PAWLPI MAKAI KITEEL CIANG
#Akiteel dingte #Teelna ngah thakte #Teelna ngah lote #A teel mipite
Siang gen mahmah mai leng Pawlpi kitapna leh Pawlpi sung a buaina omte pen MAKAI hang ahi hi. Makai kituh, makai ut lua, makai ut lo lua, makaih siam lo, makaite thu mang lo… cihte hang vive hi. Tua hang mahin makaihzia tawh kisai mipil John C. Maxwell in “Na khempeuh a khanna ahi a a kiatna ahi zongin makai hang hi – Everything rises and falls on leadership…” na ci hi. Hong khanpih ding makai maw hong kiatpih ding makai koi dante teel ihi hiam?
Kum bei simin Zomi Pawlpi sung kiteelna a tamzaw om den a, Khrismas hang a lungdam ding leh lungnuam tak a kumthak dawn ding kim lai Pawl sung leh innkuan sung kimaitai zo lo thei gige hi. Makai kiteel ciang a theih huai pawlkhat mimal muhna tawm hong kum ing. Mimal muhna hi bek ahih manin nang a tawh a kituah kei leh hong maisak in.
1. A KITEEL DINGTE: Nomination Committee/Mipi in teel ding a makai min a gualhte lakah na min a kihel leh na ut a na ut kei zongin kamtam lua, paupeng lua kei in. Bang hang hiam cih leh Topa in mipite zang a hong deih pen lungdam huai lua hi. Na tate paulam kei in. Topa nasepna ah na tate a dongkholh a ci tawh kibang kha ding hi teh. Nasep tam lua, ci-in paulap zong kei in. Nasem zo ding a hinna damna hatna hong pia Topa ahih lam phawk zaw in. Paulap zong vetvet ken la om hit hiat lecin mi gina na hihna kilang zaw ding hi. Topa’ sapna a nial ngam dingin nang neu lua hi teh.
Tua mah bangin a kiteel ding mite lakah na min hong kikoih kei leh nakpi takin khasia se dah lel in. Topa’ teel lohpi a makai tang ut pen lauhuai mahmah zaw ahih lam phawk in. Pasian’ teel lohpi a ci le sa hanciamna tawh Upa makai a sem, Pastorte ahih kei leh midang khatpeuh khasiasak lua kha a Topa’ maipha a muh loh lawh om thei gige hi. Makai sem se lo a Topa maipha muh ding thupi zaw ci lel in. Makai ut lua ken la, hong kideih leh nial tantan se dah in.
2. TEELNA NGAH THAKTE: Mi bangzah hiamte sung panin makai dingin nang hong kiteel cing ahih manin lungdam huai hi. Ahi zongin hih pen kisialhna leh kiphatsakna lamin la het kei in la, na pilna leh na hatna khawng suang mawkmawk loin Topa’ kiangah nakpi takin ki-ap in. Nang sang a senior zawte leh junior zawte, numei Naupangte leh meigong daipamte a phawk a khual den makai hong hi in. Thungetna leh Lai Siangtho sim hahkat mahmah ding phawk in. Makai pen a tamzaw mipi mai a pai ding ahih manin piakkhiatna, kikhop paina, meeting kahnate ah lim pha hih sawm in. Pastor te ban a dom sak hi in la, Pastor te khasiasak makai hi kha kei ham tang in.
Pawlpi a tamzaw in Pastor/Advisor/Consultant i nei ciat hi. Tuate tawh tonkhawmin ahun zui-in Cialpi, Seminar, Consultation, thusinna leh activity tuamtuam bawlpih sawm in. Ngaihsut hong kipiate khinkhai in la na theihna tawh gawm khawm in. Mi khat cihcih in gamta den kei in. A kisem ngeisa teng bek sep sawm loin, lampi lui teng bek zuih sawm loin na thak vai thak bang ka sem ding hiam, cih Topa kiangah vision ngen in. Seppihte adingin a nawngkai lam hi loin teamwork a siam mi hih sawm in. Tua mah bangin na mai ate sepna maban khempeuh zahpih bawlin lumlet gawp kha kei in. Min deih lua kei in. Lawhcinna taktak Topa kiang pan ahih lam phawk in.
Teelna ngahte sung panin eimau kivakna talen ciat om ahih manin panmun hawm dan siam kisam mahmah hi. Lai mi zaw deuhte in Secretary cih bang, thu tawh a teng ngiungeute Chairman ding cih bang, sumkem ding a hoih diak cih bang om ahih manin tuate en kawmin panmun kigual leng kimazang tuam mahmah hi.
3. TEELCINGLOTE: Makai kiteel cih ciangin a cing a om mah bangin a cing lo zong om ding hi hang. Vekpi a makai cih bang om thei lo hi. Maizumna dingin ngaihsun het kei in. A pil pen a siam pen teng a kiteel cing hi tuan lo a, tutung adingin a lem pen teng a kiteel hi zaw hi. Teelcing makaite thapiak ding, tawsawn a panpih ding ngaihsun in la lang bawl het kei in. Mi na lang bawl leh nang makai na sep ciangin midangte in zong nang hong langbawl leh nuam sa lo ding hi teh.
Makai sem laitakte pawlkhat pen kiteel cing nawn kei leh “KIA” ci mawk ihih manin makai hihna pan a kiasuk tawh kibang a, pawlkhat in na sa thei, maizum ngaihsut thei mawk uh hi. KIA cih lamin la loin tawlnga, tha hong kikhek… ci leng tawldam huai pen hi. Makai na hih lai mah bangin Pawlpi sungah sumpi piakna leh nasepnate ah thadah lo tha sial loin sem suak in. Eima makaih sung bek hanciam, mi makaih ciang a thadah pen miginalote dan ahi hi.
Hih pen Pawlpi pilvangte in a “KIA” cih dan a om lohna dingin Term khat simin sehthuam suah sehkhat cih bang a tawlnga ding gual diudeu thei uh a vai tampi nuam tuam hi. A limlimin ei panna munah ei tang a hong pang ding mi a om pen lungdam zawk ding ahi hi. Khantawn a ei bek in i sep sawm leh gim huai mahmah ding hi.
4. MAKAI A TEEL MIPITE: Makai i teel siam leh i Pawlpi in na lianpi semin khangto thei a, i teel siam kei leh khangto lo bek tham lo manthanna lam kimanawh thei hi. Makai teelna ah Pasian a zahtak, nuntakna ah a siangtho gen bang lo theithei, innkuan sung uk zo mi, a zite a kamtam lua lo, mi thukhual, ngaihsutna kip a neite teel huai hi. I Timothy 3:1ff sungah Siate leh Upate pianzia ding limtak kigelh hi.
Tua ciangin tanau pai luat, khua pai luat leh beh pai luat hoih het lo hi. Pawlpi khat sung a bawng cing zawdeuhte in zong ei tam tah hang ci-in ei teng bek in makaihna buluah loin tanau meltheih hau lote phawk ding kilawm hi. Pasian in kuate teel hiam, cih et masak pen ding ahi hi. Tua pen Pasian’ tate zia ahi hi. Tanau haulote zong ei citawm ci a thanem pong mawk ding hi loin Topa mitsuan a ihihna bangbang tawh hanciam ding hi lel hi.
Leitungbup a om Zomi Pawlpi khempeuh makai teel siam ding leh makaite hang a a nuamsa a khangto Pawlpite hi dingin Topan thupha hong pia ciat ta hen. Amen.
.........
Photo a ka suan pen Pinterest pan ka laksawn, amau zg Cory Booker kammal ana laksawn uh hi.
Rev. Thang Van Lian
No comments:
Post a Comment