Saturday, September 2, 2017

ZI NAM 7

#ZI_NAM7_LEITUNG_AH_OM_HI.
Innkuan sung nuntak dan siksan in en leng leitungah zi nam sagih om thei hi ci-in mipil ten na gen hi.


1. Nu bang zi:

Pianna nute hong it bangin hong it leh a hong nek ngaih om lo a, a lim penpen hong pia nuam tawntung hi. Nikten puansilh zong a hoih pen hong guan nuam hi. A pasal muang in, vai kikum ngeungeu thei-in, a pasal thu mang ngiat hi.

2. Sanggam bang zi:

A lungsim khempeuh tawh, a pasal it hi. Kiniamkhiat a, a kilawm loin gam ta lo hi. Thu khempeuh U nau bangin kikuppih thei a, a pasal lawmte itsak in, neek ngaih hi.

3. Lawm bang zi:

Lawm bang zi in a pasal leh a innkuanpihte ngai mahmah hi. A pasal,a it lo, a ngai lote, it lo ngai lo pah in, a pasal zong U aw ci nuam lo hi. Thu khat peuh vaihawm khawm in, “lawm aw” ci pah ziau lel hi. Kiniamkhiatnate tawmzaw deuh pah hi.

4.To bang zi:

To bang zi-in pen thu leh la, nasepna vai khempeuhah thu kinei sakin, amau ut bang bangin na vaihawm in, a pasal ukcip gawp nuam hi.

(1) A pasal zawh thawh bawlin, simmawh in, hai bawl hi.
(2) Kampau leh aw khum zang ngei loin a pasal langbawl in a tate tawh kopin a pasal simmawh hi.
(3) A pasal in tai bawl pian thu hilh pian bek leh zong a zi pen kaw keek gawp in, diang gawpin lipkhap huai hi.
(4)Zan lupkhopna munah zong maibiak kisam hi.
(5)Nu pa tawh kibang loin galte tawh kibang hi. Mai et ding ut hi.

5.Gal bang zi:

A innkuan suangah ama thu bekin kigamta leh ut in, a neihsate uh amah bekin zeek in, ukcip nuam hi. A innkuanpihte tawh mawhna zong den hi. Gi lo mahmah in, kihopih ngam lo liang hi. A lungsim sungah hehna, gitlohna kidim ahih manin keeksa in om den hi. Ama’ thu bekin ki-om leh ut a, phailaang bangin launa leh kikhualna peuhmah nei lo hi.

6.Gu ta bang zi:

Guta bang zi pen neihsa lamsa khang thei lo hi. Innah amah guak om leh nek sim taak sim hau hi. Neihsa a om sunsun zuak sim a, a duhduh leina hi. Mi deidanin, amah bek hampha leh ut den hi. A innkuanpihte, inn ah om kei leh deih hi.

7.Sila bang zi:

Sila bang zi pen hehpihhuai a, innsung thu vaihawm ngam loin zong pau ngam loin mengli-in nial ngei lo hi. Innteek bang loin a pasal kihta in, gal bangin kihta hi. A inn sungah a neihsa uh bang mah, an minsa, an khing nangawn ne kik ngam lo hi.

Tua bang in zi nam 7 bang a om theite pawl lakah; "Nang" koi pen tawh kibang kisa na hiam? Koi pen teel ding cih kisit tel pah dih in! "Nu bang zi” leh “Sanggam bang zi” ki deih pen hi."

~ Pa Betnabas Pau Khan Suan' Veng 2na, Sawbua.

