CSM TUNG TOPA A HOIH HI*$$

CHARITY SIAM MINISTRIES nasep pulakna

Topa ka phat hi. Haksapi mah in kanungta a, Haksapi mahin USA ka tung hi. Topa tung ah ka thungetna in Mite ading thupha hong hisak in ci-a ka thungetna Topa in hong gual zawh pih toto hi cih ka mitin mu ka hih manin ka lungdam mahmah in Topa tung ah lungdam ka ko hi.

Mite adingin thupha hong hisak in ci-in mikhempeuh in thu ngen dingin zong ka lamen hi. Mite ading thupha hihna pen Sum lepai neihlelam ih Hauh ciangin mite tungpia zo, semzo ih hih teh Mite ading thupha akihipan, semthei pan  kihi lo hi. cih zong hong hanthawn nuam ing. Mi tampite ngaihsutna ah Ih hauhciang in mite adingin thupha a kihizo pan dingin ngaihsut thei uh hi.

Tuni in ih kiphawk sak kiknop thu in, Mite ading thupha hih ding leh Pasian nasepna ih cih pen Hauh ciang leh siam ciang bek a, Mite ading thupha, Pasian na akisem thei bek hi lo in Lungsim thu hi ci-in tuni in gen nuam ing.

Mite ading thupha pen gen leng,
@ Mihaksate ading thu nanget sak zawh zong mite ading thupha hi.
@ Mikhat in vangik pua kaikai na muh a na huhna zong mite ading thupha mah na hi hi.
@ Pau lek sak, appointment pai pih, mikhat ih hihtheih lo maw, mikhat i kitang sapna na huhpen mite ading thupha hina na higige hi.
@ Mizang khat, migenthei khat puan, nik, khedap, an, tui, leh atuam2 na huhna pen mite ading thupha ahi hi. Hih bang a na hihna khempeuh pen Pasian Nasem na hih lam phawk in. Pastor or Evangelist sep ciang bek a Pasian nasem ahipan in kingaihsun zenzen kei in. (Matt 25:1--) pan atawp dong sim le cin Pasian nasem nahihna na kitel mahmah ding hi.


Tua ahih manin kei zong USA ka tun akipan mite ading pek 1 or 2 cih bang leh na khat peuh2 ah ka huhtheih bangin ka huhna pen Pasian nasem ka hihna Topa in hong telsak semsem ahih manin CHARITY SIAM MINISTRIES cih ka pat khiat ahi hi. Pasian huhna tawh natampi kisem khin a, adiakin singkang khuhsakna pen Pasian panpihna tawh Inn thum kikhuhsak khin suak hi. Topa min thang hen! amau sang kei lungdam zaw mai ing!

Mimal khat ciatin ih pan nop leh kipangkhom thei den ahih manin tuni a pek khat bangma lo-in na zat sangin, mihaksa khat peuh in anuamtuam ding Pasian nasep na ut leh anuai ah contact theina om hi.

Contact Person: Siam Khaute (Thang Sian Siam)
                  Ph: +1 515-988-5064
         Email     : khsiampu@gmail.com

Hih anuai a pen Vaivet (Cizam) ah April, 2016 in CSM nasepna hi.

## ZOMI IN KOICHIANG HUAM HIAM?##

ZOMI IN KOICHIANG HUAM HIAM?

~Written by B Muan Ngaihte

# The Term "ZOMI" meaning ZO People or ZO MAN is derived from the Generic name "ZO" the Progenitor of the ZOMI.  - By. Sukte T.Hau Go

Zomi ichih chiang in Zo suan, Zo Tate chihna ahihi. I theihsa mahbang in Zomi te pen British Kumpi in ei hondong hetlo in amau deihdan leh Hoihsakdan in Gam thum (India, Myanmar leh Bangladesh) ah hon khenzaak.uhhi. Khenzaak a i omciang in Mituam-satuam kisakna lianpi leh ki chiziatna liantak in isung ah vaihawm hi.Huaikia leng hilo in Burma ah CHIN, India ah KUKI lehMIZO ci in mintuam ciat in hon khenzak uhhi. Huaiziak in Zomi-Zosuan in koiciang huam hiam chih hiai ah awlmawhna liantak tawh lai kahon gelh hi.

MUN-LEH-MUAL

Mun -le-mual, inten-loutenna ah denlam a i gensa mahbang in Gam thum ah khenzak in i omta uhhi.
Khenzak a i omna gam chiat uah mi-le-sa hihna nei in i khosa uhhi. India ah lomkhat i khosa ua, Bangladesh (Chitagong Hilltrack) lak ah tamkhop i khosa ua, Myanmar ah atamzawsem khosa in khenzak in i omtauhhi. Mahni omna mun ciat ah kip mahmah in Gam leh leitang humna in mahni sanggam mahmah tawh ki gamla leh ki-keelki mahmah in i om zawmah uhhi. Himahleh tuhun ciang in Pasian hehpihna tawh kikawmtuah thei in Internet tungtawn bang in kinaizaw sem a thu-le-laa kikum a kikawm tuah thei in i omta uhhi. Pasian in Abraham kiang ah "Na siikna ciangciang na gam ahi diing" acih bang in ei Zomite zong i omna mun ciangciang i gam ahi hi.

