Teek leh Mo
Nidang in nungak khat om in, tua nungak in pasal hong nei in a tekte kiang ah hong om hi! A pasal itin a zuat hangin, atek nu tawh ki-it kilem thei mahmah lo hi. A monu in ateknu kampau dan leh omdante luhekziate muthei mahmah loin, tua bang mahmah in ateknu in a monu omziate ama dan tawh kituak sathei mahmah lo hi. Tek leh mo nisim in kitawng den phial mawk ahih manin a pasal zong a lungkham in anletui nezolo in nisim khuasa in om hi.
A monu in hidan tawh om khopkhop ding ngaihsun zo keng ci-in khensatna khat hong nei a, Bazaar a van zuak a pa lawmpa kiang ah hong pai hi. A pa lawmpa kiang ah a Innkuan sung haksatna leh a teknu gilo asakna, a teknu tung ah a lungkim lohna teng hong genkhia hi.
Tua khitciangin guza na nei hiam ka teknu in guza ne in sileh tuakhitteh ka Innsung uh nuampa ding hi ci-in hong gen hi. A pa lawmpa in zong tua thu azak ciangin hong ngaihsun teitai in, atawpna ah neimah ing ei hong ci hi. Tua ahihleh kong genbangin na gamtat kul ding hi. Tua hi kei leh mite in hong thei leh nang bek hilo kei zong haksatna tampi thuak ding hong kiman ding hi. Acih ciangin Monu in aw ba cih bangbangin ka gamta ding hi cipah hi.
Tua ciangin sai neipa a inn nunglam ah hong paikhia pah in lai-ip sung ah zatui koih in hong pusuak hi. Hih zatui pen kei bawl hi in thakhat in hong sipah leh hong kithei ding ahih manin damdam in hong zawngkhal in damdam in hong sipan ding hi. Tua hileh mite in guza na piak hong theilo ding hi aci hi.
Na hihdan ding pen: na teknu in an a neksim in hih guza tawmta a an lak ah khaksakin la, nidang sangin itbawl in, don in, kamnem in hozaw in tua ahih kei leh mite in hong thei kha ding hi.
Na teknu sello in kitawng peuhmah kei inla, kamkhum in hopih in, Na teknu hong thugente mangin tua hileh asih ciangin kuamah in nang hong muangmawh, ummawhlo ding hi.
Tuateng a genkhit ciangin a zatui apia hi. Tua nu zong a zatui la in Lungdam takin inn lam hong ciah vingveng a, a teknu damdam a asihna ding gelnate hong kipan ta hi. Ni dangin an huan nuamphalo khat ni tampi sung amah in an hong huanin, meh hong huan in ateknu an a nek ciangin an hong lui a, an tung ah tua zatui hong khahsak simzel hi. Van zuakpa cih bangin mite in a theihlohna dingin haksa sata mah leh a teknu cih bangbang hong mang hi. A pianna nu bangin, a lawmpa a it bangin hong it in hong bawl hi. Tua bangin hong bawl ciangin a teknu in hong it semsem in nuta lian bangin hong khuasa, nungta uh hi.
Tuadan in ateknu a bawl kha 6 bang hong cin ciangin a Innsung uh nidang banglo in hong nuam mahmah hi. A monu zong hong kikhel toto a, lungtom leh na asia lam bekbek a ngaihsutnate hong bei deuhdeuh in a lungsim hong ki-ukzo in hong lungduai semsem hi. Tua bangin kha 6 val bang kitawnglo, ki-it in, kithumangin hong om uh ciangin, A monu in a teknu pen mi thunuam leh mi Hehpihna nei ahih lam hong thei khia hi. Tek leh mo a lungsim uh hong kikhel in hong ki-it semsem uh hi.
Tua a kipan ateknu in a vakvakna ah ka mo mah mohoih pen hi ci in pulakin phatphat hi. Tua bangin teklemo ki-it in hong nuntak uh ciangin nikhat Monu (Vanzuakpa) Apa lawmpa kiang khitui luangkawmin tai vingveng a hong huhin, tuma kha 6 lai a nong guza piak a lehkikna ding zatui na nei hiam, tu-in ka teknu mi hoih mahmah ahihlam telta ing, Ka pianna nu lian bangin ka it hi. Ka piakpiak guza tawh ka sisak nuam kei hi ci-in hong thum kik hi.
Apa lawmpa vanzuakpa in ka tanu aw lunghimawh/lungkham kei-in guza ka hong pia kei hi. Tua ka hong piak zatui pen Thaza leh Ankam limza ahi hi. Tua zatui pen hong nek ciangin, nidang sangin cidam in ankam limzaw ding, cidam zaw ding, thahat zaw ding hi.
Ataktak in cilehang guza athuak pen ka tanu aw Nang na hi zaw hi. Na lungsim pen gu hizaw hi. Ahih hangin tuateng zong na teknu na itna leh lungsim hoih na puakna tengin a SAWPSIANG khinta ahi hi ci-in vanzuakpa in a gen hi.
Ih nuntakna ah ih it dingte itin ih ngaih dingte ngai peuh leng misia kuamah omlo a ih kiit kingah zawhloh, ih kiniamkhiat zawhloh ciangin Innsung a nuamlo, nupakal, Teklemo kal anuamlo a bang hibek a, lungsim takpi tawh ahoih lamin kibawl tek peuh leng innkuan sung nuam mahmah pah lel ding hi!
Asimkha mimal kim Topa in a zuithei dingin thupha hong pia Hen! Amen!
No comments:
Post a Comment