Tuiphum Pawlpi Tumdangna leh thupomte: (Baptist Distinctives)
Pawlpi dangte in amau’ aituam thupom a neih ciat bangun Tuiphumte in zong upzia le thupom nei hi. Hih munah Tuiphum tumdang thupomziate ci-in a thutom in en ding hihang.
(1) Thu-upna le thuzuihna ah Lai Siangtho bekmah a bulpi hi
(Sole Authority of Scripture for Faith and Practice)
Lai Siangtho Sangin pawlpi’ ngeina le tatziate thupisak zawkna hang ahi zongin, Lai Siangtho’ thu laigil Sangin a kammal thupitsak zawkna hang ahi zongin hih tumdang upna hong piangkhia hi. Tuiphumte in minam’ tatzia le ngeina leh pawlpi’ ngeina le tatziate peuhmah upna lamlak bangin zangin kalsuan lo hi. Tuiphumte in Lai Siangtho pen Pasian’ humuap ahih bangin Pasian in a mi siangthote zangin a gelhsak thubu hi ci-in sang hi. Tua ahih manin Lai Siangtho in thu-ummite’ kha nuntak nadingin thuman thutak hong lak Pasian’ kammal hi cihleh hih thuman upna um ihih manin Lai Siangtho pen thu-upna le thuzuihna ah a kicing Pasian’ kammal hi a, vangliatna le thuneihna nei hi ci-in um hi (2Tim. 3:16-17; 2Pet. 1:20-21; Isa. 8:20).
Lai Siangtho pen Pasian’ lampan mihingte tawh hong kizopna hi a, Pasian’ lungsim, Pasian’ deihna hong hilh laibu hi. Lai Siangtho simna tawh Pasian’ deihna kithei thei ahih manin zong Pasian’ thu, Pasian’ kammal a kici hi. Tua hangin Tuiphumte in zong thu-upna le thuzuihna ah thunei bulpi munah a koih uh ahi hi.
Tua banah Tuiphumte in Lai Siangtho pen Pasian’ humuap hi cihna ah Lai Siangtho sunga a laimal-te khempeuh cihna sangin a laimal tungtawn a hong lakkhia Pasian’ deihna cihnopna hizaw hi. Tuiphumte in Lai Siangtho pen a bulpi in a sanna uh pen tua Lai Siangtho ii nungah Khrih omin tua a sunga kigelh khempeuh pen Khrih’ lungsim le Khrih’ deihna thute bekbek a lakkhia, lam khatin gen lehang Khrih’ thu teci panna hi, ci-in a up man uh ahi hi (Johan 5:39-40). Tua bangin a upna uh in Khrih a bulphuh hi pah uh a, Khrih bek ukna nei Topa ahihna (the absolute Lordship of Jesus Christ) tungah a bupin kinga hi pah ahi hi.
Pasian’ thu pen ama tungah i khialh loh nadingin (La. 119:11), gamtat siangtho neih nading (La. 119:9), a pilzaw in hong bawl nading (La. 119:98), i nuntak den nading (119:93), i kisiatcip loh nading (119:92), thu theihtelna ngah nading (119:104), a manlo lampi khempeuh i mudah theih nading (119:104b), midangte’ nuihsanna le siamnate panin suaktakna ngah nading (119:22), Pasian’ lampite mitsuan den theih nading (119:15), thupha ngah mi hih theih nading i (119:2), lungnopna ngah nading (Lk. 2:29) in a kisam ahi hi. Pasian’ thu pen thuman ahi bek tham loin hong siangthosak thei hi (Jn. 17:17). Pasian’ thu in Pasian’ mite cingtaaksak hi (2Tim. 3:16-17). Pasian’ thu in nuntakna pia thei hi (Jn. 6:63; 14:6). Pasian’ thu in hong siangthosak hi (Efe. 5:27; Jn. 3:5). Pasian’ thu in khuavak hi a, khuavak hong pia hi (Late 119:105; Jn. 8:12; 2 Pet. 1:19). Pasian’ thu pen kha an hi (Matt. 4:4; 1 Pet. 2:2). Pasian’ thu pen khaici hi (Lk. 8:11; Late 1:3; 2Kor. 9:10). Pasian’ thu pen Kha Siangtho namsau hi (Efe. 6:17; Heb. 4:12; Lk. 4:1-14).