PAU-LEH-HAM

Pau-le-Ham ah zong i omna atuam dungzui in Pau tuam lawmlawm kei le zong awkaih tuamciat zek in i omta uhhi. A nai pen aa gen in Kawlgam leh India Zomi te lak ah Pau leh Haam kibang hinapi in i omna atuam ziak in akaih tuamthei aa, Pau awkaih tampi inei uhhi. Zomi te lak ah TEDIM, LOSAU, TEIZANG,DIM, KHUANO, SAIZANG, THADOU, LUSHAI, leh PAITE PAU ci in DAPZAL, BUKPI, NGENNUNG, LOUSAU, LAMZANG, VAAL , ban ah VAIPHEI, SIMTE, GANGTE, MATE, THANGKHAL, KOM, etc. etc. ci in Pau Awkaih tampi kinei hi. Hiai Pau Awkaihte pen Minam hilo hi. Ban ah Zomite in Pau Awkaih hizah ziazua ineih lak ah Pau kibanglo zekzek tampi om hi. Ahihleh ZOMI te Pau pen Bangpau hidiing hiam? Ci a buai pawlkhat om uhhi. Pawlkhatte in Zomi na hihleh Zopau (Tedim Awkaih) in pau in ci uhhi. Diklua hi... Ahangbel Tedim Pau/Awkaih pen ei aa mah hi. Himahleh, lungsim zai leh lungsim lian ineih a, I Zomi sung aa pau om khempeuh te i ZOPAU ahi ci a i saan’theih hoih sa ingh. Zomi te Pau- le-Haam a i kideidan louh uh thupi diing hi. 

Linguistics te genna ah "Pau kici pen ahun asawt dungzui in kikheng kheng thei hi..." huaiziak in, Zomite Pau in kideidan in buaikei ni, ngaklah kei lehang Pau kici hong kigawmmang lel diing hi. Naga te zong Pau kitheituah lo uh a, Meitei Pau peuh in kiho uh... Ahihhang in NAGA in kip mahmah uhhi. Ettehna khat genle hang, Unau Mizo te in Zosuan te Khempeuh "ZOFA / ZO HNAHTHLAK INNI / KANNI" cici napi in LUSHAI / DUHLIAN Pau a paulo te Mizo bang in pomlo mawk uhhi. Ei Zomi te in tuapen i ciinloh a, I Pau khempeuh Zomite pau ahi ci a i pomsiam a, i ki iit mahmah hoih diing hi. Pau kichi pen i omna atuam ciang a tuam hilel a, Innkuan khat bangleng muntuam ciat a i teen leh Pautuam ciat in kipau lel hi. Pau pen Minam hilo a, Minam pen Sisan hizaw hi.

"Dialect is not our Identity, there can be locational variation in our Dialects" hilel hi.

BEH-LEH-PHUNG

Ei Zomite pen Namdang banglo tak in Beh leh Phung nei minam te ihi uhhi. Hiaipen i thupina uh ahihi. Huaite lak ah adiak in SAILO, KHUPTONG, HAOKIP, SINGSON, HRANGCHAL, SINGSIT, HANGZO, SAMTE, NAULAK, GUITE, NGAIHTE, KHAUTE, SUANTAK, CHHAKCHUAK, TLAU, etc.etc. ci in Beh tampi inei uhhi. Hiai Beh le phung te pen Zosuan ngen kihi hi. Zomi te pen i pau- i ham in ahonkhen hang, I Beh Iphung in hon gawm hi. Huaiban ah Beh-le-Phung tawh kisai i theihkhelh sek uleh i paipih tawntung uh khat hoih kasak hetloh khat ah... Zomi te pen Beh-le-Phung nei ihi. Kikhenzaak a, Gamtuam ciat a i om uh ciang inIp Ipau Ihaam tuam in,Beh khat natawm kituam suak vek kha hi. 

BEH kici pen I Gui a hon suangtu mintam akiphuak a tampen hi. Etsakna di’n, Kou NGAIHTE te bang Zo suan Zomi nuai a Pu NGAIHTE suan le khaak te ka hi uhhi... Khanggui ka suutna uah Zo a kipan ka suut uhhi. Pu Ngaihte hunlai in NAM KE / TRIBE a kikhenna omlo hi. Himahleh bangcik a kipan hiam in TRIBE aa kikhenna hong om in SIMTE, ZOU, PAITE leh adiak in Kawlgam ah tampi ka om uhhi. Pawlkhat in NGAIHTE nahih uleh SIMTE na hi uh peuh cimawk uhhi. Ka dawnna bel Pu Ngaihte hunlai in Simte, Paite, Zou,e etc.etc. a kikhenna omlo hi. Tribe in i kikhen kha ua,i omna ciat ki hi mai hi. Huaiziak in, Zomi ihi ciat uh, ka ci hi. Baan ah, Suantak, Khaute, etc,. na hihleh Vaiphei na hi, etc. etc. I kicih a i lungsim aa hiai bang ngaihsut leh paidaan i neihpen dik hetlo hi. 

Government in Divide and Rule Policy aneih a, Tribe a ahon khenzaak pen sawt nai hetlo hi. Mikhat suan,Innku Innkuan khat Minam tuamtuam hithei cihbang omlo a, huaiziak in Behkhat Nam tuamtuam a kikhen chih bang
om theilo hi. Government in ahon khenzaak pen i na pomkha ua, mawk paihkhiak theih ahikei. Himahleh, ZOMI kahi ci a i pom a, Zomi ihihna i letsak mahmah diing thupi in ka koih hi.

THUKHITNA

Tua atung a igen suk diudeute mahbang in Zosuan- Zomite pen muntuam aa iten mahbang in min tuam leh Pautuam ngen aa omkha in i kikhenzaak uhhi. Himahleh i pu uh ZO ahihman in Zomi kihi hi.I TOPIC aa zomi IN KOICIANG HUAM HIAM icih mahbang in Pawlkat in Pau kitheituah aa Inndongta aa kivaihawm te Zomi hipah ci uhhi. Himahleh Khang tampi paisa aa khenzaak a omte ihihman in Zosuan pawlkhat in Inndongta bang nei nawnlo in Ngeina tuampi khat zui in na khosa uhhi. Zomi ichihpen Sisan ahi a, I sisan i laih theikei hi. Ban ah Pawlkhat leuleu in, Zomi kichi pen Zomi ka hi acite Zomi hi, nang Zomi hiteh, ichih a aman apomkei aa Zomi hike'ng, achihleh Zomi vachih teitei phatuamlo hi, chi uhhi. Dik naciang bel omkha ding hi. Himahleh MINAM pen Sisan aa om ahihman in Zomi kaci hi cikei in utkeita mahle uh Zosuan-Zo Sisan ahihna uh beilo hi. Tuaman in Zomi i iit a Zomi Nam i iit taktak leh Zosuante Gawmkhawm dan i siam a, iitna i neih kisam kasa hi. Zosuan khat in Zomi hi'ng, acihtheih naikei lezong i khentuam a, i tuambawllouh ding ahi hi.

