Covid-19 Update XXXI: White House Press Briefing pan atheih huai thu pawlkhat leh tulai tak US sung thu tuamtuam te: (October 01 2020)
-----------------------------------------------------------------------
1) White House pan news update pawlkhat:
- Congress ah Democrats te vaihawm na 2.2 trillion bill thak sungah Coronavirus tawh akisai het lo te pawlkhat stimulus bill sungah hong guang zel uh aa, adiak diak in tax pia lo aa aguk om illegal immigrants te huhna sum stimulus check piak ding cih te zong kihel ahih manin kisang zolo ding hi ci in Press Secretary Kayleigh McEnany in tuni Press briefing ah genkhia hi.
- Supreme Court Judge ding akitel khia Judge Amy Coney Barrett pen American gam aading ahoih pen hi aa, Senate Majority Leader Mitch McConnell leh Senators te tawh zong holimna nei thei uh hi ci White House pan taangko khia uh hi.
- “Rapid Point-of-care Coronavirus tests” akici Covid-19 natna amanlang leh atawm man pen aa aki test theihna test 150 million pen kihawmkhia ta ding hi ci in President Trump in genkhia hi.
2) Coronavirus stimulus package update:
- Stimulus bill tawh kisai Treasury Secretary Steven Mnuchin leh Speaker of the House Nancy Pelosi tu ni in Capitol ah thu kikupna nei kik uh aa, ahi zongin thukimna bangmah kingah nailo hi ci in Pi Nancy in news conference ah genkhia hi. Pu Steven tawh kikupna pen zingciang zong kinei suak ding hi ci in Pi Nancy in gen pha hi. Zani in House Democrats lam pan 2.2 trillions apha stimulus package bill thak khat vai khawm khiat ding taangko khia uh aa, ahi zongin Replulicans leh White House tawh thu kimna aneih masiah uh belh bangmah kivaihawm, ki pass zo tuan lo ding ahi hi. Zani mah mah in zong White House pan 1.6 trillion apha stimulus package khat geel khia leu leu uh aa, Democrats te vaihawm khiat tawh bangcih gawmkhawm thei ding cih tulai tak Pi Nancy leh Pu Steven te akikup kup lai tak ahi hi. Hih Stimulus bill akivaikhawm te sungah mipite huhna sum $1200 piak ding, unemployment benefit $600 piak kik ding leh huhna tampi piak ding te kihel uh aa, mipi te leh businesses tampi ten phat tuamna kingah ding ahih manin thu kimna amanlang pen in hong ngah theih nang kilunggulh mahmah hi.
- Tuni tak Democrats te ii vaihawmkhiat kik 2.2 trillion apha stimulus bill pen House Congress ah vote la uh aa, atawm zaw thu kimna tawh pass leu leu uh hi. Ahi zongin kikup kholhna omlo ahih manin abeisa dan mah in Senate leh White House ah tung zo lo ding ahih manin lamet om lo hi.
3) Corona virus vaccine update pawlkhat:
- The US Food and Drug Administration (FDA) commissioner Dr. Stephen Hahn in Vaccine hawmkhiat ding tawh kisai kua mah ii tawsawnna ka mang kei ding uh aa, vaccine pen emergency in zat theih nading in ahun zui in kivaihawm khia ding hi ci hi. Tu lai tak Moderna leh AstraZeneca company cih ten US kumpi tawh kipawl khawm in Clinical Trial Phase 3 abawl lai tak uh ahi hi.
4) Covid-19 US update:
US gam sungah tulai tak States 27 te ah natna khang sem sem aa, States 14 te ah kiamlo, khanglo (steady state) in om uh hi. States 9 te ah belh akiam lam ma nawh hi. Zani in US gam sungah Covid-19 natna ngah thak (new cases) 40,929 om aa, tuni in natna ngah thak 46,815 kibelap cih Worldometer te taangkoh khiat tungtawn in kimu khia hi. Natna khang states te lak ah California, Texas, Wisconsin, Florida, North Carolina, Illinois, Missouri, New York, Georgia, Ohio, Tennessee, Iowa, Oklahoma, Indiana, Arkansas, Minnesota, Alabama, Utah, Micigan, Kansas, Pennsylvania, Kentucky leh Maryland state te kihel uh hi. Tua hi aa, ciah leh kuan kidawp huai mahmah in maituam I thuah ciat ding, social distancing I bawl tek ding, Hand sanitizer I zat ciat ding thupi mahmah ding ahi hi.
