PANTAH PAH - IN
( Nu,Pa leh Siate theihhuai...)
Thubulphuh lst :
" Naupang khat aneu lai - in lampi man tawnsak lecin , a teek dongin lampial nawnlo dinghi. ( Paunak 22 : 6 )
#THUPAT NA
Mi tampi takin naupang pen apau theih ciang, kumkhat aphak ciang, ahih kei leh sang akah theihciang pantah ding ci-in, muhdan, sandan a tuamtuam omhi.Laisiangtho leh mipilte muhna tung tawn in tawm kong at sawn' hi.
Ka neulai - in Nipi sang( Sunday School ) te ah paunak 22: 6 laisiangtho kammal pen naupangte kilot ngahsak hi.Naupang te lotngah sakding hilo a, Nute ,Pate leh Sia ,Sm. te in naupang te lampi maan atot theih na dingin, a nuntak na tawh lak ding cihna hi zaw hi.Tuhun pen thungen siam ( sermon ) hun in hong khengta - a, ih nuntakna tawh sermon hun hi tahi.Banghang hiam cihleh thungen siam tamlua ta- a, agen bangin a nungta tawm mahmah hi.Nipi ni bek pulpit zanglo-in, nisim in, ih paipai na- ah , pulpit tawh pai dinghun hong tungta a hihlam phawkhuai mahmah hi.Naupangte leh thu-umlo mite laisiangtho pen nang leh kei hihang.Amau laisiangtho theilo , simthei lo uh ahih man , nang leh kei hongsim uhhi.
Gentehna: ( 1)
#INNKUAN KHAT:
Nupa khat in ta 5 nei hi.Ata Upen numei hi - a tan 10 a sin laitak hi.Nitak khat a Nu - in a tanu Upen kiangah, "Nai 8 pm. sat ta hilo maw thunget kipan ta-vevua"cihi.A tanu- in a nu kiangah ,"Tu - nitak a-kipan thungen nawn kei ning acih leh anu heh lua mahmah a," Banghang in maw? ci vat hi.Ata nu - in zong dawng pah a, " Nitak sim naupangte bek thu hong ngen sak a, Ulian ten thungen ngeilo, kei zong golta hi lo ka maw? ci hi.Naupang tepen kambek tawh thuhilh sangin nuntakna tawh thuhilh leeng nuntak pih zaw uhhi.
1) Mit a muhna tawh..........10%
2) Bil a zakna tawh..............50%
3) Pumpi a sepna tawh.......75%
Gentehna: ( 2)
#AISA NUTA:
Aisa nuta khat om hi.Nikhat anu in ata kiang ah," Kata aw banghang phei pai se na hiam? " cihi.Tua leh ata in,nang pai mahbang a, apai hi veng aw" ci'n nadawn' san hi.Ih tate a dingin Nu,Pa leh Siate pen mintaa, mintamii ( Actor leh Actress) te ih hih lam mangngilh kei ni.Ei hong en in, ei om bangbang, ei hih bangbang hong ciing uhhi.Tua a hih man' ih Zo paunak ah," Sakhi a Pi san - Ano san " nana cihi.
#NUGIL SUNG PAN'
Naupang pen anu gilsung ah tuisik a, a om a kipan pattahna , kipat pah ding ahihi.Nau a paai laitak anu -in akhum, a al, athuk, akha cihbang nidang a , aduh ngeiloh nektheih nam tuamtuam te hongduh thei hi.Anu in a duh mawk hilo-in, a sung aom naungeek a ding a kisap na hang hizaw hi.Pawlkhat a khuak ciimna ding, pawlkhat aguh leh ataang khauhsak nading, pawlkhat a sisan siantho sak nading, pawlkhat aci leh asa - a ding a kisam na hihi.
Anu -in aduh an namte aduh hun in nekha ngeilo ahih man' in naupang a ding a pumpi tungah a kisam apilna , aciim nading leh a cidam nading bangmah ngahkha ngeilo hi.Tua ahih man naupang pen anu' gilsung pan a lungsim, apumpi a cidamlo sa- in hongsuak khia hi.Agol khitciang bangzah takin ih pattah hangin a nu'gilsung pan a ki pattahsa naupang khat pilna leh ciimna te hong banzo nawnlo hi.
