KAWLGAM TUIPHUM ZBCM, TBC, CBC

Kawlgam Zomi Tuiphum kipawlna, ZBCM, TBC leh CBC

Abeisa kha thum lai in, Zomi tuiphum vai ka gelhna ah, min gelh ngam lo “Pengkul” a kici khat in nakpi tak in group mail ah hong taih ban ah, kei mimal le ZBCM in mikhemkhem hong ci a hih man in, ZBCM in mi khem hiam? Kua hamphatna ding suksiat sak ngei hiam? Bang vai hawm khopna susia ngei hiam? Zomi te’ sungah Bang ki pawlna in susia hiam? Mimal kua in susia hia? cih te a telna dingin a sau sim in konggelh hi. Pengkul pen a ma thu a ging thei hi lo in, a mut khat a om ciang bek in ging thei a hih mah bangin thu dik (huih) in a mut ding kisam ka sakna tawh kong gelh hi.

Kawlgam Zomi Tuiphum Kipawlna, ZBCM, TBC le CBC

Ni dangin Zomi Tuiphum kipawlna pen ZBC bek om hi. Tu in ZBC bei in CBC, ZBCM le TBC thum pha hi. CBC (formerly ZBC ) sungah eimi a om lai pen KVBA (Kalaymyo sung, Leipi, Tahan, Emmanuel, Pyidawtha cih te hi), TAB (Tedim gam sung TBC tawh a ki pawl nuam lo teng- Mualbem, Thaangkai lam), ZBA (Zo or Zou lam), SRBA (Sihzang lam) leh KCBA (Kuki, Thahdo) kihel lai hi. Mai lam ah koii lam hong nga uh tam cih ih khuadak laitak hi.

I. ZBCM le TBC pianzia atom

1. Kum 1994, Feb kha TBA kumcin khawmpi Suangpi khua pan in, TBA makai in, Tedim kampau Tuiphum teng zol in, Convention khat a din ding meeting khensatna tawh ki zui-in, TBA Siapi te hongzin kawikawi in, honggen ciangun, TBA pen ih muan ih suanpen hi, Pa bang a kong neih uh a hih man un, no hoihsak a hih leh ko hong zui dinghi ung ki ci ciathi.

2. Kum 1994, April in ZCLS meeting Kawlpi tuiphum pawlpi ah ki nei in, nasia takin ZBC tawh ki khen dingvai kikum hi. Hih hun in kei zong meeting kah khat ka hihi. Tu ni dong ka bil kha ah a gingging lai ka tha ngah mahmah khatin, Rev. Kam K Thang in, “ nau te aw, kei bel teekta ing in, ngap nawn keng, no na ngap nak uh leh ki pan ni, ki pat hun ta hi,” hong cih teh tha ki ngah mahmah in, ki khen ding ki sawm hi. Tua ZCLS meeting khit teh ZBC-EC, Falam ki pai suak aa, tua lai ah zong nakpitak in ki kupna om hi.

3. Kum 1995 April kha in Zozang ah ZCLS meeting om kik in tua pan thukimna a om khit teh Khuasak ZBC triennial ah pan mun kitel nitak in TBA te’ zinpi ah kikhawm in ZBCM min ki phuak hi. TBA(Tedim),TTBA(Tonzang), KZBA(Kalay), TVBA (Tamu),ZBA(Zo) teng thukim uh aa, SRBA in ko innteek ka hih uh teh hong hi ci om phot nung ci hi. Kuki Chin (KCBA) pen delegate hong kah zo lo ahih man in, khentatna om thei lo hi. KVBA in ko pen minam kigawm khawm ka hih man un tu tadih in a buppi in hong pai thei nai lo hi ung ci hi.

4. A zingsang ciangin ZBA hong nung kik hi. TBA te Tedim a tun kik ciangun a thu uh hong kituak nawn lo in ( atom in) ZBCM tawh ahizongiin, ZBC tawh a hi zong in tawlkhat sung kipawl pih nei lo hi. Tawl khat khit teh ZBC zom kik uh aa, MBC tungtawn in Convention 2007 in TBA hi nawn lo in TBC ki cita hi.

5. Nidang a TBA sungpan in Mualbem kuam lam le Khuano kual lam pawl khat ZBC tawh ki zom suak uh hi. TBA sung pan mah in Pawlpi tam khop mah ZBCM ah om uh hi. A om lai teng Association 3 in ki khen uh aa, tu lai tak in, Pawlpi 80 kim le Association 3 pha in Tedim Myone sungteng le Yangon ah TBCY a hi uhhi.

6. ZBCM pen ih minam bup a ih phuah, thupha ih piak a hih mahbangin Pasian in thupha pia in, tu in, Pawlpi 130 val, Association 7 pha in, Kawlgam sung Zomi te om na (a tamzaw ah) te le Nyiphidaw na ngawn ah Mission ki nei hi. Gam pua ah zong New Deli, India ah pawlpi sanna ki nei a, USA ah zong Zomi Baptist Churches of America (ZBCA) om ta hi.