5) New York state ah Covid-19 natna khang kik:
US gam ah abeisa hun in Covid-19 natna atam pen na state khat ahi New York state sungah Covid-19 natna akiam na pen khang kik aa, New York City sung bek bek ah 3% khang kik hi ci uh hi. Adiiak diak in Sang, gyms, salons leh indoor restaurants tampi kihon kikna pan akhang lam kimu kik aa, hi dan in hong khan sem sem leh akihong kik businesses te kikhak sak kik ding hi ci in New York Governor in genkhia hi.
6) Coronavirus Task Force in maituam thuah ciat ding hanthawn:
US gam bup ah maituam (face mask) thuah ciat ding thukhun Federal kumpi in ataangkoh khiat loh hang mipi lak paikhiat ciang leh kikhop ciang maituam thuah ciat ding White House Coronavirus Task Force ten mipi te hanthawn pha pha uh hi. State pawlkhat te ah restrictions bawl khat la khia aa, mipi tampi in CDC guidelines te zui nawnlo uh in maituam thuah lo, social distancing bawl lo uh ahih manin US gam states 21 te ah Covid-19 natna nei (positive) hong khang kik ahi hi ci in genkhia uh hi.
7) American Airlines, United Airlines leh Delta ten nasem mi 51,000 khawl sak ding:
Covid-19 pandemic hangin Airlines te zong tuahsiah mahmah uh aa, American Airlines in zingciang nasem mi 19,000 tawm vei sung khawlsak phot ding ci in American CEO Doug Parker in genkhia hi. Tua mah bangin United Airlines ten nasem mi 13,000 leh Delta Airlines ten nasem mi 19,000 nasep khawlsak (Furlough) ding uh hi. Ahi zongin Congress leh US Kumpi te piak ding Stimulus bill huhna hong kihawm kik leh nasem teng khempeuh kisam kik pah ding hi ci in Pu Doug in genkhia hi.Tua hi aa, akua mapeuh aading tu aa akikup uh stimulus bill package pen thupi mahmah ding ahi hi.
8) Covid-19 tawh kisai researchers te muhkhiat athei huai thu pawlkhat:
- Covid-19 natna ngah sa ten anih veina natna angah kik ding uh haksa mahmah ta ci in Mipil researchers te in genkhia uh hi.
- Covid-19 natna ngah sa te pen kum atam toh toh uh ciang organ failure om thei uh aa, kidawp huai hi ci in rearchers ten genkhia uh hi. Covid-19 natna pen khuah mahmah ahih manin mihing te ii Tuap (Lung), Kidney, Lungtang (Heart) cih te sia sak hi ci uh hi.
- I nak pan in a nam bang mah I ngah nawn kei leh tua pen Covid-19 natna nei hi thei ding hi ci in researchers ten gen khia pha pha uh hi. Abeisa in zong Covid-19 symptoms lak ah “loss of smell” akici nak pan a nam I ngah nawn lohna zong akihel ahi hi. Cina bukkulh nei in I nak pan bangmah a nam I ngah nawn kei leh amanlang in zato ah kilah ding ahi hi.
- Covid-19 natna ngah aa a nasia mahmah te akithuah sak Ventilators akici huih dikna set thuahna hangin ahoih kik, ahing kik aom mah bangin asi zong tam mahmah hi ci in researchers ten mukhia uh hi. Ventilators athuah natna nei te ahin ding leh asih ding uh 50/50 ci uh aa, doctors ten zong theihsak na nei pah uh hi. Ahi zongin ventilators thuah kei uh leh atawm zaw si pah dinguh hi ci hi. Doctors ten Ventilators thuah ding leh thuah loh ding nasia tak in kikum uh aa, akisam mahmah asak te bek thuahsak uh hi ci hi. Ei Zomite sungah Covid-19 tawh hong nusia atam zaw zong Ventilators athuah khit uh ciang hong nusia suak uh ahi hi. Tua hi aa, Covid-19 natna I ngah khak zen zen leh zong ventilaors I thuah khak loh ding din mun I om ding lunggulh huai mahmah hi.