Huaiban ah I Zomi Movement a akitel zo nailo, Zomi a langpang khapawl bang a omtaak lehleng amah Pau awkaih leh a omna Tribe pen gensia aa, hiaite pawl Zomi langpang cihmawk loh a,iittak aa ahihna uh kitheichian sak a, pomdan i siam poimawh hi. Nna khat peuhpeuh a gumtu a omleh a langpang om hamtang a,tuapen a thupiina ahihi. Huaiziak in, Zomite sung ah, Pau-le-Haam, Ngeina, Awkaih, Beh-le-phung, tenna mun zui aa kideidanna pen a omloh teitei diing ahihi.

"ZOMI IN TUIBANG GAWM KEILE'NG SIINGGUAL IN
NUIHCIAM LEEL DIING"

Veina leh Awlmawhna lianpi tawh

B. Muan Ngaihte Zomidiktak
Lamka,Zogam.
+918014391608

SAPTUAM/ TELTUAM

SAPTUAM/ TELTUAM

I Have Chosen you out of the world.

1Peter 2:9 Ahi zongin note pen Pasian in a hong teelkhiat minam, Kumpi siampi pawl, a siangtho minam, Pasian' mite na hi uh a, khuamial sung panin a lamdang mahmah ama khuavak sungah a hong samkhiapa' nasepna a lamdangte a genkhia dingin Pasian in a hong teel mite na hi uh hi.

But you are a chosen people, a royal priesthood, a holy nation, God's special possession, that you may declare the praises of him who called you out of darkness into his wonderful light.(NIV)

John 15:19 Hih leitung mite tawh a kipawl hi le uh cin leitung mite in amau pawlte hong it ding hi. Ahi zongin hih leitung mite lak panin note ka hong teelkhia a, amaute tawh kipawl nawnlo na hih manun a hong mudah ahi uh hi.

If you belonged to the world, it would love you as its own. As it is, you do not belong to the world, but I have chosen you out of the world. That is why the world hates you. (NIV)

Tuni in hih thulu tungtawn in Topa hong sapna lungngai khawm ni. Ei Christiante pen Lai Siangtho in Hih leitung mite lakpanin kong teltuam, kong saptuamte hi uh teh ci-in Lai Siangtho muntampi ah hong gen a atung ah ih muhtheih pak dingin nih gelh khia hi hang.

Ei Zogam (Burma) ah Pawlpi ih ci-a, Manipur ate in Saptuam ci in, Mizoram ate in Kohhran ci uh a Mansa mahmah ing. Ei Khristiante pen English in (chosen you out of the world or chosen people) ci hi. World agen nopna in leitung mite cihna hi a, Hih leitung mite lak panin kong saptuam, teltuamte cihna ahi hi. Ahih leh tuni in Saptuam dinmun, teltuam dinmun ah ih om mah hiam, Nang leh kei kisit phat ding leh thalak kikkik ding in ih deih hi.

Khristian ih nuntakna sungah Saptuam, teltuam nuntakin Leitung mite lak ah ih nuntak sungin ih nuntakziate saptuam, teltuam mite ih hitakpi mah hiam? Khuavak atangsak takpi mah ih hi hiam, ih nuntak khuasak zia ih kilamdang takpi hiam, ih nuntakzia dingtampi om a tuate lak ah tawm kikumkhawm, lungngai khawm, tha lakhawm ding hi hang!

NEK LEH DAWN
Nek le Dawn tawh kisai-in Leitung mite lak ah teltuam, saptuam Christiante ihi takpi hiam? Leitung mite tawh ih nuntak khop sungin Pasian teltuam, saptuamte ih hihna mite in hong muh ciang, hong simtheih lungdamna leh kipahna Laikhak (letter) isuah ding pen tuni-in Nang leh kei tavuan(mawhpuakna) ahi hi. (2 Kor 3:2)

Teltuam, saptuam mi, Khristiante hinapi hangin mite in hong muh teh hong simtheih lungdamna, lungnopna, kipahna ihih kei leh hih leitung mite lak panin teltuamte ih hih mah diam, Hih leitung mite lak ah ih nuntak sungin, amau tawh kibangin ih muh peuh, duhpeuh ne ziau2, dawn ziau2 in amautawh kibangin ne in dawn leng, teltuamte ih hih takpi mah diam? Eite pen tuate lak ah Khuavak atangsak ding te ihi zaw hi. 

Teltuam mite (Chosen people) ih hih bang mahin hih leitung mite tawh nek le dawn ah ih kibat teitei leh Teltuamte ih kici ngam diam? Hi lo kha thei ding hi hang!  

SIL LEH TEN

Nikten puansilh tawh kisai-in  ih (Chosen people or chosen you out of the world) cihtawh kizui in teltuam ih hih bang mahin Hih leitung mite tawh ih kibat teitei leh bel kingaihsut huai mahmah ding thu ahi hi.

Mi pawlkhatte in tuate zongin tuadan asilh ve, tuadan ateng ve, atuaci ve ci thei uh a, ken bang cidawn ka hiam cih leh Amau ek ne leh nang ne ding maw? Amau Christian hilo kha ding a nangChristian hi ve cin, Amau Hell pai le-uh zuih sawm nahiam ka cikha liang hi.