II. Myanmar Baptist Convention, Baptist World Alliance le ZBCM kizopna

1. ZBCM pan in TBA a din tawp ciangin Zomi Siapi te patau in MBC tungtawn in gawpkhopna ding vai hawm uh aa, TBA ah or ZBC ah nakigawm kik un cihtawh gawm sawm uh hi. ZBCM in TBA in hong zolkhiat, hong zotkhiat sa hi, ZBC tawh ki zop dingin lah ih pai khiatna sa hi, ‘ngal hapaaksa tum kik kei,” ci in dingsuakhi.

2. 2000, Aug 27 ni –in, ZBCM in Emergency General Meeing Kawlpi ah nei hi. Hih hunsungin MBC General Secretary phone tawh ki donga, GS in, ko MBC pua lam a om a hong koih hi ungh a cih ciangin, MBC tawh kizopna vai pulaknawn loh dingin ki thu kimhi. Tua tawh ki zui in, ZBCM pen MBC nuai ah om nawn lo in, tang-din aa (Independent ), 2005 kum ciangin BWA ah member in lut in tu ni dongin annual member fee ki pia in ki zom den hi.

III. Southern Baptist Convention (USA) le ZBCM kizopna

1. Kum 2000 Aug.19 (Sat) ni-in, SBC pan – South East Asia Mission Director Rev. Jim McCarthy le USA aa pawlpi lian mahmah nih pan in pastor 2, le ZBCM Siapi te Maymyo ah meeting nei in, Mission nasepna ding thu le huhna sum le paai vai tampi tak geel khawm in thukimna nei uhhi.Hih hun lai tak in SBC pen BWA ah kipawl lai ahih man in ZBCM te MBC nuai ah na om kei uh leh hong huh thei lo ding hi ung ci hi. A hi zongin no guak na din uh leh ki zom thei ding hi hangh ci’n vai khak hi. A Tung a ih gen sabangin MBC in ZBCM hong pom nawn kei ung a cih khit teh, a tang-din a hih man in ki zop theihna lampi hong piang hi. Tu in a hih leh SBC pen BWA tawh kipawl nawn lo a hih man in a ut peuh peuh tawh ki zom thei in, a mau thu ciat hi ta hi. Kuamah a ki neisak tuam zong om se dah ni.

2. Hih Maymyo meeting khit ciangin Yangon ah TBC-Y Siapi te le Upa te in gamdang Siapi pa( Jim) an neekpih na nei in, tua lai ah ih muan mahmah Siapi nih in( a min gen dah ni), hih ZBCM te pen MBC sung a ki pawl lo hi, ko mi tem ah hi in thu tangpek hi, kumpi langpang hi, na ki zop teitei leh nang na ngawn a dingin lau huai hi, cih tawh nakpi tak a gen ciangin, ki zom ngam nawn lo in lai khak tawh ZBCM thu zasak hi. Hih thu te hangin ZBCM tungtawn aa Pasian nasepna ding tampi tak ki taan-lawh hi. Zomi bup supna a hihi. Midang te hong bawl hi lo a, ei sung teng mah ih hihi.

3. Tua zawh kum 4 khit ciangin SBC te in thu dik taktak hong tel uh aa, 2005 kum in ZBCM tawh partnership in mission nei khawm uh hi. Hih hun a hong pai Rev. Gerald Burst in, a ki pat cilpan in hih thu dik ki thei hi leh ih ki zopna nawngkai lo ding hi, ci’n gen lai hi. ( Hih Siapa tawh USA ah ka biakinn uh le ka inn uah ka ki mu thei zel lai uh hi).

IV. GZA in hong gawmkhawm

Hih a tung a bilial teng pen midangte’ hong bawl hi lo in ei sungteng a ki toknawi ih hihi. Hih bang kawmkal ah GZA hong piangin damdam in hong gawm tuah kik in ka mu hi. Dr. Do Kham in GZA meeting khat ah a genna ah,” a dangdang gen loh, Sia Enno le Sia Khual mahmah hong ki kholh theih kik bek uh zong GZA man phatna hi, a cih bangin, GZA hong om ciangin, ih Siapi te mipi mai (pulpit tung) ah mawh maisak na ki ngen in, mawh ki maisak in, ki ang-kawi in, ki kah liang uh cih khawng ih zakciat mah bangin lametna hong neisak mahmah hi.

GZA in mai lam bangzah in hong gawm khawm takpi hiam cih a ban tu zawh kum bang zah hiam ciang ihgelh beh dinghi.

Pengkul in zong tel thei tuam dingin hong um ingh. Lai hong simsak khem peuh tungah lungdam hong ko ingh. ( Hih ZBCM vai buainna te pen Col. Kam Pum, a dam lai in thupiang lai khak khempeuh hong copy sak in file khat tawh hong bawlsak sitset in, hong piakna sung pan le kei mimal, midang tungpan ka zak bang a kong gelh a hihi, Pengkul a sangin man zaw kha dinghi.)

Thu dik a deih na sanggampa uh,

Rev.Dr. Tun Cin Kap

Zomi American Community Church,

Florida, USA