tuam khat ahihi)

9.#Muan mawh na nei masa ken.

A phone sungah number thak bang teng om / a man sungah kua man teng om, a, massage khawng peuh simsak, cih te pen zatmasak ding a hoih thu te ahihi.
Tua te in pasal te lungsim nawngkaisak zaw a, na tung ah a lungsim bei thei hi. Innkuan a ding in a muanhuai a picing pasal khat a ding in tuabang muanmawhna te pen, a lung kiat huai mah mah thu khat ahihi. Lampai kawm a, numei en cih te pawl pen pasal a kici khempeuh a kibatna pen tua mun khat bek hi ding in ka um hi. Mipil te in tua bang a pasal te in numie hoih te a muh uh ciang in a et uh pen, tuabang a et theih na ding ngaihsut na pen pasal te khuak sungah, a omsa hi a, ki kham theih hi lo hi, ci in mipil te in gen uhhi.

JOB.CINPI
Source:- Zomi laisim nuamte

MIHINGTE IN I NUNTAKNA AH A MANPHA PENDING KITELKHIAL THEI GIGE

MIHINGTE IN I NUNTAKNA AH A MANPHA PENDING KITELKHIAL THEI GIGE
---(11-11-2017 Sat)

#Hihnungaknu tangthu gelh konggelh kik hi.

1.#Vasano Hunkhat lai in ah Pasal khat in Vasa no khat tawi in a Vot mah mahna ah kiasak in akha lahpulha votsa in lah silo in hehpihuaitak in om hi.(Kepsuak zawhloh ding it kineih in kemlo ding)

2.#Bawngpi khat vapai in tua vasano khuavotsa a, sidek a ek peknelhsuk ek hi. Ahizong Vasano bawng eklum nuamsazaw in kipekpek in nuntak lawh zawsawp in lengkhiathei dek hi.(Honkhia i kineih leh anungthu ngaihsun in nusiapah loding)

3.#Sahang khat pai in tua Vasano Bawng eklak a, Awk va honkhia, lakhia in ne vetse hi.(Mi hehpih huaia om a it kineih in honkhia in anuntakna laksak ngeina hilo hi.A omna ah omsak lel ding)

#Ngaihsutding...Mihingte in Vasano bang in hong kempen a, I ngaihsutte in sihna khuk hongtun theia, Hong simmawh Ek hongpek i cihte zong i nuntakna hong hawnkhia nuamte hithei in, hong hawnkhia a i ngaihsutte hong thatnuam lua  na hizaw gige zawsawp thei cih kitel hi.

#Khatvei hong siasak, Khatvei hong honkhiatna tawh nanga ding Siapen, Hoihpen in thukhen kei in..Topa bek Mihoih,Hong honkhiapa hi.
**
Kham Lam Tuang