Thursday, August 31, 2017

ZOMITE PAUNAK PAWLKHAT

PAUNAK PAWLKHAT
1) Pu le lamphung kineh zo lo-i pute kidem thei lo
2) Deeklam tuktum zong gal-i muan pente zong i gal hi thei
3) Mihing le papo-kisi pak thei
4) Gallu kihta gallu tuak-i buksawmna mun ah a 
siazaw kan kituak thei
5) Sakhi a pi san, a no san-nu le pate kisun hamtang
6) Hawmsem nungta, ne-bum si-a cinghte hau semsem,
a cilte zawng semsem
7) Zawlthu kalah sialthawl-na zekaikai leh thusia khat lut pak thei
8) Na kellu phum kidawk ding-na thu imsim hong kithei ding
9) Na suakluka uh kibalkham-na kithutuakna uh kitamsak
10) Meima lo ah tho tu lo-paubang lo phamawh cihna
11) Zuau in a khap tawn-zuau thu gente kithei veve
12) Nupa kithutuak khuakhat in zolo-kipumkhatna thupitzia
13) Khuakhat kithutuak -tawm taleng a tampi khuakua in zo lo kilemlote’n hong zo zo lo
14) Bui a phak kuana khawl-tangtun kuana dinkhawlte
15) Nu le pa thumang a nahlawhpeek-a daupai-in a ma vang pah
16) Akta mang kuan kitutu - mancip giimnam
17) Ngalvang in a tat nading - i gamtat zia ding saupi gelkhoh
kuam kua khualhuai
18) Simbeng zong kim citciat-kipawlkhopna khatpeuh ah tangzang kiguangmakai tangzang kiguan kul
19) Sialtat zawh nung, sial daikai - Apian zawh teh, khua nung thei
20) Ki-uitui- Ki-itbawl tuam deuh hun sung
21) Ki-angvan- Kideihsak, kihu, kipanpih
22) Laikhun- Lupna
23) Khunlan- Lupna
24) Lia le tang- Nungak le tangval
25) Puvun pivun- Pu le pi
26) Tun le zua- Nu le pa
27) Ciin le tuai- U le nau
28) Angkawi- Zi
29) Kiang- I pasal
30) Vontawi- Tanu tapa
31) Sawn- Tute
32) Mamo- Monu
33) Zaitha- Thatang
34) Cinthu- Thu
35) Tongdam- Kampau
36) Na lel cinthu- Na gen thute
37) Lak mai- Maitang
38) Luankhi- Khitui
39) Banzaal- Khut
40) Pheiphung- Khe
41) Na siangah- Na kiangah
42) Heina- Paina peuh
43) Tuang lam - Lampi
44) Saumang- Inn
45) Lang lam- Neih le lam
46) Lii bang kicing- Kisap om lo
47) Vailo- Lo
48) Laal- I galte
49)Sangsa- Gamsate
50) Zinleng- Dawi
51) Sianmang- Pasian
52) Tangbang dam- Cidam
53) Omlai vei- Dammawh
54) Naubang kap- Kap
55) Mimbang thum- Thumthum
56) Hui bang mau- Khasiatna hau
57) Lawkbang tau- Tautau
58) Suumbang bia- Biakpiakna
59) Vaimang siamsil - Lai
60) Khaubang ciah- Ciahlam
61) Hawm teel- Micingte’ nun sawt
62) Iplah- Pammaihsa
63) Mimphung- Pianna behte lam
64) Pal bang nang- Thuak tentan
65) Sumkuang in a lii khuat - Numei in a ma khuat
66) Pu le lamphung kineh zo lo - I pute kizo zo lo
67) Kisial- Thei khiasak
68) Kawlciang- Thau
69) Lamsai- Lamgui
70) Namtem- Temta
71) Kawl hei- Hei
72) Tu kawl- Tu
73) Sunglawh- Annek
74) Khing an- An
75) Ningzu- Zu
76) Aisa- Sa
77) Sumlu- Lutang
78) Besam- Sam
79) Thul guah- Guah
80) Phialva- Vasa
81) Buh al- Ak
82) Thangvan- Vantung
83) Simlei- Leitung
84) Khawi le vulh- Ih khawi gannote
85) Zal mang- Zanmang
86) Khangthei lo- Khanglo
87) Tung sunni- Ni
88) Sul khapi- Khapi
89) Alsi- Aksi
90) Zingdamsol no - Solpi
91) Laukha- Kha Siangtho
92) Zinleng- Dawi
93) Pham- Si
94) Gua bang hing- Nungta
95) Thel nah- Laidal
96) Nuh sawl- Singteh
97) Tulsing- Singkung
98) Khimzing- Khuamial
99) Phalvak- Khuavak
100) Muikhua zin- Khuamui tung
101) Silh puan- Puan
102) Ten nik- Nik
103) Dam tui- Tui
104) Lumsuang- Suangtum
105) Vaivut- Vut
106) Sian sung- Innsung
107) Kankong- Kongpi
108) Vaimang- Kumpi
109) Lunmang- Mihaute
110) Sanggah- Tagah
111) Meigong- Nupa langsam
112) Laizom- Sung suahpih
113) Pahtang- Innkaa
114) Sumtual- Inntual
115) Sesum- Dangka, sum
116) Vangkhua- Khua
117) Tangbang phong - Thotosak
118) Albang tah- Nekngaih, nesak
119) Albang dah- Dahna hunte
120) Nun bang nuam - Nopsak hunte
121) Kizo- Kilungdampih
122) Kimuak- Nopnate kinuampih
123) Ki-uap- Dahna hunte ah kitutpih
124) Awh khi- Khi
125) Tau buh- Khut a tau bulhte
126) Tai khua val- Khua vakta
127) Senlai- I neu lai
128) Lobang tul- Lui suahta
129) Tum bang guai - Teek kuanta
130) Paak bang kitawi - Kipahtawi
131) Mu bang ngai- Kingai
132) Vabang pil- Pilsan Teitang
133) Zu bang mawl- Hai kisa
134) Ci bang teel- Deih teel
135) Gia bang zun- Kizem, kipuahpha
136) Maimit- Mittang
137) Gial bang kia- Khitui malte kia
138) El ho- Zahpih ho
139) Kulsin- Hankhuk
140) Vabang laam- Laam
141) Ngabang leng- I lenlai hunte
142) Siangkawm- Tanaute kiang hawh
143) Zing zin- Khualzin
144) Ciampeel- Thuzuau
145) Cilgil- Citak
146) Mabang hial- Zawhbawl
147) Zulhzau - Gamtat gina lote
148) Mit tuuk- Sawm gige, thangah
149) Bantan- Sattan
150) Ne bum si- A huaihamte nek tom