Christian ih nuntakna ah Teltuam, saptuam hitakpi ing, hih leitung mite lakpan na cih leh tuni in amaute omdan, khawldan, kizepdan, nekdan, dawndante leh adang2 zuih ding hilo zaw a, amaute tawh kibang lo-in nungta thei a, amaute’n eite gamtat hoih hong muh teh Pasian min aphat theih ding uh Khristian nang leh kei Mawhpuakna ahi hi.

Sia Dokhup in Biakinn beek Pulpit tung ah, kizepzia ding hong gen a, thupi mahmah hi. Biakinn bek hi lo-in mun khempeuh ah kizepzia, nek leh dawn, kampau akipan lungsim puakzia, hehpihna akipan na khempeuh ah Teltuam mite gamtat in ih gamtat thei ding thupi mahmah ding hi. Tua hi leh Mite in Topa hong muthei ding a, Christiante hoih si ei, Christian hih nopna hong phul in, Pasian hong phatthei ding uh hi.

Saptuam, Teltuam Khristiante ih hihna sung ah Nundan kilawm a ih om nak leh Pasian hoihna mite in hong mu semsem ding a Khuavak in anuntakna uh hong luah ding hi. Tuni in nang leh kei tavuan, mawhpuak, vaipuak ahih lam Teltuam Zomi Christian te’n theih tek in thala tek ni.

Lungdam

Siam Khaute

May21, 2016

KA PASIAN IN NA KHEMPEUH HIH THEI!****

KA PASIAN IN NA KHEMPEUH HIH THEI!

Cambodian galkap pa pen Pasian um Christian khat hi a galkap atumna ah mikiniam khiat mah2 leh Pasian asuang mahmah khat ahihi.

Nikhat a bupa captain pa in hih papen Pasian kium sak mahmah Pasian in na khempeuh hih thei ci, maizum sak ding bawlsia ding ciin ngaih sun hi.

Nikhat anautangte tawh akigualh laitak un hih mipa amai ah samkhia a motor tawh khat pia in apam vua om Motor pen vahawl in la hua zum kong lam ah va Park in ciin sawl hi.

Tua Galkap pa in Sia aw ken motor hawl thei kei ing ciin dawng a, a Captain pa in Ka Pasian in na khempeuh hih thei na cive leh ciin dawng hi.

Tua ciangin Galkap nautang pa in kapsain a Motor tawh lain tua mawtaw lam hong zuan in thunakpitak in hong ngen hi. Thu anget khit ciangin Motor sung hong luta, tawh khumin hong start a Tua Motor hawlin Bupacihna mun ah va park hi.

Apark khit ciang in lungdam takin atawh tang Captain pa pia kik a, Captain Bupa in lamdang sa mahmah hi.

Na biak Pasian pen nungta Na khempeuh hih thei takpi hi ciin, kenzong bia nuam ing Cia Tuani in mitampi tak in Pasian muh lawh hi ci hi.

Captain pa in Na mawtaw hawl park pen hong pai in ciin et pih a, a engine omlo hi, Na Pasian in na khempeuh hih thei hi na cih pen man hi. Na lah motor hawl ngei lo hi lai.

Tua ahih man in na Pasian kabia ding hi ci hi.
Na khempeuh akitang sap hun a a omlo pan omsak pa, apiang theih loh ding laitak a apiang sak thei pa, To Jesuh ih neih manin ka lungdam hi.

Eizong upna tawh nungta in isep ngam le Topa in hong sep pih hi.

Engine om lo start a ahawl sak atai sak thei pa Nang leh Kei Pasian mah ahi hi.

Umlah ken muang lah ken Topa in hih thei hi.

Lungdam

Siam Khaute

HOIHNA NAM NIH*

*HOIHNA NAM NIH*

Numei pawlkhatte in hoihna nam nih nei uh hi

1.Pua-lam hoihna (melhoihna) hi. 
Tangval pawlkhat in melhoih numeite amuh uh ciangin ngai in tua hoihna a khutsung uh atunteh.. pakpalh a kungtung pan a kilo khia... zungneilo bang in vulpak ahih man in cimtak in pai khia thei uh hi.

Bang hang cih leh numeite' melhoihna pen pasalte' khutsungah pakpalh a kungtung pan lawhkhiat bang hi a tanu/pa khat neikhin leh leh tua pakvul hi. Tua pak avulteh ahoihna om nawnlo ahihman in awlmawh nawnlo thei uh hi.

2.Sunglam hoihna (Numeite' manphatna)
Sunglamna pen puatham hoihna bei zawh teh kitel muh semsem ..kilang semsem hi. Pasal pilte in numei khat i manphatna ( a sunglam manphatna/mit a muhpak ahilo manphatna) amuh uh leh tenpih ngam uh hi. Itna muanna ngiat nei pah uh hi.

Numei khat i hoihna pen amanpha mahmah pak namtui bang hi a...ama omna a inn sung leh a veng apam ah ama namtui na kizel zo hi.
Atate a dingin zong gamluah hoih khat suak hi.
NA KHEMPEUH IN AHANG OM A...
NA KHEMPEUH IN HANG NEI HI.

Pualam hoihna tawh ki itna in vul pak ding a..
Sunglam hoihna tawh ki itna ahih leh nosuah semsem ding hi.

Ngaihbaanna pen zuaupi hithei a...melhoihna zong maimang thei hi. Ahi zong in Topa azahtak numei a phattak ahi hi.
Paunak 31:30

By: SB Khuppy

May 202016

ZOMITE KAMMAL MANPHA MAHMAH PAWLKHAT:

ZOMI TE KAMMAL MANPHA MAHMAH PAWLKHAT:

Kammal khat in mi thanem sak thei a,kammal khat in mi thalawp sak thei hi. Pasian in leitung na khempeuh akammal tawh piangsak a, Zeisu in cina adamsak atampi te kammal tawh damsak hi. Tuni in Zomi te kammal manpha deuh kazak ngei pawlkhat hong tangko nuam ing.