Lai Siangtho pen Pasian’ kammal le Ama’ thu ahih manin eite in thungetna tawh limtak simin, thuaktak kantel ding kisam hi. Tua hileh bek Lai Siangtho sunga Pasian’ deihna kitel thei pan dinga, kha thahatna, kha thuthuk kitel semsem ding hi. Mihingte’ tatzia leh ngeinate, Pawlpi’ tatzia leh ngeinate in mihing’ theihna le ngeina bulphuh ahih manin Pasian tawh thuktak kizopna hong pia thei lo a, ahi zongin Pasian’ thu ahi Lai Siangtho tawh kalsuanna bekin kha lamah thuman thutak hong telsak ahih manin Tuiphumte in Lai Siangtho bekmah thu-upna leh thuzuihna ah a thunei pen, a bulpi pen a ci-in a um uh ahi hi.
(2) Thu-ummite bek Tui Sungah Kiphum Ding hi
(Believers’ Baptism by Immersion)
Jesuh um lo napi’n ngeina bang ahi zongin, kum cing kisa ahi zongin, pawlpi sungah hamphatna ngah nopna hang ahi zongin tui kipum ngeingai ahih manin hih thupom a kiphuangkhia ahi hi. Hih tui kiphumna tawh kisai-in Judah mite sungah tatzia pawlkhat om khin hi.
(1) Judah mite’ tui kiphumna: hih pen a puatham sianthona limlakna hi a, a nunung ciangin gamtat luhek sianthosakna lakna hi (Siam.15:5-6; 16:4, 26:28; Pai. 30:19-20).
(2) Biakna Pawl laihna: Gentail mite in Judah minam sungah a lut nop uh leh pasal vun-atna, biakpiakna leh tui kiphumna tawh biakna leh minam adang khat ah kilaih uh hi (Herbert Danby, The Mishnah, 1933, pp-148-431).
(3) Johan ii tuiphumna: Hih pen mawhna kisikkikna tawh kisai tui kiphumna hi a, mite leh Pasian kizopna ah a kisam masa pen hi (Mk. 1:4; Lk. 3:3-6).
(4) Jesuh’ tui kiphumna: Hih pen mawhmaisakna lahna hi (Matt. 3:13-15; Mk. 1:9; Lk. 3:21-22).
Jesuh Khrih pen mawhna pan hong tankhia Honpa le Topa in umin Tuiphum thupom bulpite a tel sitset-te bek tuiphumna nei ding hi. Tui sungah kiphumna pen Pa, Ta, Kha Siangtho ahi Thumgawm Khat Pasian kici a nungta Pasian a um a sangte hi dinga, Pa, Ta, Kha Siangtho min mah tawh tui sungah kiphumna ahi hi. Tua mah bangin Jesuh Khrih ii singlamteh tungah a sihna, kivuina leh a thawhkikna thu a um ahih bangin a diakdiakin Jesuh’ sihna pan a thawhkikna upna hangin eite in nuntakna thak ngah hi cih upna zong ahi hi (Rom. 6:1-4).
Tua bangin upna a neite in kha thu tawh kisai-in amah le amah a ngaihsun tawm thei hi dinga, ama ngaihsutna leh khensatna tawh tui a kiphumte bek pawlpi sungah min kikhum ding hi. A langkhat ah kumcing ahihna tawh tuiphumna, kiteen nop manin tui kiphumna, midangte’ hahsawlna hangin tui kiphumna, pawlpi’ hamphatna deih manin tui kiphumna cih Lai Siangtho tawh kilehbulh tuiphumna peuhmah pawlpi makaite in sepkhak loh ding thupi hi. Jesuh Khrih pen Honpa leh Topa in umin sang ngiat a, a nuntakna uh Khrih sungah a kikhel taktakte bek tui sungah phum ding ahi hi.
(3) A kikhelte bek pawlpi mi suak thei hi
(Regenerated Church Membership)
Pawlpi’ tangthu sungah lungsim kikhel lo mi tampi in pawlpi misuak khin ngei uh ahih manin hih thupom kiphuangkhia ahi hi. Pawlpi’ tangthu sungah Khristian biakna pen gambup biakna in a kikipsak hun a kipanin Jesuh a um lote nangawnte in hamphat ngah nop manin pawlpi sung lut uh ahih manin pawlpi sungah a kisam lo buaina tampi piangngei khin ahi hi.
