LEITUNG BUP TUIPHUM PAWLPI LEH ZOMI TUIPHUM PAWLPITE PAIZIA

 

#LEITUNG BUP TUIPHUM PAWLPI LEH ZOMI TUIPHUM PAWLPITE PAIZIA

Thusunna zom ding hilehang...
#KIPAWLNA A THUPISAK TUIPHUMTE
Ngaattakin kipawl thupi a'sa tuiphum pawlpi et pak dingin Southern Baptist om ding hi. Kipawlna thupi bawl uh ahih zahkhat un Kipawlna panin thu vaihawmna "lian" pah hi. A phualphual ah a om pawlpite kimakaihna (local autonomy) nusia (nelhsiah) tuanlo hi; ahi zongin Kipawlna a phungpi-ah upding zuihding thukhunna neikhawm uh a, tua mah zong kipawlna sungah a om pawlpite ii dinpih ding hipah hi.

Gentehna in biakna vai ah a pangpi, thunei leh thuhilhna cihte pen numeite a'dingin ngaihsun thei ngiatlo uh hi. Tua mah zong kipawlna sungah a om pawlpi khempeuh in zui pah uh hi. Tua mah bangin neih kibang nupa suahna cih zong kipawlna panin sanglo uh ahih mah bangin kipawlna sungah a om pawlpi khempeuh in sanglo uh hipah hi.

#LOCAL AUTONOMY, LOCAL PAWLPI ATHUPISAKTE ZIA
A phualphual ah a om pawlpite bulphuhna (local autonomy) ngaattakin a nei tuiphum pawlpi et pak dingin BWA, NABF, ABCUSA cihte a kipan tampi om hi. Local Autonomy thupisa uh a, kipawlkhopna ahihleh mapan khopna dann in nei uh hi. Sepkhop theihding mapan khop theihdingte taangkona nei uh a, semkhawm uh hi. Kipawlna phungpi panin kipawlna sungah a om pawlpite (local) upding zuihding tawh kisai thukhunna cihte neilo zaw hi.

Ahi zong theihding ah, Kipawlna ii Vision, Mission, leh Upna Pulakna cihte bel nei hamtang hi. A kitelkhial den keii khat om-a, hih kipawlnate'n numeite biakna makaipi hihtheihna leh neih kibangte nupa suahna sang hi, cih ahi hi. Local Autonomy thupisa cih ahih mah bangin "Kipawlna min tawh local pawlpite hibang ding hi," cih thukhunna ahihleh neilo zaw hi. Local Autonomy thupisa ahih mah bangin local pawlpite ii dinpih tungah kinga hi. Ettheih pak dingin; ABCUSA, NABF, BWA in "kipawlna min tawh neih kibang nupa suahna sanglo hi." Ahi zongin ABCUSA sungah a om local pawlpi a'sang om hi. Local Pawlpi tungah kinga hi; ABCUSA, BWA, NABF in sang hi, cih bang hitheilo hi. Tua ahih manin a sanglo local pawlpite in pawlpi thukhun ah "nupa suahna pen pasal leh numei bek hiding hi" ci-in koih ciatciat uh hi.

Tua mah bangin numei makai san'na tawh kisai-in "hi hamtang ding" cihna hilo zaw-a Pasian' sapna ngahin Pawlpi in a'san ahih nakleh Pasian' sapna ngahna (calling and annointing) hihna thupikoih uh hi. Mihingte' nan'zawh dingin ngaihsunlo hi.

(Pulakna: thugen kizom ahih manin zopsuakloh phamawh cih dann in a ngaihsun bek ka hi-a, a neng a tawng in kuppihna hilo hi. Ahuampi in Tuiphumte dann theihpak nading cih hizaw-a, suk-hoi, tohoi Tuiphumte ahilo ding deihna ahi hi.)

November 04, 2026
Dr. GO VAN MUNG
@followers