Pasian in leitung mikhempeh mikang, mivom, misan avekpi-in pianpih khuak ciimna a kibang in hongpiak a hihi.Leitung ah a khangto pen gamte a hi, USA, England leh Japan te a .khuak uh ahoih zaw deuh in bawl a, Kawlmi leh Zomi te a hoih lo zaw deuh a , bawl cih bang hi tuanlo hi.Gamdang te bang hangin ei sang pilzaw, siamzaw, khangto zaw hiam cihleh amau ei sangin a ki pattah dan uh na siamzaw ahih man hi.
#NAUCING SIAMAHTE
Tuma kum 50 kum 60 hun pawl in ih Zogam ah ih naucing Siamah te pen a tamzaw ABC a sin kha ngei lo leh Kawlpi zong a mukha ngeilo ihpi, ihpi te na hi uh hi.Naucin' zia, naukep zia cihte nasin kha ngeilo uhhi.Tua ahih man'in atate, atute uh bangci bangin pantah dingcih na theilo uhhi.
Naupang khat hongsuak khiat akipan a sep theih masakpen khat in, kahna a hihi.Nui seisai sa - a suak khat zong omlo hi.Anui seisai sa - in khatbang hongsuak mawkleh lau a, ki taisan ngeingai kha dinghi.Pau thei nailo a hih man' anduh, tui duh, agilna sa, a cithak sa - ta leh kahna tawh a genkhia, alak khia na uh hi.Kahna cihpen a pau khiat taang a , a zat nahi hi.Tuiduh, gilkial, cithak ta leh zuha muamsuk in, luai sungah sial- in vei-a, a ih mutdong khim uh hi.Ama pumpi tungah a kisam khat ngah ngeilo a hih man, a lungsim ngaih sutna in a khangto na gam te khuak hong ban nawnlo pah hi.
Naupang pen luaisung ah sial- in,
" Kanau aw e,ihmu aw
Sikha tam e,zawhngeu tam
Na ihmut kei leh
Sikha in hongman ding
Palik ten hongman ding"
cih kammal pawlkhat la-in sa a, a veikawm in a ihmut nadingin khim hi.Tua bangin khembawl ahih man' in patauhna, launa leh amah leh amah kimuan zawhlohna, a guan ih hihi.Tuhun in naupangkhat akhan kum tawh kizui-in, a lungsim ngaihsut ziading thei kawmsa a, Pasian kammal tawh khan' suahding a hihi.
###Khembawl kei - in'.
#KHA ( 6) A PHAK CIANG
Naupang ten atheih masak pen mi tawh ki zopna in , a muh peuhpeuh maitai na hi.Kha 2 pan kha 6 dong mi deidanna neilo uha, azol peuhpeuh tungah pai hi.Kha 6 hongval ciangin amuh ngeite bek maitai-in amuh ngeinailoh te kiangah ut nawnlo uhhi.Mi deidanna lungsim hong kipan ta hi.
Tuahun akipan mite a maingap theih na ding pantah pah in.
###Maitaina kisin sakin.
#KUMKHAT PAN KUM( 4) KI KAL
Kumkhat a phak ciangin kam mal 3, mal 4 bang hongpau thei tahi.Kum 2 kum 3 a phak ciangdong anu leh apate itna amah tung bekah om ahih man' in bangmah nawngkaina omlo hi.Ahi zong naukhat leh nih hongneih ciangin anu leh apa itna a mahbekin ngahkha nawnlo , ahihman a nau te hazat theihna lungsim hong kipan hi.Tua hun a kipan itna leh piakkhiat nopna lungsim, pattah pahding kisam hi.
Gen Teh Na:
Khuasung vakna pan tate moh puak cini.AUpen napiak leh ," Nanaute piaphot inla, tuakhit ciang ne pan ding na hi maw'" ci'n piak khiat na hilh ki pan pah in.
###Piakkhiat na hilhpah in.
