SAWMAH KHAT THU THEIH HUAI

ZOMI-TE TUNGAH THUPHA HONG KIP THEIHNA DINGIN SAWM AKHAT.

 Malakhi 3: 8-12

SAWM Ah KHAT tawh kisai ih gending ciangin na lungsung ah bang hong lut hiam? Sawm akhat ih theihsa hi  lomaw bang gengen kul hiam na cikha thei ding hi. Tuni in Zomite tungah bang hangin hauhna khang khat khom ding haksa mahmah mawk hiam? Zomite, Chinte sumzon pen kum 100 lom bang sawt ta hi. Bang hangin Budish-te leh Hindu-te hau thei zaw, Christiante sang cih dotna omthei zel mawk ahi hiam?

Sawmah khat thupen tulai pau in Pastor or siate, tanglai pau in siampite in, gen taktak ngam lo-in thuphasan nading bekin gen in kuamah lah thuphasangin Hidu or Budist or muslimte bang in atu, ata khang ah khom cih pen kigen vangvang lo mawk hi. 

Tuni in sawmah khat thu pen LST lam a Doctor late na ngawnin agen mengmeng ngam loh, siate in gen leh na duhman hi, ci a ih mawhsak uh, Kong vaksa uh hi ih cih uh, atal ih kawk ngam uh, tuni in kiciantak in Zomi khempeuh in ih theih dingin genkhia nuam ing. Sawmah khat kuate adingin kipia hi mawk hiam?

 

SAWMAH KHAT BANG HUN IN HONG KIPAN A KUATE TUNG KIPIA? When it's started.

Sawmah khat pen hunsawt lai pekin hong kipan hikha in cin, adang sut man kei ni in, Abraham in Melchizadek siampi tungah pia hi. Mi khempeuh Pa ahi Abraham tungpanin hong kipan hi. (Piancil 14:20).  

Anih na ah, Moses hunlai in Moses Isreal makai hi na pi-in 10/1 Moses tungah Pasian in na pialo a, Asanggam pa Aaron siampi tungah napia hi. (Gamlak vak na 18: 21-32 sungah)

 

TUN MALAKHI 3: 8-12 ENSUK NI.

8 Keimah in note kong dotnop thu pen, mi khatpeuh in Pasian na guksak ding kilawm ahi hiam? Kilawmlo hinapi-in note in nong guksak uh hi. Ahi zongin note in, 'Bang hong guksak ka hi uh hiam?' na ci uh hi. Sawmah khat piakna leh biakpiaknate-ah nong guksak uh hi.

9 Na minam bupun keima neihsa hong guksak na hih manun note khempeuh tungah samsiatna hong tung hi.

10 Ka biakinn-ah an a om theihna dingin sawmah khat a kimin hong paipih un. Kei hong ze-et un; vantung kongkhakte hongin, note-a' dingin na hoih tampi kong piakna na mu ding uh hi.

11 Lo panin a piang na ante uh, kauphe ka nesak nawn kei ding a, na leenggui uh gahpha mahmah ding hi.

12 Tua ciangin na gam uh, ten'na dingin a hoih mahmah leitang hong suak ding ahih manin, minam dang khempeuh in note pen a nuamsa minam, hong ci ding uh hi," a ci hi.

 

SAWM AH KHAT KUA A HIAM?

            Sawm ah khat pen Pasian a hi. Cih phawk ni in, Pasian deihna ah ih zeksak ding thupi ding hi. Malakhi 3:8,9

Tu-in aneu 10 na en suk ni. KA BIAKINN-AH an a om theihna dingin sawmah khat a kimin hong paipih un.

 

BIAKINN AH CIH KAMMAL EN NI.

Biakinn cih tawh kisai-in na lungsung ah bang hong lut hiam? Biakinn a cihtak ciangin Mipawl khatte in Muhtheih biakinn mahin ngaihsun pah a, aman mahmah bel hi pah hi. Khat ih ngaihsut dingin ah, Biakinn a cihna ah Nidangin Biakinn ah kuate teng or om cih ngaihsut ding thupi mahmah hi. Gentehna: USA Biakinn pawlkhatte ah Inn tawh kizo pah a, tua teng ah Siate ki-om sak, kitengsak pah in, tanglai hun tawh kibang ka sa hi.

Tanglai in ah Biakinn ah kuate teng or om hiam cih ngaihsut kul hi. Siampite/siate om hi cih ih kiphawksak nuam hi. Akithoihding or biakpiakna, mawhsutna ah neih ding uh ciangin Biakinn ah pai uh a, tuateng ah siampi-te in biakpiakna piaksak hi. Gamlakvakna 18:12 pan in sim leng mi maimai kikhopni lo-in Biakinn nai ah apai ding Pasian in deih lo hi. v22

“Ka biakinn-ah an a om theihna dingin sawm ah khat a kimin hong paipih un. Kei hong ze-et un; vantung kongkhakte hongin, note adingin na hoih tampi kong piakna na mu ding uh hi.”

Hih laisiangtho in Biakinn agen nopna pen muhtheih Biakinn a gen hinapi a gen nop khat ah mawhpuak(tavuan) aneihsak siampite or siate agen nuam zong ahi hi. Cih kithei sak hang. Anuai ah en suk lai ni.

 

SAWMAH KHAT KUATE GAMH, OR LUAH DING AKIPIA HIAM?

            Gamlakvakna 18:20-32 ciang ah ih sim suk ciangin kitel mahmah hi. Kuate go, tan ding akipia cih kitel sitset hi. Azatna ding gen kul lo-in kitel pah lai hi.

Aneu 21"Kikhopna buk sungah amaute nasepna thaman dingin Israel sunga sawmah khat khempeuh, Levi mite tungah gamh-in ka pia hi.

Aneu 24Bang hang hiam cih leh amaute in biakna-in Topa tungah a piak uh Israel mite sawmah khat pen Levi mite tungah luah dingin ka pia khin hi. Tua ahih ciangin Israel mite lakah amaute in luah a neihloh ding uh ka gensa ahi hi," a ci hi.

            Hih tangnihte gel ih et takciangin Sawmah khat pen Siampi te or Tulaipau in Siate adingin gam leh luah ding akipia ahih lam kitel  mahmah hi. Tulai Siate in sawmah khat thu agen uh ciangin kawlgam, vaigam leh western gam dong ah om Zomi or Chin mite in a duhman uh hi, ci ihih manin sawm akhat hoihtak inzong hong gen ngam lo uh a, Malakhi 3: 11 leh 12 hong hahtang gen uh a, kuamah in tua hamphatna te kinei tuan lo mawk hi.