Source :
EI ZOMITE NGEINA A PHUNPI TENG
Pa Cin Lian Khai
Tungzang Taih, Kalaymyo
ZYA Tin Jubilee Magazine Laibu.


NA PICING TA HIAM

NA PICING TA HIAM
Picinna cih pen kum tawh kisai khol lo hi. Naupang no khat picing cih a om theih loh mah bang in khangham kumtam khempeuh picing lo mawk hi. A hizong in a picing a tamzaw pen kum 30 kim pan kipam ahihi.
Khangham kumtam khempeuh a picing ahih loh zia le, khangmoi kum tawm ahih hang in a picing te om zia:

1. Bang mah ngaihsun lo pi in, nagen ziau kammal khat hang in, mihing khat tung ah adam thei nawn lo ding lungsim natna na piansak khak ding kidawm in, nakam na kemthei ta hiam.?
2. Haksatna khat peuh a tuah ciang in mi dang te mawhsak lo in, a piang bang bang tung ah a hoih thei pen in kalsuan ding a ngaihsun zaw te ahihi.
3. A telcian loh thu khat peuh/a gen nop loh thu khatpeuh a kidawt ciang in, theilo pi ki theisak se lo in, nuihsan ziau in thu dang a khel thei te.
4. Na zakding in hong kigensiat hang in a awlmawh lo bang/ a zalo bang in na om thei te.
5. Nang sang a ham zaw/Upa zaw te tawh na tutkhop ciang in, a pau lam sang in, thungaih lam a thupisak te.
6. Na hunawng sung in namawk-om sang in LAISIANGTHO / laibu dang khat peuhpeuh sim ding in na ngaihsun thei te.
7. Na mawhna a hi lo thu khat peuhpeuh ah hong ki mawhsak ciang in, nial se lo in awzol tak tawh a mawh loh na a gen hiat-hiat thei te.
8. Na mawhna/na khelhna khat peuh hong ki kawk/hong ki gen ciang in, nang zong bang ki sa na hiam ci-se lo in ki puahphat ding na ngaihsun thei te.
9. Awkhauh tak a pau'sang in awzol tak a pau'na in muibun zaw ahih lam thei in,tuamah bang in na zang thei pah te.
10. Na veng na pam/kim le pam te tung ah lungsim kinga se lo.( ki gensiat hang lungkia pah lo, ki phat hang in nuam pah lo.
11. Na innsung kilem-lohna khat peuh hang in maitaina pi'n , a pualam ah a kilang khol lo te.
12. Mihon omna pawi lak ah puansilh nikten hoih silhding kisam mahmah na pi'n, Na neih khatpeuh tawh nang le nang ki muang tak in pai theih ahih lam na sin ngam ta hiam.( pawi pai na ding leiba liang in puan lei kul lo hi)
13. Mipil te gen na ah, man nasak nak leh maitang zahtak nei lo in gen ngam na pen hansan na hi a cih hang in, a man hang in a ki lawm lo na mun a khen thei te.
14. Na neuzaw te tung ah, na khilh ciang in hong maisak in kakhial hi/ ka mawh hi a cih ding a lungiang lo te.
15. Mi khat in natung ah midang khat hong gen siat ciang in a ma pau bek a ngai hithiat te.
16. Ni dang in na kipilsak mahmah hang in tua zah pi in pillo na hih lam a kithei mi.
17. A picing khat in mimawh te a muh ciang in mawh hi ci in mu bek uh aa, gensiat ding ngaihsun lo uhhi.
18. Hih a tung a te tawh a tam zaw tawh kituak na pi cin, picing nai kei tehhong ki cih a nalung a kiat kei le a picing na hi ta hi.
~ Job Cinpi
Source :
Zomi laisim nuam te.