Kumkhat pan kum 4 dong akhuak ciimna ding ki pattah thei hi.US. Sangsiapi Benjaminkarin in," Naupang khat kum 4 a phak ciang a, a lungsim khantohna pen, a khankhit a , aneih ding khuakciimna ii a lang pha khinta hi".ci hi.Bantanwaih in," Kiim leh paam hangin naupangte khat leh khat akhuak ciimna uh kibanglo hi" ci hi.Kum 4 aphak dong akhuak ciimna ding kipattah thei a, kum 6 val leh hithei nawnlo hi.Kum 4 aphak khit ciangin atam zaw ,kiim leh paam pan a sin khak, a tuah khak na uh tungtawn in a pualam pilna leh theihna ( knowledge) bek khang hi.
###Khuak ciimna kum 4 aphakciang
bek kipattah thei.
#KUM ( 5 ) APHAK CIANG
Kum 5 a phak ciangdong numei leh pasal ki deidan lo-in, kimawl khawm uhhi.Kum 5 aval ciangun pasal leh pasal, numei leh numei atuam ciat- in kimawl uh hi. Tuahun in pasal a hikimlai numei bek tawh kithuah sakin, numei bangin zeemin, puah denna pan " A Keu " ihcih te namin hongpiang thei a hihi.Tua a hihman', pasal te pasal mah bang, numei te numei ngeina mah bang a, omsak ding a hihi.
###Pasal te pasal bang in
Numei te numei bang in
Zeem inla puah in.
#KHANGNO KIPAT HUN
Khangno kipat hunpen kum13 pan 19 sung hi. Numeite kum 12.6 hunin a pumpi tung nate uh kikhel a, pasalte pen kum 14.8 hunin apau uh hong kikhel hi.Hih hun sungin Ulian te tawh lah kikhawl thei lo,naupangte tawh lah kithuah nuamsa nawnlo uh a, a vanglak hun hi.Nu leh pa te pen huntawh kizui - in, khangto lo lua ( date out )sa-in hawmthawh uh a, amai zumpih zong om uh hi.
Tuahi a , hih hun sungin , inn sangin alawm agual tetawh kikholh nuamsazaw uh ahih man' in, nu leh pa ukna pan suakta nuam uhhi.A hoihlo lam zui kha le- uh puahkik zawh-nawn loh hun ahih man'in, nu leh pa te in telsiam a, innah nuam asak theih na dingun hopihsiam,pattahsiam kul hun ahi hi.Tua thamlo in mite lakah alawmte sangin dawknuam, minthang nuam ( popular) zaw uh-a, a hoih lamah amin than zawhloh ciangun, asia lamah minthan nading zongthei uhhi.
### Inn nuam asak ding
Nu leh pa te'
Ta-vuan lian pen hi.
#UNAU KHAT SUNG NANGAWN, NGAIHSUTNA KIBAT LOH ZIA:
Lungsimlam ( Psychology) pilna nei te in unau khat sungah anuai abangin, ngaihsutna ki banglo nam 8 mukhia uhhi.
1) Sepding khat peuhpeuh
sawlkul lo athei............ Atamzaw aU'pen
2) Mite pahtak theih
pen naupang...................Asuak nihna
3) A deihbang zuihluatna
tawh asia naupang.........Atum pen
4) Mi dangte tawh kizopna
ah, ahi-dingsang aval lua thei naupang
5) Lai a hanciam naupang
6) A cinghkamh naupang
7) A thumang nuamlo phadeuh naupang
A damlo pha deuh naupang
#THUKHUP NA
Unau khatsung nangawn ngaihsutna ki banglo a , atuam ciat ahih mahbangin, khat leh khat ukzia, hopihzia leh pattahzia zong kibang theilo dinghi.Amau ukdan leh amau lungsim puakzia tek tawh kizui-in pattah siam ding kisam pha mahmah hi.
Ref: ...
-Child Psychology
-Bethany International University,Sgpr.
Bible lesson
-B.A.( Psychology)..lesson
-Personal Note Book
#Sia. Lian Nang
Yangon
No comments:
Post a Comment