ZOGAM ZOMI LEH ZOPAU Gelh: L. Lam Khan Piang

 Zogam, Zomi, leh Zopau

Lai gelh:  L. Lam Khan Piang

Pupa satsa Zogam a piang, a khangkhia, Zomite min tuamtuam in hong kiciapteh hangin Zomi I hihna na mang tuanlo ahih manin tuciang in mikim in Zomi hihna pen tualsuak hi ci-in zong kitel ciat ta hi. Tua bang hina pi-in, I minam min mahmah zong ei deihna tawh hong kiciamteh nuamlo se pen poi zong kisa mahmah hi. Hih pen thuthak zong hilo ahih hangin tulai social media zang kitam pianta ahih manin zawhsa bang a I ngaihsutte zong khat a dingin na thaksuak in hong ki post ciangin tampitak nongkai sak thei zel se hi. A suakta gam kumpi a kicih leh minamte zong ahihna bang tek a ciapteh ding pen hong thupi ngaihsut ding hi. UNDRIP bang in be lei-leh-ei kiciaptehna mah thupi bawl in, tua pen indigenous people hihna bangin kisang hi ci hi. 

Tua hi a, kumpite in Mikang gamkekte bangin hong khennen in hong ukhcip nuam uh ahih manin, hong khennennate uh thupi simloh dingin hoih hi. Tribe ichih pen ei ngeihna tawh kituak zong hilo a, thupi sim luat kisam lo hi. Legal identity a ding a kiphamawh ahih tak leh zong khatpeuh peuh tawh bel kiciapteh ngaihkha ding hi. Ahih hangin tuate tawh kideidanna I neih leh ei hong langpang te a gualzo sak I suakkha ding hi.

Ahih zongin, state (India or Myanmar) tawh I kisukkhak khitnung ei-leh-ei, Zongeina leh ciindante zangin kivaihawmna tuam kinei khalo ahih manin, hunpaisa a pupate mabang patsa khangsawnte kiangah simthu an bang moptheihna ding education system tuam kineilo kihipah a, tua ahih manin tudong mah buaina hong piang thei gige hi.

Kum 1919 kum in Dr. J.H. Cope in zattaang ding lai bawlkhiat sawm a, tua ahih manin hausa lian — Zo awkaih zang, Thadou awkaih zang, Paite (Paihte/lamzang) awkaih — te sung pan mahmah panin Tedim ah na samkhawmin, kamkupna na neihpih hi. Tua lai in tuhun a pawlkhatte in Tedim pau acih uh pen, hong ukh mikang kumpite in ‘Kamhau dialect’ na ci se uh hi.

Limhtak kamkupna hong nei tak uh ciangin, I pupate thukhualsiamna mah hong kilang in, Dr. Cope kiangah Kamhau dialect mah pansan in laibawl ding lungtuak takin (concesus) thusung uh ahih manin, hih Kamhau dialect pansan in Zolai hong kibawl khia ahi hi. Bang hangin Kamhau dialect ci se uh hi ding hiam? Bang hangin paudang khat peh na ci se lo hiam? Hih dotna pen theihhuai mahmah hi. Hih hunlai pen, lungsim siangtho, minam picing hih nopna tawh I pupate kalsuanna kimu thei hi. Kamkupna pan in a kimuthei thu pen, kuamah peuh in kamhau dialect pen telsiam uh ahih manin thukimh ahihna uh gentek uh hi. Bang hangin Kamhau dialect pen mikim in tel se uh hiam? Cih dotna khat hong pianthei leuleu hi. Tedim pen kukmpi kiukhna munpi khat, Kamhau hun panin, hong hih ciangin, mun tuamtuam panin mi tampite hong peemlutin, khuapau tek zang ngen hong kisukkhopna mun ahi hi. Tua ahih manin, kamhau dialect pen khuapau dan a ilak teitei ding leh bel khuapau lakah a naupang pen hi ding hi. Lamkhat panin enkik leuleu leng, khuapau tuamtuam hong kigawmna ahih manin khua tuamtuam pan hong peemkhawmte  in amau pau zong kihelkhatek ahih manin, hun khatlai in kuamahpeuh in kiangtangsak pihin, zong kineisak tek lel uh ahih manin pautaang bang khat hong suakthei hi-in ka ngaihsun hi.