Zomite, Christiante in aneu 11 leh 12 ih ngahzawh lohna ahang in, aneu 8 na leh 9 nate ah kinungta lai ahih man ahi hi. Siate kikhasia sakin kizah ko a, kong vaksa peuh uh kici zanzan hi. Siate pen ei vaksa hi lo a, Pasian vak hi. Sawmah khat ei a ahih loh lam kiphawk lo in, ei a mah kisasa a, Siate bang tona in kizang ta zen hi. Pasian a ahih lam ih phawktek ding uh kideihsak hi hang.

 

SAWMAH KHAT PEN MISSION SUM HI DEKTAK LO HI.

            Sawmah khat pen Pasian in kei ahi Biakinn ah hong puak un, siate luahding hi. Siampi/siate gamh hi, pia un acihcih lai tak in eite in, Kha an hong vak Siate kham ding hoihtakin ih piak masak sangin haksa khat peuh huhna leh Building peuh ah kizang masa a, aman mahmah dingin kingaihsun thei hi. Pasian in gamh leh luah ding in siampi or siate apiakhit nungsangin, Pasian a ahih lam leh a ngah ding akilawmte in a ngah masak ding thupi hi, malakhi 3: 8,9 ah hoih takin hong gen khinzo hi. Mundangte ah huhna leh budget in ih neih nop leh zong siate kham ding gel photin akicin lai leh gel ding hi pan hi. Ih hih dan uh leh ngaihsutdan man lo ahih manin Pasian lungtang kinasak hi. Tang lai Moses hun hi leh suanga den lup ding pawl kihi kha ding hi. Hehpihna hun ah ih om manin hong kithukpah lo a, ahizongin mite or namdangte thupha ngah bangin ih ngah thei kei hi. Abraham in Melchizadek Siampipa apiak bangin, Pasian na sem siampi or sia khat  sangin mundangte ah na thupit sak zawk leh a paina ding mun ah a pailo suak ahih manin Pasian sum a zekkhial suak ih hih manin Pasian lungkimna kingah lo ding a lei thupha kisailo thei ding hi.

 

MISSION SUM KISA KHA THEI

Sawmah khat pen mission sum himasa lo a Pasian in apiaksa om hi in, Siampi te an, gamh, luah hi cih phawk ni. Mission na sepna dan in, Mission huhna ah nazat nop leh sawmah khat na lak khiat khitteh 9 pan in pia in. Sawm ah khat leh Mission kisailo hiphot hi. Sawmah khat tawh mission kisai masa hi leh bang hangin Pawlpi  kim ah Mission box ci-in kituam hawm/dong mawk ding ahiam? Ngaihsut huai mahmah thu ahi hi.

Tua ahih manin USA, India, Burma mun tuamtuam a ah omhih lai sim kha khempeuh in Na siate uh akham dingin sawm akhat hoihtak in na pia un tua hi leh thupha kisang pan ding hi. Siate in khasum hongkham zawh loh tak ciangin sumhong zong a, ih gensia lailai uh hi. Na gensiat sangin na sawmah khatte uh akhamding uh napia un. 10/1 tawh siate innkuan kham ding ih piak khit ciangin a kicin lai leh Pawlpi sung kivanna, Mission, Buildingte ah khenzawh zah khen ding hia, Siate a masaklo liangin mudangte ah budget gel ding hilo hi. Tua pen 10/1 tawh kisai pai zia leh zek zia ding ahi hi. Tua hi leh thupha Malakhi3:11-12 sunga ah gente ih tang thei pan ding uh a, Hindu, Buddhist-te bangin tu leh ta khang dong ah ih hauhnate uh ih zek thei ding uh hi.

 

Christian ahilote gentehna a ihgen det kei zong ngaihsun thei leng a namah hi. Christiante ahoih lamin Christian ahilote in hong gen leh ih ut kal ah, a hoihlo-in hong gen det uh pen ngaihsut huai hi.

Sawmah khat pen kawlte nuntakzia atheite in thei ding hi hang, amau zong a phungzi-te tung uh ah nak piak mahmah hi. Zingsang tho baih in, an huan uh a, amau nek ma in a phungzite adingin kuang khat ah thukma sa in pia masa uh hi. Hindute ahih leh an huan uh a amin ciangin innsung innpua a pasian nonote uh pia masa in tua ciangin amau ne pan hi. Bang hangin thupha ngahlohna ding hiam a nungta Pasian bialote in zong a siampu-te leh a pasiante uh zahtak mahmah hi ven. Ei a nungta Pasian biate in ih Pasian ih kihtak mahmah ding hizaw hi. Budishte in a pasian uh sum apiak dinguh ciangin ahoih penpen mah na pia uh hi. Christiante e leh bang ih ci vua, siate gensiat leh cilphih peuh sawmte hi zaw hang ahi na? Sawmah khat pen siate tung ah nang piak bangin na ngaihsut cingin na iplah a Pasian a, Pasian piak ahih lam phawk lecin na hamtam ngam kei ding hi. Tua bek hilo an Pal pen siate ading hi cih na kigen lai hi.

Chin or Zomite Pasian in thupha hong pia nuam napi in eite in ih guk saksak manin thupha kingah theilo a Pasian kikhasia sak zaw hi mawk hi. Tang laidan in hong nitun hi leh suangtawh den lup ding vive hi hang.

 

TANGLAI

Tanglai in sawm akhat leh anpal, gan pal napia tangtang uh a, tuate pen siampite ading hi a, siampite in tuatung panin sawmah khat apiak sawn ding uh pen Moses tung ah na hilh hi. Sawmah khat thupen OT sungah hoihtakin na gen a NT ciangin sawmah khat thu telgen ding in nei nawn lo in, cit piakna na gen hi. OT sungah 10/1 khat vai kiciantak in na gen khin ahih manin NT ah na genthuah nawnlo-in 9 pan piak khiat ding na gen hi. 

Gupna thu tawh kisai in OT a pen NT ah kizang theinawnlo ahih manin kician tak in Jesu thu up ding hong gen hi a, OT ah Sawmah khat thu kiciantak in genkhin ahih manin NT ah hong  genthuah nawnlo in a mite in apiaknate hong genbek hi.

 

SIA TAWH KISAI LEH UKNA ZA,

            Hih tawh kisai in LST sungah hong uk kumpite thu na mang un hong ci a, tua ma in bang gen hiam cih leh kei ma theih loh in Ukna za angah om lo ahih manin hong uk kumpite thu na mang un ci hi. Pasian thu tawh kituaklote man ding cih hituan lo hi.