Monday, August 14, 2017

LUNGNGAIHHUAI THUTE KA LUNGTANG AH

Lungngaihhuai Thute Ka Lungtang Ah
1980 May 2 ni-in leitungah mihing khat in kapiang a, tuni ciang leitungah ka hunzat kum 37 val a lut hita hi.
Leitungah mi gina, mi minthangte ka et ciangin khangham lua sangin khangno lai, thahat lai vive na hizaw uh hi.

1. Topa Jesuh: Kum 33 aphak in asep dingteng khempeuh semkhin zota hi.
2. Boyoke Aungsan: Kum 32 aphak in Kawlgambup suahtak nading vai khempeuh na gualzo khinta hi.
3. Alexander the Great: Greek galkap mangpipa in kum 23 aphak in leitungbup na lakhinta hi.
4. Martin Luther: Kum 30 aphak in leitungbup lok in Biakna vai ah lamdangtak gualzawhna na ngahkhin ta hi.
5. Isaac Newton: Kum 24 aphak in "Leitungin hupna nei hi" cih nate' thu ah muhkhiatna nei in leitungbup in mipil in na ciamteh khinta hi.
7. Napoleon: Kum 27 a phak in galkap mangpi le kumpi na suak khinta hi.
8. Herbert Cope: Kum 31 a phakin Zogam, Hakkha, Falam le Tedim sungtengah Mission lianpi sem khinin Zolai hong bawlsak khinta hi.
9. Mark Zuckerberg: Kum 20 a phakin leitungbup ah zat theih ding Facebook na bawlkhia khinta a, tu'n kum 33 phapan in leitungah mihau pen 5 sungah kihel hi. 2017 July kha in a pilna tawh angahkhiat sum US$ 71.8 billion valta hi.
10. Bill Gates: Kum 20 a phak in leitungbup zattheih ding Microsoft na bawlkhia khin a, kum 31 a phakin Billionaire nasuak khin hi. Tulaitak leitungbup ah mihau pen ahi hi.

