Tulai khovel ah na Siangthou (Virgin) lai hia chih dotna kidong ding hileng kua teng in hangsan tak in dawnna i pe ngam diam? Khenkhat ten hidan khong kidot huai kei, thupi nawn kei,ichi maimah diam...100 lak ah bang zah siangthou i om lai diam? Kum ching nailou ichih te tanpha/nangawn nupa kal sex/hinkhua ana chiam khin tamtak om ta hi. Numei moupuan silh di leh Pasal moupuan silh zi dia nei dingin iching lai hia chih kiveel kik ni...
MOUPUAN SILH DIN NA CHIN LAI HIA?
Moupuan numei tampi tak ten a silh kal uh ngak lah mahmah uhi. Pasal neih chiang a moupuan silh di pen numei te lunggulh penpen te lak a khat ahi hi. Numei te ading a kizepna etlawm pen ahi chileng genkhial kei ni. Numei in moupuan ahon silh chiang in ki zahtak in etlawm leng/zong ki sa chiat hi.
Ahi leh itheih ding khat, moupuan in bang ensak hiam chih ahi hi. Moupuan ataangpi in ngou/kang sit sek hi. Hiai pen in a etsak ahih leh numei te siangthouna (virginity) ahi hi. Numei tamtak moupuan in a etsak/atheih saknop theilou a moupuan silh tampi om hi. Adik a gen in, numei virginity man suah te bel hih mopuan silh dingin tak non lou ahi uh hi. Siangthouna man suah nung a moupuan silh chih bel mipi te mai a zuau gen leh Pathian lau lou chih na ahi hi.
Numei in a koppih pasal ading a, thil/van manpha pen apiak theih omsun chu a siangthouna (Virginity) ahi hi. Mou van tam pipi ken sawm sang in siangthouna kembit in kiteenni chiang in a pasal pethei leh huai/Tua manpha pen in Pathian deihdan leng ahi hi. Numei hoih bangzah i omlai a...(Prov.18:22) Ahih kei leh nau sukhia a tualthat kha bangzah i om a...?
Numei siangthouna (Virginity) mansuah te bel moupuan siangthou silh ding in ching nawn lou uhi...!
MOUPUAN SILH ZI DIA NEI DIN NA CHIN LAI HIA?
Pasal in a koppih ading a thil/van manpha apiak theih omsun chu a siangthouna ahi hi. A siangthouna toh teh pih theih ding thil/van dang manpha lua omlou hi. Pasal tamtak ten a siangthouna uh bangmah a ngaihsun lo in kepbit na sawm khollou uhi. Kepbit sangin numei te siangthouna lak mang sak ut a hoih lou pasal tampi tak om hi. Numei siangthou tata bang en lah uh a, a siangthouna uh laksak in kimawl pih uhi.
Pasal tamzaw ten numei teng thangtatpih ding ngen in en uh a, khat veivei numei te nau bang paisak kha uhi. Tua chi bang a numei in nau a paai khak leh hehpihna neilo in taisan lai uhi. Ut dan teng a numei tampi a tatkhelh pih nung chiang un zi nei ding in hong kisa uh a, numei siangthou (Virgin) hon zong uhi. Ei/Mahni siangthou louh dan/lam kithei lou in numei kuahiam/pasal toh takhialte bang deihlou lai uhi. Ahihziak/ahih hang in amau tawh kibangmah tuakkha thouthou/veve uhi.
Hichi bang pasal te bel numei moupuan silh zi dinga nei ding in ching nawn lou uhi...!
JOSHEP & MARY A KITEN NUNG/khit NASAN UN SIANGTHOU LAI UHI.
Pathian thupiak bang in Joshep leh Mary in Jesu Kris apian ma in a siangthouna uh ana kembit uhi. Joshep le Mary nupa hita ua, miteng in nupa in pom ta uh a, inn khat a omkhawm in sun leh zaan in naa semkhawm uh a huchia kidek di chih pen bel thil haksa mahmah hi ding in igingta/ingaih sun hi. Joshep leh Mary in le hun tamtak ah chu haksa sa mahmah ding un gintak/upmawh huai hi. Tulai khovel/leitung a kingai maimaite le kidek haksa samahmah, hunrem teng a ut teng hih sawm...Joshep leh Mary kha tampi kidek chu baih liai lou di eive maw...amau taksa ut na neilou hi tuanlou uh hituan lo ding a maw...
Joshep leh Mary in Pathian alauh ziak ua kidek zou ahi uh. Amau taksa ut na sang a Pathian thupiak zuih pen ahoih zawk dan thei uh a, Pathian in amau adia hun abawl sak pen haksa leh le ngak hamham/tantan uhi. Tulai in mi tampi/tamtak ten kidek zou mahmah lou chimawk...Pathian in ‘Kei lou Pathian dang nei ken’ chi hi. Kidek zoulou ichih leh bel Sex pen Pathian sang in i poimoh ngaihzaw a Sex Pathian a nei chihna suak ahi.
Pathian in angkawm na zadah mahmah in Thukhunlui hunlai bang in tualthat tawh kikim in koih a, angkawm te chu asih ding uh ana chi hial hi. Thukhun lui hunlai a Tualthat te leh Angkawm te bel capital punishment piak ahi uhi. Huchi tel a Pathian in a zakdah ahi...Kumpi David leng Pathian lau tak himah leh ang a kawm khak ziak in Pathian in nasia tak in gawt hi...unau nang leh kei bang dinmun ah iding a? Pathian gawtna hongtung ding ngak te lak ah tel kha ihi hia?
Minute tamlou sung, nawpsakna i zon ziak in maw Pathian zak dah pen ina hih sek maimah uh...! Nungak leh tangval lai a ana thangtat te zi leh pasal aneih ni un amau ading in bangmah athak chih ding om nonlou ahih man in kipahna, lungkimna taktak neilou hi. Bangkim ana chiam lawk/kha ta ahih man un lungsim leh taksa ah lunggulh ding neilou uh a, amau ading in zi leh pasal neih ni pen bangmah lou suak hi. A koppih ua lungkim haksa sa uh a, zi leh pasal neih nung in thangtat na tawpsan thei nawn lou uhi. Kisik a bawldik theih di lah hi nawn lou a, damsung a nawpsak na taktak tel lou a hinkhua/nuntakna zang maimah te asuak uhi.
I siangthouna mansuah kha ta ihih leh leng/zong Pathian lam zuan in amah kiangah kik nawn ni. Aman a sisan in hon silsiang ding a huchi in numei moupuan silh dia chin leh moupuan silh numei zi dia nei tak in hon bawl nawn ding hi...!
Siangthouna tuni tan ana kembit lai na hih leh Toupa min phat in om hen! Amah muang kawm in kikem siangthou tou zel in, huchi in koppih tung ah kipahna taktak nanei ding a, na suante leng/zong nang bang in hong hoih ding uh hi. Nupa kituak leh innsung nuamsa chih te kua a hilou in nang a ahong hiding...Toupa khut len lai/den hamham in Unau!
Agelh tu Counsellor ahi, contact ut na naneih leh chik lai peuh in contact theih ding.
No comments:
Post a Comment