UKRAINE LAM
Mai nipi kal October 17-18, 2024 sungin NATO gam Defence minister-te NATO Headquarters, Brussels khuapi-ah kimuhkhopna nei kik leuleu ding uh hi ci hi.
Hi hun sungin Russia in Ukraine gam paulama Nuclear tawh NATO gam pawlkhatte a vau den zakzak gige thithe-na hangte kikum ding uh hi ci hi.
Tua banah NATO gamte in Russia gam koici masuan ding, maingatdan ding cih tawh kisai, geelna leh ngaihsutna thakte zong (new strategy) kikumkhawm ngeingai leuleu ding uh hi ci hi.
Russia gam khauh nawk semsem ding cih a deih pawl a om lai in, pawlkhat in dausak semsem ding cih a deih pawl zong om uh hi ci a, NATO gam 32te zong tuni ciang dong kithutuak thei mel lo uh hi ci hi.
Tua bang kawmkal in MATO gam kipawlna sunga om, Hungary leh Slovakia leh Turkey-te in a sim a tham in Russiate na zawlmit zel uh a, na kineel, na uitui zel uh ahih manin, amau kal sinthu zong tawm khat beek kikum dinga lamet ahi hi.
———
Washington Post in a gendan NKorea galkap honpi khat Russia galkapte khut nuai training a nei laitak uh hi a, tu kum tawp lam ciangin Russia galkapte tawh kipawl in Ukraine gamah galmadawk in pang thei ding uh hi ci hi.
Ukraine official lamin zong NKorea galkapte Ukraine gam a si pawlkhat leh a liam pawlkhat zong om khinta hi ci uh hi.
NKorea vaihawmna innpi-ah zong (National
Assembly session) Korean Defense Minister pa, Kim Yong-hyun in, Russia galkapte huh dingin NKorea in galkap a tamzaw kikhak thuah lai mai thei hi ciin gen hi ci uh hi.
A beisa hunin hua gala Kimpu leh ngaanbawkpa in zong galkap lam tawh kisai kihuhtuahna dingin kilemna suai na kai khin uh hi. (mutual treaty akin to a military alliance)
———
Russia galkapte in Black Sea tuipi-ah bomb thang/ mine 300 val ding bang siah uh a, tuihual in a taai lai, tuipi tungah a laam zuazua lai leh tuipi ngei sehtaak khawngah muh ding om ziazua hi ci uh a, hi pen leitung upadi (international maritimes law) tawh kipelh hi ci uh hi.
———-
Western gamte in Russia kumpi gawtna a piak manin Russia galvanleng muan leh suanpen khat ahi, SU-57 5th geration fighter Jet pen bawl zo nawn loin tawlnga phawt uh hi ci hi.
No comments:
Post a Comment