1. Sia Enno kammal:

Thulian te ah semkhawm bawlkhawm ni, thuneu nono te ah suahtakna kipia ni,tua hileh igualzo ding hi.

2. Bishop Felix Liankhen kammal:

Mopawi ni in video khui tampipi bei in ikizaih nuam a, kum 10 khit ciangin izaihkik nuam nawn kei hi. Zomi te kipum khat keileng eiteng mah isum ding hi.

3. Pu Cin Sian Thang kammal:

Tamvei pi tak Zomi ka it manin kolbulh khaukhih katuak ngei a, ahizongin Zomi ka itna lungtang kuamah in khaukhih thei lo hi.Ka pumpi athanem hangin ka lungtang thanem lo hi.

4.Sia .Do Kham kammal:

A guallel te lamto inla, agualzo te pahtawi in.

Asia pendingin kiging inla ahoih pendingin sem in.

5.Sia.Khual kammal:

En' Zogam puah kei leng , Pasian in Zogam puahding midang sehlo ding hi. Pasian amasa in na it nakleh Pasian in athupha hong masak ding hi. Zeisu pen i upngam naciacia hongpha thei den hi.

6. Sia Do S Mung kammal:

Pasian i itleh Pasian itte i it ding ahihi.

Pasian it ten amipih Zomi te itding hi.

7. Sia. Mungtawng kammal:

Pasian napiak atam leh Pasian hongpiak kik tawmzaw ding hi.

Leitungah nanuntakna "o" natun leh Pasian adingin gualzawhna kalthak asuak ta nahihi.

8.Sia JM paupu kammal:

Pasian kamciam i upngam leh Pasian gamciam ingah pan ding hi.

Hong lamto khutpawn imangngilh ni-ni in hong khiasuk khut sukthei khutpawn suak ding hi. Na hih lohna pipi hong kigensiat leh hilo nahih manin hehkei in,nahihna pipih hong kigensiat leh hi nahih manin hehna ding om tuanlo hi.

9.Sia Tuanno kammal:

I Khantohna dingin thuthum kisam masa pen hi, kikhel theihna; ahoihlam in demtheihna leh midang te tawh kipawlkhop theihna ahihi.

10. Sia Thawngno kammal:

Khuaizu iduh mahmah a ahizongin khuaibu i susia pahpah hi.

Khedap neilo in phungphung kei in, midangte kheneilo zong om cih phawk in.

Mipil ten damlo te hehpih a, mihai te damlo simmawh hi.

11. Pa Dai Lian Pau kammal:

Midang te hauhna kangaih sut ciangin kalung gimsemsem a, nidanga ka gentheihna sate kangaihsut ciangin tu a kadin mun pen kalungdam mahmah in ka tha honglawp sak hi.

12. Sia Kap Mang kammal:

Zeisu kiangah akitun thulian penpen sihdaan nangawn suahtakna suak thei hi. Pasian bawlsa humpi neelkai nangawn Daniel tawh kilem thei mawk hi.

13. Sia Kam Hau kammal:

Hai minte khum in lawh baih a, haipuam te thuk in lawh hat hi, Pasian thu azak te aum ngam pahpah te Haimin bang hia, a um hakte haipuam bang ahihi. Umngam lehcin Pasian in semngam ding hi.

14. Sia Do Khup kammal:

Midang te ihehpih na zahzah Pasian in eitungah hehpihna hong tungsak den hi. Pasian in khasungah laivuan hongneisak den a, ikahtoh nadingin kisin ngam kul den hi.

15. Sia Pau Lian kammal:

Midangte muhloh a Pasian na isepkhak sunsun te pen Pasian in midangte muh in ahoihna tawh hong pho laak zelzel hi. Pasian muhna ah aneupen inasep nangawn alian mahmah in hongsansak denhi.

16. Sia Kaptawng kammal:

Pasian thu amang mahmah Abraham, abiakpiakna ah atapa aitangin tuutal tawh kilaih sak napin, eite mawhna tangin sihna athuak Zeisu alaihding kuamah omnawn lo mawk hi.

Eite pen Pasian neihsa kemdingin Pasian in tanupi dinmun hongpia hi.

17.Sia Paulianmung kammal:

Pasian adingin na dang ataak semsem leh Pasian hongitna lim nasa semsem ding hi.

18. Pu Pau Lun:

Zosiam nasepna sungah kum 7 kaki hel khitteh Topa in tua nasep mah ahi, Health Department honglensak in lamdang akasa a, ka khaici tuhna mah asem kha kahihi. Lametna om ta kei leh isep khat peuhpeuh denciangin agah kimu thei hi.

19. Pau Khai:

Pasian a it mahmah te Pasian in amah ait mahmah ding geelsak den hi.

Thusia ukmahmah a thupha ngah cihbang omngeilo hi.

Motor cycle in gear aneih banging inuntakna ah akisam bangbangin igear ilaihsiam nakleh kigualzo den hi.

I pumpi ninbung kisuak sak kha pahpah a, nin pen ninbung sungah koih leng ipumpi tawldam mahmah hi.

Vantung gam hong tunpih zoding Pasian in leitungah zong hong makaih zo mahmah ding hi.

Ka zakpak leh kaphawk pak kammal manpha kasak pawlkhat hipan hi, adang mitampi omlai hi.

Thupi asa,

Sia Pau Khai.

May 142016

ZOMITE MINAM LIANIN KICIAMTEH TA!

