Norway 
June 11 ni thungetna ka neih laitak ka muh teng lamdangsa in ka phone sungah gelhsa-a ka koih, ka phone kisia in ka mansuah kik a, lungnuam thei lo ka hih manin a tomin hong gelh kik hi ing.
Zomi khangno tampi munkhat ah kipaikhawm ka mu hi. Mipite lawpin mikim lungsim sungah lametna lianpi nei tek uh hi. A tung masate in kikhopna innpi sungtawng lam pan tutna hong la zel uh a, group kim in guitar khat tek hong pua uh hi. A tung masa sa in guitar tumin Pasian itna gam itna late sa ziahziah uh hi. Kei zong a laizang pawla tungte tawh guitar khat tum kawmsa in ka lut leh, a tung masate in tum leh pha zo, a nunglam a te in hong tum non kei un ci-in hong kikhaam ahih manin ka guitar tum khawlin ka tukhian hi. Ka ngei-a tupa khatin ka liangko hong len ahih manin kua hiam ci-a ka et leh, lasiam guitar tumsiam mahmah midangte sangin zong a siamzaw khat hi cih ka thei hi. Nang zong hih i guitar hong tum lecin hoih lo ding hiam ci-in ka sawl leh phamawh kei daitakin om hithiat ni ci-in hong dawng hi.
Ko lutkhit nunga hong lutte zong guitar tum kawmsa lasa kawmsa mahin hong lut tek uh a, kuamahin khaam tuan lo ahih manin, Pasian kiangah thungenin ka dot leh, Zomite sungah kilangbawlna kikhentuamna tampi om in lungsim maan lo mitampi om hi cih hong musak hi.
Tua laitakin a tung masate sungpan makai khatin a khut hong laamto-a thu gen dingin hong dingto ka mu hi. (Tua mipa in Kawlpuan tungsilh phianni taihpong silh-in a awm ah utong lim kisuang hi.) Mipi laizang thugenna munah hong pai-in thu hong gen a:-
‘’Tuni kei kong gen nop thu in thudang hi lo hi. Zomite a kua mapeuh kei hing ci-a akingapsa cingteng mah a paikhawm ihih manin, khat khit khatin i kilai/kibuan phot kul ding hi. A zo peuhpeuhin thuneihna khempeuh la ding!’’ ci-in mipi hong to ziahziah hi. Mipite in lamdangsa in khat le khat ki en duamduam uh a, mipi lungmang mahmah a om ka mu hi.
Tua laitakin Topa aw hih mipi nong muhsak Zomite bangci om ding deih na hiam ci-in thu ka nget leh, Pasian Khasiangtho ka sungah khauhtakin hong lut-a, Khasiangtho in thakhatin hong ding to sak hi. A lai-a ding makai thu genpa maitang limtakin en kawmin, ka sungpan tua Pasian Khasiangtho in ka muk ka kam zangin thu hici bangin hong paukhia hi.
‘’Hici banga Zomite khat-le-khat kitona, kilemlohna kilangbawlna, kitot kilaina, lungsim kithutuaklohna mun-a zang ding nahih uh leh kei om nading mun hi lo hi. Ka na pusuak kul zaw ding hi. Ahi zongin, ka pusuahma in thukhat hong vaikhak nuam ing. Zomite pen a beisa hun lai-in micitak, mithumaan, keimah a nungta a Sangpen Pa Pasian mai hong zongin hong um, keimah a nungta tawntung Pasian khatbek om ka hih lam hong thei-a ka thumaanna ka thuciamnate leh ka thupiaknate bangin a hong zui minamte na hi uh hi. Keimah a nungta Pasian ka hihna hong thei lo thu-um lo minamte geelna leh bawlsa ngeina lampite zui-in amaute tawh kipawlin na nasep uh leh, na tukhang na takhang un na suakta ngei non peuhmah kei ding uh hi. Kei sangin minamdangte maibiak ding leh mite tungpan thupha ngah ding lametna tawh na minam sung uah makaih a sawm na om lai tazen uh hi. Hici bang lungsim na neih suaksuak lai uh leh, note tawh kong omkhawm thei kei ding hi. Zomi khempeuh beimangin cimang thei lai ding na hih manun, a hun om lai in limtakin kingaihsun pha lai un.’’ cih thu teng hong pulaak khia hi.
