THU MANPHA, THU LAIGIL

 ZOMI TIMES 21.11.2021 Sun. 

Copy & Pasted from  Sia Cinpu. 

Zogam sungah gal kidona phualpi a suahding hanciam keizaw inla, Zogam leh Zomite gal sungpan a bitna dingin hanciam zaw in. 

=========================

Khuahun Ensiam, 

Pilvang Takin Gamtang, 

Vision le Gimna Goal Limci Nei 

Zomi ihihna manggilh lo.

Na Suahtunga na Nu le Pate hongphuah na min taktak leh na golkhitteh na min a theilo minam dangte hongsap pakna minpen na mindingin koi kipsak nuamzaw na hia? 

Zogam sungah Zomite tenna leitang teng akembit dingin tavuan kala zoding uh hi ci in, a pulaak khia vanzat kicing anei khin Zomi galkap thautawi group ZRA-Ete in NUG tawh kopin zingvai  hawmkhawm uh ahih manin Zomi khempeuhin panpih dingin hoih kisa hi.

Zogam leitang ah thautawi amautawh kizom lo, kipawl lo peuh2 nohkhia dinguh ahih manin Zomi leh Zogam a it thautawi peuhmah amautawh na kizom un.

 Zomi hi kei ung aci namdangte tawh na kipawl leh ni khat niteh na Zomi pihte ado, akap dingin nang hongzang kik dinguh hi. Pilvang ni.

Kawlgam buaina pen aipeng lakin nangbekin va dosawm se kei in, 

Amasa dingte masak phot in

Kipum khatna pen hoih mahmah aa, no nupa kipum khat, kithu tuak masa lopi in,

 na innvengte tawh na kipawl leh na Innsung buaina hong lian tektek ding hi.

Kawlgam bup buaina Kawlgam bup mahtawh do dingleh siahsuah ding hi a,

Zogam buaina Zomite bekmah in isiansuah leh cihloh namdangten hong huh zenzen lo ding uh hi.

Kawlgam khuapi lian ahi Yangon, Mandalay, Nipidaw te ah limtakin Kawl galkap ukna buluhte akido zawh masiah Zomite in do isawm leh kawl galkap te in hong susia nuam taktak uh hih leh nikhat thu in Zogam bup vut le vai hong suah zoding galvan hoih aneih lam uh Zomiten itel ding kisam mahmah hi.

Zogam sung hubit zolo pi in nangbek in Kawlgambup do sawmkei phot inla, 

Kawlgambup Makai pi NUG te in nikhat thu, thakhat thu in do khawmding hi hang hong cih nini in do pan zaw ding hi hang.

Zothau, tupi thau tawh PDF lutte thupi kongsa a, zahtakna kongpia aa, na pilvang dinguh ka deih hi. Bang hanghiam cih leh a hun lopi in na nuntakna uh a mawkbei ding kong phal nai kei hi. A hunlo pi in iZomipihte a galtai dinguh ka phal nai kei phot hi.

Mipil te in gal ado dinguh ciangin, a galte’ thahatna leh galvan neihteng kan masa uha, zolo ding kilel ding hi cih amuh uh leh do nailo phot in, azawhna dinguh lampi zongin ahih kei leh  kilemna bawl ding ahih kei leh ahun sottoh in kiging hun la toto zaw uh hi.

Lel dingcih thei gige in na do teitei pen, pawlkhat in hangsan salpha hongci dinguh a, apil te in Mihai hi hongci lel dinguh hi. Zo mahmah dingcih na telkei leh a thukan laiphot inla, na tha ahilo midangte tha muana zawhsawm na hih leh na muante mahtawh do khawmin la nangbekin va tuamdo kei in, na tuamthuak dinga, na nuntakna a beikhitteh kila kik thei nawnlo hi.

Kawlgam sungah khuapi Myo 330 val bang oma, tuasungah Myo bangzahin kawl galkap ukna buluh te do uh cih na thei kha hiam? A do nailo Myo te zong ukna buluh galkap te apawlpih hi zenzen lo uh hi. Pilvang takin gamtang uha, NUG te mihek leh kalsuan zia ngakphot uh hi. NUG in kawl uital te do ding a pulaak uh pen, amau thu aa adodo teng a thauhkhanna ciangbek hi in, amau kipan nailo, gamnuai mi thautawi taktakte tungah thakhatin do khawmta ni ci in bangmah genna nei nailo uh hi. Thu ngaihsun khial kei ni. 

Na Vision leh na tumna goal pen Kawlgam bup buaina vengsak pakding ciangbek ahih leh NUG mahtawh kopin amau cihcih ngakin amau tawh nasem khawmding hi hang, ahizongin Zomi le Zogam mailam saupi ding thungaihsun kawmin iminam aa dingin nasem mapangte nawngkai sak kei in.

Tulai tak khua hunpen, Kawlgam buppi in thakhat in a do masiah en Zogam leitang pan mawk do masa lo ding hanga, Kawlgam bupin thakhat in a do lianleh Zogam buppi tavuan la aa adoding ZRA te tawh mapangkhawm in a dolian dingin amansa (ready) sa in om ding hi hang.

Zogam sungah gal kido na phualpi a suahding hanciam keizaw inla, Zogam leh Zomite gal sungpan a bitna dingin hanciam zaw in.

Credit : Sia Cinpu

Ygn khuapi ah galkap misokte Vanleng.