Tua mah bangin siate pen Pasian theih pih loh in sia za ngah om tuan lo hi. Tua hih manin athu uh ih man ding kisam hi. Tucing pa nung zuih sawm in la, NA nung/mipi nung tuucing pa zui sak kei zaw ni. Upa Tansawm zong onglo khat in Siate pen Eideihdan a ih kaih sawm mawk pen ngaihsun thei hileng kilawm hetlo lua hi. Pasian in ana semte siate kisuan pih, gum mahmah a tua pen Mihau pa leh Mizawngpa(razarus) tung tawn in ih mu thei hi.

            Mizawng pa Abraham ang sungah a om lai-in mihau pa HELL ah om in, tui tak khat anget leh Abraham in phal lo hi. Mihau pa in tua ahih leh Ka sanggam u leh naute kei tunna ah hong tun lohna dingin vagen sakin ci-in athum tak cianin, Abraham in adawn na ah, Leitungah ka na sem Pastorte kamsangte tam mahmah hi. Tuate thugen a up kei leh hih pa hing kik in a vagen hangin um tuan lo ding uh hi cih san hi. Pasian in a nasemte kisuan pih mahmah in, hu hi, cih phawk in. Siampi itten siampi thupha sang ding, kamsang itten kamsang thu pha sang ding hi.

 

Thukhupna

Ka lungsim ah om lua mahmah ahih manin kizom leh lo ngaihsun lo in Pasian hong theihsak bangbangin ka at hi a, atel siam dingin Topa’n thupha hong pia hen. Hih thutawh kisai in nuntak pih leh azui zo dingin Topa in asim mimal khat ciat thupha hong pia hen. Kei tha tang tawh hong pai in gen thei lo ka hih manin hih lai tungtawn in na sim un la, ih Zomi sungah thupha ih ngahna leh Pasian gamtang zaina, ih Pasian nasemte ih itna leh Pasian a a hihna ih telsemsemna dingin Pasian in hong suak sak hen la, tu a kipan in hih lei tungah zong ih hauhnate uh akhangkhang in akip pai suakna leh sawtpi akikhom hong hisak hen la, vangtungah zong thupha tampi ih san na uh, leh Pasian lungtang akhoihkha, Pasian alungkimsak mimal khat ciat asuak ding in hih teng pan in thukong ngetsak hi.

Asimkha mimal khat ciat Topa thupha in akhangkhang in na inn kuan sung ah hong kipna hi ta hen. Amen.

 

Siam Khaute

USA post masa march 2013 nihna edit may, 10, 2014

 

ZOMITE AA DING NGAIH SUT HUAI THU

EI ZOMITE AA DING NGAIH SUT HUAI THU
BISHOP - LIEN KHEN THANG

August 1/ 2016

 

Ei Zomite’ ading, ngaihsut huai thu khat, ei leh ei mi ban ih kisak hang, UNDP te leh Kumpi Sipuazi leh Amyota Khantona lam lente hong muh dan cih article kong puak kawmin, kei muhdan khat zong a tomno khat in a nuai a bang in hong pula nuam ing.

Ei mite pen in, ih leitung nuntakna hamsa salua deuh a hiam maw, kha mi cihma ki om in, van ah hingtang in len kisawm phial ta maw hi. Gilkial daangtak leh zawn leh ngau na ih sa mahmah a, ahih hang, nezo dawnzo pian in, ih gil hong vah sunsun leh Pasian cih thadah ei mau min nangawn ki mangngilh thei hi. Nei pian in, zu leh sa nezo in nuam sa pian leng, gawl bembem, kamdimtakin Halleiluia, Praise the Lord ki ci zaizai in, Vantung gam malep dan khat in ki om phiupheu thei hi. Zawn puak nop kisa mahmah in, pilna leh hauhna ki puak siam zo nailo, kipai siam zo nai kei deuh leh kilawm kasa hi.

Ei mite pen, annek tui dawn, sum leh paai bek tham lo, pilna ciimna, upna, thu khualna, cihtakna, ki-itnate ah zong zawng khal lai, picing zo nai peuhmah lo hihang.

Ei Zomite lah ah, ih hai, lai theihlo, laitan neihlo, ih pilna neihlo pen na a sa, a awlmawh mahmah alaitang na venven pen mi kitam pha nai lo hi. Tua ahih man in,lai thei khempeuh mipil ahih lo hang, mi pil khempeuh pen pilna nei vive ahih lam tel in, pilna lo tawh mui kibun zolo ding, gual tung kituang zolo ding cih thei ni! Tua bang lungsim ih neih khit tek, ei khangthakte in, a maan pha mahmah ih khangno hun sung in, ih sum ih paai neih sunsun te tawh pilna pen tup lian bel in nei a, han ciam tak a pilna ih sin/zon ciang bek in, pilna kuitung, gualzawhna lukhu nelkaaite khu in, pilna ciimna phungpi ahi ih biak Pasian mahmah tawh zingvai nitak vai ih hawm khawp ciang, Zomite bangkua sung khempeuh ah, nuntak gim hong nam pan ding, a bucing khantona in, ih mite’ nuntakna sungah kip tak in zung hong kha thei pan ding hi.

Citciat in ah: Mel hoihna Topa piak hi napi, mel hoihna tawh mi tampi puk citciat hi. Hauna Topa thupha hi napi, a hau pawl khat Pasian mangngilh lawh citciat hi. Pilna Topa piak hi napin, a pil pawlkhatin Pasian awl mawh lo citciat hi. Za liatna Topa piak hi napi, a za lian pawl khat in Pasian mangngilh citciat hi. Cidamna Topa thupha hi napi, cidam sungin Pasian hehpihna ahihlam kiphawk lo citciat hi ( Pu Lian Za Kam, L.L.B; Advocate; Suang Suang magazine, p.140).

Ih nisim nuntak suangpona ah, pilna tawh thu ngaihsun a, pilna pen pansan kim mahmah khat a ih neih ciang bek in, ih sep ih bawlna leh ih vaihawmnate khempeuh ah, daupai maapai in, lawhcing tak in maa ih tung zo ding a, pil na gahte lungdam maitaai tak in ih lo zo pan ding hi. Tua ciang bek in, ih tuptup, ih deihdeih, ih lung gulh mahmah kumsawtpi a khawm khantonate ih Zogam, ih Zomite nuntakna ah hong tual suak ding a, gualzawhnate paak bang in ih tawi thei pan ding hi. Buh aal khuang e, taai khua vaal ta, ei Zomite gilkial dangtak, zawn leh ngau na sakna pan, ih pilloh, laitheihloh, laitan neihloh, ih hainate phawk siamthei in, pilna deihna lam ah kal khat ih suantoh ding, hun mahmah ta hi. Upna leh pilna tawh khut khat tawi khe khat khai bangin apicing khantohna lam ah.kalsuan diamdiam ni!. Tua hileh, Vantung ah na deihna a kicin mah bangin, leitung ah zong hong kicing ta hen, cih, ih Vantung thungetna hong kicing taktak pan ding hi (cf. Mt. 6:10).