Tua ciangin khuadak in la, na kiim na paam ah kua om hiam? cih en in hong ci hi. Ka et leh, Zomite kiim ah pawite, kawlte, kalate.... cihbangin pau nam tuamtuam minam tuamtuam minam neu minam lian tampite in Zomite hong umcih a om ka mu hi. Tua minamdang tuamtuamte in Zomite muhloh kalin khat le khat mitheek kipia sim uh a, kinuihsan in Zomite etneuna simmawhna mit tawh en uh-a Zomite in theipha lo uh hi. Zomite pawlkhatin tua mite maibiak in amaute nungzui-in hamphatna ngahsawmin diangin buaikeei mah ta leh, kuamahin amau kilamet bangun bangmah na pia tuan lo uh a, na en neu semsemin nengcip semsem zawsop uh hi. Zomite khasia in kap uh a, lungsim khankuunkawmsa leh maizum taka om ka mu hi.
July ni 4 ni-in leitung muntuamtuan pan Zomite kihokhopna khat ahi zoom meeting ah ka thungetpih international prayer hun nihte nusia in ka lut a, hun a man dipdep khit ciangin kihokhop thu kikikupna ah a kigen thute lungngai kawmsain Pasian tawh maitang kituaha thungetna intercession prayer lam zuan kikin naikal 5 kiim sung Pasian tawh kihona thungetna hun ka na ngah hi. Pasian hong muhsaksa thuteng a ngei bangin zan ka mangsungah hong muhsak kik ciangin lamdangsa in thu ka ngen hi.
Tua ciangin Pasianin Zomite tunna dinmun etsakna vision hong pia leuleu hi. Tua ka vision muhna hici bangin hong lak ahi hi.
Zomi mipi honkhat mualdawn khat ah hong kahtoh sawm uh ka mu hi. Lampi haksa in to mahmah a, keenkawm suangkawm ah hong luai uh a, a kahnopna uh mualdawn hong naih mahmah ta uh hi. A tupna mun uh a tun nadingin themcik gampa lak tawnin hong pheipai pian lai deuh leh ol no taka a tung ta ding uh hi napi in, a lampi ding uah lopa po in muh pak theih lamngil omsa hilo ahih manin, munkhatah hong dinkhawlin mualdawn bangci kahtoh lai ding cih thu hong kikum uh hi. Tua laitakin minamdangte lakah leh mundangte gamdangah zong mitawh kibanga nasem in makai ulian a sem ngei mipil misian milian thuthei makai kici mi nih leh thum hong dingkhia uh a, Zomite minam min tawh hih mualtung mualsang dawn dong tun nading kahtohna lampi lam kician zuih ding takpi zong a om lohna ah hi mun ciang dong haksapi taka hong makaih Zomi minpua i makaite in bang a ngaihsutna uh hi mawk ahi hiam? I minam ii i lemlawh ding bangmah om keeilo pi-in mipite hong khemin a hong genthei sak lel ding bek uh hi. Bangmah makai theilo, bangmah semlo, bangmah sem theilo, mi gina zong hi kei uh, mihai hon hi... cihbangin zahkona kammalte tawh nakpi takin zahko in akawkngawp khit uh ciangin, a langkhat lama om mualtung kahtohna lampi gil omsa khat zui in a niamzawkna lam a om khuadakna mualbawk mualciangh khat lamzuanin mipite tuahpihkik ka mu hi. Hih pen Zomite min, minam min tawh kalsuanna leh nasep maalaknate a thupi sim lo, minam min tawh kipawlkhawmin minam buppi pankhop sepkhop ding a sawm lo, min leh za, thuneihnate akipan a baihsa-a ngahtheih nading bek ngaihsutna a nei, midangte khut midangte vaihawmna bel-a nasep maalak a sawm mipawlkhatte hangin hong tung thei ding Zomite dinmun kong etsakna hi cih hong hilhcianna zong ka ngah hi.
Nakpi takin thungetna tawh panla tek ni. Pasian in Zomite bangci kalsuan ding hong deih hiam cih theih sawmin Pasian maipha zong ni. A thei nuam velvelte tawh mimal in kihopihna hun lem tuamkhat lak theih hi.
Hih pen nett sungah kuppih dinga kong gelh hi lo hi. Pasian leh kei kizopna ka thungetna ah Pasian in hong muhsaksa thu nihvei thumvei hong muhsak kikkik ciangin minambup mailam dinmun ding sinnuam thei loin hong gelh phapha hi ing. Thu hong ngetpih ing. I kiseppih theih a dang om kei. Topan a telsiam dingin thupha hong pia hen.
By: Sia. Thang Khan Thawn Suante
Norway
No comments:
Post a Comment