ZOMITE MINAM LIANIN KICIAMTEH TA!

KAWLGAM BUP CENSUS AH
ZOMITE MINAM LIANIN KICIAMTEH TA
SK. Gin Khan Pau
Census Committee, Kalaymyo

Piancil 12:2
Thupha a ngah dingin “MINAM LIAN khatin nang hong bawlin, thupha hong pia-in na min kong liansak ding hi“ a cih bangin ZOMITE MINAM LIAN i suah theih nadingin kumpi le UN thukimna hangin suakta takin ihihna (Identity) pulaka zingvai hong hawmpih ZOMITE hong ai-tuam it Pasian tungah lungdamna i ko masa hi.

1.ZOMI vai i gen teh a kimangngilh thei lo le a kinawlkhin thei lo Pu Chin Sian Thang ahi hi. Kawlgam haksat mahmah laitakin ki-mat, kihen thuak taleh ZOMI a dinpih cintenna Radio tungtawnin VOA, BBC, RFA panin ZOMI a gensak denden i Pupi hi a, ZOMI a itna gah tu’n hong tungta cileng kikhial lo dingin ka um a, Census Committee tungtawnin zahtakna i pia hi.

2.Hih Census ah simple form i ngah baih theihna Zomi Congress for Democracy (ZCD) party-te hanciamna ahih manin nakpi takin lungdamna i ko a, a kigen theih a kipan ZCD in hong makaihpahin 914 ZOMI gelhdan ding a nuai-a munte ah hong tangko uh hi.

1) 30.12.2013-Yangon TBCY ah mipi tawh holimna
2) 17.1.2014-Yangon TBCY ah GZA tawh holimna
3) 24.1.2014-Kalaymyo Galilee Biakinn ah mipi tawh holimna
4) 27.1.2014-Kalaymyo Bethel Biakinn ah Beh, Khua, Kipawlna tuamtuam tawh kikupna
5) 3.2.2014-Tamu le Nanphalong ah mipi tawh holimna
6) 20.2.2014-Zominam ni Tuithang ah khua tuamtuam tawh holimna
7) 23.3.2014-Chanthagyi le Zozang khuabup tawh thugenna hong nei uh a, Census tangkona hong pankhia ZCD ahi hi.

3.ZBCM gambup in a 7 veina GM khawmpi March 8-11, 2014 hun sungin 914 ZOMI-a gelh ding thukhensatna hong neih uh tak ciangin mipi kilungmuang tuam mahmah hi.

4.A 1 veina Census Committee ZCD, ZYA, ZOFA, MZCYF, ZBCM kipawlkhawmin 23.3.2014 ni-in ZBCM zum pan Rev. Dr. Gin Khan Khual GZA makaihna tawh kiphuankhia hi.

5.25.1.2014 TVBA-MC Khawmpi, Buangkung panin Pasian nasem khempeuh in Tamu gamsung 914 ZOMI-a gelh ding thukimna nei uh a, tua a kipanin Pasian nasemte’n tavuan hong la uh hi.

6.ZOMIBUP kipawlna lianpen a i ngaihsut GZA hi a, amau tawh semkhawm a, hong makaih dingun kilunggulh mahmah hi. 2011 GZA makai khawmpi, Singapore panin i minam min ZOMI cih ding thuzawhna om sa ahi hi.

7.GZA khawmpi, a 2 veina March 13-16, 2014 Tedim panin gambup Census hun teh 914 ZOMI-a gelh dingin thukhensatna kinei hi.

8.Hih pen Party, Biakna, Khua, Beh kipawlna tuamtuam-a’ bek hikei in, i minambup vai ahih manin ci-in , Census Committee munpi 5 ah kiphuat beh a, a omsa Kalaymyo tawh munpi 6 hong pha hi.

9.Committee omnate Cikha, Tonzang, Tedim, Kalaymyo, Tamu, Zanggam teng adingin Yangon hi-in, 16.3.2014 GZA Tedim panin a kisam ding TA kihawmkhia pahin ei’ mun ciat ah kikuankhia pah demdem hi. Hih thu hong om teh GZA GS a sem ngei Rev. Dr. Chin Do Kham in a vision 24.3.2013 ni-in ZCD zum Kalaymyo ah a gen, a sawt loin ZOMI ihihna khua kim ah gospel pai-in i gen kul ding hi, a cih ka phawk a, hih bang vision a nei makai hoih kimangngilh thei lo hi.

10.A thu le thatang bek tawh septheih hi lo a, sumlepai kisam ahih manin sum hong sik a diakin tuipi gal-a om ZOMI khempeuh tungah i minambup in lungdamna i ko hi.

11.Census vai-in Committee-te’n i mun ciat ah pan i lak bek tham loin Kipawlna, Khua, Beh, Biakna tuamtuam i pankhop manin 90% bang lawhcinna a ngah ihi hi.