Hihte pen kei kumzah a phakma un leitungbup ah a kithei mi thupi vive suak khinta uh hi. I gelh khak loh mi thupi tul tampi omlai hi. I gennop thu ah lut suk samsam ni.
Leitungbup huam, Kawlgambup huam, Zomibup huamin kei-le-kei ka ki et ciangin ka lung kia hanhan in ka nuntakna in man neilo zahin ka kingaihsun hi.
Ahi zongin u le naute aw, ngaihsun taktak lehang ei sangin a pil, a siam, a haute enlo in leitungbup thupiangte en lehang, biakna vai tawh thahlup tuak om ei. Bangzah takin hau in pil taleh Zato ah oxygen bek tawh a nungta liamliam tampi om ei.
Mun dang tampi en naikei ni. I kim i pam ah khutkimlo khekimlo khut dawhngen mi tampi om ei. Thonginn sungah sih dingbek ngak aom mi tampite enlehang eite pen a hampha lua ihi hi.
Ka Lametna In Hong Lung Muang Sak:
Leitung bek tawh i lungkim sawm leh mihau pen, mipil pen, mi minthang pen zong khang khat bekmah a nungta ding hilel hi.
Eite pen hih leitungah khualzin banglel ihi a, i tawntung gam taktak ding pen Vantung Pasian kiang ahi hi. Leitungah gentheih haksatna, zawnna le guallelhnate hangin a pukcip dingte ihi kei hi.
Tua, tawntung mun ding a theikhalo, a lamen khalote hamsia kasa mahmah hi. Hih tawntung mun dingin ka kha hong muangsak a, ka lung hong nuamsak ngaungau hi.
Na Gam Hong Piang Tahen:
Topa Jesuh in a nungzuite tungah thunget dingzia ahilhna ah, "Vantunga na deihna a kicin mah bangin leitungah hong kicing sak ta in!" ci hi. Tua banah "Na gam hong piang tahen!" a cih zong kihel hi.
Pasian in ama' gam ah a gamh luah dingin hong teel a tanu/tapate adingin leitung mahmah ahzong ama' nopsakna kicing takin i ngah theih nading hong deihsak hi.
Tua ahih manin hih i lei nuntakna ah Pasian' gam hong pian ding Topa Jesuh in thunget zia ah hong hilhzo hi. Ama' deihna kicing ding, ama' gam hong piang ding cih hong deihsak hi.
Tua ahih leh hih i leitung tomkal nun sungin Pasian' gam koi bangin hong piang ding cih i ngaihsut ciangin tawntung nuntakna tawh kizom lametna kidim tawh i nuntak kul hi.
Lametna kidim i ngah masiah i nuntakna ah Pasian gam hong piang ngeilo dinga, keu gawgam bangin i ngaihsutna khempeuh ah lungkiat huai vive hong suak dandan ding hi.
Tak Suah Sak Ni:
Pasian' gam pen i lungtang ah hong piangzo ahih manin i sep i bawlna khempeuh ah Pasian deihna (Rule) tawh kituak in i nuntak kulta hi. Kha thu le leitung thu pen 50% kileek kim sak ding kisam hi.
I innkuan sung, i minam sungah Pasian' gam hong pian theih nadingin lametna kidim tawh mainawt in mailam ah makai ding ahi i naupangte nakpitak i pattah ding kisam hi.
Tulaitak-a i naupangte nakpitak i pattah zawh leh a tunga i gengen mi thupite bangin i naupangte zong leitungbup ah mi thupi-a hong kiciapteh sak dingte hong hiding hi.
Thukhupna:
A tawpna ah leitung mit bekbek haksak in leitunga i nuntak nading bek kikhual in i om khak leh leitungah i nuntakna tawh beikhawm lel ding, bek thamloh tawntung hell meilipi sung manawh i hihkhak ding lauhuai mahmah hi.
Leitungah Pasian' kiang pan hong pai nopsakna a zek kha i hih ding thupi a, Pasian' mit tawh kituak in i masuan ah mainawt in tawngtung mun ding lungngai tawntung mimal, innkuan, minam a hiding in itngaih laizomte' tungah hih thu teng holung hong kum hi ing.
I minambup sungah Pasian' gam hong piang tahen!
Itna tawh,
Dal Sian Hung
Kuala Lumpur, Malaysia.
14
August 2017

Thursday, August 10, 2017

NUPA KAL NOPNA DING (5)




Nupakal nopna ding=>

A nuai ah sex (kipawl dan ding) nam li om hi: 1) Kigingkhawlhna. 2) Ki thawhna. 3) Guanglutna. 4) Tawldamna hi.