9) USCIS in Fee khangsak nawnlo ding:
Covid-19 hun sung budget sum nei nawnlo aa, abuai Kumpi Agency khat ahi U.S. Citizenship and Immigration Services (USCIS) in October kha 2 ni in Fee khempeuh khan sak ding atangkoh khiat uh pen Northern District of California pan U.S District Jugde Jeffrey S. White in September 29 ni in khansak loh ding thupia (block) ahih manin akikhangsak ding fee khempeuh kikhangsak nawnlo ding hi ci in USCIS website pan taangko khia uh hi. USCIS fee kikhangsak ding hi leh:
- Visa fee khempeuh 21%-75% khang ding
- I-485 (Green card) siau na man pen $1130 ah koih ding
- N-400 (Citizenship) siauh man $640 pan $1100 ah khangto ding
- Asylum siauh man $50 kila ding
- Employment authorization document (EAD) card siauhna $490 kila ding
- Abeisa hun aa aneih uh Foodstamp ngah te apiak “Fee Waivers” pen om nawlo ding
- I-131 (Travel document) siauh man $590 kila ta ding
- I – 130 (Family Petition), innkuan te sapna pen $ 560 ah khangto ding
- Biometrics fee pen $ 30 ah ki khiam suk ding
Bang bang hi ta leh USCIS fee te hong kikhang sak nai lo phot phot ahih manin lungmuan lo aa, Citizen asiau nailo ten amanlang aa I siauh ciat ding thupi mahmah ding hi.
10) NASA in tulai tak student internship (Student Trainee) tampi sam:
Abeisa hun in President Trump vaihawm na tawh United States Space Force hong phuhkhiat zawh aa kipan tua tawh akizawi tawn Federal Kumpi Agency khat ahi National Aeronautics and Space Administration (NASA) in zong nasem pawlkhat akisepna tawh kizui in tulai tak College & University kah lai sangnaupang te Student internship dingin sam uh aa, College leh University khat peuh peuh ah Information Technology/cybersecurity, Engineering, Accounting, Science (e.g. Math, Physics, Chemistry) major ala sangkah lai sangnaupang ten siau thei uh hi. GPA asang pen (4.0) kiim a nei te lamet om zaw deuh hi. Student internship asep sung un kha sum kipia dingaa, Sang aman uh ciang a qualify teng nasep sam suak ding uh hi. US gam ah Federal government nasep pen “very competitive” kici in nasep sang pen lam in kiciamteh aa, ngah ding sam sa mahmah in asiau mi tampi lak pan a qualify pen them cik teng bek akitelkhia ahi hi. NASA ah direct hire (lut) theih nangin atawm pen Bachelor degree leh experiences tampi neih kul aa, qualifications sang mahmah zong neih kul hi. NASA pen kumpi Department 15 ah kihel lo aa, independent Agency khat in ding in President in ama deih Administrator khat koih in direct in direct in uk hi. NASA pen adang Kumpi deparment golpi te ahi Department of Defense leh tulai tak ka nasepna ahi Department of Commerce pan Engineers te tawh ahun zui in nasem khawm uh hi. NASA pan Scientist, Engineers, Astronaut tampi pantah khia ahih manin ei Zomi sungah zong Scientist, Engineers, Astronaut cih te tampi I om theih nang lunggulh huai mahmah aa, khangno ten zong tu aa akihong Student internship te I siauh ciat ding tha I kipia ciat hi.
11) Johns Hopkins University & Medicines te report na tungtawn in October 01 2020 ciang dong Leitung ah Covid-19 natna ngah mi 34 million pha ta in asi mi 1,017,129 pha ta hi. US gam ah natna ngah mi 7.2 million leh asi mi 207,771 pha ta hi. Kawlgam ah natna ngah mi 14,383 pha ta in asi mi 321 om ta hi. Kawlgam ah tulai tak Covid-19 natna akilawh ziah ziah lai tak hi aa, US gam sungah zong Covid-19 anei tampi kibehlap toto lai a hih manin i om na ciat ah i kidawp ciat ding leh I innkuanpih te hoih tak I kepcing ciat nang thupi mahmah ding hi.
---------------------------------------------------------
Thomas On Sian Mung (Thomas Mung Guite)
Washington D.C
October 01, 2020.
Momno Media & Museum @
No comments:
Post a Comment