Pasian nasem ten i mipite le innkuan sung kizopna le nuntakna ah theihuai bek tham loin, zuihpah le nuntakpih ding akisam mahmah hi. Tua manin Makaihna le Innkuan Vaipuak cih thulu pen a kisam le athupi mahmah khat ahihi. Makai tampite in a ma nasepna bekbek thupisak lua liang ahih manin, thunget hun le zi le tate tawh kithuahkhop hunte cihte nangawn a don manlo liang,makai kibuaisak den pawl khat om thei ahih manin, lawhcin zah dingin kilawhcing theilo ahi hi. Anuai a thuteng en kawmin thala khawm ding hi hang.
- Amasa pen in Pasian koih tontung ding.
- Anihna ah Innkuan hi ding a,
- Athumna ah Ih nasep hi ding hi.
Hih atung order ih koih khialh leh ih nasepna I lawh cing thei kei ding hi. Mission nasemte' tate atamzaw in Pasian deihlo uh hi. Pasian in ka nu leh ka pa tawh hong kikhensak ci uh hi.PSI phuankhia pa Dr. Bob Price in asin khak thu laibu in gelh hi. Amah pen Korea gal leh Vietnam gal sungin sangmang nasepa na-ah va kihel a, naupangte vadon in vakem hi. Azi, atate tawh hun ngah ngeilo a, Pasian nasem in thamang hi. Atate in, “ Kapa in, ko sangin Korea naupangte vei zaw, itzaw hi,” ci uh hi. Bob Price in azi tawh kikhen den ahihman in numei dang khat tawh khial kha bek tham loin, azi atate te mansuah khin hi. Tua banah laibu khat gelh a, tua laibu sungah "Pasian nasem ten ih khialna lian mahmah thute; kei khial bangin kuamah akhialhloh nang " ci-in gelh a, tua laibu mi-ten kideih mahmah hi.
Nupa I cihpen Pasian in a kibanglo minih hong gawm khopna hi hi. I kibatlohna pen mawh kizonna in zang loin, tha kipiak tuahna in zang leng nalianpi sep khop zawhna hong piang ding hi. Pasian in ih hoih man a tavuan hong pia hilo in, hong muan man a tavuan hong pia hi zaw hi. Thu ngenngen Pasian nasemte zite zindo siamin, counseling zong siam uh hi. Numei pil in inn lam a, numei hai in a kilamsa nangawn susia cih Paunak LST sungah kimu hi.
Ih nupa kikal i cidam hiam? Buaina hong pai caingin a pualam pan hong pai masa lo-in a sung pan hong kipan masa hi. Tua hihman khat leh khat kizopna (Communication) neih kul a, hun zat khop mahmah kisam hi. Na pasal/ nazi birthday te ciamteh in la, a huntan pha (anniversary) te ah kipahtawi ding kisam hi. Dotna khat kidong hi leng..."Conference khat ah nang thugen ding hi in la, na zi hong cina dihdih leh na pai teitei diam? Conference pen nang lo tawh piang thei dinga, nazi pen nanglo tawh pianglo ding hi.
Pasian nasemte in Innkuan biakpiak khopna neih den dign thupi mahmah hi. Biakpiak hun pen kitaai hun a zat ding hilo hi. Innkuan i cih pen Bawlung Team khat tawh akibang hi hang. Ei I kuan khiat laitak, I nungah i zi, i tate ei tawh pang khawm ahih lam theihsak ding kisam hi. Gamtat hoih kipatkhiatna bulpi pen inn sung pan ahi hi. Tate tungah bang thupi sak I hiam cih genpih in. Hih a nuai a thute thupi tate' tungah gen masak ding kisam hi.
- Pasian zong masa in.
- Zi/pasal neih ma in angkawmna bawl kei in.
- Taten alawm ngaih khawng hong gen ngam ding kisam hi.
Tua bang ciang tai kei in la, thungetna tawh ngak zawh ding cihte le thu ngetsak pah in. Pasian deihna I zonna pen lawhcinna kipatna ahi hi. Pasian nasem ten I nunga, khangsawn ten a luah ding gou (legacy) koih ding ngaihsun ding hi hang. Nang hong keem ding (mentor) zong in. Mentor I cih ciangin in eimau hopih masa den ding hi. Tua manin Pasian nasem khat le makai khat peuhpeuh in, innkuan sung makaihsiamna panin i nasepna ah lawhcinna le makaih zawhna kineitheipan ding ahi hi. Makaite pen a gina/ gina kei phial zongin, nungzui nautang mite in hong etteh veve uh cih phawk den in.
By: Siamah Lucy Eng Za Dim,
No comments:
Post a Comment