Tuni ading Topa aw nem, Kammal thak te :
——
1Sam 18:14
David in asepna khempeuh ah ama tun hi , Banghang hiam cih leh Topa in amah ompih hi .
—-
1-Topa ompihna icih pen nasepna khempeuh ah lawhcinna naak ahihi.
2- David in anuntakna ah alawhcinna dingin amasa in Topa minphatna sungah nuamsa hi .
3- David in Siampi Samuel tungpan sathau nilhna ngah hi .
4- Pasian sathau nilh Kumpi Saul tungah khutkhial lo kampau khiallo hi .
5- David in khialhna khat peuhpeuh aneih ciangin kisik in thum pah hi .
6- Migualzo icih te pen thuakna tampi anei ngeite ahihi.
7- Leitung ah hamsatna khat peuhpeuh ituah ciangin thangpaih ngaihsut lo in Topa deihna bang hiam ci in ngaihsutna pen gualzawhna lampi ahihi.
8- Zeisu nu Mary leh John nu Elizabeth te kha 3 sung Elizabeth te innsungah omkhawm uh a , kuamah gensia manlo liangin amau tunga Pasian vangliatna te kikum kum uh ahih manin Pasian alungkim mahmah hi .
9- Nisim in izak thu in inuntakna hong limci sak leh hong zawngkhal sak thei namnih omden hi .
10- Tano te a ih mutsungin Nulehpa ten akisam dingteng akaihkhop sak bangin Pasian in amah a it leh ama tate adingin i ihmut sung na ngawnin ikisap nate hong kaihkhop sak den hi .
11- Biakinn sungah ipumpi bek hilo in ilungsim khempeuh itunsak zawh nakleh biakpiakna sung mahmah panin imaban ding Topan geel zo ding hi .
12- Tuhun pen hunsia mahmah ahih manin i nusiat ding teng bek buaipih ding hun hi nawnlo in ima nawh ding thu zong ibuaipih ding ahihi.
13-Tate don manlo liangin neihsa lamsa izong thei a , ahizongin itate kikhelna ding leh lampi man totna dingin ineihsa teng beikik thei veve hi .
14- Leitung ah Credit hoih ding athupi mah bangin kha thu ah zong I credit ahoih ding thupi mahmah hi - Biakpiakna, thungetna, Pasian Kammal simna leh piakkhiatna te ah .
15- Kikhoppih puante silh le hang nin khat peuhpeuh aom ciangin kilang pahpah a, ahizongin itualpuan te nin aban hangin kilang lo hi, ikhialhna khat peuhpeuh hong kimuh baih leh mihoih mahmah lai cihna hiden hi .
16- Elisha guhkeu in Israel misi hingkik sak thei lai buang ahih leh ei adamlai ten Zeisu khephung ah damna ingah ding leh midangte damna hinna ingah sak zawh ding thupi mahmah hi .
17- Jonathan in Pasian sathau nilh David tungah itna tawh thupha abawl manin amah asih khit ciang nangawn in atapa khelbai pa in apa na hoih sepna tawh Kumpi inn ah om in kumpi an ne tawntung zen hi . NulehPa te khaici in koi ah kituh cih leh bang khaici kituh cihpen thupi mahmah hi .
18- Nisim in ngaihsut den ding khat ah - Ei bang vive Pasian thu um hileh Pasian alungkim taktak mah diam ? Pasian min athang taktak mah diam cih pen nisim in kisik zel le hang inuntakna thupi ding hi - Biakpiakna ah , sepna leh piakna ah , thungetna leh Topa Kammal lung ngaihna ah cite .
19- Leitung ah itate sangkahna ding sang hoih izon ciangin- Building hoih kizong masa lo in - Sia hoih aom hiam ? Sikan thukhun hoih aom hiam? Ut bangbang in zune zatep khawng aom hiam ? Ut dadan in sangkah leh sangkahlo zelzul khawng ahi uh hiam? Sang naupang ten thu amang hiam ? Lai limtakin akisinsak hiam ?cih danin kizong hi , tuamah bangin Biakna vai ah ut dandan a kikhawm , ut dandan a pia , ut dandan a sem cih te tawh kalsuanna Pawlpi ah khantohna om ngei lo dinga , Kha thu ah discipline limtakin akineihna mun bek ah Khantohna leh lawhcinna aom ding ahihi.
20- I nuntakna ah i tha piak zawk zawk in i innsung , ikampau igamtat hong makaih ding hi . Zeisu tha ipiak a i welcome leh itha lawp in ilungdam dinga , Satan tha ipiak a i welcome leh i sepna khempeuh ah itha dah in atawpna ah Hell sung na nangawn hongtun thei ding nahi mawk hi .
Topa Pasian in David bangin ama tun dingin Mimal kim hongsiam tahen.
Amen ….
Nov 11,2021.
9:00 AM .
No comments:
Post a Comment