A HUN ACIN CIANG LAPTOHNA NANGAH DING HI.

AHUN ACIN CIANG LAPTOHNA NANGAH DING HI  sunday April 12. 2015
1Peter 5:6
By: Sia Thangboih ZBCM

1. Pasian laptoh na ut leh MUHNA MAN NEI IN.
@Jesuh lawn mittaw pan muhna man
@Samaritan mipa muhna man, Biakna dan, ngeina dan, kumpi dan hita kei leh muhna man tawh miliam pa kem in en

" Na muhdan aman leh ahun tun teh laptohna ngah ding"

Ruth in atek nu Naomi apasal ....

2. Pasian in hong laptoh theihna dingin "ZIN LE LENGLA DO SIAM IN"
# meigongnu in Elijah zin hoihtak do in thuph ngah...
# Isau   in ankuang khat tawh inn luah za kheng...
# Jacob in ankuang khat tawh thupha sang laptohna ngah,
# Abraham in vangtung mite hoih tak lengla do in ta ngah,

" Siate leh Zin le lengla hoih tak do in"

3. Pasian in hong laptohna dingin "NA HIHNA KHEMPEUH LIMTAK SEM IN"

4. Pasian hong laptohna dingin " NA HOIH SEM IN"
# Modekai in Kumpi pa tung na hoih sem a, ahun cin teh kilamto
# Esther Bangin minam ading nahoih sem in ...

Laptohna, thupha cihte pen  kideih ciat a tuate pen na hoih ihsepna pan in hong piang zaw hamtang hi.

Pasian hoihna ih muh nop leh na hoih asep kul ahi hi. Galati 6:9

Topa thupha
By Siam Khaute

BANG CI LEH NUPA KITUAK THEI DING?

BANG CI LEH NUPA KITUAK THEI DING?

Leitung ah Nupa kithu tuak mahmah te zong khat veivei na kitawng thei zel veve uh hi. Nupa kihehsak, kitheisiam lo, kitawng cihte om thei tham hi. Nungak le tangval ahih lai a, kingai mahmah le kituak mahmah te zong hong kiteng khin le uh kitawng, kihehsak hun nei veve uh hi. Kitawt le Kihehsak hoih lo lam telmahmah a, kithutuah sawm mahmah a hanciam/panla den Nupa tampite zong Kithutuak lo, kitheihsiam loh hun nei zel veve uh hi.

Nupa kal kitheihsiam loh na leh kithutuah loh na hangin Nupa tampite kikhenin Innkuan kisia tampi tak om in, Tagah tampi na om lawh hi. Nupa kal buaina hangin Mipawl khat lunggim lua in, Anuntakna uh bei lawh kithat tangial in, Pawlkhat in alawm, Koppih maw, ahih kei leh midangte nuntakna bang na la tangial thei uh hi.

Banghang a nupa kal buaina hong piang hiam ci-in vakan taktak le hang thupi vet lo pan hong kipan n ahi lel thei hi. Thupi vetlo na neucik pan hong kipanin atawpna ah thulianpi tak hong suak thei a, Buaina lianpi hong suak thei zel mawk hi.

Nupa kal buaina hong piangsak atangpi in: ih Lawmnu,pa tung ah ih mawhpuakna ih theih loh man, Numei or Pasal lamte zia theih luat hang, Nuntak khuasak haksat luat man, Sum zatdan kitheih siamloh man, Nasepna kiphawkpih loh man, Lungsim utdan deihdan kitheih loh man, Sep leh bawl kihuh,panpih loh man, Nu le pa zanthu kituak loh man, Nupa kal kimuang, cihtak loh man, Kham theih guih theih hang, Pasian phawk loh man leh adangdangte na hi gige thei hi.

NUPA KITUAH NA DING A KISAMTE
[1] KITHEIH SIAM TUAK DING
Nupa kitheisiam tuak icih pen sum-le-pai in lei theih loh aman manpha ahi hi. Nupa aki theih siam nak u leh a hinkhua, nuntakna vuah, a sepna vuah, innkuan khosakna vuah leh Na tuamtuam te ah haksatna hong tung ta leh a kikaal uh cidam den ding a, lungsim khat tawh kalsuan khawm gige thei ding uhi.

Nupa kal ah kitheih siam na a tangsap, kisap leh bel nuntakna sung ah a nuam cih gen ding tawm mahmah ding a, ki hehsan leh kitawng cih te Inn sung ah om mun mahmah ding hi. Tuahangin nupa kituah na ding in kitheih siam tuah kitang sam mahmah hi.

[2] KICIAM NATE MANG NGILH LOH DING
Nupa bel kihehsak khak ni omthei tham a, lungsim anat mahmah ni zong om tham ding hi. Tuadan a koppih,zi/pasal ten hon hehsak khak uhciang, ahih keh koppih tung a I lungsim a sat vitvet lai tak in nidang a I kiciamnate ngaihsut kik ding hoih hi. Nungak-tangval ihih lai a ‘itna leh khualna tawh kong kem ding, ih cihte phawk kikkik ding ahi hi.

I ki-it, ki-ngaih lai a igen te leh kiteenni a mipi leh Pasian mai a ikiciamnate i ngaihsut kik ciangin i lungsim natna leh hehnate hong dam thei zel hi.

[3] NUPA KAL A KUAMAH KIGOLH SAK LOH DING
I koppih, zi/pasal toh ikal a bang hiam, thu a om ciangin midang kiang ah gen sese lo a ihih siang pah ding ahi hi. I koppih tawh ikal a midang hong kigolh lut mawkmawk ding uh hilo hi. Midang tawh ikikal thu ah bel a uut teng hong kigolh, lut phial zongin I koppih toh ikal ah bel Jesu lo kuamah dang I cial loh ding hoih ding hi. Midang hong kigolh lut the ahoih lam sangin, asia lam piang zaw a, Na neucik zong thulian pi hong suak zaw thei mawk hi. I kikal ah midang hong kigolh lut leh bel ei nupa kal ikitheician zo nai kei a, mun awng lianpi omsak lai cihna hi.

