ISREAL LEH IRAN KAL SINTHU KIKAIAWK SEMSEM

 ISREAL LEH IRAN KAL SINTHU KIKAIAWK SEMSEM

Mi pawlkhatte in leitung galpi kinaih semsem hi ci uh a, pawlkhat in Middle East gam kuama om, Muslimte zong kingeih kithutuak het lo ahih manin Isreal in phulakna a paipih zongin galpi piang zo lo ding hi a ci pawl zong om uh hi.

Tu ciangciang thu kizakdan in Isreal in Iran gam a kapna mun dingte  (military targets) kiciansakta uh a, ahi zongin Iran in a thuhkik khak zenzen leh, koici bangin kiveng kidal ding? Isreal gam security dinmun ding tawh kisai Cabinet in a kikupsan laitak uh hi ci hi. Pawlkhat in phu lak ding vai tawh kisai a khinkhai lai tak uh hi a, phu la sese loin Hezbollah tawh kidona zoh siang phawt ding a deih pawl zong om uh hi ci hi.

Isreal galkapte in Iran gama military target mun dingte a genkhiat nop loh hang un, hih a nuai munte hi hamtang dingin ki-ummawh ciat hi. 

1) Isfahan muna om Irante nuclear munpi (Iranian uranium processing sites in Isfahan)

2) Iranian air defence bases

3) Iran oil infrastructure. A diak in Kharg oil Terminal Isreal galkapte in mittuk deuh uh hi. Iran gam in hi lai mun panin 90% crude oil gam dangah puak uh hi ci hi. Hi lai mun suksiatsak leh, Iran Economic kihumzuulsuk pah hinhen ding hi ci uh hi.

4) Isfahan muna galvan bawlna munpi (weapons factory in Isfahan)

5) Iran’s cluster of missile and drone bases

Ahi zongin Pupi Biden in Irante nuclear munpi a suk ding pen awi lo hi. Bangbang ahi zongin Pupi Biden leh Benjamin Netanyahute ei thei loh kalin sun leh zan kipailet in kiho ding uh ahih manin hong koici pai zel tam? Hungaih ni. 

US thu loin Isreal zong hong tangtat ngam tuan lo ding a, Pupi Biden in Irante nuclear munpi a suk ding uh deih se lua zaw, a awi lo hong kineih khawng zong hi thei hi. Leitung pen politics tawh kal kisuan khawm ahih manin a awi lo takpi mah zong a hi takpi tam theihsiam haksapi hi ta hi.