THUM KIGAWM PASIAN
(Trinity of God) Nasim khitciang CM pan in-
THU PATNA ...
" Trinity" in, Khristian upnate lakah athu laigil mahmah khat ahi hi. Aki ciangtan mihingte ngaihsut zawh loh leh tel-a kician lah theilo pen in hih "Trinity" akici "Thum kigawm Pasian Khat" thumah ahihi. LST sung ah hih kammal lian a kimuhloh hang in hih Upna pen LST mun tampi in honghilh taktak hi. Trinity alangpan up-khialh na te hang in pawlpi masate'n hih thuman mah na buaipih in na telkan uh aa na kipsak uh hi.
A KHIATNA..
“Trinity" icih pen "Khat ahi PASIAN, atuam nuntaklo mimal thum (three-persons) ki pumkhatna" ahi hi.German kammal - "Dreieinigkeit" (three-one-ness = thum-khat hihna) pen hih thu-ah azat huai kammal hoih khat hi. Trinity lian sangin "Triunity" (thum-kilom khatna) cih kammal na kizang kha leh ahoih zaw ding na hi hi. Zomi-te paunak ah, "Dakthum bu-khat", "Suangthu thum thukkhat", "Bi-telthum Puakkhat"; icih te zong Trinity gentehna hoih mahmah hi. Pasian pianzia in PA.TA leh Khasiangtho tawh kilam hi. Pasian khat sungah mimal 3 om cihna ahi aa, mimal 3 kipawlna Pasian cihbang hilo hi.
1. TRI-THEISM
Pawlpi masa te hunlai in John Ascunages leh John Philoponus ten Peter, James leh John-te kipawl bang in Pasian ahi veve thum kipawl khopna cih thu nahilh uh hi.Pasian khat hihna sungah mimal thum pumkhat hihna sang in 'Pasian thum te akipawlkhawm danin' nahilh uh ahih man in khial uh hi.
2. SABELLIANISM OR MODALISM
A.D. 200 pawl a Sabellius in Tri-Theism tawh aki lehbulh ding aa ahilh upna manlo khat hi. Sabel-lius in Pasian khat bek pen atuamtuam (PA,Ta,Kha-siangtho) in aki khel toto in gen hi. Modelism zong akicih na pen in, Pa,Ta leh Khasiangtho lim (model) tawh abanban in Pasian hong kilaak toto dan in, ahilhna hang ahihi.
3. ARIANNISM
Pa sangin Ta a zaneu sakzaw Tertulian upna gui pan aa piang upna hi. Tetullian ngaihsutna pen Origen in na hilhbeh aa, Pasian hihna ah Pa sangin Ta niamzaw in nahilh hi. Hih thu in Khrist' Pasian hihna anial Ariannism kici upna hong tunto ahihi. Arius in Pasian bek akipiangsak lo hi aa, Khrist pen Pasian in bawlhunkhat neingei ahih man aa, Pasian Topa hi ci in hilh hi. Arius ading in Khrist aomloh hunkhat omngei tuak hi. Arius leh ama upna pen AD 325 kum, Nicea Council ah kimawhsak hi.
1.Pasian' hihna laigil (Essence)ah Khat hi.
Pawlpi masa te hunlai in Khrist in PA hihna laigil (essence) mah anei takpi hiam cih thu na buaipih mahmah uh hi. Arius in Khrist leh PA hihna laigil kibangsak napi, PA in Khrist sang in lianzaw hi, ci-in nahilh hi. Trinity ih cihna taktak in "hihna laigil sungah khat" (one in essence) cihna ahi hi. Pasian pen hihna laigil khat bek nei ahihna Thuhilhkikna 6:4 a, " Za-in, Isreal aw, eite Pasian in TOPA khat ahi hi," acihna ah kimu thei hi.
Hih mun-a "Khat" cih pen Hebrew-te lai ah, "echad" (nih leh thum sakhat; dakthum bu-khat; cih tedan..) akizat na pen khat sanga tamzaw napi khat mah akigen te ah akigen kammal hi. Hebrew-te lai ah, mal-khat, tang-khat aki gen ciangin "yacheet" nazang uh hi. Hih kammal te tungtawn in Pasian' hihna laigil khat sungah mimal thum pum-khat, sa-khat ahihna kitel mahmah hi (James 2:19). Pasian hihna laigil pen ki khenkham lo aa, Pasian pianzia tua mimal (persons) thumte'n neikim ciat uh hi. Tua laigil khat sunga pumkhat ahi mimal thum-te (PA,TA,Khasiangtho) atangtat tuam omlo uh hi. Zeisuh kammal in aki pumkhatna uh natel gen mahmah hi ( Jn.5:19; 8:28; 12:49: 14:10).
2. Pasian in Mimal (person) hihna ah thum hi.
Pasian in mimal ah thum hi cihna ah; a). Pasian hihna laigil akikim in neiciat uh hi; b). Pasian' kicinna zong omciat hi. "Pasian hihna laigil sungah a mimal in thum om cih thu hi aa, aki banglo Pasian thum om cihna hilo hi. Modelism (Sabelliannism) tawh aki lamdan na ah, hih upna in Pasian khat tang bek pen lampi tuamtuam thum in hong kilang a cihna uh hi. O.T. sungah tua mimal thumte ki pumkhatna kimu thei hi. Isa 48:16 ah, PA in, Messiah sawl-a, Kha in aki phutkik gamte gen hi. Isa 61:1 ah, PA in Ama nasep nadingin Kha tawh Messiah sathau nanilh hi. Hihmun te in tua mimal thumte' kikimna leh ki pumkhatna honglak hi.