KAWLGAM BUP CENSUS AH
ZOMITE MINAM LIANIN KICIAMTEH TA
SK. Gin Khan Pau
Census Committee, Kalaymyo

Piancil 12:2
Thupha a ngah dingin “MINAM LIAN khatin nang hong bawlin, thupha hong pia-in na min kong liansak ding hi“ a cih bangin ZOMITE MINAM LIAN i suah theih nadingin kumpi le UN thukimna hangin suakta takin ihihna (Identity) pulaka zingvai hong hawmpih ZOMITE hong ai-tuam it Pasian tungah lungdamna i ko masa hi.

1.ZOMI vai i gen teh a kimangngilh thei lo le a kinawlkhin thei lo Pu Chin Sian Thang ahi hi. Kawlgam haksat mahmah laitakin ki-mat, kihen thuak taleh ZOMI a dinpih cintenna Radio tungtawnin VOA, BBC, RFA panin ZOMI a gensak denden i Pupi hi a, ZOMI a itna gah tu’n hong tungta cileng kikhial lo dingin ka um a, Census Committee tungtawnin zahtakna i pia hi.

2.Hih Census ah simple form i ngah baih theihna Zomi Congress for Democracy (ZCD) party-te hanciamna ahih manin nakpi takin lungdamna i ko a, a kigen theih a kipan ZCD in hong makaihpahin 914 ZOMI gelhdan ding a nuai-a munte ah hong tangko uh hi.

1) 30.12.2013-Yangon TBCY ah mipi tawh holimna
2) 17.1.2014-Yangon TBCY ah GZA tawh holimna
3) 24.1.2014-Kalaymyo Galilee Biakinn ah mipi tawh holimna
4) 27.1.2014-Kalaymyo Bethel Biakinn ah Beh, Khua, Kipawlna tuamtuam tawh kikupna
5) 3.2.2014-Tamu le Nanphalong ah mipi tawh holimna
6) 20.2.2014-Zominam ni Tuithang ah khua tuamtuam tawh holimna
7) 23.3.2014-Chanthagyi le Zozang khuabup tawh thugenna hong nei uh a, Census tangkona hong pankhia ZCD ahi hi.

3.ZBCM gambup in a 7 veina GM khawmpi March 8-11, 2014 hun sungin 914 ZOMI-a gelh ding thukhensatna hong neih uh tak ciangin mipi kilungmuang tuam mahmah hi.

4.A 1 veina Census Committee ZCD, ZYA, ZOFA, MZCYF, ZBCM kipawlkhawmin 23.3.2014 ni-in ZBCM zum pan Rev. Dr. Gin Khan Khual GZA makaihna tawh kiphuankhia hi.

5.25.1.2014 TVBA-MC Khawmpi, Buangkung panin Pasian nasem khempeuh in Tamu gamsung 914 ZOMI-a gelh ding thukimna nei uh a, tua a kipanin Pasian nasemte’n tavuan hong la uh hi.

6.ZOMIBUP kipawlna lianpen a i ngaihsut GZA hi a, amau tawh semkhawm a, hong makaih dingun kilunggulh mahmah hi. 2011 GZA makai khawmpi, Singapore panin i minam min ZOMI cih ding thuzawhna om sa ahi hi.

7.GZA khawmpi, a 2 veina March 13-16, 2014 Tedim panin gambup Census hun teh 914 ZOMI-a gelh dingin thukhensatna kinei hi.

8.Hih pen Party, Biakna, Khua, Beh kipawlna tuamtuam-a’ bek hikei in, i minambup vai ahih manin ci-in , Census Committee munpi 5 ah kiphuat beh a, a omsa Kalaymyo tawh munpi 6 hong pha hi.

9.Committee omnate Cikha, Tonzang, Tedim, Kalaymyo, Tamu, Zanggam teng adingin Yangon hi-in, 16.3.2014 GZA Tedim panin a kisam ding TA kihawmkhia pahin ei’ mun ciat ah kikuankhia pah demdem hi. Hih thu hong om teh GZA GS a sem ngei Rev. Dr. Chin Do Kham in a vision 24.3.2013 ni-in ZCD zum Kalaymyo ah a gen, a sawt loin ZOMI ihihna khua kim ah gospel pai-in i gen kul ding hi, a cih ka phawk a, hih bang vision a nei makai hoih kimangngilh thei lo hi.

10.A thu le thatang bek tawh septheih hi lo a, sumlepai kisam ahih manin sum hong sik a diakin tuipi gal-a om ZOMI khempeuh tungah i minambup in lungdamna i ko hi.

11.Census vai-in Committee-te’n i mun ciat ah pan i lak bek tham loin Kipawlna, Khua, Beh, Biakna tuamtuam i pankhop manin 90% bang lawhcinna a ngah ihi hi.

12.Hih vai-in leitungbupa om ZOMI khempeuh ma kipangciat a, minam khat vive mah kideihsak luatna hangin mun tampi tak ah kitot kiselna hong om kawikawi hi. Bang hang hiam cihleh vai thupi, na lianpi a pian ding teh ze-etna a om gige den ahi hi. ZOMI zong minam lian khat pian nading thu ahih manin buaina a om ding mah ahi hi. Ahi zongin tu’n veilua kisa-in Moses bangin i kithat liang zongin a khiatna om nawn loin ahun hong beita hi. Asuk, ato ah an ngawl liangin a sem zong ki-om a, inn ah tu hithiat kawmsa-in a langpang zong ki-om veve hi. Kuamapeuh khasiatna, hehna, thangpaihnate kimaisak in, maban ah i pankhop ding thupi mahmah ding hi.