Nisim naisim ih nuntakna leh ih vaite khempeuh ah, pilna tawh gelkhol masa, thuman thutak lampi tawn, upna tawh kal suan in, hanciamna bul let tawn tung zo leng, ih nuntakna hongpi cing in, hong nosuah ding, Zo laukha paallun ding hi.

Sepna bawlna, nopna dahna, nek leh dawnnate ah sem khawm bawl khawm diamdiam; nuam khawm dah khawm, ne khawm dawn khawm liailiai in, ih neih ih lam sunsunte zong, Thang Ho leh Lian Do te mah bangin mimtang phel hawm taangtang phel hawm leng, ih neih ih lamte zong Pasian in thupha hong piak sak ding a, hawm leh zeek hong cing ding, ih lei nunna ah van nunna ma lep in, lungdeih teng lii bang hong cing ding hi.

Ngaitui Von Tawi
Zogam Siampi
Msgr. Felix ZOHEISA
Kalay Diocese

 

MUANG IN = GAMTA IN %

MUANG IN = GAMTA/NungTA IN

Believe and Act it

Nidang lai-in Khua nih kikal ah Luipi khat om in Tua khuate kikawmna dingin Lui tung ah sikkhau leipi khat kidawh in, Tua lei tawnin nisim, lokuan, vaikuan ah kipan tua kim a om khuate akikawmna, hawhna a kizang mahmah lei ahi hi.

Ni khat guah tamlua ahih manin  Lui tui khangin lei teng phusia a, asikkhau bek cian mawk hi. Nitaklam ahih manin tua leiphung ah mitampi awk hi. Tua laitakin Pasal mel hoihsim khat hong pai-in tua bangin Lei phung ah mi abuai henhan laitakin, tua lei kisia sikkhau bek kikhung/omlai tung ah hong pai phei zatzat in alang leh alang hong kawm kawikawi hi.

Tua bangin akawm kawikawi khitciangin Mipite  vante, Antang, Avokpite na ngawn uh aliangko tung ah pua in sikkhau tung tawn in alang leh alang ate van hong puak phei sak kawikawi hi. Tua bangin ahih khit takciangin Mipite kiang ah tun Na vante uh kipua khin alang leh lang ah tungkhin nong muhdan uh hi.  Tun gim mahmah ta ing, ahih hangin hihvante sang no zang zaw nahih manun khat khitkhat tun hong pua phei ding hing ci-in hong tangko hi.

Tua bangin agen takciangin Pawl khat te-in amit uh tawh vangik pipi sikkhau tung tawnin apuak phei mu napi-in tuang ngamlo uh a, pawl khat te-in mitsi liang in bawm phei in agal lang khat ah tung uh hi. Pawl khat in amit in mu kilkel, um ta leh agamtatna uh tawh lakngam lo, Muang ngamlo uh ahih manin agal khat tungzo lo in, anung lam a khua ah tuazan agiah loh phamawh mawk hi.

Pawl khat te ahih leh sih leh sih ci-in mitsi liang mahin atung ah bawm phei uh a, kiatpih samlo ahih manin Agal a khua ah, alungtupna mun vuah tung thei in asawmna leh gelnate tangtungin Nuamtakin agal akhua ah khuasa thei, nungta thei uh hi.

--------------------------------------------------------------------------------------------------------------

Tua mah bangin Guamthukpi, Lui pi kantanna dingin Jesuh hong kidawh a, Jesuh in ken hong pua phei ning ci-in ih um theih, na dingin ih upzawh loh ding phial nalamdangte hong bawl in mu, thei-in, zata le hang ki-um sam na pi-in Amuang zo, agamta ngam, mi haksa mahmah mawk hi. A tung a ih tangthu gen bangin Um ciang tawh nuntakna pen thupi mahmah na pi-in ih gamtatna or Muanna tawh atung ih bawm phei ngam kei leh Lui galkhat kitung zolo ding na hi mawk hi. Mitsi liangin atung ah aluai pheite in Lui gal tungin nuamtakin tualui gal a khua ah a nuntak theih mah bangin, tuni in Jesuh ih up/um ciangbek tawh beisak lo-in Nuntakpih, Muang, Gamtatna in lah ngam, Ih hangsan ngam kei a ahih leh Tua lui gal a Khua ah kitung zolo ding, ih lungtup mualsuah zolo ding na kihimawk hi.

#Tua Mipa Jesuh tung  natuan ngam kei leh Nikhat niciangin tua Lei khau tung ah nang leh nangin na pailo aphamawh hun hong tung ding a, Na paingam leh suakta, na paingam kei leh tua teng ah acian/omden ding nahi hi. Nang leh nang in na kihottawm ding hun hong tunma in tuni in Jesuh in hong puanuam in Lei phung ah hong kunkun, ngak lai hi. Hun om lai-in amah muangin, gamta, Hangsan in la Kalsuan in Aman leiphung ah hong ngak lai hi.

@Hong pua phei ding a om loh hun hong tung ding a, Na paingam leh suakta, na paingam kei leh tua teng ah acian/omden ding hun hong tung pel mawh ding ahi hi.

Ahun omlai-in Jesuh um inla, amah kipuasak ngam, muang ngam, GAMTA ngam, sem ngam Hangsan in Upna, um ciang bek tawh na om leh Lei phung ah hong kinusia kha ding hi.

Lungdam

Siam Khaute

July 24,2016

NU LE PA THUMANG ANAH LAWH PEK (III) #

NU LE PA THUMANG ANAH  LAWH  PEK (III)

Nidang lai-in Khau khat ah Kumpi/ Hausa Innkuan khat om a, Nikhat tuate Inn ah Putek khat zin vatung in na na-uh hong sem sak un cin vathum hi. Tua Kumpi pa in tua putek ah Inn ah gancing leh atuam2 semsak in nitha anvak in ah Inn vuah omsak hi. Kumpi pa in ta Numei nih nei a amelte uh hoih mahmah ahih manin Nungak hel kilawi ngei lo hi.

Tua bangin mihau, mipil, miliante zawl hel in a om kawmkal ah zin putek pa lah kisil ngei mello namsia thitthet lai ahih manin a Kumpi pa tanu upen in mite muhna ah hihbang inn aom  aneih pen zumhuaisa lua mahmah hi. A nulepa kiang ah mi zahtakhuai lengla ih neih kawm kal ah hih putek pa pen zum huai lua namsialai mi omom na ah hong pai nuam lai-in paikhiasak un, Inn ah omsak nawn kei un ci-in anute kiang ah gen hi.