12.Hih vai-in leitungbupa om ZOMI khempeuh ma kipangciat a, minam khat vive mah kideihsak luatna hangin mun tampi tak ah kitot kiselna hong om kawikawi hi. Bang hang hiam cihleh vai thupi, na lianpi a pian ding teh ze-etna a om gige den ahi hi. ZOMI zong minam lian khat pian nading thu ahih manin buaina a om ding mah ahi hi. Ahi zongin tu’n veilua kisa-in Moses bangin i kithat liang zongin a khiatna om nawn loin ahun hong beita hi. Asuk, ato ah an ngawl liangin a sem zong ki-om a, inn ah tu hithiat kawmsa-in a langpang zong ki-om veve hi. Kuamapeuh khasiatna, hehna, thangpaihnate kimaisak in, maban ah i pankhop ding thupi mahmah ding hi.

13.Hih Census vai-in minambup in 914 ZOMI ah gelh ding cih thukimna om taleh pawlkhat in ei Code, eima nambat, ei kampau, ei beh, ei khua, ei biakna, ei bawng teng ci a, ZOMI hinapi in, a makaite’n i taipihkhak i tu, i tate’n hun khat ciangin hong mawhsak hun om dingin ka lamen hi. Hih mawhsakna a omloh nadingin i maban ah ZOMIte’n vai thupi i neihkik hun ciangin, ei beh, ei kipawlna guak ci nawn loin i mipite tawh kipawlkhop ding hanciam ni. Kawlte paunak in “Bawnga hon lak pan tangtat leh sahang in pet“ a cih bangin kuamah tangpek loin minam vai ah kigawm sawm ding hi hang.

14.914 ZOMI vai-in leitungbup mi khempeuh i siam tawpin ma kipang ciat napi-in, a sem le a makaih ding a kilawm makai pawlkhat, Census Committee in kimukha hetlo ahih manin i siamna, i panlakna tawm khanin i ZOMIte ading hong hanciam dingun kilunggulh hi. Midangte ading bekin i hun beisak kei ni, ci-in GZA Census Committee in deihsakna tawh kong hanthawn uh hi.

15.GZA makaite pen biakna zui-in Siampi vive ahih manun i zuih diamdiam theih leh i minam minthang dinga, i lehpan leh eile-ei a kilehpan ihi ding hi. Pawlkhat in hawmthawh bawlin kei thu hong kidong kei ci-a, a langpang khat le nih ki-om hi. Kei muhna ah tu’n makai le thudot-a nang hong kineih nai keileh mipi in hong muang nailo ahih manin mipi’ muan dingin i kipuahphat ding thupi mahmah ding hi. Tua hileh mipi in a kik teh thu hong dong ta ding uh hi.

16.Tutung bang a, Kawlgam mi kisimna man taktak hong om, a khat veina hi a, ZOMI a it le a it lo kitel mahmah ta ihih manin tu-a kipan ZOMIte in makai hoih i neih hong kipan ta ding hi. Bang hang hiam cihleh i minam, i biakna, i hausa upa dingte ZOMI a it vive teel ta ding ihih manin i minam sung hong nuam mahmah ta ding hi.

ZOMITE MABAN LIMCI LUA (VISION)
1)Census lai mah bangin Pasian nasemte le Minambup pangkhawm tading hi hang.
2) A sawt loin Zomite Minam lianin Topa’n hong kipsak ding hi.
3)Zomite’n a tuamin State i ngah ding a, Gunkhawm tungsiah Kumpi tungah i ngen ding a, i gam hong hi ta ding hi.
4)Zomite mah in Zogam Kumpi i sem ding a, gam tuamtuam Kumpite tawh zingvai kihawmkhawm ta ding hi.
5) Zomite gamh Gullu mualpi, Zomi company-te’n i to ding a, Zogam ah Dollar bekbek kizek ziahziah ta ding hi.
6)Mawtaw line tai khempeuh tungah Zogam Bus bekbek kigelh dinga, Kawlgambup i kimvel ding hi.
7) Zomite’n Vanleng i lei tading a, Zogam Air Line ci-in Puandum, Puanlaisan le Vaphual tawh i zem dinga, leitung i kimkot ta ding hi.
8) Thangmual dungah Neino Vanleng tual (Neino Airport) kibawl ding a, a kiim-ah Cing Khup le Ngam Bawm-te tawlngakna Hotel i lam zihziah ding hi.
9) A mualdawn sangpen ah Peng Lam Cinema Hall i lam ding a, Zomi Film i et kawmin Census vai i gimna khempeuh hong bei ta ding hi.
10. Tua hun ciangin ZOMI a ut lo a langpang i om nawn kei ding a, i minambup i pangkhawm dinga, Vaphualte’n Zogam zuanin hong ciah diamdiam ta ding hi.
11)I lamet-et “Eden Huan thak i Zogam Nuam” ci-a la-a i saksak, a taktak hong hita ding hi.

Hih khempeuh hong pian theih nading pen 2014 March 29 - April 10, 2014 Census vai a, asuk ato ah gilkial dangtak i thuaklawhna, sumlepai neilo pipi-a i piakkhiatnate a gah hong hi ding hi. Hih hangin sumlepai, thalengal a zang khempeuh leitungbupa om ZOMIte i tu le tate’n i Pu i Pate vaihawmsa ci-in Pasian itna nuai-ah zingvai a hawm theih nadingun tangthu a gelhgelh ihi hi.
Hih lai a sim khempeuh in mailam muhkholhna (vision) tawh sim ciat ni.

ZYA Tin Jubilee Magazine Article 19 Na

By:ZYA

May 13,2016