IH THEIH LOH KALIN EI LEH EI KISUN

I THEIHLOH KALIN EI LEH EI KISUUN!
~~~~~~~~~~~~~~~~~~~~~~
Agelh ~ Thang Do Khen

1. A daupai mikhat i hazatleh, hazatna gah atat lai ding cih na hi.
2. Mi i thanem' sakleh, thanemna mah atat lai ding cihna hi.
3. I nasepna in midangte a nawngkai' sakleh, nawngkaina mah atat lai ding cihna hi.
4. I mun, i gam hawmthawhin, i keekkeekleh, kigi leh lutang kikhek thei hi cih pen thu om sa ahi hi.
5. Mi' mun, mi' gam sunga na om muang khat i lakleh, i lak zahli thupha hong kidok hi cih i phawk dingin a hoih hi.
6. I thupha tawh mite i deep gawpleh, a sawt lo-in ei zong hong deep kik dinga, neihsa' sila i suak ding hi.
7. I kiliatsaka, i kiphatsaka, i kihauh sakleh, i mual sangpen a tungta i hi a, a kumsuk kuan ding i hita hi.
8. I ngaihsutna a hi-a, i kampauna ahizongin, khantohna lam hoi lo-in, i thum'thum'leh, thum'thum' namte in hong zuanzuan ding hi.
9. U sung, nau sung leh kiim leh paam thuphamawh i khual keileh, i gam a neu tektek ding hi.
10. Thuphanaak a kang sak thei te:-
(1) Vok-thau, bawng-thau, i kuang i keu sawp hak lua;...ganno cidam mawh ci!
(2) An hauh khawng kigim lua lel;..khawhsa kikham nawn lo ci!
(3) I vok-ek, i ak-ek teng mah namsia;...ganno khawi thei nawn lo ci!
(4) mite' hoihlohna i koko, i ciinciinleh,... ki su'n thei ci!
(5) Mite' neihsa tungah i tatsiatleh,...i neihsa in thuak thei ci!
(6) Neih leh lamh tungah i ngamh-tatleh;... i neihsa in hong teep thei ci!
(7) Gannote' tungah i ngongh-tatleh, gan khawi' thupha om lo thei ci!
(8) Annek tuidawn tawh ciamnuih i bawl' leh;...khawhsa kikham mawh ci!
(9) Ankuang, an-keu i zahlak' sakleh;...ki tuahpha mawh ci!
(10) Innkuan sung i kikhahual keileh;...daupai lo nuam ci!

#Sumbawl, vanzuak mite' a'dingin:-
(1) I kizoppih sate lungkim' sak lohna!
(2) Nathemno khat hanga hih te'l-ta'l luatna!
(3) Om mun laih kawikawi-na!
(4) A hun tawh kizui-a pilvan' lohna!
(5) Deidan tuam neihna!
(6) Citloh(ciilluat) na!
(7) Cihtak(gitnat) lohna!
(8) Thuak zawh lohna!
(9) Leiiba siik' hatna!
(10) Lawmhoih neih lohna!

#Ciin' gige dingte:-
(1) "Ei leh ei kituisa buah"
(2) "Langbawm a ek-ah awk"
(3) "Thallam cilsiat ei' tung tu"
(4) "Khaikha a gui-ah gah"
(5) "Na kampauna hong zui ding"
(6) "Zuau in a khap tawn"
(7) "Kel luphum kidawk"
(8) "Zawlgai' lo in zawlgai' koleh..."
(9) "Na vawh bangin at ding"
(10) "Thupha in kong biang kanlo; thusia in mual kua khum"

From:-Laibusaal, Cinpu Zomi

naupang la

"TAKKHEH ZOMI THASAN PHA NI"

"TAKKHEH ZOMI THASAN PHA NI"
Ih vanleng tualpi vai, district vai, minam kipawlna a omsate ka lung ngaih ciang, ka lungsung ah hong kilo zelzel thu pawlkhat om hi.

1. KALASAI HIMAWK MAW!
Airport vai thusuahna tuamtuamte..., thuman thutak ahihleh ei adingin bel deih ihihman, Kalasai poimah si ee, cihding hiphot hi. Ih Chin state ading le falam myone sung a om i mipihte adingin khantohna namkhat a kibehlap suak a hih man, lungdam huai hi. Athu in district (autonomus) vai le vanleng tual (airport) vai i deihna a tangtung nailo hiphot hi. Ih makaite zangin nikhat niteh i ngah hun om vive ding hi. Tha nem loding hihang.

