KEI ZONG NU KHAT HI NUAM ING

 KEI ZONG NU KHAT HI ING! 

1. Mi khempeuh adingin ka gina zo kei zongin, ka tate' ading Nu
   hoih hi nuam ing.
2. Mihaute bangin adeihdeih uh ka leisak zawhloh hangin a kisapna khempeuh uh a kicing sak den
   Nu hi nuam ing. 
3. Guahzuk ciangin vasate in singkung lian a muh teh lungnuam in a khawl mah bangin, ka tate' ading a lungmuanna Nu hi nuam ing.
4. Khuaite in paak amuh uhteh akiimah bawmin azu adawn mahbangin, ka tate ading gilvahna "Nu' hi nuam ing.
5. Tuivot kilkel in i tawl hong damsak mahbangin ka tate' ading tawldamna Nu hi nuam ing.
6. Leitungah lingpak bangin (Nu) numei melhoih atam hangin, ka tate' adingin, alungkimna uh Nu hi nuam ing.
7. Ka paina khatpeuhah hun ka lapzo kei zong, ka tate' ading avai khempeuh uh hun mansak den Nu hi nuam ing.
8. Pilna nei-in ka minthang zo kei zongin, ka tate pilna sangpen atunpih Nu hi nuam ing.
9. Pasian nasemte bangin thunget ka hat zo kei zong, ka tate' ading ka thungetna a ngah den Nu hi nuam ing.