I koppih tawh lungsim nop lohna leh hehnate hoihtak gen khawm a kituahna ding lampi zong khawm ding ahi hi. Tua ahih manin Nupa kal ah Jesu Khris lo kuamah akigolh lut loh ding kitang sam hi.

[4] KI PANPIH TUAK DING
Tulai Leitung ah ‘numei na’ ‘pasal na’ cih om lua nawn lo hi. Ki panpih tuak a sepkhawm theih te sepkhawm ding ahi hi. Khat manlo, gimzen a kipeipei-in khat lah hih ding theilo a lum hithiat cihpen man het lo hi.

Nupa ki panpih tuak theilote a lungsim uh zong kigamla hi. Nasepna ah nupa aki panpih tuah ciang un a lungsim uh zong paikhawm hi. Koppihte nasep pen I hih theih lam hi kei mah leh ihih theih zahzah a ih panpih leh tua in kithutuahna piang sakin zathu zong hoih hi.

[5] HEHNA OM LEH KAMDAM A GEEN DING
I heh mahmah laitakin mawkpau lo-in Thagum zat het loh ding thupi hi. Thagum ih zat leh anungciangin ih kisikna ding kisem kha thei hi. Heh mahmah laitak ih kam a ut teng gen, Kivuak ek sangin Hehna pen kamdam hoihtak a kigen ding hi zaw hi. Heh mahmah lai tak a kamdam agending cih pen thuhaksa mahmah hi a ahi zongin kisin leng hi thei lel hi. Kamdam a genkhawm theih pen nupa kal cidam na ding leh tate thunun/uk zawhna ding lampi hoih mahmah ahi hi.

[6] EI NOPSAKNA DING BEK NGAIHSUN LO DING 
Mi pawl khatin koppih te ading khual khalo-in a utut in om in nungta thei uh hi. Ei lunglut dan, ei ngaihsut dan, ei nopsak dan, ei duhdan leh eikalsuan nop dan bek a ih lawm nu/pa kaih ding hi zenzen lo hi. Ih Koppih zong eidan mah a Mihing nuntakna nei khat hi in, lungdam thei, dah thei  ahih lam ihphawk ding kitang sam hi. Tua mah bangin ih lawm/koppih ih lunglutna, duh, deih, utnate zong ngaihsut sak a lungdam sak kisin ding a hi hi. Ei nopsak dan a ih gamtat/tal pen Koppih thusim lohna hi pah lel hi. Amau ading ngaihsut pih a, nopna, dahna leh Lungdamna cihte ah kikup a, Anuam ahaksa ah ih thuakkhawm pih ding ahi hi.

[7] MIDANG TOH KOPPIH TEH KAK LOH DING

Koppih te midang tawh tehkak hetloh ding ahi hi. Midangte ei koppih sangin ahoih zawkna ih muh, theih leh zong ei apen tawh tehkak ding hi zenzen lo hi.  Ei koppih in zong midang tampi te sang a hoih zawkna neikha ding ahih man in, a hoih lohna lam imuh ni in ahoihna lam zong muh sawm ding ahi hi.

Ataktak in gen le hang ih Koppih pen midangte sang hoih ih sak zawkman in ih neih ahi hi. Tua ahih manin midangte koppih tawh ei koppih tehkak a, koppihte tung a phunphun cih te ciin loh ding hoih hi. I koppih tung a lungkim dan ding kisin a midang etlah nawn loh ding ahi hi.

[8] BUAINA HIH VENG PAHPAH DING
Buaina, kitheih siamlohna, hehna a om ciangin sawt kidiah sak loh a hihveng sawm pahpah ding hoih hi. I heh lai mah a, kamdamin gen a, I koppih tawh kikup a veng sak ding ahi hi. Hun hong sawt ciang in I kal ah kitheih siamlohna ding hong kibehlap den ding a, asawt ciangin thu lianpi hong suak thei hi. Lungsim hong kigamla deuhdeuh ding a, na neucik ah zong kitawtna hong piang pahpah ta ding a, atawpna ah nupa kal ah I ut loh tantan kitung thei ding hi. Tua ahih manin Nupa ka ah hehna aom leh khawl lo-in genveng pahpah ding kitangsam hi.

[9] SUM-LE-PAI ZATNA KI THEIHPIH DING
Nupa kikal a kituah lohna hong piang sak ut mahmah te lak a khatin sum ahi hi. Koppih te tawh sum zatna kitheihpih tuah hamtang ding ahi hi. Khasum lak ciangin sum zat/zek ding dan kikup a Budget gel khawm hamtang leng hoih hi. Kha sum tam zaw pen in sum tam zek zaw ding cihna hi luan lo a, a kitangsam bangin sum zat khawm ding ahi hi.

Sum zangsim cih pen hoih het lo a, nupa a ih neihteng ih zekkhop,neihkhop ding thupi hi. Sum in nupa kal ah siatna leh kikhenna ciang hong tun thei ahih manin I sum muhna, zatdan leh neih zahte kitheihpih a kikup ding thupi ding hi.

