Leitungah Numeite’ thupitna tampi kigen a, tuateh’ gualzawhna nungah Numei khat na omden hi. Tua ahih manin Numeite’ sungah a thupi tampi om cih i pulak masa nuam hi. Innkuan sungnopna dingin nute’ tungah nakpi-in ki nga diak hi. Tunitak in zong Numeite’ tungah Pasian geelna /Pasian nasepna ah Numeite cih tawh LST sunga Numei (3)te tawh kikup ding konggel hi.
1). Rahab-(Joshua 2:1-24)
Jericho khua numei paktat nu hi-a, Hebrew thukan te nih zindo in seel a, a suakta sak nu ahi hi. Joshua sawl gam en te a suahtaksakna hangij Rahab leh a innkuan te Jericho a kilak teh Israel ten that lo uh hi. Mate khangsimna sungah Jesuh hongpian na ding Gentail numei (4) lakah khat ahi hi.
Rahab mi thupi lua hilo a, a zindo na hangin a innkuan pihte suplawh hi. Numei te zindo na in na lianpi sem a, hong gumpa Jesuh khanggui dong hongsuak hi.
2). Namaan silanu/Israel nungakno-(2King 5:1-19)
Galkap mang Naanan in gal lel in sila leh nasem ding in a mat hih nu pen nasep thupi neilo, a mi mahmah zong thupi lo hi mah leh a pu ahi, Namaan phak natna pan a damna dingin hih nu hang kici thei hi. Tua hi a, ei mahmah thupi ki salo-in nasep thupi zong neilo kisa mah ding hihang , a hi zongin Pasian in geelna lianpi nei hi cih kiphawk den dingin deih ing.
3). Mary -(John 12:1-11)
LST thak sun gah Mary kici min nei (6) om a, tuni ka gennop Mary pen Bethany khua Martha leh Lazarus te sanggam nu Mary ahi hi. Jesus anne in a om laitak in hongpai a, a manpha mahmah paaknamtui Jesuh khe nuh in a sam tawh hong nulsak hi. Paaknamtui pen namtui lua in innpi sung zel mang hu.
Mi dang te mawhsak nuam in hih zah a manpha zuak in mizawng te huhna leng ci-in mawk sak uh hi. Hih paaknamtui pen zuakleng ngunpek zaathum manding (Judah pasal hat khat kumkhat income) tawh kidim ding kici hi. Jesuh in mite mawhsak na a theih teh mawhsak Kei in a mah in kei tungah na hoih khat a sem hi. Mi zawngte no kiangah om den ding a, kei ka hih leh no tawh ka om khawm den kei ding hi ci-hi. Hih sathau nilhna pen Jesuh ki vui ding pumpi puahlholhna lim hi a, lungdamna thupi zong neilo a ki genna Leitung mun khempeuh ah hih thu kigen ding hihang ci-in dawng hi.
U te nau te Mary in Jesuh it lua ahih manin a neih manpha pen pia ngam, sumngam in mawhsakna thuak ngam hi. Topa Jesuh a sih in a zui ngam Numeite’ hi-a, thawhkik ciang zong a mu masa Numeite’ mah hi se hi. Mary bangin Jesuh it pen in nei-in i neih manpha pen Jesuh ading a pia ngam Nute’ a hi dingin Topan thupha hongpia ciat tahen.
A tawpna ah Pasian zatak Numei thupi ka sak mahmah nih ahi, Mother Teresa leh Daw Khin Kyi thu tawh ka khup nuam hi.
*Mother Teresa-1910-1997
Hih nu pen August 28,1910 kumin suak a, Albanian minam ahi hi. Mi dangte hehpih na lungsim nei numei khat ahi hi. Kum 1929 pan India gamah Nungak Siangtho sem hi. Kum 1950 in “Association of Charitable Missionaries” phuan a, tagah kepna 127, sum beilo zato 213, mi phaak zato 54 leh sum beilo laisin na sang 60 phuan khia hi. Mite pampaih mi zawng daipam te lakah Pasian nasem hi. Itna leh veina taktawh ki pumpiak in Calcutta khuapi sung aom mi phaak teng kaikhawm in kem hi. “Pasian ading na hoih khat “ (Something Beatiful for God) cih laibu khat gelh a, kum 1972 in Nobel prize leh England kumpi nu Queen Elizabeth piak “Order of Merit” pahtawina ngah hi. Pope John Paul II in “Blessed Teresa of Calcutta “ ci-in minphatna pia hi. September 06,1997 ni-in leitung nusia in kumpi te ki vui zahphial in gam tuamtuam pan kumpi leh mi thupi te pai-in gal uh hi.
*Daw Khin Kyi-(1912-1988)
April 06,1912 in Myaungya khua ah suak hi. Yangon Kyimyimdaing ABM numei sangah pilna sin a, zato siamah Nurse zong sin hi.
Kum 1949 in New Delhi WHO khawmpi ah kawlgam taangmi makaipi sem aa, kum 1950-1952 sung Ganeva khawmpi ah kawlgam taangmi makaipi mah ngah hi. USA, Japan, China, India,Thailand,Vietnam, Europe gamte ah kumpi vai tawh zin kawikawi hi. Kum 1950 in USA kumpi-in Kawlgam nu (Mother of Burma) cih pahtawina pia hi. Kum 1960-67 kikal India gam New Delhi ah kawlgam UN palai (Ambassador) sem hi. Yugosalavia kumpi in Pahtawina (Star) pia hi.
December 27, 1988 in Yangon ah si-a, Tapidaw ngeina tawh ki vui hi. General Aungsan tawh tapa (2) Aung San Oo, Aung San Lyin leh tanu (1) Aung San Suu Kyi te nei hi. April 16,2012 in a nu Daw Khin Kyi kum 100 cin phawkna “Daw Khin Kyi Foundation “ phuankhia a, na hoih tampi sem khia hi.
No comments:
Post a Comment