ISREAL LEH HAMMAS KILEMNA DING

 ISREAL-HAMAS KILEMNA DING

Isreal leh Hamas kidona pen gengen ni cileng, nisim naisim in kikaptuahna, bomb kikhiatnate tatsat lo tawlnga loin mun tuamtuamah muh ding om den a, mi tampi in sihlawh manlawh den uh hi. Tutung in tua lam thu tawh kisai khawlsan in, kilemna ding vai tawh kisai tawm khat kikum ding hi hang. Keima mimal muhna hi a, dik pah lian ding hi cihna bel hi tuan het lo hi. 

Isreal leh Hamas kidona tawh kisai, US makaih kilemna ding vaihawm pawlin (mediators) ngaihsutna khuak leh lungsimte zangin kilemna ding zong mah leh, khat lam khat lam lungkimna ding tuni ciang dong mu zo nai lo uh a, ahi zongin kidona pen a tawpna ding laikung laidal hi cih tel mahmah uh ahih manin lungkia lo, thasial loin kilemna ding lampi zong uh hi. (US, Egypt & Qatar ten kilemna palai na sem uh hi) 

Jerusalem Post in a gendan in kilemna ding a gelpi (Frameworks) sungah 90% khat lam khat lamin sang theita uh a, 10% bang om lai hi ci uh hi. Tua 10% khelkhiat ding pen haksa mahmah hi ci uh hi.

Hih kilemna ding a gelpi sungah (frameworks) kilemna ding lom thum in paipih uh hi:

1) Gal mat kikhektuah ding vai tawh kisai.

Condition of the hostage-prisoner exchange.

2) Gal ven khit ciang Gaza gam huhzia ding leh Gaza gam lam kik ding vai tawh kisai.

Humanitarian aid into Gaza and the rehabilitation of the Strip. 

3) Kikap dinkhawl ding vai leh Gaza gam pan Isreal galkapte ciahkik ding vai tawh kisai.

Terms of the ceasefire, including an Israeli withdrawal from Gaza.

Kilemna ding a dalpi pen hih nambat thumna, Gaza gam pan Isreal galkapte ki-withdraw ding vai ahi hi. Hamas singnuaimite in Isreal galkapte Gaza gam pan a ciah kikna ding un, a galmatte uh tawh kal uh hi. Cih nopna-ah Isreal galkapte Gaza gam pan a ciahkik kei ding uh leh a galmatte uh piak sawm lo phawt uh hi.

Tua bang kawmkal in Isreal galkapte in Egypt leh Gaza gamgi PHILADELPHIA CORRIDOR nusiat ding pen haksa sa mahmah uh hi. Hi lai mun pen Isreal thukante in (SHINBET) Hamas singnuai mite in gamdang pana galvan namkim a laklutna cianggek hi ci uh hi. Hi lai mun panin Isreal galkapte ki-withdraw le uh, Gaza gam kidona pen a mawknapi suak ding a, hi lai mun tawnin Hamas singnuaimite in galvan lalut kik ding uh a, a gei mah kisuak kik zel ding a, Isreal leh Hamas kidona a bul panin pat kik kul zel ding hi ci uh hi.

Bangbang hi leh Isrealte gamtatzia pen leitung in khengval sa lua, ngongtat sa lua ta ahih manin gam tuamtuam in Isreal mawhpaih in, Isreal langpanna lian semsem ahih manin Pupi Binden leh Benjamin Netanyahu-te nangawn kitawng dekdek ta uh hi.

Tu dinmun pana et in, Isreal galkapte in Gaza gam pana ki-withdraw ding a san theih ding uh lamethuai sim pianta a, ahi zong Hamas singnuaimite nuntak khuasakzia bang tan hiam sung enkai kawmin PHILADELPHIA CORRIDOR panin kum bang zah hiam khit ciangin Isreal galkapte a tawpkhakna dingin hih Corridor nusia dingin kilemna a bawl ding uh upmawhhuai ta hi.

Bom 💣