[10] TUP LE NGIIM NEIH DING
Nungak-le-tangval ki-it, ki-ngai a kiten mawkmawk a, maban bang cidan a nungta ding cih athei lo nupa Leitung ah tam mahmah hi. Nupa pen ta neih ding mah hi a, ahih hang ta neinei pongin tup-le-ngim neih loh pen hai huai leh hai na khat ahi hi. Leitung ah ih nuntakna ahang thei mel lo a ih om ciangin Nupa kal ah kiningna leh kituah lohna hong piang zel hi. Nupa in ih maban ah sepding, bawlding, (Goal) tupna kician ih neih ding kisam mahmah hi. Mailam ah sepding bawlding ngimna kician ih neih ciangin ih nupa in ih lungsim kigawmkhawm thei bek a, kithutuahna hong piang thei hi..

[11] PASIAN NEIH DING
Pasian pawk anungta nupate innkuan sungpen atangpi in kituakin, nuamin, cidam lawhcing hamtang se uh hi. Nupa kal ah Pasian liansakin hong ding ciangin kitheih siamlohna, kitawtna, kihuatna, kivuak cihte om lo hi. Pasian I kal ah hong ding a, hong gawmtuah Pa a, hong pang ciangin nupa lungsim mun khat ah luang, ut kibang, kitheihsiamna om in ki-it tuak takin kal kisuan khawm thei hi. Pasian nei nupa bel leitung ah midang bang in nei zolo in, pil lo in, nek zawnna haksa in, genthei ta mah le uh lungdam, kipak thei gige/den  uh hi.

------------------------------------------------
Leitung ah nupa kutuak utlo leh kituak lo ding a kiteng kua mah om lo ding hi. Ki-it mahmah leh kingai mahmah akiteng, ahih kei leh kingai hetlo a kiteng te nangawn zong kituak a khuasak dialdial ding uh tek ding uh hi. Nupa tampi te in Nupa kal nuam mahmah in innsung khuasa ding a ut lai takun alam et loh pi uh innsung nuntakna haksa, nuam lo pen tung thei mawk uh hi.

Nupa pen ship or tembaw bang nih tawh kibang a, alangkhat ahoih mahmah hangin, alang hoih kei leh tui hong lutin tum mang veve ding hi. Tua ahih manin Nupa pen Khat hoihin khat sia cih om theilo a, ih nihtuak a hoih ding sawm a, hih leitung kituahna ding a pan lak khop,pan khop kitang sam hi.

Nupa ih cih pen Cycle tawh kibang hi. Pei lang khat hoihin Pei lang khat hoih kei zel leh taithei tuan lo ding hi. Tua ahih manin Nupa kal anopna ding, Innsung nuam ih lam theihna dingin apei lang nih ahoih kisam hi.  Nupa pangkhawm a lungsim kituaktak a kalsuan khawmte bang a nupa nuam leitung ah kuamah om lo ding hi.

Tua ahih man in I koppih te tawh I kituahna ding atung a kigelh te zuihsawm in pan la ciat ni, Topa’n leh I koppih tawh kituak tak a innsung I bawl leh kuadang innsung I eng dia…

asimte, Nupa kituak leh mite adinga etton/etteh tham cing ding Topan hong vualzawl tahen!

Hoihna sak leh na Share sawn vua, khat peuh in phattuam lawh ding!

Topa thupha

Siam Khaute

INN KUAN NUAM BANG CI LAM DING?

INNKUAN NUAM BANGCI LAM DING?

Innkuan nuam khat lam khiat zawh nading in a kisam masa penin, nupa ki-itna ahi hi. Nupa ki-itna omlo in innkuan sungah nopna om thei lo hi. Nupa cih pen mi nih hinapi-in, lungsim kituak in ki pumkhat ding, ama mi taktak ahi ding tate i neih theih nading leh i thuciamnate i palsat khak loh ding pen Pasian' deihna ahi hi. "Pasian in na zite uh tawh pumkhat, lungsim khat ahi dingin hong bawl hi lo ahi hiam? Hih bangin a hong bawlna pen bang a deihna ahi hiam? Pasian’ mi taktak ahi ding tate i neih theih nading ahi hi. Tua ahih manin na khangno lai-un na tenpih na zi uh tawh na thuciamna uh na palsatkhak loh nadingun kidawm un." ( Mal 2:15).

Nupa kaal nopsak nading, nupa kaal kilem nading pen midangte' tungah kinga lo a, ei nupa' tung tektek mahah kinga zaw hi. Nupa kaal-ah kitot kisel hun zong om kha dinga, tua bang hun ciangin a khiam zawzaw kituh det ding hoih hi. Ki telsiamna a omlo nupa kaal-ah buaina om thei tawntung ahihna zong phawk gige ding ahi hi. Nupa kilem, nupa hoih i cihte pen a kitawng' ngei vetlote hi tuan lo a, kitelsiam in a kimaisak theite hizaw uh hi. Ahi zongin a phawkhuai khat ah, nupate in ki telsiam zawh loh ding zah dongin mawhna khialhna i neih/bawl khak hetloh ding bel kidophuai mahmah ding hi.

I zi/pasal kicin'lohnate pen i kim i pam a om mi' zi mi' pasalte' kicin'na khatpeuh tawh teh khak ding hi hetlo hi. Amaute in zong kicin' lohna nei ciat uh a, ei adingin i teenpih i zi/pasal mah a thupipen hi den veve hi. Kei pen ka zi/pasal ii kicin'lohnate a huh/panpih dingin ama koppih ka hi hi, cih i kitel ding kisam hi. Tua banah, Nupate in i ki-it i kingaih hun lai(Aktui banga i kidopbawl hun lai)te khawng suut khawm kikkik a, lungngaih kikkik ding zong hoih mahmah hi. Tua in nupa ki-it ki ngaihnate nosuaksak/thaksuahsak kikkik hi.