13.Hih Census vai-in minambup in 914 ZOMI ah gelh ding cih thukimna om taleh pawlkhat in ei Code, eima nambat, ei kampau, ei beh, ei khua, ei biakna, ei bawng teng ci a, ZOMI hinapi in, a makaite’n i taipihkhak i tu, i tate’n hun khat ciangin hong mawhsak hun om dingin ka lamen hi. Hih mawhsakna a omloh nadingin i maban ah ZOMIte’n vai thupi i neihkik hun ciangin, ei beh, ei kipawlna guak ci nawn loin i mipite tawh kipawlkhop ding hanciam ni. Kawlte paunak in “Bawnga hon lak pan tangtat leh sahang in pet“ a cih bangin kuamah tangpek loin minam vai ah kigawm sawm ding hi hang.

14.914 ZOMI vai-in leitungbup mi khempeuh i siam tawpin ma kipang ciat napi-in, a sem le a makaih ding a kilawm makai pawlkhat, Census Committee in kimukha hetlo ahih manin i siamna, i panlakna tawm khanin i ZOMIte ading hong hanciam dingun kilunggulh hi. Midangte ading bekin i hun beisak kei ni, ci-in GZA Census Committee in deihsakna tawh kong hanthawn uh hi.

15.GZA makaite pen biakna zui-in Siampi vive ahih manun i zuih diamdiam theih leh i minam minthang dinga, i lehpan leh eile-ei a kilehpan ihi ding hi. Pawlkhat in hawmthawh bawlin kei thu hong kidong kei ci-a, a langpang khat le nih ki-om hi. Kei muhna ah tu’n makai le thudot-a nang hong kineih nai keileh mipi in hong muang nailo ahih manin mipi’ muan dingin i kipuahphat ding thupi mahmah ding hi. Tua hileh mipi in a kik teh thu hong dong ta ding uh hi.

16.Tutung bang a, Kawlgam mi kisimna man taktak hong om, a khat veina hi a, ZOMI a it le a it lo kitel mahmah ta ihih manin tu-a kipan ZOMIte in makai hoih i neih hong kipan ta ding hi. Bang hang hiam cihleh i minam, i biakna, i hausa upa dingte ZOMI a it vive teel ta ding ihih manin i minam sung hong nuam mahmah ta ding hi.

ZOMITE MABAN LIMCI LUA (VISION)
1)Census lai mah bangin Pasian nasemte le Minambup pangkhawm tading hi hang.
2) A sawt loin Zomite Minam lianin Topa’n hong kipsak ding hi.
3)Zomite’n a tuamin State i ngah ding a, Gunkhawm tungsiah Kumpi tungah i ngen ding a, i gam hong hi ta ding hi.
4)Zomite mah in Zogam Kumpi i sem ding a, gam tuamtuam Kumpite tawh zingvai kihawmkhawm ta ding hi.
5) Zomite gamh Gullu mualpi, Zomi company-te’n i to ding a, Zogam ah Dollar bekbek kizek ziahziah ta ding hi.
6)Mawtaw line tai khempeuh tungah Zogam Bus bekbek kigelh dinga, Kawlgambup i kimvel ding hi.
7) Zomite’n Vanleng i lei tading a, Zogam Air Line ci-in Puandum, Puanlaisan le Vaphual tawh i zem dinga, leitung i kimkot ta ding hi.
8) Thangmual dungah Neino Vanleng tual (Neino Airport) kibawl ding a, a kiim-ah Cing Khup le Ngam Bawm-te tawlngakna Hotel i lam zihziah ding hi.
9) A mualdawn sangpen ah Peng Lam Cinema Hall i lam ding a, Zomi Film i et kawmin Census vai i gimna khempeuh hong bei ta ding hi.
10. Tua hun ciangin ZOMI a ut lo a langpang i om nawn kei ding a, i minambup i pangkhawm dinga, Vaphualte’n Zogam zuanin hong ciah diamdiam ta ding hi.
11)I lamet-et “Eden Huan thak i Zogam Nuam” ci-a la-a i saksak, a taktak hong hita ding hi.

Hih khempeuh hong pian theih nading pen 2014 March 29 - April 10, 2014 Census vai a, asuk ato ah gilkial dangtak i thuaklawhna, sumlepai neilo pipi-a i piakkhiatnate a gah hong hi ding hi. Hih hangin sumlepai, thalengal a zang khempeuh leitungbupa om ZOMIte i tu le tate’n i Pu i Pate vaihawmsa ci-in Pasian itna nuai-ah zingvai a hawm theih nadingun tangthu a gelhgelh ihi hi.
Hih lai a sim khempeuh in mailam muhkholhna (vision) tawh sim ciat ni.

ZYA Tin Jubilee Magazine Article 19 Na

By:ZYA

May 13,2016

A GUALZOTE IH CIH Mi PEN:

A GUALZOTE IH CIH Mi PEN:

1. Pasian tawh a kalsuan khawnden mi.

2. A tupna sepna ah hangsan leh citak tak a, kalsuan asem mi

3. Tangval nungak lai ahih leh tupna ngimna, sepna bawlna ah Nu le pa sanggamten a tawsawn back up mi.

4. Zinei pasal nei sa ahih leh Azi/pasal tate in lungkiatna ding lam hilo in gualzawh theih na dingin tawsawn backup mi hihamtang hi.

Migual zo atam zawte pen innkuanpihte sum leh pai ahi zongin, thu leh la ahi zongin, support  thapiakna hiham tang hi.

May 1016

Siam Khaute

NUPA KAL KI-IT KINGAI SEMSEM LAWMTA BAT NANG

NUPA KAL KI-IT KINGAIH SEMSEM NANG LEH LAWMTA BAT NANG

Hihtawh kisai in Nupa ki-it in kingaih semsem na ding muhdan khat gelh pak ni.

Gentehna: Inn ih tun teh Ui or Zawhmeng in hong na dawn ih tutna ah hong kitat in a mei hong pek leklek leh kihawl khia lo in kizut in hong maingap uh a, Ganhing ahih hangin ki-it semsem in kipakta kiphawk, in kikhual in mihing leh ganhing ki-itna leh kikhualna hong om semsem hi.

