PAWLPI KEM SIATE ( Church Pastor) VANGIK HONG GUAN THEI PAWL KHAT

 

#PAWLPI KEM SIATE ( Church Pastor) VANGIK HONG GUAN THEI PAWL KHAT

1. Thungen pawl/phuaih : 

Hihte pen a tamzaw in Numei/nupite kitam hel phadiak uh hi. Cina thu ngetsakna siansuahna cihlamte tam sep deuh uh hi.

 Mi siansuah, Inn siansuah, Biakinn siansuah, khua siansuah cih bang lamah kizang pha diak uh hi. Thusuak nei zong om thei pahpah uh hi. Ahoihna leh phattuamna zong tampi mah om hi. Thu ngen pawl sung pan hong piang thei van gik pawl khat en pak ni..

(A) Kha sanglo : Pawlpi kem Siapa in kha 100 ah 100 pom lo sang lo hi. Tua hangin i pawlpi in thupha i san ding zah kisanglo hi ci in a mau thupha san loh Pastorte hong ngawh mikmek khawng om thei hi.

(B) Thusuak : Khualzin na pa uh hoih takin thu ngetsakun ze-etna sung ah puk dekdek hi ci-in nupa kimuan mawhna a piangsak om thei hi. Ka lawmnu thu ngen phuaihte tawh hong kizop a kipan ka nupa kal uh nuam nawn vet kei, teklemo kikal buaisan kei ung ci-in Pastorte kiang hong ko zong om thei zel hi.

(C) Khaici tuh : Innteekte lunggulhna hi lopi khaici a tuh sak a ngen, thu ngen phuaih zong omthei zeuhzeuh hi. Thu ngen phuaihte in tua bangin hong ngen uh hi ka pia ding uh hiam/ bang cih ding Sia ci in hong kidong thei hi.

(D) Sihgup : Pawlpi sungah thu ngen phuaitte a sih gup pawl khat om thei a, thu ngen phuaihte sep khialhna tha nemna Lai Siangtho tawh a kituah lohna khawng gen kha le hang singkhuah suangtum man a hong vel ngam ding pawl na om ta leuleu hi. Vaisah mahmah hi. van gik mahmah hi.

2. Gospel pawlkhat : 

Lungdamna thu gen ci a hong pai Gospel pawl khat pen Pawlpi kem Siate adingin lungkhamna thu hong puak peuh hong suak thei hi.

(A) Sutuah: Na Sia pa uh na zahtakun na itun a thu na mangun cih lam sangin, tua bang dana a hih ding hilo hi ven, atua cih ding hi ven, upate hong dot ding hi ven, thu kimna a lak phot ding hi ven cih bang lam tawh upate makaite hawlhthawhin a ma hong pai khit a kipan pawlpi sung hong nuam nawnlo cih bang Pawlpi kem Siate in kituakkha thei hi.

(B) Bingphut : Pawlpi in bang vai teng nei, cih ngaihsut sak loin, Ni 3 sung Cialpi bawl ding Topa’n deih hi, kipan leng hong lem toto lel ding hi ci giapgiap mawk. Sang kei leng pawlpi mite’n kha mangthang vei lo, cialpi bawl ding nial hong ci ding. 

Sang lehang upa makai dangte in ama thu a na sem kikup kholhna lungkimna thukhensatna omlo pi a sang hong ci leuleu ding. Sum bei teng aman si hen hong kici giapgiap thei lai hi.

(C) Thu muam : Tanaute kiang vahawh pak ning e ci sim zawzen ngimna khat nei na hi gige. Hi pawlpi khawngah na om ding uh hi lo hi, i khuapih pa kiang na ki-ap un.

Eilam teng, pau kibangteng, cih bangin thu muam kawikawi in a ma ciah khit ciang Pawlpi kem Siate in buai lawh mahmah cih bang om thei hi.

3. Thuhilh manlo : 

Ei tawh om khawm i Siate thu gensangin lengla Sia khat i thu gen pen ki-um zaw kha thei mahmah hi. Tanglai pawlpite in zong hi bang dante na phu kha uh ahihmanin Thuciamthak sungah Sia man lo, thu hilhna man lo cihte muntampi ah na om hi.

(A) Upzia / sanzia : Tu hun ciangin pawl kideidanna om lua nawn khol lo hi. Kua pawl kua pawl ci loin Pasian thugen nuam ahih nak leh Pulpit kipia lel ta hi. Innteek pawlpite upzia sanzia ngaihsun loin a mau upzia sanzia khawng limtakin hong gen kha thei uh hi. Tua pen innteek pawlpite upzia sanzia man kei a ci suaka, ama upzia sanzia a um kha hong om ciangin Pawlpi kem Siate buaina vangik khat hong suak leuleu hi.

(B) Pawlpi pai zia : Tuiphum pawpi veve zong munkhat leh munkhat kibang lo ahih lam theih huai mahmah hi. Tua bang mahin A dang Pawlpite zong kibang kim tuan lo uh hi. Amau pawlpi kalsuan zia pen a man pen dan in mi pulpit tung pan a gen ciangin thu ngai pawl khatin i Sia pa in pai zia man lopi tawh hong pai pih hi ci in Pawlpi kem Siate hong kimuang mawh thei a, vangik khat mah hong suak zel hi.

(C) Gupna leh gamtat pha : Gupna leh gamtat pha pen a kisai kha lo a kizom kha vet lo bangin thuhilh hong om thei hi. Hi bang thu genna dan pen zu dawn kawmkawm, teplemuam zang kawmkawm, nulepa thangtatna nei kawmkawm sa a, Pawlpi sung khawngah pan mun a neite in sang thei mahmah uh hi. Hih bang dan thu hilhnate hangin Pastorte in Tapaidaw nuntakzia ding i gen hangin zui zo leng khialhna om kei e, cih ciang tawh hong kikoih sak lel thei hi. Hih bang thu hilhnate zong Pawlpi kem Siate vangik khat hong guan mah na hi zel hi. 

Thu khupna : Mikhat peuh suk nopna tawh hi loin ka tuah khak, ka ngaihsut khak thu kong gelh hi. Lai sim mimal kim adingin phattuamna leh Pasian gamzaina ding hita hen.

Credit: Sia. Kaplian

Siapa thugelh thangah ing! Behlap nop Gupna thu igenleh gupna thugenin gupna thu lo adangte (gupna ngahte gamtat hoihna ding or Topa thumanna ding)sawkkha se loin gensiase kei le uh hoih ding hi!

1. Topa itna

2. Topa itna i dawnkikna ciang gen uh hen la…

3. Topa thumanna ding (gamtat hoihna) pen gupna ngahna ding hilo hi hong cici kei le uh hoih ding hi.