Ei lam tuaktuak thupitsakna leh a kiniamkhiat zaw ding kituh loin a gualzo zaw ding kituhnate hangin zong nupa kaal-ah buaina om thei tawntung hi. Numei in pasal' thu man' siam ding kisam a, Pasal in zong numei ading geel siamsak ding kisam mahmah hi. Numei in pasal dong lopi-in ama thu tawh thu mawk vaihawm lo dinga, na khatpeuhpeuh kidot bawlin kikum khawm a, a hoih lamlamah iki thutuah ding kisam hi. A hoih lo lamah i ki thutuah khak ding bel kidop mahmah kul ding hi. A hoih lo lama kithutuah khakna pen lauhuai mahmah a, tua in innkuan nuam ihih nading lampi khak tan hi.

Nupa hoih hi masa lopi-in, innkuan nuam kilam thei lo dinga, innkuan sung Jesu ki-uksak lopi-in innkuan sungah nopna om theilo ding hi. Tua ahih manin innkuan nuam khat i lamkhiat zawh nadingin;

(1) Innkuan sungah Jesu mun pia-in amah ki-uksak ni(Innkuan sungah Jesu mun pia-in a mah i ki-uksak nak leh buaina leh haksatnate om vetlo ding bel ci khang, buaina leh haksatnate sungah a tawntungin kigualzo ding hi).

(2) Nupa sungah siangtho ki-itna thupisak ni(Siangtho ki-itna i thupitsak nak leh tua itna bangmah in susia zolo ding hi).

(3) Nupa sungah telsiamna leh maisakna thupisak ni(Maisakna leh telsiamna a om nak leh kitot kiselnate hong bei dinga, i innkuan sung pen kilemna tawh hong kidim ding hi).

(4) Nupa sungah ki thutuahna thupisak ni(Nupa ki lungtuak khua khat in zolo, cih paunak zong i thei khin zo hi).

Khazih sungah, David Tuang

NANG TAWH KIBANG TA NA DEIH HIAM

NANG BANGBANG TA NA DEIH HIA?

Nang bangbang ‘TA’ na deih hiam cih dotna kidong leng 100 lakpan mibang zah in hih dotna ih dong thei uh tam?.. Dotna dawng ding hi le hang Bangcidan in ih dawn uh tam? Kei dan ta deih ing or keidan deih keng ih ci zaw diam? Kei bangbang ta ka deih acite adingin sau Ngaihsut deuh ding om ding a, Kei dan deih keng acite in Bang hangin deih lo cih pen ngaihsut deudeu kul kha ding hi.

[1] KEI TAWH KIBANG TA KA DEIH
‘Kei bangbang TA ka deih’ icih theih leh Na nam nih suut ding om hi.

Khatna ah, Pasian mai a hoih, bukim kisak hang zong hikhol lo kha ding a, ahi zongin ei leh ei bang ciang hiam khat ah hoih kisa cihna ahi hi. Kham theih guihtheih khoih lo, mi dangte ading ahoih lo sem ngeilo, Mi panpih, tup leh ngim kician nei, hai gamtat lo, innsung nuamsak, Mipi ading a na hoihsem khia, Leitung nopsakna tuamtuam te ah kibual lo, nungak/tangval kal a siangtho, Zileh pasal itdan siam, midang te huh leh panpih nuam, Thuman a ding den, Nekgukna leh sum tawh anuntakna buaisak lo, Mi nunnem, Lai lam thupi sa, Pasian phawk leh adang nate tampi tak neihman a “KEI TAWH KIBANG TA KA DEIH” Cingam mi om ding hi.

Nihna ah, I hoih loh nate I ki muh loh man a, ei bangbang TA deih zong hi kha thei ding hi. Ei lah hoih het lo ahih hang a, hoih kisa mahmah in eidan TA deih ih hih khak ahih leh bel kingiahsut huai mahmah thu ahi hi. Hih dan a amah hihna kitheilo te in ta hong neih uh ciangin akepdan ding zong theilo ahih manin atate tawh kikal buai thei uh hi. Tua bangmi te in atate uh ahoih loh takciangin alawm nu/pa ngawh nuam mahmah uh a, nupa kal cidam lo thei hi. Ei leh ei hoih kisakna leh tate hoih sak loh na hangin Inn sung ah kituahna, kilemna piang het lo hi.

[2] KEI BANGBANG TA KA DEIH KEI
‘Kei bangbang TA ka deih kei’ ih cih leh asut nop nam nih om hi.

Khatna ah, ei ih nuntakna hoihsam na pi in ei leh ei  hoih kisak zawh lohna hangin eisang hoih zaw ta deih cihdan hi kha thei ding hi Tua leh pawl khatte Kham theih guih thei zang lo, Mite ading leh Pasian ading ahih theihzahzah a sem mapang mahmah in, Pasian mai ah kitel cian mahmahin Bang mah ahih loh lam kitel lua ahih manin Amah tawh kibang TA deih lo in, amah sangin Pasian phawk zaw telzaw, hoihzaw ding TA adeih na hangin Kei tawh kibang ta ka deih kei ci thei hi.

Nihna ah, sum-le-pai, khamtheih leh leitung nopsaknate sung akibual in, Pasian deihdan thei na pi lah zo lo, mite sangin kei bek cih lungtang nei in, kua mah khualna nei zo lo a nungta ahih lam kithei manin Tua hangin KEI BANGBANG TA ka deih kei hi ci zong Tampi om kha ding hi.

-----------------------

Bangbang hita leh, leitung ah ‘TA’ hoih deih lo kuamah om lo ding hi. Nu-le-pa ahoih te hi-in,a hoih lo pente hita leh ‘TA’ hoih bel deih vek kha ding uhi. ‘TA’ hoih lo deih bel om ding in lamet huai lo hi. Ahih zongin ‘TA’ hoih neihna dingin Ei mahmah hoih masak kul hi.