Step One
KiGingkhawlhna

            Pasal leh Numei in sex adingin hih danin kigingkhawl ding hi.
a)Maisakna. Na lupma un na kiselnate uh kimaisak/gencian phot un. Na Nupa un zing an neklai tak a na kisel, na kitot gaga nate uh kikumin kei khialing hong maisakin cia mawhnate kimaisak phawt ding thupi hi. Tua hih keh sun tawntung na lungsim uh hong nasak ding hi.
            Na hehna ni na tumsak kei in. (Eph .4:26)

            Na nihun hih LST na zuih nak uh leh na lupuh ciangin na lungsim uh hong kinai-in, maisakna lungsim tawh kidimin, zan thu ah nuam nasa ding uh hi. Nupa a mawhna uh a kimaisak nuamlote pen a lungsim uh nasa den ahih manin zan thu ah nuamsa thei ngei lo uh hi.

b)Siangtho kisam. ‘Dan’ akici pa-in hidanin gen hi. Secretary na sem ka hih manin hoih takin kizemin ka kuana, nitak ka ciah simin, ka zi pitek kizem bangin kizem ka muden hi.
            Elizabeth in, Ka lawmpa hoih takin kisil ngeilo ahih manin, agim namsia a sex (lupkhop) ka utna hong beisak zo ci hi.
            Pasal hi-in numei hi ta le hang ih omkhawp sungin siangtho a gim namsia liailuai a om loh ding hi.

c)Kong kilh in. Na lupna khan kawng uh hoihtakin kilh in. Nupa gamtat khawp lai takin Mi khawng hong lutvat ding pen numei-in lau a, a lau leh kipawlna nuamsa thei mahmah lo hi.

d)Tangguak. Pasian deihna ah Pasal leh numei guaktangin lumkhom a, nuamsak ding pen hong deih hi. (Pian .2:25)
Hih danpen zumna, nuamsak loh nading hi lo hi. Lupna khan sungah na nihun na om uh ciangin pasalin zi (kiss) tawpin a puante damdam in suah sak a, numei in zong tua bang mahin a pasal tungah hih ding ahi hi. Hih banga nupa guaktang a omkhawp pen nuntak sungah anuam pen ahi hi.

Aban nidang ciang zom=>
LUNGDAM
Siam Khaute







Sunday, July 16, 2017

CHRISTIAN, NUNTAKNA KHUAVAK

AW CHRISIAN NUNTAKNA, KHUAVAK
Matthew 5:13-16
Nang leh kei ih nuntakna ah ih kitangsap mahmah ahi Christian nuntakna (Christian Life) ahi hi. Jesuh gumpa, honpa, tanpa dingin ih sankhitteh ih sihdong ihkalsuanna ah akisam Christian nuntakna ahi hi.
Mi pawlkhatte in Jesuh gumpa honpa in kasan khitnak leh ka utut in kagamta zongin Vangam tung veve ning ci-in Pupate Lawki pan Christian hong suak lecin Vangam tungding cia gen hun lai bang mahin nunta mawk uh hi. Lawmta kiho khatin Vangam tungveve ding leitung nuntaklai utbangin om ding hilel lo maw acih leh alawmpan, Vangam tungdingte in dawndawn lo hi veh aw ci hi. Ih Christian nuntakdan kisit huai mahmah sa ing.
Matthew sung ah agen bangin khen thum in lungngai khawm ni.

1.      Ci tawh na kibang uh hi.
Ci ihcih pen mikim in azat theih leh zatkim ahi hi. A hizongin an nek teh meh limsi e kici a, na ci uh limsi ei kici tuan lo hi. Tua ahih manin Christian ih nuntakna ah:
1)      Mikim tawh ih kipawl thei ding
2)      Ih sepna bawlna piakna ah hong kiphawktakei leh ih hihna mang sak lo ding,
3)      Hong kiphawk ta kei leh Pasian adingin Tavuan zo mahmah ding,
4)      Christian Piangthak ih hihna mite in hong muhtheih ding, Pasian ei hangin amuh theih ding, kisam hi.
Christian nuntakna ah ci bangin mitawh kipawl thei, hong kiphawk takei leh Pasian ah kipden a ih al tawntung ding hong deih hi.