Hih bangin a nulepa kiang ah hong gen ciangin atawpna ah a nu le pa in putek hehpih veve sam uh ahih manin atawpna ah putek pa hopih uh a, pu aw bang leh bang leh Lo zapi khat nei ung, tuateng ah lo vahawng in, vaimim vahong in, Kii vabeng in ci-in nikhat hong gen uh a putek zong aw ci-in hong mang hi.

A zingciangin tua Putek zong lo ah asawl mah bangun, lo ah hong kha uh a amah zong Lo buk ah sun leh zan lo hongin tua teng ah zan hong giak denta hi. Putek pa zing an nitak an ding pen tua Kumpi pa in apuak dingin atanu upen sawl a, atanu upen in amuh dah mah bangin apa nial in Putek lo hong pa an ding puak nuam lo hi. Tua leh a tanu neupen kiang ah lo hawng pa an ding vapuak in acih tak ciangin anau penin a Pa thugen nial ngamlo in va puak zel hi.

Sun an puak in apai ciangin Putek pa in nau aw an puakin nong pai ciangin lo khung panin hong ku, awng zel in ci-in vaikhak hi. Tua mah bangin tua anau zaw numei in an apuak simin lo khung panin Hong tungta ing ei, ci-in awng zel hi.

A sawtsawt ciangin Nikhat nungak nu-in abang hi peuh mah hiam lo khung tunsim a hong awng in cihdet kei mawk ci-in aciah kawmin hong ngaihsun a, azingteh an puakin apai ciangin lo khung pan awng lo-in lo buk a vapai-in va en sim hi. A va-etsim leh tua putek pa pen Lo buk tautung ah tamngai leh guasem tumin alunglen late tumin atu zilzial mu a, tua Putek a amuhmuh pen Tangval melhoih mahmah khat na hi mawk, avang bang tang heuhau liang a muh teh lamdang salua in lo khung ah paito khian2 kik in, lo khung panin hong awng in lo buk ah hong paisuk leh tua tangval pa pen Putek dan mahin na om kik mawk hi. Nu ngaknu zong tua akipanin tua putek pen hong limbawl in an puak ding bang atha hong lawp mahmah hi.

Nikhat Kumpi pa in asuah ni hong nai ciangin Ka suahni ah Thalkap kidemna om ding, asiam penpen ka tanu tawh kiteng sak ding cih thu agam sung ah hong tangko hi. Mun tuamtuam panin Thal khapsiam aomteng hong pai ngeingai uh a 100 bang pha uh hi. Hih thu lo hong putek pa in an puaknu tung tawn in azak ciangin amah zong tuani hong ciah in thalkap kidemna ah hong pang hi.

Atom in: Kumpi pa suahni hong tungta a, Thal kap hong kidemdem uh hi. A tawpna ah Putek lo hong pa asiam pen, akhatna hong la mawk hi. Akhatna hong laktak teh Kumpi pa in akamciamsa om bangin ka tanu tawh kiteng sak ding cih himawk ahih manin A tanu upen kiang ah hih nalawmpa ding hi ei cih in hong gen a zingteh pawi bawl ding ci-in hong lak ciangin atanu in hih putek pa lo hong pa hilo maw hong ci-in, hih zah a mipil misiam, miminthang in hong deih a, hih putek pa tawh ka kiteng kei ding hi ci-in apa hong nial hi.

Hih bang thu a om takciangin Kumpi pa in a tanu neu pen hong dong hi. A tanu neu pen in lah tua Putek ahih na, Tangval mel hoih mahmah ahih lam thei ahih manin pau lo-in Pa aw nang cih bangbang hita hen ci-in thukim hi. Mopawi ding ni hong tun takciangin Kumpi pa in Putek pa kiang ah Pawi nei ding hita na hih ciangin hong kithawi buang in ci-in putek pa hong gen hi.

Putek pa zong zi nei ding hi mawk ahih manin hong kithawi-in, Mopawi sung ah hong luttak ciangin, mipi in khut bet ziahziah a, tua lai tak a u nu-in a et leh tangval melhoih mahmah avang bang atang liang khat na hi mawk ahih manin lamdang sa mahmah hi. A Pa thu amang anau nu tawh kiteng hi mawk ahih manin a U nu-in hong eng kik mahmah hi.

Putek pa pen Kumpi gam dang panin Kumpi pa tapa zi zong dingin hong zinkhia hi a mel hoih aduang cing, thal kap asiam mahmah khat hi a, Zi zong dingin Putek dan in akineih Putek savun puan asilh a akisel khat ahi hi. Hih bangin Kumpi khat I gam ah zizong dingin hong pai a, anau numei in itin kihlo in na huh, panpih ahih manin tuatawh hong kiteng ahi hi. Mopawi ah ahihna teng hong pulak a lungdam takin ama Kumpi gam ah azi tawh hong cih uh hi.

Nulepa thuman na pen lawhcinna leh gualzawhna in hong zom tawntung hi. Mi ih thupit sak loh khat zong athupi mahmah mi khat na hithei mawk hi, cih asim kha mimal khat ciat in ih theih ding thupi leh kideihsak hang!

Lungdam

Siam Khaute

July 9,16

NA HOIHNA DING IN AMAN HONG THUAK+**

NA HOIHNA DING IN AMAN HONG THUAK

Nidang in Khuapi khat ah Nuta Innkuan khat om in, Inn that/sawng 3 na ah om uh hi.Tua nupi nu in a tano numei ih musak in a ih mut kalin inn nuai ah van lei-in vapai hi. Kamsiatna tawh tualai tak in a omna uh Inn that/sawng 2 na panin Inn hong kang lualua a, Tua nupi nu in Inn kang amuh takciangin hong delh vangvang hi.

Ah Inn uh hong tun takciangin Inn tung ah kahto ding acih leh melkuang phalua ta ahih manin anu kahto thei nawnlo hi. Tua lai takin Inn nuai panin Tua numei no Kahna aw kiza ziahziah a anu in lah honkhia ngam nawnlo in Inn nuai lam ah kata nu hong hot sak un ci-in awngawng ta leh kua mahin huh ngam vet lo hi.

Tua bang hunlai takin Motor hoih sim khat panin Pasal khat hong pusuak a, Nupi kiang koih ah hiam ci-in hong dong ah Inn tungpen khansung ah katano ka sial om hi. Si ding hita hi hong ci hi. Tua ciangin tangval pa in ippi khat kikhuh in Kahlei tung ah kahto samsam in Tua numei no akap2 pen A ippi tawh hong tuam in ah angah hong pom in Mei kuang zuai2 lak ah step kahlei zui-in hong tuaksuk hi. Inn nuai hong tun takciangin tua tangval pa hong tuksuk in khua phwk nawnlo a numei no pen ippi tawh hong kikhuk suk bang mah ci lo-in anu kiang ah cidam takin hong tung thei a anu lungdam mahmah hi.