Taten I hoih nate sang in I hoih loh nate hong suun ut zaw uhi. Tua ahih manin ei bangbang ahih kei leh ei sang a hoih lo zaw thei ‘TA’ nei ding ihih man in ‘TA’ hoih neih na ding bel nasia tak a pan lak kuul ding hi.

Ta thumang, pil, nu-le-pa zahtak dan siam, nun nem, lai sim kuhkal, khamtheih a kibuallo, Pasian lau, leitung nopsakna te sang a, Van go delh a kalsuan…hoih na tampi tak nei ‘TA’ I deih a leh bel ei mahmah iki bawl/siam hoih masak ding ahi hi. A hang pen bel ei bangbang Lian ta nei ding lah hi ngel ih hih teh maw!…taten nu-leh-pa a sut kei vualeh kua a suun ding ua leh?

KhuaVak taten khuavak ngai uh a, Khuamial taten khuamial mah ngai cih ahih manin Bangdan TA nei ding ihi hiam cih ei leh ei kien leng theihtheih mai ding hi.

‘TA’ hoih deih ihih leh a piang nailo ‘TA’ pen tuni apan a hoih ding in ki kem thei hi, tua bel EI HOIH SAWM LENG…tua pen akalmasa or tawhtang ahi hi.

Asim khempeuh Topan hong vual zawh hen!

Hoihna sak leh Na hawmsawn, Na share in mikhat peuh in phattuam lawh ding hi

Siam Khaute

A CIMTAK HUAI NUNTAKNA

A CIMTAK HUAI NUNTAKNA

Tulai Leitung ah hinkhua kining a khuasa mitampi tak om in, ahih peuhpeuh uh cimtak/ning in, lungdam kipahna om lo ding anungtakna uh zang uhi. Nang leh kei zong ih nuntakna, hinkhua kiningte lak ah khat zong ih hi khathei ding a, ih hih kei leh zong ih kim ih pam ah anuntakna uh kining mahmah mitampi om ahih lam pawkin  tuate Bang cidanin panpih thei dingin, bang cidanin Hinkhua kining thei mawk uh hiam cih tawm sut khawm ni.

1] TUP LEH NGIMNA NEIH LOH MAN
Mihing in tup leh ngim ineih loh ciang in hih ding leh hih loh ding kitheilo a, paina ding lampi leh i tun na ding mun zong kitheilo hi. Nisim in ih hih ngeiteng ih sep ngei teng mah kisem in, atawpna ah cimtak or kicimtakin mannei lo lunggam hing bangin hing danin kingaihsun in ki om thei hi. 

Gentehna khat: Thau tawi khatin akap ding target aneih kei leh bel Thau gikpi pen tawitawi zo lo kha thei mah ding hi. tua ahih manin ih thau tawi pen apha tuamding a ih zat nop leh Target kapding leh zatna ding ih theih a, ih zatding kisam hi.

Sang kah lai hi in, Nasep nei khin khat leh neilo hita le hang, tupna khat pen neih ding kisam hi. Mai lam ah tua ka suakding, tua ka hih ding, cih ngimna aom kei leh maban sepding om lo ahih manin Leitung pai-in mawk nuntak mah hong kul ding hi. Leitung in ih utloh lamin hong kalsuan sak takciangin ih kining in sih bang kiut mawkmawk thei hi. Tua ahih manin aneu alian cilo in, thupi leh thupi lo deuh cilo a, tup khat nei teitei a ih nuntakna ih zat ding thupi ding hi. Tua ahih kei leh Tembaw tui hual in alang alang ah anawk kawikawi bangin  pai nading theilo in ih nungta kha ding hi.

2] LAWMTE PHA ZO LO KISAK MAN
Mi tampi te in midangte a endan uh gengen thei uh a, amau lah bang mah sepsawm tuan lo cihdan tam mahmah hi. Midangte in lawhcinna leh minthanna hong ngah uh tak ciangin, eng mahmah in “ Kei Zaw” cin in kingaisia, bang mah lo a kimu pah cihdan in om pah uh hi. Hih bang gual zawhna anei mite thuakna leh gentheihna te ngaihsut sak kha lo thei uh hi. Mi talent nei te amuh uh the hampha sa mahmah eng mahmah in, ahih hang lah ken bang talent nei ka hiam cih kikan kingiahsut sawm lo uh hi. Midangte Pasian thupha sang lah na mu theih mahmah Eitung a Pasian thupha hong piakte leh muthei lo mitampi takte na hi uh hi. Hih bang mihing lungsim pua leh atheisiam lo te in Pasian tung leh mihing te tungah Khasiatna ding hau in, anuntakna uh Ningin Bang hangin na piang ka hiam? Bang hangin ka nu sungpan tuisuak hohlo ka hiam? Cih amau le amau kidong mun mahmah uh hi...

Ken bang siamna nei a, bang talent nei ka hiam Ka sung ah om thugukte bang hiam? Cih zonkhiat sawm ding hi a, Pasian hong piak talent tuamtuam ahih manin, midangte siamna leh talent te va engeng a nuntak ding hi lo a, Kei zong siamna talent nei hi ing cih kiphawk ding thupi ding hi. Midang te nuntak zia eng2 lo in, kei zong mi eng theih dingin ka om mateng ci a, haksatna paltan a ih hanciam ding thupi ding hi. Tua ahih manin bang mahin kimuh lohna in ih nuntakn ahong niam koih semsem hi cih phawk det ding ahi hi.