" A gual zo icihte pen a guallel ngeite mah hi." I khualetui, minam khantoh nadingin a hunlapin kipawlkhawm a sepkhop siamna kisam hi. Kua tengin geelin ma hong pan ding? Khualetui mipihte lakah a hangsan i om mah bangin, namdangte lakah a hangsan le a phuthei ding, tu a i makaite zomah nungthuap makai hoih kisam to to ding hihang.

2. MAPAT SIAM KISAM:-
Khualetui minam khantoh nadingin i khuapi Tedim khuasungah ateng Zomite khempeuh banah, muntuam tuam ah a om mipite le makaite kithutuahna le kipumkhatna, mailam thuding khuamuhna le sepkhop siamna i neihsa banah pan ilakphat semsem ding ahi hi. I kipatna amun hoihin, ahun manin, a semte in citaktak in hongsep nakleh i maban uh hong hoih limci toto ding hi. I nasep uh hoih peuhleh a genthang ding mi kituh lel ding hi.

3. KHANLAWH AHUNLUA HITA:- 

Tua ahihteh 'Khangthak Zomite, Khanlawh hunta hi, Geelkhop hunta hi, Sepkhop hunta hi, Kithapiaksiam hun peuhmah ta hi. I pil i siamna, i neihsate gawmkhawm in i khuapi le minam ading i kulhpi ciang khawm ni. Kipumkhatna in thahatna hi. Eima makaihna bek suang kei ni. Lutang makai hihding bek sawm kei ni. Eima makaihna a hihkei nakleh awlmawhlo thapialo cih lungsim neinawn kei ni. Makai cihpen midangte manphatna pulakna hi a, mi demna hilo hi. Makai cihpen kumtam le tawm tawh kisailo a, veina lainatna hizaw hi. Makai cihpen midangte munpiakna le vangpiakna hi.

4. TUA A HIHCIANG

# Namneu a tangtoi lungsim pan - mipi nampi lungsim,
# Duhhop huaihamna lungsim pan - deihsakna le kipiakkhiatna lung sim,
# Ki-el kilangmuhna lungsim pan- kipumkhat kihuhnopna lungsim,
# Aipeng tuamsepnopna lungsim pan - gelkhop sepkhop hawmkhop siamna lungsim,
# Innkuan behlephung, khua le pawl lungsim pan - tangpi tangta, minambup ahuam hamphat nading lungsim,
# Hawmthawh gensiatna lungsim pan - huhna thekna le kipahtawi siamna lungsim leh
# Mimal vangdeihna le minthan nopna lungsim pan- Minam lian minam kip suah nadingin sepkhiatna tawh ma pankhop ding a hun hita hi. Ahun- ahunlua, hong tawsawn- hong makhelh dek hita hi.

5. SEPKHOP SIAMNA:-
Zomite in i geelkhop, mapankhop, sepkhop le zeekkhop siam ahun ahunlua hita hi. Mimal nasepna (private ministry) lamah a hunkhop khat i tungta hi. Mihon nasepkhopna (organizational ministry) lamah i thanem mahmah lai hi. Keima hamphatna ding omkei ci in sepkhopna lam ah i thanem mahmah hi. Mimal nasepna tawh a kuitung minam hamphatna omthei ngeilo hi. Tua ahihman kipawlkhop makaih siamna i minam sungah i phutkhaksa thu le i kisap mahmah thukhat ahi hi.

Tua hi a:-
-Thu vaihawm in i khentat leh nasepna tawh kipankhawm pah ni. - Vaipuak i kipiak leh thuneihna tawh kipia khawm pah ni.
- Matutna ineih leh lungdamkhawm in kipahtawi siam ni.
- Hamphatna i ngah leh mipite tawh nekhawm lungdam khawm ni.
- I nasepna sate enkik in, puahhuaite puah, zunhuaite zuunkhawm ni.
- I lungtupte sutkhawm in mipite lunglawpsak in, thasan khawm mualsuah khawm ni.
- I lungtup hoih in, sawtpi a kimang ding thuhoih a hihnak leh, mipite lungsim lawng(sukha) ding a, mipi ten zong a sumbawm uh hong lawng ding uh hi. Halleluijah'''.

"Zomite hanlung ciam, khangto diam".
Minam ading lainatna tawh,

Rev Cin Ngaih Thang
Grand Rapids, Michigan, USA
November 03, 2017.