Tua bang laitak in tua tangval pa pen mei kuangin ahulna asamte amaite kang gawp ahih manin khuaphawk lo in Zato kipuak pah hi. Kamphatna tawh tangvalno pa zong hong dam zosam in ahih hangin nidang bang nawnlo in amai leh akhut ah meikang pawn tawh hong kidim in amel ngei hong bang nawnlo a nidang a melhoih mahmah Tangvalno pen tun putek hong bang mawk hi.

Tua numei no pen hong khangtoto in Pilna siamna hong nei in, 2016 Zomi Melhoih Model cih bangin Tua khuapi kim le gam ah Melhoih pen Model hong ngah hi. Tua bang in Melhoih hong ngah takciangin Mi tampite in pakta in ngaih bawl mahmah uh a, Khua kim khuapam panin tua numei hel in tangval melhoih, mihau, mipil kituah khengkhang zel hi. Tua bang lai takin tuakhua kiu ateng tangval melsia mahmah khat hong hawh zel a, tuanu hong helzel hi.

Tangval melsia mahmah khatin hong helzel in midng te lak ah pau zong paungam lo in hong tukhinkhian zel a, nitak bang midangte sangin ciah hak zaw thei zel hi. Tua nu in hoihtak zong hopih nuamlo ban ah, midang te tuisuah in alim thei2 pia ta leh amah pialo in nawlkhin den hi. Tua bek hilo in kamkha leh kamsia tawh hopih thei zel hi.

Nikhat niciangin thuakzo nawnlo ahih manin anu kiang ah hih mi melsia pa inn ah hong hawh den mihau milian mipil hihzah lai ah zum huai lua, ei zong melhoih pen kihisam  ahih manin hong hawh lohna dingin genin hong hawlkhiat sakin ci-in anu kiang ah gen hi.

Ni khat anu in atanu samin hong hopih a, thu khat hong gen ning. Na neu lai in Nang na ih mu a lupna ah kong sial hi. Tuakal in Inn nuai ah van lei-in ka pai kalin ih omna inn uh hong kangin hong hon un, ka tanu honglaksak un ka cihcih hangin kuamah in hong langam lo hong huh ngamlo hi. Tua bang laitakin ih khuapi sung a Pasal a melhoih pen amin thang ahi Tangval no pa in ka awtot azak ciangin nang huh dingin inn tung lam ah ippi sihin hong kahto a, nang cidam takin keikiang hong tunpih hi. Amah Nang hong huhna in kanggawp in khuaphawk lo in Zoto kipuak pah hi. Zato panin hong damsam a ahih hangin mibang nawn lo in amai leh akhut te ah mei kang apawntawh kidim in, Nidang in melhoih pa pen tun melsia pen suak hi. Tua pa pen tu a na huat mahmah melsia pa ahi hi. Ama hangin nang tun Melhoih leh mideih pen asuak thei hi teh ci-in a nu in atanu kiang ah hong gen hi.

Tua ciangin atanu in hong ngaihsunsun in aw, Kei kakhua theih ma-in amah Melhoih pen a na thang a tun amah kei hangin Melsia pen suak a, kei tun ama hangin melhoih pen leh mite deihpen suak hi-ing ei ci-in hong phawk takciangin, Bangzah ta in midangte pilin, hau-in, hoihta leh Tuni a kei hang a amelsia pen hong thuak ka umah ka nuntak sung a dingin tel ing, pom denning ci-in kitui lungsa in alungsim hong khensat hi.

Tua panin tua a U melsia mahmah pen kiangah hongpai-in nidang ah ka theih lo man a kong bawl khakteng hong maisak in Tuni a kipan in Ken nangtawh ka nuntakna zangkhawm dingin nang adingin kong kipiata ci-in angpom in hong gen in, Mihoih, melhoih, mipil, misaim, mihau zatam lai ah nang bek kei adingin ahoih penpen hi teh Ka bangkim nang a hitang ci in hong ki-ap hi.

_______________________

Tuni in ih nuntakna sung ah Jesuh zong ei ading in damna ih ngahna dingin  amah hong kisat nim, Nang leh kei hoihna ding in amah ahoih lo pen in kibawl, Nang leh kei hauhna dingin amah azawng pen hong thuak, Nang leh kei nunnopna dingin amah haksa pen hong thuak, Tuni in kei sihtang dingin Jesuh hong si, ci-in amah ih pom hunhun in amahin hong sangding a, leitung vantung ah amah tawh nuamtakin ih nungta khawm ding hi.

Asimkha mimal tung ah lungdam!

Siam Khaute

July 916

NU LE PA THUMANG ANAH LAWH PEK (II)"""

NU LE PA THUMANG ANAH LAWH PEK (II)

Nidang lai-in khuakhat ah Innkuan khat om a ta numei 2 nei uh hi. Apa in aneu lai un sihsan ahih manin anu bektawh hong khuasa uh hi. Atate sang khahna ding leh nek ding dawn ding anu bek mah in nisim in zong zel a, u nau pasal om lo, pa omlo ahih manin khuapihte in simmawh mahmah uh hi. Tua bang kawmkal ah atate hong khang lianto in hong nungakto ta uh hi.

Singtang gam ahih mah bangin Aneu vua kipanin anu in Tuk lam ah THEIPI vilzel in tua tawh atate hong en,vak toto hi. Zo lam ah a nu theivil in apai zelzel ahi hi. Tua mun ah thei avil ciangin thei pen gah hoih mahmah, amin zong tam, agah zong gol thei mahmah in seng dimdim pua in Inn lam aciah zelzel in Inn atunteh atate gel in tua theite ne-in, alungdam mahmah uh ahi hi. Nikhat tua mun mah ah vapai a thei lawh laitakin Pasal aw khat in hopih hi. Inn ah ta na nei hiam ci-in dong a, ta numei 2 nei mah ing anu in ci hi. Tua leh tua aw in Na tanu khat tawh hong kiteng sakin tua hi leh nidang ciangin thei navil ciangin gahpha mahmah ding a, tuk leh khal leh lungkham om nawnlo ding hi. Tua ahih kei leh hih theite kong losak nawn kei ding hi. ci-in agen ciangin anu in aw na ci hi. Anu in ngaihsunsun in lamdang sa mahmah in atate kiang gen ngamlo hi.