3. Mimal Thumte' Kizopna
Hih teng ah, PA in kuamah tungpan piankhiat hun hi-ta leh meng/ke-khiat hun neilo hi. TA in a tawntung pekpek in PA sungah omzo hi ( Jn.1:18; 3:16, 18; 1-Jon 4:9). Khasiangtho zong atawntung pekpek akipan PA leh TA pan amengkhia (proceed) hi(Jn. 14:26; 16:7). "Mengkhia" cih in kizopna lahna hi a PA leh TA in Khasiangtho paisak/khahkhia uh cihna hi.
Hih Trinity sunga kizopna ah zaliat, zaneu na thu themzong kihel khalo hi. Laisiangtho siam pawlkhat te nagawn in atelkhiat man un buaina tampi pianlawh hi.
4. Aki ZA-KIM Mimal Thum Hi.
Trinity sung a mimal thum aomte thahatna, vangliatna leh thuneihna te akikim linlian hi. PA pen athunei mahmah leh avanglian mahmah in akikipsak mah bang in (1 Kor. 8:6); TA in PA tawh akikim in naciamteh hi ( Jn. 5:21-23); Tua mah bangin PA leh TA tawh Khasiangtho kikim hi (Mt. 12:31). Khasiangtho in vangliatna nei-a, tua Khasiang-tho in vangliatna khat hilo hi. Khasiang-tho pen PA leh TA thahatna namkhat ciangin angaihsunkhial zong om hi.
5. Thuciam Lui Hilh Nate
Thuciam lui sungah, Trinity hilhcianna ahi Pasian in mimalthum ahihna honglak muntampi om hi. Pian. 1:1-2 ah Vantung leh Leitung akibawl in PA leh Khasiangtho nasepna kimu hi. Pian. 1:1 a, "Elohim" in khatsanga tamzaw genna alah banah Pian. 1:26 ah, "Eite" cih kammalte-in PA, TA, Khasiangtho, mimalthum a omna hong muthei sak hi. Hih anuai aa, LST mun te ah PASIAN KHAT sungah a mimal in thum aom lam leh Pasian hihna aneihciat lam uh kimu thei hi ( Isa 48:16; 61:1; 7:14; Late 110:1).
6. Thuciam Thak Hilh Nate
Trinity icih pen ah Pasian khat bek sunga aom mimal-thum te PASIAN (GODHEAD) kici ahih lam theih masak ding kisam hi. PA in Pasian hi (1 Kor.8:6); TA in Pasian hi ( Heb. 1:8-10); Khasiangtho in Pasian hi ( Sawl. 5:3-4). Pasian in PASIAN khatbek hi ( Thkn. 6:4). Hih Laisiangtho munpi 4-te in Trinity kipsak pha mahmah ahihna kimu thei hi.
Zeisuh in nungzui te thu avaikhak na ah " PA, TA, Khasiangtho, "MIN" tawh ( Mt. 28:18 ) ci aa, "min-te" cilo ahih manin tua mimal-thum te ki pumkhatna leh kikimna honglak hi. Mary naupaai na en leng, Mary tungah Khasiangtho hongpai in, PA vangliatna in amah liah aa, TA hong suakkhia hi ( Lk.1:35). Zeisuh ki baptizedna-ah atuamtek in kimu thei hi ( Lk.3:21-22). A pumkhat na uh Jn. 14:16 ah ki mukik in, TA in thu-umte a hong tendeen ding Khasiangtho pen PA kiangah nangen hi. Thu-um te ahong tendeen in mimal thum te ahihna zong (Rom. 8:9-11) ah kimu thei hi. 2-Kor. 13:14 a thupha piakna in PA, TA, Khasiangtho-te ki kimna leh ki pumkhatna nasia tak in kipsak hi ( 1-Kor. 2:4-8; Mang. 1:4-5; te zong sim in).
(THE FIRST ZOMI SYSTEMATIC THEOLOGY pan)
BEHLAP Trinity ahihna LST mun pawlkhat
( Mt. 3:15-17; 4:3-9; 8:29; 10:40; 11:25-26; 12:5-8; 12:11; 15:13; 16:17; 16:27; 17:5; 19:6; 20:23; 24:36; 26:39,53,64; 27:46; / Mk.3:11-12; 5:7; 12:7; 13:32; 14:62; 16:19; / LK. 2:49; / Jn. 1:32-34; 1:51; 5:17,30; 11:41; 12:28; 12:48-50; 13:3; 14:20; 16:15; 17:11; 20:31; / Sawltak. 1:1-4; 2:33; 7:55-56; 8:37; / Rom.8:34; / 1Kor. 6:17; 15:24,28; /2Kor. 13:14; / Gal.1:3; / Efe. 1:20; 5:31; 6:23; / Flip. 2:11; / Kolose.1:23; / 1Thes.3:11,13; / Tim.2:5; / 2Tim.2:13 / 1Peter.3:22; / 1Jon.4:15; 5:5;).
No comments:
Post a Comment