ZI LEH PASAL BANG CIZON DING BY: REBUID & RESTORE

KOPPIH BANG CI ZON DING?

Hih leitung a om mi khempeuh buaina hi cileng igen khial kei ding hi. I khangdong ma, Zi/Pasal nei thei ding dinmun a i om ma pek a kipan in i buaina ahi hi. Hih dotna “KOPPIH BANG CI ZON DING” cih pen a dawng thei tawm mahmah a, a dawng thei ten bel zi/pasal nei khial hetlo uhi.

I nu leh pate kiang ah hih dotna dong leng  hong dawng dingdan uh theih sa ahi hi. “Hoih tak in om in la ka thu mang peuh le cin ken nang ading ahoih thei lua ing” hong ci pah ding uh hi. I lawmte dong leng, “it pen tawh kiteen ding himai,” “Mi hau ahih keh sepna hoih nei tawh kitengle hampha ding himai hi hong ci ding uh hi.” “Pau kibatpih mah tawh kiteen ding ahi hi.” “Kristian mah tawh kiteen ding hi,” “Hong it leh hehpihna tak tawh a hong kem ding pen tawh kiteen ding hi,” “Innkuanpihte deih sak penpen tawh kiteng ding,” “I thuzawh ding penpen tawh kiteng ding,” “Lungsim hoih tawh kiteng ding,” “Pasian lau tawh kiteng ding hi,” cih leh adangdang tampi hong gen ding uh hi. Hihdan thuhilhna teng hoih mahmah bang ta leh, hoih hi, hoih kei ihci tuan kei hi.

MI PAWLKHATTE ZI LEH PASAL ZONDAN A TANGPI IN EN MASA NI.

[1] LAI SIAM, SEPNA NEI, SUM-LE-PAI HAU
Laisiam, government sepna nei, mi hau icihte tulai nungak/ tangvalte thupitsak leh deih mahmah ahi hi. Hidan lungsim tawh mikhat peuh zi/pasal dinga vaneih ziau ding cih peh khial thei lua ding hi hang. A mi pen kiteen pih hizaw lo a, a siamna, aneih-alam kiteenpih kisuak lel kha thei ding hi. I Lawm-le-gualte tung ah ileng kha maithei ding a, ahih hang a simtham a khitui i nulna ding tampi omkha maithei ding hi. Tuaban ah mi haute ong nikhat zankhat thu a zang mang thei ahih lam zong theih huai hi. I simmawhte zong i theih loh kal in mithupi, mihau suak thei cih i mangngilh loh ding thupi hi.

[2] MEL HOIH, ETLAH HUAI
Mihing mel hoih deihlo bek kitawm mahmah ding hi. Zi/pasal melhoih deihlo kuamah ki-om khollo kha ding hi. Mi pawlkhatte in lungsim bel  kibawl thei, mel bel kibawl thei nawnlo ci-in melhoih bek zong uh hi. Hih bang mite'n zi/pasal ding a mit uh tawh zong uh hi cihpen kician mahmah hi. Melhoih leh taksa etlawm sak mana mi khatpeuh ih kitenpih leh kikhial mahmah lua ding hi. Damlohna hangin mel-le-puamte i etlah huainate hong sepah thei ahi hi. Accident hangin i hoihna teng hong bei thei hi cih phawk ni.

[3] MI MINTHANG, LASIAM, TALENT HAU
Pawlkhatte'n a mi deihdante uh kiteen pih mawk uh hi. ‘Lasiam sakte leh mi minthangte khawng kiteenpih kha leng miten hampha hongsa ding uh hi cia, mi minthangte a delhdelh mi pawlkhat om uh hi. Tua banga thupi a sak mite uh a kiteenpih khak ciang un a ngaihsutdan uh nabang khollo in a lungkham na ding uh hong leh tam thei hi. Hih bang a  mi minthangte a tamzaw in muanhuai khawllo uh ahih man in kiteng tul cih ding haksa mahmah hi.

[4] EI CI-LE-SA, PAU KIBATPIH, TAWNDAN KIBATPIH
Pawlkhat ten namdang, pau dang cihte koppih ding in en thei mawngmawng lo uhi. Nek-le-dawn kibatpih, gam-tat, khosak dan kibatpihte mah ci a, kitengte zong anung ciang in neifuh/ neih hoih kisa tuan khollo zel uh hi. Namdang tuak hong kigawm ciang un buaina neuhneuh ding tampi hong piang a, haksa mahmah zel sa uh hi.

[5] PASIAN PHAWK, KHA MI, BIAKNA A KIZANG, PASIAN NASEM
Mi Pawlkhat in koppih ding bel Pasian phawk mah kinei leh lungsim nuam pen ding, kivuak, kisat, lunggimna cihte omlo ding ci-in Biakna or pawlpi a kizangte khawng ahih keh, Pasian nasemte khawng nei uh hi. Tawlkhat sung bel nuamsa in, lunggimna ding bel tawm deuh kha ding uh hi. Ahizongin Pasian nasem neikhate zong a kisik hun uh zong om law tham zel hi. Khami mahmah, Pasian na nasiatak a sem na pin, pasalte zahtak dingdan theilo, zite it in kep dingdan theilo mi tampi om veve zel hi.

[6] NGAIH THEIH MI, MI THEISIAM, LUNGSIM PICING
Hih dan a zong tampi mah om hi. Kiteen ma a mi theisiam leh lungsim picing bang mahmahte zong zi/pasal hong neih khit uh ciangin thuakzawh loh a zong hong omthei mawk zel uh hi. Mihing bel lungsim leh omdan kikhekkhek ahih man in maban ding gen kholh haksa mahmah hi.