Nikhat thei vil dingin apai kik ciangin athei te minlo in puam elal uh a, kumkhat pen minmahmah in zong limci mahmah a, ahizongin sang lua mahmah hi. Tua phuang ah adak toh laitakin Tua Thei kungtung panin GULPI khat in hopih a Natanu tawh nong kiteng sak ding hiam, Nong kiteng sak leh hih thei kong losak ding hi. Tua bek hi lo nidang ciangin zong Hih nakim leh pam a theikumte min pha mahmah ding a, niam mahmahin na deih bangin na lo thei ding hi hong ci hi. Tua nu in Thei pua lo in ciah leng lah katate agil kial ding a, ta nute gultawh kiteng ding cih lah ngaihsun zo keng ci-in hong lung gel hi.

Atawp ah neik leh dawn ding mah hong lunghimawh ahih manin hong kiteng sak ning ci-in dawng a, tua ciangin Tua Gulpi in tua theikung tung a gah limci mahmah te niamsak suk in tua Nupi nu in asengdim taklo in hong cih a, inn atun teh maitai het lo in Inn ah hong tung hi. Theipi atanute gel tawh hong nek kawm in, tua thupiang teng hong gen a, Atanu upen kiang ah Nau nang tawh nong kiteng ding hiam ci-in atanu upen hong dong hi.

Ata nu in nu aw Gulpi tawh kiteng ding nong cih lawmlawm nasa lua in hong mang zo kei ning ci-in thal nial pah a, anu pau ngam nawn lo-in tuateng tawh zan hung hong man to hi.

Azing ciangin nek ding dawnding omtuan lo ahih manin Theipi avilna Zo lam ah hong pai leuleu in thei hong vil leh Gulpi in tua bangmah in na dong leuleu a, Nong kiteng sak kei leh thei konglosak nawn kei ding hi acih ciangin, aman zong hong kiteng sak mah ning ci-in dawn in thei sengdim tak pua in hong ciah kik leuleu hi.

Nitak ciangin anu in Nau aw Na u lah utlo mawk a, ei ih nuntakna haksa lua mahmah a theipi bek mah tawh akivak ih hih manin Nang nong kiteng diam ci in atanu neupen kiang ah agen ciangin atanu in Nu aw nang kiteng in na cih ahih nak leh nang cihbangbangin gamta ning  nu aw ci-in atanu neupen in hong thukim hi.

Nikhat theivil in pai kik leuleu a, Tua bang mahin a Gulpi in acih takciangin a nu in hong kiteng sak mah ning Hong zui-in acih takciangin Gulpi in, tua nupi nu hong zui nguainguai ta hi. Anu zong sengdim in thei gah hong pua kawm in Inn lam hong zuan a anung ah gulpi khat in zui guaiguai mawk ahih manin khuapihte muh ding, mi simmawh kawmkal ah amai zum mahmah ding hi.

Inn hong tung takciangin tuagul pi zong Inn sung ah lut nguinguai a, Ata nu neupen tawh hong kiteng saksuak mawk hi. Zingsang khuavak ciang in Tuagul pi pen Innka tung ah kualvenvan in nisa lum awi zel a, Khuapihte in Theivil zel nu atanu gulpi tawh kiteng cih hong theih takciangin lamdang lah sa, simmawh lai, tanute gultawh kiteng cih mahmah ci-in phun kawm leh munuam in hong tai henhan uh a tuagulpi Innka tung a kual venvan pen hon gen uh hi.

Anu zong thei avil mah bangin thei vil zel a, thei te pen minpha lua zong apumte nidang sang limci zaw in gahpha semsem ahih manin anu lungdam mahmah hi. Nikhat anu in zingsang ciang lah Gulpi inn katung ah om zel zanciang atanu tawh lumkhawm zel cih pen alungsim ah ngaihsun thei mahmah lo ahih manin Nikhat Za alup khit uh leh Zankim in thosim in atanute nupa va en sim hi.

Atanute nupa ava etsim leh Gulpi a ahpai nguai2 zel nisa lum awzel pen Ata nukiang ah Tangval mel hoih mahmah khat a n alum hiuhiau mawk ahih manin amah zong pau lo in alupna ah pai kikin ih mu a, zingsang teh tua tangval papen Gulpi bangin innka tung apaikhia nguainguai in nisa lum awi zel hi.

Kal khat bang hong cinteh anu alungnuam tuanlo ahih manin nikhat a et kik leuleu leh Tangval mel hoih mahmah khatin na lumin avang bang tang lian a, alupna nuai a et leh Tua tangval pa kituamna gul vun/lip pen kizial in om ah muhteh anu in tua selsim sak hi. Nupa te zingsang hong thawhteh Tangval pa akisel na gulvun na om nawnlo ahih manin kisel thei nawnlo a, mihing mah bangin hong om khia in kisel thei nawnlo hi.

Tua takteh khuapih tuipihte in Gultawh kiteng ci a asimmawh mahmah uh, tua thu azak uh teh a en dingin hong pai ngeingai leuleu uh a, Tangval papen mel hoih luakisa avang bang tang heuhau liang hi.

A U nu-in amuh teh anau nu eng leuleu in A nu kiang ah kei zong kapasal ding gul hong zon sakin ci leuleu a anu in athei vilna lam ah gulkhat mah tawh kimu a tuagul atanu a dingin hong tonpih leuleu in, Kalkhat khit teh anu in atate bang acimah hiam ci-in ava et leh atanu gulpi in na valh in, na valhtum dekta ahih manin anu in temta la in atanu honkhia kik hi.(atom a ihgelh pak hi)

Nu leh pa thuman pen Pasian in Nu le Pate tung ah thupha akoih ahih mah bangin  NulePa thumangte Topa in thupha hong pia a, A u in ama deihna tawh azonsak takciangin sihna tuak lawh dek hi. Tuni in Nu leh pa thumanna in Lawhcinna hong tun hi cih mangngilh kei ni.

Lungdam

Siam Khaute

July 4,2016

Add caption

NU LE PA THUMANG ANAH LAWH PEK (I)

NU  LE PA THUMANG ANAH  LAWH  PEK (I)

Neu lai  a Tangthu theihte kepna in pawlkhat gelh dih ni e,

Nidang lai-in ah Khua neu khat ah Innkuan khat om a, tuate nupa in ta Pasal thum nei uh hi. Gal le sa tamlai  ahih manin up mawh lohpi in apa in atate neulai in hong sihsan in tua tate anu bektawh hong khuasa uh hi.