Zolai bawl hong kipat ciangin Dr. Cope in zong thukizakna lai khat, Tedim Kam Ki Za Na Lai, ci-in Zolai tawh suah in hong hawmkhia hi. Hih hoih takin en phakik leng, Kamhau dialect ah khuapau tuamtuamte na limzat mahmah ahina muhtheih in om hi. Gentehna in, ‘ki za na lai’ cih bang pen I Zo pau bul mahmah hi. Tu dong in, ‘ thuzana’ zong kici lai lel hi. JH Cope zong buai mahmah sam hi, a thukizakna December 1919 Bu 1, Shil Sim Na 3 ah hih bangin gen hi: “Phalam ‘ngal kap’ mang pi pa a pai shuk zo hi.” Hih gual lianah ‘ngal kap’ cih zang na pi-in, a gual nihna ah hih bangin gen leuleu hi, “Tua nung ciang-in gal do na a’pai a kumli tawn-tung gal a do hi.” Hih limhtak en leng ‘ngal kap’ in ‘gal do’ hi.

Ahih hangin, kum 5 bang Zolai bawl in hong puah toh ciangin, Tedim Thu Kizakna Lai hong ci ta hi. Noun form a kammal hong bawl dek ciangin consonant khat behlap se hi. Gentehna, ‘ki za na’ pen kammal khat ah hong gawmin noun hong suahsak tak ciangin ‘kizakna’ ci-in ‘k’ hong zeplut se hi. Tua mah  bang in, ‘kho’ pen ‘khohna,’ ‘thangpai’ pen ‘thangpaihna’ cih bangin consonant khat behlapin noun form suah se hi. Hih pen a standadised na dan khat hong hi in, tua mah bangin I kampaute ah zong I hong zangto uh a, a Zolai mah in zong I pau zia hong lawh (influence) in tua pen tu ciangin Tedim sub-division a kizang ahih manin Tedim pau na ci pawl zong om hi. Kawlgam zin kha ngeilo kahih manin ka telloh tampi om kha ding hi. Ahih hangin Zolai a bawlna ah Tongzang/Kansau te pau pen a based a zang deuh ahi ding hiam ci-in ngaihsun ing.

Martin Luther in German pau tawh Lai Siangtho a leh lai-in German te in  pautaang neilo uh hi. Ama khankhiat pih pau middle German dialect (Saxony) tawh zong bawl tuanlo in, high German pan in hong bawl se hi. Bang hang hiam icih leh hih pau a zang pen a milip zong tamzaw hi, ama apau in pautaang ding a bawl loh hangin, thumal tampi tak mah ama i pau tung panin hel hi. Hih in bang hong musak thei hiam ichi leh, na thupi khualna tawh semin lawhcing ding icih leh kei a, icih tentante uh ‘sacrifice’ masak hong kisam hi. Tua ciangin pautaang hong kibawl penah khuapau tuamtuam te kizang ahih manin, kineisak in, I kiangtangsak tek uh kisam hi.

Tedim khua pen, khuapi i neih masak pen uh ahih mah bangin, pautaang a kizatna mun zong hong suakpah hi. Zolai a kibawl lai in, khuapau tuamtuam kihel a kibawl hi a, tua pen Tedim ah kizang tangpi ahih manin Tedim pau na ci uh hi ngel ding hi. Ka  khanggui ka kan ciangin ka pupate Tedim ah teng kha ngeilo uh hi, ahih hangin ka theih phak na ciangah ka innkuan un pau ka khellam uh zong kigenkha ngeilo hi. Tua ahih leh ka pau pen Tedim pau hilo in, ka pau tawh Tedim pau a cih pen uh tawh kibang kha hong suak hi in ka ngaihsun hi. Tua ahih leh kei pau bang pau hi ding? Cih dotna hong suak lian hi.

Kei pau pen ka pupate khuapau pan ka luahsuk pen Zolai in a in a influence pau hong hipah a, tua pen Zopau hi in ka ngaihsun hi. Tua ahih manin, Zogam a piang, Zogam ah khangkhia, Zomi ka hih leh ka pau pen Zopau hi ziau hi. Kei ngaihsutna pan Zomi icih khit leh ‘people’ zat ngailo hi, ‘Sunday Ni’ cih tawh kibang a zong kilawm lo hi. Tua ahih manin, Zomi te in Zopau mah zangkhawmin, Zongeina te zuikhawm in, Zolate sakhawm in, Zolam lamkhawm in, Zopuante silhtek ngeingai in, Zophualva bang itna nei in, Zogam zuun khawm leng e. Tung Pasian in vangtung kongte hongin thupha hong buaksuk dinga minam hampha I suak ding uh hi.