Leitung a om biakna dangte leh Khristian biakna a kilamdanna pen Khristian biakna ahihleh ngeina khat ahih keileh thukhun khat a zuizui-te hi loin sihna pan a thokik ahi Jesuh Khrih tawh mimal ngiat in kithei in kilawmtatna neihna biakna ahi hi. Tua bangin Jesuh Khrih tawh mimal ngiat in kilawmtatna neih theih nadingin a mimal mahmah in lungsim khensat tawm theihna nei a, a taktakin zong mimal khensatna tawh a lungsim a kikhel taktakte bekin pawlpi sungah pawl mi suak thei ding hi ci-in Tuiphumte in sang uh hi.
Pawlpi pen mihingte tawh kipawlkhopna tawh a kilam hangin mihingte’ neih pawlpi hi loin Pasian neihsa kipawlna, Pasian mahmahin a phuatkhiat masak pawlpi ahih bangin (Matt. 16:18), Jesuh Khrih pen mimal ii Honpa in sanga, lungsim kikhelna taktak a neite ii kipawlkhopna tawh pawlpi hong kipankhia ahi hi. Pawlpi in Pasian’ gam ading limpha (Model) bangin a dinkip tavuan a nei hi a, Pasian gam kiphut theih nadingin vanzat a suah theih nading leh tua Pasian gam pen koi dan hi ding cih mi khempeuh in a teltheih nadingin etteh huai in limpha lak ding ahi hi. Tua bangin a lian mahmah tavuan a semzo dingin zong pawlpi pen Jesuh Khrih pen Honpa le Topa in umin kikhelna taktak nei a, Khrih sungah mithak a suak thu-ummite tawh kipawl gige ding a thupi ahi hi.
(4) Thu-um khempeuh siampiza ngah hi
(Priesthood of All Believers)
Siampi cih pen thu-ummite leh Pasian kikal a kizomsak ding tavuan a semte ahi hi. Jesuh Khrih in tua siampiza luahkhin ahih manin thu-ummite in Khrih tungtawnin Pasian tawh direct in kizom theita ahi hi. Tua bangin kizop theihna pen thu-ummite’ hamphatna hi. Thu-ummite’ hamphatnate pen:
(1) Lungdamko in i ngetnop thute Jesuh’ min suangin kingen thei hi.
(2) Pasian tawh direct in mimal kilawmtatna nei thei hi.
Jesuh pen thu-ummite’ siampi lianpen ahih bangin Pa Pasian kiangah eite’ kitangsapna khempeuh hong thumsak in hong ngetsak siampi lianpen ahi hi (Heb. 4:14-15). Hih bang Pasian’ thuluanzia hangin Jesuh nung a zui thu-ummi khatciat pen siampi hi (1Pet. 2:9-10) a kici ahi hi. Hih bang upna hangin eite siampiza nuntakna pen Pasian tungah a ki-ap den nuntakna, a kipiakhia den nuntakna ahi hi (Rom. 12:1-2).
Siampiza ngahna tawh kisai-in Tuiphumte’ upna zangkhai ngaihsutna tawh pulpit tawh kisai siampiza ngahna, pawlpi’ tatzia tawh kisai in pawlpi in atel siampite ii panmunte luhin nawngkaisak ding hi lo hi. Pasian in thu-ummi khempeuh Amah tawh direct kizom thei dingin siampiza a piak mah bangin pawlpi a makai dingin atuam vilvel a teel siampiza ngah Pastor-te om hi. Pastor-te pen pawlpi van dingin Pasian in atuam vilvel in teel a, pawlpi’ vai teng a sem, a van dingin hunpha le tavuan a piak ahi hi. Pastor-te pen Pasian’ pawlpi a van ding, a kem dingin Pasian’ teel hi a, Upate ahihleh pastor-te ahuh dingin mipi’ teel ahi hi. Hih bangin kigen ciangin pastor-te leh upate a za/panmun sang deuh cihna hi loin Pasian’ mai-ah thu-ummi hihna kikim tuak hanga, ahi zongin khatciat tavuan-te kilamdang cihna bek hi. Pastor ahilo thu-ummite’ siampiza ngahna ahihleh Pasian tawh direct in kizop theihna thupha a gennopna ahi hi.