A nu-in atate avakna dingin nisim in lokuan ban ah tuk sungteng Theipi vilzel in tuatawh atate hong vakto zelin Asawtsawt ciangin anu in guahpi nuam a, lokuan in theivilna hangin akhua hong sikin aci nasia takin hong na hi. Akha bang cina in Inn ah hong om takciangin dam zo nawn lo ding kahih manin ci-in nikhat anu in atate hong samkhawm in thu hong hilh hi.

Tate aw napa in hong nunsiat nungin haksapi in ih nungta to a tun kacina lua ahih manin damzo nawnlo ding, na pakiang lungkham dahna beina gulgal kingakna munah pai ding kahita hi tate aw, ih neihsa lah bang mah om lo ahih manin ih neih sunsun ih suangthu thumte na paina navuah khattek na pua un la, Khuapi lam nazuan un cin in anun hong vaikhak hi. Tua khit ciangin atate tawh kingawng kawi in khitui luangin, hong kipawm uh a, asawt lo in anu in hong nusia ta hi.

A nu-in hong nutsiat takciangin anu in avaikhak mah bangin asawt lo-in khuapi lam zuan dingin hong kithawi uh a, a unau un anu vaikhak bangin athuk uh suangtum khatta hong pua in hong paipai uh hi. A U pen in naute ngak zolo ahih manin hong paisan in lamkal ah asuangthuk zong giksa ahih manin, hih kimanna nei lo Suang thuk ci-in pai a, pai vingveng in Khuapi khat hong tung a tuateng ah, atom in genleng Khamtheih guih theih tawh hong khuasa in atawp ah mite na khawng gu-in thong ong tung hi.

A u nihna pen zong atawp2 ah anau neupen ngakzo lo ahih manin asuang tum puak pai in anau nusia in hongpaipai leh khuapi khat mah hong tung in tuateng ah a u bangmah in leitung nopna teng tawh hong nungta in atawp ah thong inn sung ah hong tung kik hi.

Anau neu pen ahih leh asuangtum mah pua in hong paipai a,… nitak nitung dekta ni in galmual teng hong kap silsial in tuate amuh teh anu tawh akithuah laite hong phawkin, a ute in taisan sawnsawn ahih manin alung hong leng mahmah in galmual nitak silsial te hong en in, Athuk anu vaikhak suangtum hong pom in amittui hong tak datdat hi.

#Tun aw hong ngai ing ei, na von no khattang sawl bang hei ing e, hong khawl aw tun laukha zua laukha aw ci-in lungzuan zatam hong sial hi.

Tua kawmkawm in agal khat lam aet kik leh khuapi et lawm mahmah pak silsialte hong gal muh a amittui hong nul in katun lungtup na mun galin dontang ei, ci-in a luankhi nul kawmin hong pai leuleu in sawtlo apai khitteh gal a ni tang silsialte hong mangta ahih main khuamial dingin lengthete hong khuang ciaiciai a, amah zong bang le bang leh ci-in Singkung zam didiai tung khat ah hong kahto in adawn ah kabom ah hong tu-in tuazan, tulsing dawn ah lungzuan zatam sial in Nu ngaihna, ute ngaihna sial kawm in asuangtum tawh hong ih mu hi.

Zan takciangin Anuai lam ah hong ging sialsial khatzavat in hong khang lo a, atuanna singkung phung aet sut leh Gulpi khat amit tang lela in hong khakto a, hong Tulum, hong neding aive maw cih lungsim tawh laumahmah in singkung tung ah tang ngamlo in asuangtum (thuk)pomtinten in agul hoihtak in hong en hi. Agul in naih toto ahih manin akiang nai mahmah hong tuntak ciangin aman zong asuangthuk tawh alu deng a, tuagul anuai ah kiasuk in, tua akipan zingsang khua vak dong ihmu ngam nawnlo in singkung tung ah lau kawm, lungleng, nulepa ulenau ngiahna tawh zansung hun hong mang hi.

Zing sang phalvak khua hong vak hiuhiau a anuai aet suk leh tua gulpi si pen kiang ah Gul nei khat hong pai mu a, tua Gul in akam ah singteh hing sitset khat pet in hong pai hi. Tua gul neu-in asi Gulpi kiang hong tunciangin Gulpi asi lutung ah tua singteh hing hong pei leklek leh agul hong tang in hong hinsawm mawk ahih manin amah zong kumsuk samsam in Tua Gulneu pen Ciangkang tawh satlum in akam a ahpet Singteh hing sitset pen a-ip sung ah pua in akhual zinna hong zom kik hi.

Asawtlo in agal muh khuapi hong tung a, tua khua nawl hong tun takciangin khuasung pen gamlum henhan in kahna aw, tangkona aw kiza ngeingai ahih manin amah zong lamdang sa in hong dong hi. Tua lai takin Tua khuapi a Kumpipa tanu na si ahih manin Kumpi pa dahlua mahmah a agammite kiang ah Katanu kua-in hing kiksak thei ding ahihiam? A hing kiksak thei aom leh Katanu tawh kiteng sak ding kham le ngun tampi leh kagam phel langkhat pia ding cih thu hong za hi.

Tangval no pa zong hong paipai in Kumpipa inn, misi omna lam hong zuan a, mitam mahmah ahih manin amah zong damdam in tua mite lak ah hong lut a, Kumpipa tanu kisial na mun hong tung hi. Tangval no pa in zong aip sung a singteh hing sitset apuak hong lakhia a, tua singteh asi Kumpipa tanu taltung ah hong pei leklek leh Kumpipa tanu hong hing kik mawk a mipite in lamdang sa mahmah in Kumpipa lungdam lua mahmah hi.

Kumpipa in akamciamsa om bangin Tua tangvalno leh atanu hong kiteng sakin Gamphel lang khat ukna pia in Azi tawh nuamtak in hong khuasa uh hi. Hih bangin Kumpipa tanu tawh kitengin hau mahmah in, agam phellang khat aneih hangin alungsim nuam khit tuan lo a, Alungsim sung ah ka sanggamte koi ah om hiam cih ahi hi.

Tua kawm mahin asanggamte hong Kankan leh Tuakhuapi sung ah thong inn ah a-om lam hong thei ahih manin Nikhat vapai in A ute gel thong panin vala khia in nuamtakin asanggamte tawh hong nuntak khawm kik uh hi.

Hih tungtawn in Zomite Paunak ah “ Nu le Pa thumang Anah lawh pek” cih kimu thei a, Nisim ih nuntakna sung ah Nute Pate thumanna pen Pasian deih hi a, Na Christian nasep uh hi ci in Kolose3:20, efasa 6:1 ih muthei hi. Topa in Hih tangthu tungtawn in ih nulepa thumang siam dingin Asimkha mimal khat ciat Topa hong lamthak hen!

Lungdam

Siam Khaute

July 4,2016