2.      Khuavak bang na hi uh hi.
Tuni in nang leh kei Khuavak hong ci hi. Piangthak Pasian nungzui khat ih hih khittakciangin ih nuntakzia in mite Pasian amuh theihna dingin Khuavak ih suah ding pen hong deih hi. Hindu pasal khat tawh ka kiho a Pasian thu kagen pih zel hi. Ni khat Christian lunglut lo na hiam bang ci na ngaihsun a kacih leh, ka ngaihsutna ah “Christiante pen Siangtho ding, thuman ding, etc” in ka ngaihsut leh Kei  nuntakzia tawh kilamdang lo hi, tua ahih manin “Christian ka suahding pen kei adingin kilamdang lo” ci hi.

“Mei akivak khit ciangin lawh kikhuh lo-in asanna ah kikoih zaw in Innsung khempeuh tangsak” tuni ih lungngaih ding ah tatkhiatsa ih hih khitteh khuavak atangsak ding ih hi zaw a asanna mun ah koih in mite in hong muhding nungzuite ih hihi. Ih nuntakzia, ih gamtatzia, ih gamtat hoihte mite ih amuh ciangin ih Pa Pasian aphat theina dingin ih gamtat hoih uh khuavak bang na tangsak un, acih bangin ih gamtat hoih pen asang ah koih a Pasian umte, umlote Mei bangin atan ding kisam nang leh kei ih nuntakna akisam mahmah thu ahi hi.

Hindu pa cih bangin ih gamtatna ih gahtawh hong ki-en ahih lam phawk huai sa mahmah ing. Hindu, Buddhist ten khem2 hilo ding leh ih nuntakna zia thu-um lote in hong en den hi cih phawk ni. Online khat ah Muslimte khat leh Christiante kamkiselna khat ka mu a, No Christian anungta bia ci-in Thong sung ah kia percentage atamzaw pen Christiante na hi uh hi, Bangci Christian hiam cigiap ka mu hi.

Tang 16 ah agen bangin Christiante ih nuntakna mahmah in Pasian midangte in aphat, amuh theihna dingin ih gamtat hoih uh khuavak bangin ih tangsak ding athupi mahmah nang leh kei mawhpuak, vaipuak ahi hi cih mangngilh ngei kei ni.

3.      Khensatna bek hi lo Khentatna neih ding kisam.
Christian ih nuntakna sungah khentatna kician neih kul hi. Shadrach, Meshach, Abednego lawmtate ih et takciangin akhentatna uh thupi mahmah hi. Daniel 3:17-18 ah Kumpi pa kiang ah “Ka Pasian in hong hon ding hi, hong hotkhiat kei leh zong Nang milim mai ah kakun tuan kei ding uh hi,” ci-in dong uh hi.

Tuni in ih nuntakna sung ah lungngaih huai mahmah thu hih ahi hi. Tulai Christian tampi Nang leh kei akipan in ih kisapin Khentatna kician ahi hi. Pasian adingin:
1)      Nuntakna hoih, nuntakna tawh khuavak tangsak ding,
2)      Pasian ihbiakna pen hauhna, nopsakna ding bek ahih loh ding,
3)      Pasian ading ihpiakkhiatnate thupha sanna ding bek a ih ngaihsut loh ding,
4)      Pasian a ih piakkik 1/10 pen thupha sanna ding bek a ihpiak loh ding,
5)      Pasian ading ih sep ih bawl khempeuh Leitung thupha ngahna ding bekin ih ngaihsut loh ding,
6)      Thupha ka ngaih kei zongin ka zawng zongin Pasian ading pia, sem, um, gamtat hoih veve ding cih theih ding kisam hi. Zomi aw!
Tua bangin Thupha ding bekin ih ngaihsut takciangin, ih ngaihsutdan hong piang lohteh Pasian nusia in ih upnate uh kiam thei hi. Tua ahih main in Na/ih lungsim ah ih koih tawntung dingin Daniel te lawmta bangin Thupha sanna, daupaina ka ngaihkei zongin Ka sem, kapia, ka hih, ka gamtat hoih veve ding hi cih lungtang khentatna kisam mahmah hi. Tuabang khentatna neite Pasian in mawk koih tuanlo ahih lam phawk in.

Ih nuntakzia, ih upna zia mahmah Pasian adingbek ngaihsun, tunglam thu ding bek in ngaihsun in, Leitung hamphatna ding ngaihsutna hi sak lo ding hi hang, hih leitung thuphate, Nate mai ah Kunlo in Ka zawng, ka genthei zongin Pasian adingin ka nunta veve ding, cih Daniel te lawmtate ih bat takciangin Ih gamtat hoih mite in mu in Pasian hong phat thei ding uh hi.