(5) Tualsung Pawlpite Amau le amau vai kipuatawm hi
(Autonomy of the Local Church)
Khristian pawlpite sungah pawlpi khat leh khat ki-uk kimakaihzia kibang lo hi. Hih sungah pawlpi ki-uk kimakaihzia nam (4) om hi.
(1) Pawlpi’ makaipi khat bekin ukna (Monarchical System)
(2) Pawlpi kipawlna khat in ukna (Episcopal System)
(3) Pawlpi upa-te in ukna (Presbyterial System)
(4) Suakta takin ukna (Independent or Democratic System)
Hih a tunga ki-ukzia thu (4) lakah Tuiphumte in tualsung pawlpite in amau le amau ki-uk theihna nei hi kici ki-ukna sang uh ahih manin pawlpite in suahtakna nei ahi hi. Bang hangin Tuiphumte in hih ki-ukna zang uh ahiam cihleh Thuciam Thak sunga pawlpite in zong a phualphual sunga thu-ummite’ kilawmtatna tungtawn a piang Pawlpi khat ciat tungah bulphuh in a kilamh man ahi hi. Sawltak Paul a kipan sawltak dangdangte’ phut le makaihna pawlpite zong tualsung pawlpite hi a, amau le amau a ki-uk tawm pawlpi vive ahi hi. Matthai 18 sungah Jesuh in pawlpi sunga piang thubuainate tua pawlpi mahin vaisai nading thupia hi. Pawlpite pen amau le amau ki-uk tawm ahihna Sawltak thubu a kipanin Paul’ laikhakte sungah kimuthei hi.
Tualsung pawlpite in amau le amau ki-uk theihna ngahna ahang thunihna in Jesuh Khrih ii thuneihna (The Lordship of Jesus Christ) hang ahi hi. Khrih’ pumpi ahi pawlpi leh pawlpi’ lutang ahi Khrih kikal ah tangmi kisam lo hi. Jesuh Khrih pen pawlpi khempeuh direct a uk Pasian hi. Tua ahih manin Pawlpite in Jesuh Khrih bek tawh direct kizomin eite kikal ah thuneihna le thuduhna tawh hong uk ding mihing (Person), kipawlna (Organization) leh ki-kupnate (Conference) te peuhmah kisam lo ahi hi.
Tuiphum pawlpite in tualsung pawlpite ei le ei ki-uk theihna nei cih pulak ciangin thu-upna leh thuhilhnate (Beliefs and Doctrines) tawh kisai-in ei’ ut bangin puah thei in khel kawikawi thei cihna hi hetlo hi. Hih thupom a deihna ah Tuiphum pawlpite in i pawlpi a khantoh a cidam nadingin mihing khat, kipawlna khat leh khawmpi khat peuh ii ukna, thupiakna nuai-ah om loin ei mahmah in geelin vaihawm thei cihna hi. Tuiphum pawlpite’ ki-uk theihna huamte in: (1) Ei mah ki-uk tawm (self-governing), (2) Ei mah kisiik tawm (Self-Supporting), (3) Ei mah vaikizelhsak tawmna (Self-propagating), (4) Ei mah Pasian’ thusin in nuntak tawmna (Self-theologizing) cihte ahi hi. Hih thu a piantheih nadingin pawlpi mikim ciat in itna tawh khat le khat kihuh kipanpih in taangpi lungsim tawh zatsiam ding thupipen ahi hi.
(6) Pawlpi leh Gamvai a tuamtuak kikhen hi
(Separation of Church and State)
Gam uk kumpite in pawlpi ii upna leh ki-uknate hong vaisai theih loh nading, hong angvan theih loh nading leh pawlpi in zong gam uk kumpite ii ki-ukna leh gamvaite ah a nawngkaisak theih loh nadingin hih thupom a kiphuangkhia ahi hi. Sisar’ nate Sisar’ tungah piakna leh Pasian’ nate Pasian’ tungah piakna tawh a kibang ahi hi (Matt. 22:21).
