EIMA MUH BANG NA HILO THEI

EIMA MUH BANG NA HILO THEI

Nupa kiteng tu'ng khua tuamah innluah uh hi. Amau inn tawh kinai ah innkuan picing tangte tawh gamlum mahmah khat om hi. Zingsang khat tua mothak nu in a innvengnu puansawp hong phokhiatte en a , a pasal kiangah, "I innvengnu puansawp siam lo hi, a puansawpte siangvet lo hi," ci hi. Nipi kalkhat zawh zingsang khat a khuadak leh a innvengnu in a puansawpte hong phokhia leuleu a, tua ciangin ama'n a pasal kiangah, "Kalai, i innvengnu puansawp tu'n siam mahmah ta ei, a puante siang mahmah ta," a cih leh a pasal in," I innvengnu puansawp siam leh siam loh thu hi kei, tuzingin i kongvangneu (window) limlangte na nawtsiang ka hih manin a puante a siang a mu hizaw niteh," ci hi. 

Tua bangin mite i et ciangin eima limlang (view) tawh ki-en a, amau siantho le siantho loh na hi khinpah loin eima lungsim tawh na kisai mahmah hi cih phawkhuai hi. 

Hih ka gen ciangin 1982-85 sung Union Biblical Seminary, Pune a Bachelor of Divinity ka sinlai un, kei ko class makai in hong tel uh hi. Ko pawl pen mi 53 ka pha uh hi. Laisiam mahmah leh siam het lo kihelkhawm ka hi uh hi. Nitak simin ka class-pihte khat khat in thungetna neihpih ding ka hanciam hi. Tua ah laisiam le a kamtamte amasa lamin ka neihpih a, ko class sungah a mel le puam zong hoih lo, Mikangpau zong siam vet lo Ichha Ram Verma kici khat om hi. Amah hun pen a nunung penpen ah ka koih hi.

 Tua nitak Ichha Ram tawh ka kihona panin ka ngaihsutna tampi hong kheel hi. Uttar Pradesh state sunga khua khat ah meileng khawlna ah ticket zuakna na nasem hi. Tua bangin mite'n ama tung panin ticket lei buai mahmah laitak mi khat in; meileng ticket a leina sum a piak kawmin Lungdamna Thu lai (Gospel Tracks) na piakhawm hi. Tua a simna panin Khristian hong suak hi. A nu le pate'n Khristian a suah thu a zak uh ciangin maizumna le hehna tawh kidim uh a, amau beh le phungte samin bang lawh ding i hi uh hiam ci-in kiho uh hi. "Inn ah hong ciah phot in ci-in sam ni in, a biakna a khek leh pha, a khek nop kei ding leh that ni," ci-in thukim uh hi. 

Amah inn lamzuan in a ciah lai-in a sanggamte khat in lampi ah na lamtuah a, "I inn ah i meltheih tengin hong ngak hi, Khristian na hihna na tawp kei ding leh tunitakin hong that ding uh hi," ci-in na hilh hi. Tua panin amah zong Mumbai lamah meileng tawh na paisuak vingveng hi. Ni thum sung Mumbai khuapi sungah omna ding thei loin na vak a, Singlamteh kisuanna Methodist biakinn mu in amau kiangah ki-ap hi. B.D. sin a hong pai zong tua Pawlpite vaihawmna tawh hong pai hi. Hih a tangthu ka zak nitak in Pasian kiangah, "Topa, ken ka lawmte a laipilna, Mikangpau a siamna khawng tawh na tehkha ing, hong maisak in," ci-in thungetna ka nei hi.

Mi pen ei muhna tawh amau manphatna le niamna kibulh thei a, ahi zongin amau nuntakna sungah kihel leng ei ngaihsut na bang khin loin mi hoih mahmah, zahtak pahtak ding na tam mahmah hi. Tuni a i gennop a hih leh i Topa Jesu in, "Midangte thu na khenzia uh tawh kizui-in note tungah hong kikhen ding a, midangte tungah na zat uh ngeina mah note tungah hong kizang ding hi," a cihna ka phawk hi (Matt.7:2). Mi mitsunga ninthem muhsakin ahih hangin eima mit sunga singluang i muh lho ding lauhhuai kasa hi. Hong simsak khempeuhte tungah Topa thupha.

Sia JM Paupu!