Tuadan lian mah in Nupa ih cihpen Zite in Pasalte kiang ah kinel or kingeksak dan phial a Va kinel vakitat ciphial ding maw a om theih ding pen thupi mahmah in ki-itna , kingaihna khang semsem sak in mu ing.

Nupa pen kinel mel lo kiho mello, kiciamnuih ngei mello in ih om ciangin Ki-it lo ih hih loh hangin kinel , kimai ngap leh kikhualna tawm mawk hi.

Tua ahih teh Om gemgam or sanggam bangin kisap ciang bek kiho lo in, nupa te pen Khangno in Uhamta leng Kinel kitat, kihopih sipsip ding pen thupi mahmah in mu ing.

Ui leh Meng ih gen bangin Numeite Pasalte kiang hong kinel mahmah leh Ki-itna khang, kikhualna khang, kilawmtatna khang in kicimtak cih om ngeilo hi.

Numeite Pasal kiang hong kinel kitat phat loh ciang kihehsak hilo napin kiitna kikhualna kihehpihna kilunglutna tawm thei hi.

Tua ahih teh Khangno in uhamta leng ihpasalte kiang ah kinel in ciamnuih gen, kimawlin huntam ih lak khoppih leh nupa kalpen nuamlo thei lo, kiit kikhuallo theilo in, lawmta bangin kigamta kiho thei, kimawl khawm thei ding a Nupa nang tawh hih mah leitung ah nuampen hi cih Napasal in genngamlo in Feel nuamsa mahmah ding a nisim nuntak zia nuam mahmah ding hi.

Numeite mahin na khat peuh2 zo a pasal om gemgam lo in ih kinelsiam ding Innkuan nuam ding ih ut leh cih kigen hi hang, share le cin khat peuh in phat tuam puh ding hi.

Pasalte gilo samlo a nupite na kinel loh man hi. Lim a ih muh bangin na lawm va nozel le cin a lungkham, asinkham, agim atawl dam zel ding hi.

Lungdam
Siam Khaute
April 82016

A GUALZO NUNTAKNA NGAH THEIHNA DINGIN:

A GUALZO NUNTAKNA NGAH THEIHNA DINGIN:

1. Anungta Pasian tawh kizom den ding.

2. Midangte lungdamna ah lungdampih zo ding.

3. Thusia mun ah kidiah lo ding.

4. Sepna khat peuhpeuh ah kipumpiak zoding.

5. I dinmun ah lungdam thei in mainawt thei ding.

6. Hamsatna pen gualzawhna kahlei ahih lam phawk ding.

7. Thuhoih khat peuhpeuh thupi sim thei ding.

8. Gualzawhna pen Pasian tungah ko siam ding.

9. Ineih zahzah tawh kipan khia ngam ding.

10. Isepna peuhpeuh ah Lungsim khempeuh tawh sem ding.

11. Ei sangin apilzaw , ahauzaw, asiamzaw te langpan lo ding.

12. I tunga hong kipia tavuan te thalawp takin mainawt pih ding.

13. Khasia pahpah lo ding.

14. Midang khat phatnuam lua kisa in midang khat gensia phot lo ding.

15.Vision kician leh ahoih nei den ding.

16. Pahtawina ingah teh midang te hawmsawn thei ding.

May 9.

Sia Pau Khai

PA IN A TATE' TUNGAH A THUHILHNA

PA IN A TATE' TUNGAH A THUHILHNA

• Na nu khasiatna dingin, gamta, kampau kei in la, na nu simmawh kha kei in.
• Na nu' hong itna na thukkik zo kei zongin, na nu' hong itna a mawkna suaksak ngei kei in.
• Na nu' ading tanu/tapa hoih khat na suah zawhna ding hanciam den in.
• Na zi'/pasal' hangin na nu mudah ngei kei in.
• Nang nu' na it mah bangin na zi/pasal nu it zawh sawm in.
• Na nu' deih loh, na nu' phal loh khat peuhpeuh sem/bawl kha kei in.
• Na nu pen, nute' ni leh ni thupite bekah a pahtawi leh a it hi loin, a tawntungin pahtawi-in, it zawh sawm den in.
• Na nu na lungkim/lungdam sak zahzah ama thupha ngah ding hi teh cih phawk gige in.
• Na nu' na khasiatsak zahzah hamsiatna ngah ding cih phawk in.
• Na nu' tungah Pasian in thupha tampi tak hong koihsak cih phawk den in.
• Midang ten bangbangin na nu hong gensiat sak ta leh nang adingin na nu zah-a a hoih kuama dang om tuan lo cih phawk in.
• Na nu' lametna leh ama lungmuan'na in nang bekmah na hih lamtak phawk in.
• Na nu' adingin na khatpeuhpeuh hih/sep sak ding thasial kha kei in.
• Na nu' tungah itna lak tawntung in la, thupha ngen zelzel ing.
• Na nu pen pilna, siamna a neih loh hangin nang adingin leitungah a zahtakhuai pen ahi hi.
• Na nu' deih khempeuh na pia zo kei zongin na nu' kisap bangbang a pia zo ngiat dingin hanciam den in.
• Na nu in hong dampih lai ahih leh a damsak Pasian' tungah lungdam ko khial kei in la, sawtpi tak mah hong cidam pihin, a khansau theihna ding thungetsak den in.
• Na nu in a kimu thei kipahtawinate sangin a kimu thei lo nangma itna lungtang deih zaw hi cih phawk den in.

# A nu simmawh in,a khasiasak mite in leitung thupha a ngah loh banah khansauna ciam kha lo ding uh a, a nu it in, a lungkim/lungdam sak mite in ahih leh leitung thuphate leh khansaunate ngah ding uh hi.

-David Tuang