3] TOPAN EI ADING NGIMNA ANEIH LAM IH THEIH LOH MAN
Pasianin ih hinkhua. Nuntakna ah ei a dingin (plan) gelna neih hi cih ih mangngilh ciangin i nuntakna kining kha pahpah na hi hi. Hongsiam,bawl pa in hong bawlna ahang leh hih leitung ah hong zatnopna dan te ih kankhiat ih zonkhiat ding ahi hi. Ei ading bekin nungta in ih kikoih ciangin ih nuntakna aman nei lo-in kingaihsun, kiningin ih nuntakna mannei lo-in kingiahsun bek hi lo in hih leitung kiut lo thei mah hi. A hi zongin Pasian ading a ih nuntak taktak ciangin hih leitung ah ih nuntakna thaman a om lam kithei semsem hi. 

Mi tampi takte in hih leitung nuntakna cimtak in amah leh amah peuh anuntakna na kila/bei sak thei hi. A taktak in Ei Christian te pen ei ading bek a kinungta hi nawnlo in, Sisan tawh hong tanpa Jesuh Khrist a ding a kinungta ahih lam mangngilh loh ding thupi mahmah ding hi.  Tua ahih manin hih leitung khangkhat sung ih nuntak sungin Pasian adingin bangsem thei ding kahiam ci a, ih zonding, ih sepkhiat sawm ding, ama hong deihna le zatnopna bang a hong zat theihna dingin Ama deihna lam ih zawnkhiat ding, ih nuntakna tua bangin ih zat ding ahi hi.

………

Hih atung a ih at points te bek hilo tampi ih nuntakna ih ninna/cimtakna tampi om kha ding hi. avekin ih gelh man kei ding a, hih tungtawnin Ahong bawlpa deihna leh ama hong gelsaksa bangin ih nuntakna amannei in ihzat theih na dingin asim mimal khat ciat Topa in thupha hong pia kim ciatta hen!Amen.

FOR I KNOW THE PLANS THAT I HAVE FOR YOU,' DECLARES THE LORD, 'PLANS FOR WELFARE AND NOT FOR CALAMITY TO GIVE YOU A FUTURE AND A HOPE...(JEREMIAH 22:11)

Hoih nasak leh Na shared sawn in, Khat peuh in nuntak lawh ding hi. source: Rebuild and Restore
Siam Khaute

NA HIHNA LEH NA MAWHPUAKNA

NA HIHNA LEH MAWHPUAKNA

Mihing adingin eile ei hihna leh mohpuakna mangngilh ngei louh pen thil poimoh/a kitangsam mahmah khat ahi hi. Mahni/ih hihna mangngilh lou ten midangte tawh kikal ah buaina nei tawm mahmah uh a, a hinkhua uh leng na-vaak tuam in khovel/leitung manpha tak in zang uhi. Mahni/ih hihna leh mohpuakna mangngilh ten bel lawmte tawh kal ah, seppih te tawh kal ah leh sung/inn kuante tawh kal ah buaina tampi tak piang sak uhi. Huaiziakin, ‘hihna leh mohpuakna’ ichih bang hi a, I hinkhua/nuntakna a bang chitel/cidan a poimoh/kitang sam hiam chih te I suut khawm ni.

[1] NA SEPPIH TE LAK AH
Officer lianpi hiam ahih kei leh mi tampite tung a sem ihi mai thei, sepaih/galkap heutu lian mahmah hiam ahih kei leh lal/lian mahmah a khedap nawt ding nasan mi nei ihi mai thei, tua bang dinmun a ding ihih leh bel lal dan siam a heutu/makai hih dan leng siam sawm ding ahi. EiSang a upa zaw te nasan makaih tu leh pil taktak leh laisiam taktak te makai bang ihih leh amau muh a omdan siam leh vai hawm dan siam mahmah poimoh/kisam kha ding hi. Pianken a pil lualou bang leng a pil mahmah bang a om hoih zaw kha ding a, a huchih kei leh heutu/makai zoulou, heutu/makai dia chin lou, heutu theilou chia nuai a te simmoh a om khak theih ding ahi.

Huchia mite tung a vaihawm dan leh lal dan itheih bek hun lou a, ei sang a lal/lian zaw leh thu nei zaw te zahdan/zahtakdan leh pahtawi dan leng I siam kul veve ding ahi. Ih Tung a te thuman dan leh lungkim sak dan te itheih poimoh mahmah ding hi.

[2] NU-LE-PA LAK AH
Bang chituk a sepna lian nei in a-sing, a-sang tung ah lal himah le, hon suang tute mai ah bel ‘ta’ ihi chih mangngilh ngei-ngei louh ding ahi. Thupi kisa in lal kisa mah le I nu-le-pa mai ah bel pil leh lal hizaw lou in ‘ta’ ihi chih mangngilh louh a tua I lal na te koih khiat dan theih a ki thupi sak het louh ding ahi. Nu-le-pa ziak a lal leh hiai/hi tan tung ihih dan mangngilh louh a nu-le-pa zah/zahtak dan leh pahtawi dan siam ding ahi. Nu-le-pa mawl/hai mahmah nei ihih ua leh leng amau sang a ei thupi zaw ngei-ngei lou ding ihi chih phawk a, nu-le-pa I leitung Pathian ahi uh chih mangngilh ngeilouh ding ahi.

Khenkhat ten nu-le-pa bang mawl leh hai sa in zum pih mawk uhi. Mi lak ah leng a nu-le-pa te uh gen ngam lou zen in zumpih uhi. Akhen/pawlkhat ten lah sepna hon neih chiang un nu-le-pa te ziak a huchi bang dinmun tung ahih lam uh theilou in nu-le-pate simmoh in bawl genthei zaw mah uhi. Tua bang te bel mahni/ih hih na theilou, mihai ahi mai uhi.

