"TAKKHEH ZOMI THASAN PHA NI"

"TAKKHEH ZOMI THASAN PHA NI"
Ih vanleng tualpi vai, district vai, minam kipawlna a omsate ka lung ngaih ciang, ka lungsung ah hong kilo zelzel thu pawlkhat om hi.

1. KALASAI HIMAWK MAW!
Airport vai thusuahna tuamtuamte..., thuman thutak ahihleh ei adingin bel deih ihihman, Kalasai poimah si ee, cihding hiphot hi. Ih Chin state ading le falam myone sung a om i mipihte adingin khantohna namkhat a kibehlap suak a hih man, lungdam huai hi. Athu in district (autonomus) vai le vanleng tual (airport) vai i deihna a tangtung nailo hiphot hi. Ih makaite zangin nikhat niteh i ngah hun om vive ding hi. Tha nem loding hihang.

" A gual zo icihte pen a guallel ngeite mah hi." I khualetui, minam khantoh nadingin a hunlapin kipawlkhawm a sepkhop siamna kisam hi. Kua tengin geelin ma hong pan ding? Khualetui mipihte lakah a hangsan i om mah bangin, namdangte lakah a hangsan le a phuthei ding, tu a i makaite zomah nungthuap makai hoih kisam to to ding hihang.

2. MAPAT SIAM KISAM:-
Khualetui minam khantoh nadingin i khuapi Tedim khuasungah ateng Zomite khempeuh banah, muntuam tuam ah a om mipite le makaite kithutuahna le kipumkhatna, mailam thuding khuamuhna le sepkhop siamna i neihsa banah pan ilakphat semsem ding ahi hi. I kipatna amun hoihin, ahun manin, a semte in citaktak in hongsep nakleh i maban uh hong hoih limci toto ding hi. I nasep uh hoih peuhleh a genthang ding mi kituh lel ding hi.

3. KHANLAWH AHUNLUA HITA:- 

Tua ahihteh 'Khangthak Zomite, Khanlawh hunta hi, Geelkhop hunta hi, Sepkhop hunta hi, Kithapiaksiam hun peuhmah ta hi. I pil i siamna, i neihsate gawmkhawm in i khuapi le minam ading i kulhpi ciang khawm ni. Kipumkhatna in thahatna hi. Eima makaihna bek suang kei ni. Lutang makai hihding bek sawm kei ni. Eima makaihna a hihkei nakleh awlmawhlo thapialo cih lungsim neinawn kei ni. Makai cihpen midangte manphatna pulakna hi a, mi demna hilo hi. Makai cihpen kumtam le tawm tawh kisailo a, veina lainatna hizaw hi. Makai cihpen midangte munpiakna le vangpiakna hi.

4. TUA A HIHCIANG

# Namneu a tangtoi lungsim pan - mipi nampi lungsim,
# Duhhop huaihamna lungsim pan - deihsakna le kipiakkhiatna lung sim,
# Ki-el kilangmuhna lungsim pan- kipumkhat kihuhnopna lungsim,
# Aipeng tuamsepnopna lungsim pan - gelkhop sepkhop hawmkhop siamna lungsim,
# Innkuan behlephung, khua le pawl lungsim pan - tangpi tangta, minambup ahuam hamphat nading lungsim,
# Hawmthawh gensiatna lungsim pan - huhna thekna le kipahtawi siamna lungsim leh
# Mimal vangdeihna le minthan nopna lungsim pan- Minam lian minam kip suah nadingin sepkhiatna tawh ma pankhop ding a hun hita hi. Ahun- ahunlua, hong tawsawn- hong makhelh dek hita hi.

5. SEPKHOP SIAMNA:-
Zomite in i geelkhop, mapankhop, sepkhop le zeekkhop siam ahun ahunlua hita hi. Mimal nasepna (private ministry) lamah a hunkhop khat i tungta hi. Mihon nasepkhopna (organizational ministry) lamah i thanem mahmah lai hi. Keima hamphatna ding omkei ci in sepkhopna lam ah i thanem mahmah hi. Mimal nasepna tawh a kuitung minam hamphatna omthei ngeilo hi. Tua ahihman kipawlkhop makaih siamna i minam sungah i phutkhaksa thu le i kisap mahmah thukhat ahi hi.

Tua hi a:-
-Thu vaihawm in i khentat leh nasepna tawh kipankhawm pah ni. - Vaipuak i kipiak leh thuneihna tawh kipia khawm pah ni.
- Matutna ineih leh lungdamkhawm in kipahtawi siam ni.
- Hamphatna i ngah leh mipite tawh nekhawm lungdam khawm ni.
- I nasepna sate enkik in, puahhuaite puah, zunhuaite zuunkhawm ni.
- I lungtupte sutkhawm in mipite lunglawpsak in, thasan khawm mualsuah khawm ni.
- I lungtup hoih in, sawtpi a kimang ding thuhoih a hihnak leh, mipite lungsim lawng(sukha) ding a, mipi ten zong a sumbawm uh hong lawng ding uh hi. Halleluijah'''.

"Zomite hanlung ciam, khangto diam".
Minam ading lainatna tawh,

Rev Cin Ngaih Thang
Grand Rapids, Michigan, USA
November 03, 2017.