DONALD TRUMP GUALZAWHNA THUKHUN 10 TE
Donald Trump pen tulaitakin Kum 73 pha-in USA ah kumpi 45 na hi. USA tangthu sungah kumpi Upapen hia, Business Mihau Kumpi asuak masa pen pa ban ah, USA kumpi khasum $33,333 lalo a Kumpi sem masa pen zong ahi hi.
USA ah Billioner kumpi masa pen ahih ban ah Mihau kitelna ah 248 na ah om hi. A sum leh neihsa a vekpi pen 3 billion kim dingin kiciamteh hi. Amah pen Politics lam ah alut ma, Kumpi asepma business kat leh TV show lam ah inntek semin alawh cing nuam asa mahmah khat hi!
LAWHCINNA DINGIN
1. Nuam nasak nasep sem in.! Nuam nasak nasep nasep leh gualzawhna in hong zui ding hi. Sum ngahna ding bekin na sep leh gualzawhna taktak nangahzo kei ding hi. Nop nasak na nasep leh sum nangahpah loh hangin sum ing hong zui ding hi. Nop nasakna mun ah hoihtak na nasep leh gualzawhna taktak na mu ding hi!
2. Gualzawhna pen guallelhnate pan hong pai hi.! Gualzawhna pen thakhatthu in kingahlo a natuahkhak thute pen na gualzawhna dingin pilna hi. Na tuahkhak thute pen gualzawhna dingin sia hoih penpen hi.
#Trump in guallelhna nam10 na nei hi.
1) Trump airlines ci-in tua vanleng airline pen sumin guallel in khawl kik hi.
2)Trump mortgage ci-in Inn lei nuamte sum leitawi piakna bank hong in sumin guallel in khawl kik hi.
3)Trump Game ci-in game kimawlna company khat hongin tua sum in khawl kik hi.
4)Trump network ci-in cidamna lam zatui leina company bawlin sum in khawl kik hi.
5)Trump entertainment (plaza) ci-in company khat bawl in tua zong sumin khawlkik hi.
6)Trump steaks ci-in bawngsa kanna Company khat kipanin sumin khawl kik hi.
7)Trump magazine ci-in business khat kipan in tua zong sumin khawl kik hi.
8)Go Trump.com ci-in travel company khat mah kipan in sumin khawl kik hi.
9)Trump ICE ci-in dawnding tuisiang bawlna Company kipan in tua zong sum in khawl kik hi.
10)Trump university ci-in 2004 kumin kipanin tua zong sum in 2010 kumin khawl kik hi.
3. Guallelh ding lau kei in! Guallelhna khat na tuah ciangin nang aguallel hilo in, gualzawhna ding lampithak amu ding ci-in kingaihsun zaw in.
4. Thuakzawhna nei in! Na gualzawhna dingin thuakzawhna nei in na Lungsim kemzo in. Mite in hong gensiat ciangin lungneu,lungkham gawppah lo in, hong phat ciangin zong Lungdam luapah kei in la, gualzawhna dingin Lungsim kemzo in, Thuakzawhna nei in.
5. Lungkia ngei kei in. Never give up! Na sepna khat peuh2 ah na gualzawh kei leh zong lungkia ngei kei in, nasep zia laih in adang zon ding hilel hi. mipil misiamte bek agualzo hilo a leitung ah alungkia ngeilote agualzo hitawntung zaw hi!
6. Na gualzawh nop leh nang leh nang agualzo in kimu thei in! Khat veivei nangleh nang agualzo in kimuh ding haksa kha ding hi. Eilehei gualzo a kimuhpen gualzawhna ding in athupi mahmah khat hi. Mite tungah kingalua kei in na lungkia in na guallel ding hi. Nang leh nang a gualzo in na kimuh theih nak leh gualzona nangah ding hi.
7. Na sungtawng makaihna zui in! Banghangin mi pawlkhatte guallel hiam cihleh a pualam mite thu zui uh hi. Mipawlkhatte anulepate cih danbekin gamta uh a agualzawh zah dingin gualzolo uh hi. Na kimlepam mite genna sangin na sungtawng makaihna zui-in khensatin sem zawle cin na gualzo ding hi.
8. Na Cidamna ding thupi sak in! Trump in acidamna ding thupi sakin zuleza khamtheih zanglo hi. Tua hangin cidam in hat mahmah hi. Tua mah bangin a tate 5 teng zong zuleza Khamtheih zanglo dingci-in pantah in aneu lai in khamtheih guihtheih zanglo ding ci-in kizuisak hi. Gualzawhna dingin cidamna thupisak in.
9. Na khat peuhpeuh ahoih lamin muthei in! Ahoih lamin muhtheihna in Lungsim thahatna hong pia ding hi. Ahoih pen ding na lamet bangin, asia pen dingin zong kiging khawl den in! Gualzo mite in asia pen zong ahoih in muthei a, a guallelte in asia atuahciang ahoihin mutheilo i guallel uh hi. Na guallelhnate pen gualzawhna dingin kahlei ahih lam phawk in.
10. A hoih pen ding lamen den in! Ni atanlaiteng Pasian hehpihna om hi cihphawk in. Mailam ah gualzawhna leh thupha lianzaw in hong ngak hi cih muhna leh phawksa in nungta in.
Pasian in mailam ah gualzawhna tawh anungta thei dingin muhna hoih ngaihsutna thak tawh hong tonpih hen!
Sia Pauthawn Video pan
Teikhia: Siam
No comments:
Post a Comment