[7] A VIRGIN LAI MAH
Nungak/Tangval pawlkhat ut le dah a takhin sa mite in virgin mah ci-in zongse uh hi. Amau lah mi tampi tawh gamta khin ta, ahihhangin a koppih ding bel a virgin mah neih sawm veve. Nisim a limlang a i ki-et bang a eilehei ih nuntakzia ki-et zelzel ding ahi hi. Ei virgin lo in virgin vazon ding cih pen na haksapi khat ahi hi. Tua ciangin virgin cih tinten in virgin vanei kha ta mah leng a lungsim leh omdan a hoih tuan kei leh koppih hoih nei kha kihi tuanlo ding hi.

[8] NU-LE-PA DEIH SAK
Nu-le-pa thumangte'n nulehpa thu mang leng thupha kingah ci in, a it mahmah khat na ngawn kitui luang liang in nusia in nulepate deihsak mah tawh kiteng ning kiteng uh hi. Hih bangin nulepate deihsak tawh kitengte zong hunkhop khat mah kikhen om koikoi zel hi. Nu-le-pa deihsak a kitengte sang a phalloh pipi a a kiteng teiteite kuitung zawsop cih bang om zel hi. Nu-le-pa thumang hoih kei icih na hilo hi, ahihhangin zi/pasal neihna ah nu-le-pate in amau mawhpuakna tan thei uh hen la, ahilo ciang ah thu neih sawm zaw dah le uh tate ading hoih zaw kha ding hi.

[9] DAMTHEI, TAKSA HOIH
Pawlkhat ten koppih cidam mahmah zong uh hi. Cidam mahmah mihing kideihtek ding hi. Ahihhangin i theih ding a hoih in a cidamte koppih aneih khit nung ah ci damtheilo cih zong om tham zel uh a, nungak/tangval lai a cidam hetlo icihte zong koppih aneih uh ciang a dam mahmah cih zong hong om zel hi.

[10] PASIAN KIANG A THUNGEN IN AMAN ZONG
Hihdan pen mi tampi takte hih dan ahi hi. Zi/pasal ding pen Pasian kiang a ngen den in, ahih hang in Pasian in a piak ding pen ngak zolo, Pasian aw lah ngai tuan lo, Ei deihdan hoih ihsak dan, deih dan mah zong veve, Ei mit a hoih leh lungsim ngaihsut dan leh ei lungsim dan mah zong leh en veve...Pasian kiang ah ngen om ahihhang lah Pasian zong sak tuan lo. Hih bang mite'n koppih hoih nei kha tuan lo uh hi.
--------------------------
Hih atung a mi pawlkhatte zon dante pen ahoih kei ici kei a, hibang qualityte nei numei/pasal bel ahoihlua mahmah hi. Ahihhangin hihte koppih zon dingdan man leh ahoih na hilo hi.

Zi/pasal hampha ihih ut a, zi/pasal hoih ineih ut elh, Pasian hong piak pen mah ineih ut leh tua in zi hoih pasal hoih hong hi ding hi.

ZI/PASAL BEL MITSI KAWM A ZON DING HI

Pawlkhat ten mit hak kawm in zong kimu zolo a, mitsi kawm in i mu zo mahmah ding hiam ci uh hi.

Mitsi kawm a zon ding cih bel ‘Pasian kiang a nget ding’ cihna ahi hi. Zi/Pasal ding bel Pasian kiang a nget cihtak a nget ding ahi hi. Thumthum mai ding hi a, Neu tung a kipan ngetnget, thumthum ding mah ahi hi. Ei mit a hah sung teng Pasian hak theilo a, Pasian in zong theilo hi. En i mitsi leng Aman hong zonsak ding hi.

Pasian kiang ah i deihdan bel geen theih mah hi, ahizongin Pasian khut ah avek in ap khiat a, i mi deihdan, i hoih sak dan, leh ei ma lungsim…teng gen khiat a ‘Topa nang kei sang in na thei zaw hi, nang kei ading hoih nacih penpen tawh hong kiteng sak in cia, ih ap ngam a thu ih nget ding thupi hi. Pasian kiang ah ‘hong zonsak in’ cia i nget nungsang ei kitaklah a zonzon nawnloh ding thupi ding hi. Ahun cinciang in aman hong pia ding hi. Pasian hong piak ngak zawhloh man in neihloh ding pi kineikha thei hi cih phawk in.

Pawlkhat in ‘Bang cidan in Pasian hong piak pen ka theithei diam, ci uh hi. I nget Pasian khut sung ah ih ap taktak leh Pasian in hong piak hun a tun ciang in ahong piak pen theih theihna zong hong pia khawm hi. zi/pasal hoih ideih leh thu nget hahkat ding cihna hi mai hi. Zi/pasal ding Pasian kiang ana ngenngen a, Pasian piak pen mah tawh kitengte a kisik omlo uh hi. ‘Hua pen nei kha leng maw’ cia kisikna ding omlo ding hi. ‘Pasian in zaw ka zi/pasal kei ading hong koih sak pen mah aive maw’ cih lungsim ah kingaihsun in lungdamna in kidim zaw hi. Hi bang a Pasian gawmte innsung cidam a taten zong nuam sa uh hi.

KOPPIH NEI NAILO A SIMTE PASIAN KIANG AH KOPPIH DING TUNI A KIPAN NGET CIHTAK IN NGEN NI!

A SIM MIMAL KIM TOPA IN HONG GUALZAWH PIH TA HEN!