Ka sapmi tam ka telmi tawm cih kammal lungngai zelzel ding zong kisam mahmah hi.
Deihsakna tawh hiteng akipulak hi ni. Nang leh kei ih nuntakpih theih nadingin Van laukha Siangtho in hong huhta hen! Amen

lungdam
Sian Siam Khaute
July 16,2017
Sunday





Saturday, July 15, 2017

NUPATE LUNGSIM PUAKZIA

Nupate lungsim puakzia
A kiteen khit zawh kum 11 bang a sawt khit ciangin, a neih uh tapa bek ahih manin nupa te’n a tapa uh it mahmah uh hi. Hun hong bei toto in a tapa uh zong kum 2 bang hong cingta hi. Zingsang khat a pa uh zum a pai ma in zatui thol hon sa khat sabuai tung ah a kikoih amu hi. A zumhun cing ta a hihman in a zi kiang ah zatui bung sin in bizu sung ah koih ding vaikhak in zumkah ding hong kuankhia hi. A nu in anbuk nasep teng sem in buai mah2 a hihman in a pasal thu vaikhak ong phawk man nawnlo hi.
Naupang pa’n sabuai tung a om zatui bung amuh ciangin sabuai lam hong zuan hi. Zatui bung a et leh limtuak sa ahih manin a vek in thakhat thu in a dawn hi. Tua zatui in naupangte aading gu a suak thei zatui nam ahi hi. Zatui a valh khit lian ciangin a nu’n hong mu hi. Patauhna lungsim tawh kinawh tak in a nu’n naupang pa zato lam ah pua in ong tai pih hi. Zato a tun ciangin naupang pa a nuntak na beita hi. A nu dah lua in hong sibup hi. A pasal tawh aki muh ding zong kihta mahmah hi.
Patau leh lungmang sa in zato khansung lam ah hong lut suk a pa in nuntak na anei nonlo a tapa luang bek mu khata hi. A tapa luang a et khit ciangin a zi kiang ah pai in kammal mal 4 hong gen hi. Bang kammal hi in na um mawh a?
A pasal in a gen kammal 4 te in
“ Ong ngai ing, Ngaih”.
Naupang pa ahih leh si khinta hi. Hong nungta kik thei nonlo ding hi. A pasal in a zi a khial in mu tuanlo hi. A pa un “Zum ka pai ma, tua zatui bung sin in ka kepna ding hun themno cik beek na pia kha leng hi bang thu pianglo mah ding hi ven' ci hi. A zi zong a pasal mah bangin a tapa neihsun a suplawh mah ahi veve hi. Kua mah kimawh sak tuanlo uh hi. Tulaitak in a zi i kisap penin a pasal i it na le hehnepna ahi hi. Tua a kisap pen a pasal in a pia ahi hi.
Khat veivei ciangin i kim i pam, itatna tuamtuam, i lawm le gual, i nasepna, khat le khat kizopna ah kua in mawhpua in, kua mawhsak ding cih tawh i hunbei kha thei zel hi. Khat le khat i kizopna ah khalumna, itna ki lah khiat ding mangngilh kha thei zel hi hang. A tawpna ah, ih it khat mawhna maisak ding a baih pen hilo hiam? Na neih nate manphat na thei in. Ih hehna, ih lungkim lohna, ih lungsim hong nasak nate khang sak lo in mawhmai sakna tawh tuisuak sak ding kisam hi.
Mi khempeuh in ih nuntakna ciat ah hi bangin ngaihsun thei hileng leitung ah buaina zong hong kiam tektek ding a, itna tawh hong kidim in hong etlawm mahmah ding hi. Mawhmai sakna tawh ki huatna, ki elna, lungkim lohna, ki hazatna te hawl khia lehang huaihamna le launate hong bei in na khempeuhte in ih upmawh zah in a haksat loh lam ih mu ding hi.
..................
Credit: Love Stories, Internet
Translate: Sleet ( 9:55 PM, 9/9/2015 )
Foto: Messi te innkuan
Sr; internet