Kam khat I gen a mi tampi te liing dup-dup leng ahi kha maithei uh, ahih ziak in nu-le-pa te mai ah bel ‘ta’ ihi chih mangngilh louh a nu-le-pate gen ngaih khiak/sak a, a thuhilh nate uh lak ding ahi. Nu-le-pate lah I leitung Pathian ahih ngal ua.

[3] KOPPIH/ZI,PASAL LAK AH
Pasal khenkhat sepna mun a lal/lian te a inn sung uah leng lal/lian om pah sek mawk uhi. Mi tamtak/pi te adia saap/pi,pu leng ihi mai thei, hileh le Ji te adia ‘saap’ hiam ahih keh ‘heutupa’/sia hiam ihi kei a, a pasal uh ihi chih mangngilh hetlouh ding ahi. Khenkhat ten a sepna mun ua anuai ua sem te a bawl bang un inn ah a Ji te uh bawl suk pah ua, suak-le-sal bang in zang suk pah mawk uhi. Hiai dan bel pil huai hetlou hi. Office ah tampi te ‘Bosspa’ I hi maithei, hileh leng inn ah ji te ‘bosspa’ ki hilou a ‘koppih’ ki hi zaw ahi.

Numei loh/Khasum nei tam zaw ten lah a pasal te uh simmoh pah sek uhi. Pasal numei vaak sa chih bawl in biak tuau-tuau leh mai et mahmah ut uhi. Sepna mun ah numei leh pasal tamtak te heutu/makai ihi kha maithei, I nuai ah pasal tamtak in sem leng ahi maithei, ahih ziak in inn ah I pasal te adia a ‘heutunu’/makainu hizaw lou in a ‘koppih’/pasal ki hi zaw ahi. Office ah lal/thupi mahmah ihih tak a leh leng office a I lal na innsung a puak lut louh ding ahi. Innsung ah bel I lutang (pasal) I zah tak ngei-ngei ding ahi. Sepna mun a omdan a innsung a om hetlouh ding ahi.

[4] TATE LAK AH
Nu-le-pa khenkhat tate adia houpih theihlouh hunkhop om hi. Sepna mun chouh lungsim a koih a innsung a ‘pa’ hihna ahih kei leh ‘nu’ hihna phawk lou tam mahmah hi. Tua bang a ‘nu-le-pa’ ten innsung a mohpuakna a neih uh ngainep/thupisaklo a, ahih na uh a phawk louh chiang un a tate uh khasia kisa ua lam diklou tawn khasek uhi. I sepna haksat ziak a gim kisa a inn tun chiang a tate ngaihsak/thudon peih nawn lou leng ihi maithei, ahih ziak in ei sik-le-tang leh I dinmun a ding diing hiai khovel ah midang omlou ahi chih nu-le-paten mangngilh het louh ding ahi.

Ei neu lai in I nu-le-pate I ngai mahmah a, a pawt ua leh leng hong tun di kal uh ki ngak lah mahmah hi, I nu-le-pate ki muang a, a mau kiang a I om chiang in lauh kinei lou hi. Thil I theih louh peuh mah I nu-le-pate ki dong pah sek a, lawmte lak bang ah I nu-le-pate kisuang mahmah hi. Tua ei neulai a I nu-le-pate thupi isak dan leh I poimoh dan a I taten leng thupi hon sa ua hon poimoh/kitangsam mahmah ahi uh chih hong gen kei le uh leng en theih kilkel ding ahi. Tate tawh hun zat khom a thil aneu hi in a lian hi ta leh kikup pih zel ding ahi.

Sepna lianpi nei ihih a leh leng tate adia bel pa/nu ihi a, innsung ah I hihna leh mohpuakna pen mangngilh louh ding ahi. Ki lawh tawm a genthei tak a nek zong ihih leh leng innsung ah pa/nu ihi chih mangngilh louh a Pathian in mohpuakna hong guat pen A deih dan tak a semkhia dinga kisak ding ahi. Nu-le-paten salam kikepna kia hilou a khalam kikepna leng poimoh/thupi ngaihsut ding ahi.

Israel taten Pathian kiang a athum chiang un Abraham Pathian, Isak Pathian, Jakob Pathian chi sek uhi…I taten a thum chiang un ‘ka nu Pathian’ ahih kei leh ‘ka pa Pathian’ chi in thum ding hile uh adik zou taktak diam? Nu-le-pate a ding in ki veel thak kul kha ding hi.
…………………………………………………………..

Mahni hihna leh mohpuakna I mangngilh chiang in midang te tawh kituah haksa mahmah a ei mahmah in leng I hinkhua ah buaina kituak ut mahmah hi, tua ahih man in I hihna leh mohpuakna mangngilh louh a I omna leh I ompih te dungzui a I hihna leh mohpuakna leng khen siam kizil/sin ding ahi.

Na SHARE theih leh SHARE in, kua hiam ading manpha kha ding hi.

ABRAHAM LEH SARAH KITUAHNA THUGUK

ABRAHAM LEH SARAH KITUAHNA THUGUK

Bible ah, ‘Ji te a pasal te uh mai a aki ngaihniam ua a pasal te uh a zahtak ding uh chih leh Pasal ten a ji te uh a iit ding uh’ chih Ephesate bung 5 ah chiang tak in kigelh hi. Numei in a pasal a zahtak a, pasal in aji a iit leh nupa kal ah kituahna om a, innsung leng suam hi. Hiai toh kisai ah Abraham leh Sara etton tak ahih dan uh i suut khawm ding…

SARA IN A PASAL A ZAHTAK DAN
[1] THUMANG TAK IN A PASAL ZUI DEN
Abraham in Pathian sapna hon zak tak in a omna mun a paisan ngai a, midang leh namdangte gamteng ah a teen ngai hi. A pianna gam Ur nusia in Haran tung hi, Haran ah hun bangtan hiam a om nung in Canaan hon lut suk nawn a, Canaan ah kial atun ziak in Egypt gam ah tai suk nawn hi. Tua zawh in Canaan ah hong leh luut kik nawh hi. Hiai bang a omna mun det nei lou a alanglang a apai hang un Sara in a pasal kiang ah kam khat mah leng bangmah gen lou in thumang tak in zui ngitnget hi. Hiai in a pasal zahtak a kiniam khiak mah ahi chih chiangtak in a kilang sak.

