ZUA, PA IH CIH

ZUAPA 

• Zi leh tate’ ading ahih nak leh tha leh ngal siit loin, a hanciam den ZUAPA ahi hi.

• Haksatna leh lauhuaina tampi om mah ta leh zi leh tate’ ading ahih nak leh nawk ngam lah aneilo ZUAPA ahi hi. 

• A sep, a bawlnate ah Zi leh tate’ lungnopmawh ding ut loin, a nopna teng bek gen in, a haksatna taktak teng a imcip den ZUAPA ahi hi. 

• Zi leh tate’n a telkhialh ding zah dongin, na khatpeuhpeuh a lei ngamloh hun zong om thei zel a, tua pen a taktak in, a neihzah uh tel lua mahmah ahih manin sum leh paii a zek ziahziah ngam lo ZUAPA ahi hi. 

• Pilna siamna nei se ta kei leh zi leh tate’ adingin ahih theihna khempeuh sunghkhia in a kipiakhia den ZUAPA ahi hi. 

• Zi leh tate’ ading ahih nak leh zum leh dai zong khual loin, mihai abat hun tamveipi a om ZUAPA ahi hi.

• Zi leh tate’n a utut un aci phial zongin, itna tawh a thukkik den ZUAPA ahi hi. 

• Inn vai lo vai leh zi leh tate’ mai lam ding a ngaihsutsutna  in ihmut zong a cim zo ngeilo ZUAPA ahi hi.  

• A niampen pan a sangpen ah, khuamial sung pan khuavak sungah, haksatna pan nopsakna-ah zi leh tate a tunpih nuam ZUAPA ahi hi. 

• Zi leh tate’ adingin a nuntakna buppi kikham in, leitung nuntakna a dosak den ZUAPA ahi hi.

• A nuntakna hu abei dong( a lungtang a khawl ma teng) zi leh tate’ adingin, a nuntakna buppi a suplawh ngam den ZUAPA ahi hi. 

• Zi leh tate’ ading ahih nak leh,  a thuak ding leh a si dingin a baihsa-in a om den ZUAPA ahi hi. 

ZUAPA’ ITNA na tel ni-in ama tungah lungdam ko in la, amah khasiasak ngei dingin na ki upmawh leh ama tungah mawhmaina ngen in. Nang tungah na ZUAPA’ lungkimna pen khang tampi kizom thupha hi  ding hi.

* Hih thu leh lim(photo) pen mikim adingin maan khin khollo kha ding hi. Ahang pen, Pa hoih pawlkhat a om mah bangin Pa ginalo pawlkhat na om thei zel hi. Hi bang Pa hoih na neih leh, Pa hoih hong pia Pasian tung leh na Pa’ tungah lungdam ko hamtang in. Pa’ ginalo anei na hih khak zenzen leh zong, na Pa’ ading thungetsak in. Bangbang ahi zongin ama sisan sung pan mah in apiang na hi hi. 

Pa’ khempeuh tungah cidam khansauna om ta hen. Amen!

Khris sungah, David Tuang

PATE LUNGGULHNA

PATE NI ADING PATE LUNGGULH
2018
THUMASA:
Pa cihpen vaak, makaih,lamlak leh abulpi cihna hi a, Pa omlo innsung pen anungta zo mahmah phialzongin tate lungtangsungah lung patauhna leh khamuan zawhlohna omden hi. Pate ni hongtun ciangin Pate tungah thupha bawlding ki hanciam ngeingai in lungdam huai mahmah hi, ahizongin ahundangah itna lahding pen kingaihsun lo kha thei zel hi.

PATE NI BANGCI ZAT DING:
1. Topa tungah lungdamkohna in zangding.
2. Pate tungah thupha bawlna in zangding.
3. Pa neinawnlo ten Zeisu  pen Pa bangin ngaihsun ding .
4. Pate aomnawnloh hangin pate thupha omden cih mangngilh lo ding.
5. Pate itna pen han ah kivui khawmlo cih phawk den ding.
6. Pa te tungah itna kammal khum te zasak ding.
7. Pate in van leh nate tungah tate itding ngaihsun lo in nuntakna mahmah thupi sa hi.
8. Pa cih kammal sungah thupha leh vangliatna om cih mangngilh lo ding.
9. Pa te in tate itna khamnuam mahmah cih phawk ding.
10. Pate teekna pen tate hang cih phawk ding.

PATE BANGTAWH KIBANG HIAM?
1. Pate pen Suangmanpha tawh kibang hi.
2. Pate pen inn muanhuai tawh kibang hi.
3. Pate pen lampi tawh kibang hi.
4. Pate pen tuisiangtho tawh kibang hi.
5. Pate pen ciangkhut tawh kibang hi.
6. Pate pen khaci tawh kibang hi.
7. Pate pen engine tawh kibang hi.
8. Pate pen bizupi tawh kibang hi.
9. Pate pen store house tawh kibang hi.
10. Pate pen lupna tawh kibang hi.

PATE IN TATE TUNGAH  ALAMET UH:
1. It ding lamen hi.
2. Pahtawi ding lamen hi.
3. Thupit bawlding lamen hi.
4. Thudot ding lamen hi.
5. Zahtak ding lamen hi.
6. Amau sangin apilzaw ding lamen hi.
7. Amau sangin ahauzaw ding lamen hi.
8. Amau sangin alawhcing zawding lamen hi.
9. Amau sangin agualzo zawding lamen hi.
10. Alungnuamsak ding lamen hi.

PATE IN TATE TUNGPAN ALAMETLOH UH:
1. Simmawh ding lamen lo hi.
2. Midang tawh tehkakding lamen lo hi.
3. Neubawlding lamen lo hi.
4. Guallelh ding lamen lo hi.
5. Khasiatsakding lamen lo hi.
6. Maizum sakding lamen lo hi.
7. Haibawlding lamen lo hi.
8. Thunial nial ding lamen lo hi.
9. Tate gamtat siatding ding lamen lohi.
10. Tate gentheih cihmawh ding lamen lo hi.

PATE TUNGAH TU MAHMAH A SEPDING THUTE:
1. Na pa na awkhum zasak in.
2. Na pa tungah akimuthei ding thupha khat bawl in.
3. Na mailam ding thute theisak in.
4. Na pa lungnopna dingin kammal hoih nono zasak in.
5. Na pa in nangtunga hongtuh itna te agah lo sakkik in.
6. Na pa tungah na khasiat leh zong thupha bawl veve in.
7. Na pa cinlohna te kuama tungah gensawn kei in.
8. Na Pa hangin lungdamkohna kammal gen in.
9. Na pa hoihna penpen muhsawm in.
10. Na pa tungpan thupha dawhden  in.

THUKHUPNA:

Pate ni in thupha hongtun ding hilo in, Pate tungah itna leh thupha ibawlna in thupha hong tun ding hizaw hi. Tutunga Pate tungah itna tawh thupha abawl kha zonailo iom leh mailam ah thupha bawlsawm ciat ni.

Rev. Pau Khan Khai
Church Pastor- Bethel Zomi Baptist Church- Kalaymyo,
Church Pastor- Zomi Christian Church- Louisville&
General Secretary
Zomi Baptist Churches of America(ZBCA)
Louisville, Kentucky.
USA.
June 13,2018.