Tuiphum pawlpite in hih thupom a zuih uh ciangin pawlpi leh gamvai pen kilehbulh hi cih nopna hi lo hi. Pawlpi in gam uk kumpite gal bang ngaihsut ding cihna hi lo hi. A taktakin Pawlpi cih pen mun khat ah a tuam om, a tangdin cih bang hi lo hi. Khualletui tualsung mite mah tawh a dingkhawm khua-le-tual (Faith community with the communities) hizaw hi. Pawlpi pen leitung sunga thu-ummite tawh kiphuankhia pawlpi kipawlna ahih bangin gam ki-ukna nuai-ah nungta in a gamtaang kipawlna ahi hi. Tua bek tham loin pawlpi in leitung ading, gam adingin a kiphuankhia Pasian’ pawlpi ahih mah bangin hih leitung gam kumpite ahang om loin langpan ding kisam lo hi. I tenna gam cidam khantoh dingin mipite in lungsim ngaihsutna dik leh gamtat hoih neih nadingin a panpih ding pen pawlpi ii hunpha (Opportunity) ahi hi.
Tuiphum pawlpite’ san hih thupom a deihna ahihleh thu-upna le hilhna (Doctrine) leh pawlpi’ nuntak kalsuanna thu ah gam uk kumpi in pawlpi tungah zawhthawh thu tawh thupiakna le ana neihna cihte zang loin suakta takin biakpiak theihna hunpha piak ding (Religious freedom) deihna hizaw hi. Tua bang mahin pawlpi in zong gam ki-ukna thute ah tualsuak pawlpi ciat tawh ahi zongin, biakna kipawlna tawh ahi zongin, Party khat peuh phutna tawh ahi zongin ukna buluh loh ding cihna hi. Gammi hihna tawh gam ki-ukna vaite ah kihelna pen mi khat ciat ii mimal khensatna leh hamphatna tawh kisai ahih manin tua mi bek tawh a kisai ahi hi. Ahi zongin gamvai thute ah biakna kipawlna min tawh ahi zongin, pawlpi’ min tawh ahi zongin kihel loh ding ahi hi. Pawlpi leh gam ki-uknate kibang loin atuamtuak in ding uh hi cih pom ihih mah bangin tavuante, sepziate leh kimakiahte zong kibang hetlo ahih manin khat leh khat kisawh khakloh ding mah a kisam ahi hi.
(7) Mi a tamzawte’ deihna tawh Pawlpi kimakaih hi
(Democratic Form of Church Government)
Mi a tamzawte’ deihna tawh pawlpi kimakiah ding thupom Tuiphum pawlpite in a zat uh ciangin hih nuai-a thute a cihnopna ahi hi.
(1) Mi khatciat ii pianpih manneihna le hamphatnate kepsakna, pholakkhiatsakna, zatkhiatsakna ahi hi. Pasian in mihingte ama’ limlemel sun-a hong bawl hi a, tua Pasian’ limlemel cih pen tungtham mel-le-sa a cih nopna hi loin a sunga sepzawhna pianzia a gennuam hizaw hi (The image of God is not morphological but functional, dynamic). Mihing khempeuh in aituam ngaihsut theihna, khinkhai lungngaih theihna leh khensat tawm theihna nei uh a, tua pen Pasian’ piak pianken hamphatna (Human right) hi. Hih mi khat ciat ii pianken hamphatna pen Pasian mahmah in thupi simin manpha sa hi. Tua ahih manin Tuiphum pawlpite in zong thu-ummi khatciat ii pianken hamphatna thupi bawlin ama aituam thungaihsutnate a lakkhia dingin lampi a hon ahi hi. Tua bangin suakta takin ngaihsun in, thu a khensat ahi mi a tamzawte’ thukhensatna pen a hoih pen leh zattheihpen hi ding ci Tuiphum pawlpite in umin sang uh hi. Pasian’ limlemel ahi sunglam pianzia tawh mi kim in a khensat uh pana hong piang, mi a tamzawte’ aw pen Pasian’ aw hi ci-in Tuiphumte in um uh hi.