[2] A PASAL GINNA/UPNA AGIN/UP PIH
Tua hun lai in Pathian hing bia ana om khollou uh a, a omna mun uleh a pai na mun peuhmah ua miten milim pathian ngen bia uhi. Abraham in bel Pathian hing ana gingta tinten kha a Pathian chih dandan in kal ana suan hi. Pathian in a nupa kal hinkhua uleh a suante uh maban ding tampi a gen te tangtung taktak mah ding hiam chih gin lelh theih ding hun tam mahmah a, a Pathian biak uh Pathian dik tak mah hiam chia gin lelh theih ding khawp dinmun ah ding mah le uh Sara in a pasal gintak Pathian pen mah ana gin pih tinten a milim pathian te a na biak san mawk lou hi. Hiai in a pasal zahtak a kiniam khiak mah ahi chih chiangtak in a kilang sak.

[3] A PASAL THU ANIAL KEI
Abraham in thupukna alak chiang in Sara in hoih sa in sakei leh leng ana nial het kei. Canaan gam a kial atun ziak in Egypt ahong luut suk uhi. Egypt ah Abraham in a sih khak ding a lauh man in aji kihum bitna in zang a, zuau gensak hi. Sara in hiai pen hoih sa in sakei taleh niallou in a pasal chih dandan in om hi. A pasal thu aman ziak a Pharo angsung a mangthang thei dinmun ahi, huchi tan ah leng a pasal thu anial kei lai. Hiai in a pasal zahtak a kiniam khiak mah ahi chih chiangtak in a kilang sak.

[4] A PASAL ‘TOUPA’ CHI IN SAM
Sara in a pasal Abraham pen a pasal chouh hilou a alu ahi chih thei mahmah in a pasal mai ah kiniam khiak petmah hi. Tuajiak tak in ‘toupa’ chi in sam hi…(1 Peter 3:6). Hiai in a pasal zahtak a kiniam khiak mah ahi chih chiangtak in a kilang sak.

ABRAHAM IN AJI A IIT DAN
[1] ZI DANG NEIH ANA SAWM NGEI KEI
Tua hunlai a mi khenkhat ten ji tampi aneih lai un Abraham in a ji Sara lou numei dang ana en mawngmawng lou hi. A nupa un ta neithei lou in a upat dong uh khosa mah le uh ji dang neih ding Abraham lungsim ah piang lou hi. Hiai in aji a iit chih chiangtak in a kilang sak.

[2] AJI A IIT LUAT ZIAK IN KHIAL KHA ZAWZEN
Abraham in aji iit lua a, tua ziak in aji thu a hoih lou lam nasan ah leng ana mangkha zawzen hi. Sara in Hagar tungtawn a ta neih a sawm pen Abraham ngaihdan ana hi kei mahleh aji a iit ziak in ana nial lou hi. Hiai in aji a iit chih chiangtak in a kilang sak.

[3] AJI THU MAH ANA ZUI
Sara in inn apat Hagar leh ata (Ismael) a hawl khiak dek in Abraham a din thupukna lak haksa mahmah diing in a gintak huai. Hagar hawlkhiak pen haksa law di bang kei mah leh Ismael a sisan a piang ata inn apat hawlkhiak ding chih pen Abraham adin haksa mahmah ding in gintak huai hi. Huchi dinmun ah leng aji tai hetlou in aji chih dandan in thupukna lak pih lai hi. Hiai in aji a iit chih chiangtak in a kilang sak.

[4] SARA SIH IN A SUUN A AKAP
Abraham in aji iit mahmah ding in igingta. A pianna gam uh nusia ua, theih ngeilouh na gam a amau tegel chouh khosa den ahih chiang un a ki iit na uh zaw ana thuk mahmah ahi ding a…Bible a imuh dan in Abraham in aji sih a suun mahmah a kap hi didan ahi. Hiai in aji a iit chih chiangtak in a kilang sak.
----------------------------------------------------------------

Abraham leh Sara nupa etton tak ahi uh. Abraham in aji a iit dan leh Sara in a pasal mai a aki niam khiak dan enton le nupa kituak lou chih vaang mahmah ding ahi. Pasal in a mawhpuak na chu ‘Ji te iit ding’ ahi a, Ji te mawhpuakna chu ‘Pasal te zahtak a thunuai lut ding’ ahi. Nupa in a mawhpuakna tuak uh hon zawh chiang un nupa kal chidam a, taten vangam ana chiam lawk uhi.

# Jite aw, Toupa kianga na kiniamkhiak bang un, noumau pasalte kiangah kiniamkhiak un (Ephe.5:22)
# Pasalte aw, na jite uh it un, Kris in saptuamte a ita, a sik ua a kipiak bangin…(Ephe.5:25)

Ji te iit tak a kem ding leh Pasal te jahtak a thunuai luut thei din sim tute Pathian in hon vualzawl hen!

Hehpihtak in like inla ana share son in kua hiam adia phatuam kha ding ahi.
By: Rebuild and Restore