(2) Thu-ummi khat ciat Kha Siangtho in hopih lamlak hi cih umin tua pen pawlpi sungah zatkhiatna ahi hi (Enlightenment and guidance of the Holy Spirit to each individual believer). Thu-ummi khempeuh pen Khrih’ sungah suahkikna nei khinin lungsim a kikhelkhinsate ahih bangun tua thu-ummi khat ciat pen Kha Siangtho in lamlak (the inner voice and guidance of the Holy Spirit) hi ci-in Tuiphumte in um uh hi (2Kor. 5:17; Rom. 8:9; Mang. 3:20). Tua ahih manin tua Kha Siangtho ii lamlakna pen mi atamzaw ii deihna pan kilangkhia dingin um uh ahih manin hih bangin a tamzaw deihna tawh ki-uk ding cih thupom a zat ding a kikhensat ahi hi. Thudang in gen lehang, thu-ummi khat ciat lam a lak Kha Siangtho’ deihna pen a tamzaw’ deihna tawh pholakkhiana (expression of the inner voice of the Holy Spirit through the judgment of the majority) bek ahi hi. Tua bek tham loin mimal aituam vai tuamtuamte, midangte’ vaite a kipan pawlpi ii vai dangdangte ah khensat ding leh sep ding khat peuhpeuh a om ciangin Kha Siangtho in thu-ummite lamhilh in Huhpa (Parakletos-Guide) bangin huh hi ci-in Lai Siangtho in hong lak hi (Johan 16). Tua ahih manin thu-ummi khat ciat lam a hilh Topa, Huhpa Kha Siangtho in mi tamzaw tungtawnin koi bangin a deihna pulakkhia hiam cih kantelna in Tuiphumte in mi tamzaw’ thu le mi tamzaw’ deihna (democratic form) tawh pawlpi a kalsuanpih uh ahi hi.
(3) Hih thupom in thu-ummi khat ciat ii liangko kikimna (equality), leh liim-le-vang (dignity) lakkhiatna zong ahi hi. Pasian in mi khempeuh tungah hamphatna, suaktatak ngaihsut khensatna (freedom) cihte a kikimin hong piak ahih manin mi khempeuh Pasian’ mai-ah liangko kikim uh hi. Tua banga liangko kikimna pen mihingte adingin liim-le-vang (human dignity) ahi hi. Liim-le-vang a nei mimal khat ciat in a deihna tek uh pulakin tua mimal teng kigawmna pan a tamzawte’ deihna (democratic form) tawh pawlpi a kimakaih ciangin pawlpi mi khat ciat ii pianken manneihna, pianken suahtakna leh pianken liim-le-vang cihte thupisimna hi a, mihing khempeuh liangko a kikimna uh nuntakpih takpina zong ahi hi.
(4) Hih thupom pen a tunga thupi (6) te ii kigawmkhopna mun zong ahi hi. A tunga kigelhsa thu (6) te limtak tello, theilo, zui lo pi-in hih thupom kizat leh a tamzaw deihna tawh pawlpi kimakaihna pen lampial kha ding ahi hi. Ahi zongin hih thupom zatna ah kidop ding thu pawlkhat om hi:
(a) Hih thupom pen galvan zat bang zangin mi tam ngah theih nadingin zol tawmna, a thuman lo lampite tawh zolna cihte hihkhak loh dingin kidop kul hi.
(b) Khensatna khat peuh khensat ding ciangin mi tamzawte in kigingsa in a om nai keileh lopthop sep loin mimal khatta hitaleh, a honin hitaleh Kha Siangtho lamlahna ngakin limtak kidawh ding (Personal and communal piety) kisam mahmah hi.
(c) Mi a tamzaw’ deihna ahih phial zongin kikhial thei veve ahih manin pawlpi ading supna a om loh nadingin mi tamzaw’ deihna pen mi tawmzaw’ deihna tawh etphat khinkhai ding kisam hi.
(d) Mi tamzaw’ deihna tawh khensat ding thulela leh mi tamzaw’ deihna tawh khensat loh ding thulela-te limtak khentel theih ding kisam hi. Tua bangin sep ding leh pelh dingte limtak khentel theih ciang bekin hih thupom pen khiatna hong nei semsem dinga, pawlpi zong cidam in khangto semsem ding hi.
Hih thupomte pen minamte’ tatzia leh ngeinate tungtawnin a kingah hi loin Lai Siangtho tungtawn leh pawlpi’ tangthu tungtawnin a kingah thupomte ahi hi. Limtak sin in, kan in, zuizo lehang pawlpi tek adingin hamphatna tampi om ding hi.
Reference:
(1) Do Sian Thang, Tuiphum Pawlpite’ Tumdangnate: KVBA Youth Fellowship Golden Jublilee Magazine (1957-2007), 2007.
(2) Myanmar Baptist Convention, Tuucingte’ Khutzat, 2008.
(3) Simon Pau Khan En, Tuiphum Pawlpi: A Tangthu Tom leh A Tumdangna, 2003.
(4) Tuiphum Pawlpi ngeina leh Tawn dan te tangthu
Pastor Suang Khen Pau (2017-2018)
