PASIAN KHALIM BEL NI

 SANGPENPA’ KHALIIM NUAI ( God’s Shadow )

Rev. Khuallam Cinmang

Late 91:1-2

1. Sangpenpa’ liahna sung, ( Sangpenpa’ khaliim nuai ) Vanglianpa’ liim sungah a om mi khempeuh in

2 Topa’ tungah, “Ka bukna le ka munkip muanhuai, ka muan ka Pasian na hi hi,” ci ding uh hi.

Liim ii a manphatna pen khualum gama teeng mite bek in thei ding uh hi. Khuavotna leh vuk tamna gama teng mite in phawkkha khollo ding uh hi. Nisa nuai ah nasemin ih gim ih tawl laitakin singlim nuai kilunggulh mahmah hi. Tua bangin ih gim ih tawl laitakin singliim nuai ah om le’ng ih tawl hong dam pah hi.

Tuni-in Pasian’ liim manphatna tamlo gen ni.  Musane vasa note a pi in an zong dingin a paikhiatsan ciangin ganhing vasa lauhuaite in a note ne dingin hong pai thei uh hi. Tua bang ciangin a note lau-in ham zaizai uh hi. A pi in hong zak ciangin thakhatin a note omna a bu ah hong delhin hong leng pah vingveng hi. 

A no a neek sawm ganhingte in musane a pi hong leng a muh uh ciangin taisan pah vingveng uh hi. Tua banga a note in a pi khazap liim a muh uh ciangin a lung uh muangin ham nawn loin daipah hiau uh hi. A note in a pi khaliim a muh uh ciangin a lung uh muang mahmah hi.

Tua mah bangin Pasian khaliim a muang miten bitna leh kha muanna ngah uh hi. 

1. PASIAN’ LIIM / LIAHNA NUAI AH BITNA OM HI: Late 57:1 .... Siatna huihpi a ven mateng na kha liimah kong bu ding hi.

Lai Siangtho sunga mi minthang tampite sung panin Pasian muangin, lunggulhin Pasian’ liim a bel den mi khat in David ahi hi. David pen kumpipa Saul in thah dingin delh thapai niloh hi. A hang pen David khial hetlo hinapi in haza lua mahmah ahih manin thah sawm den hi.  David galtai-in suanghawm sungah bu kawikawi hi. Kumpi Saul zong suanghawm sungah hong lut hi. David in thah theih nading hunlem ngah hi. Ahi zongin Pasian sathau nilh khat ahihna tawh bangmah cih loin khah hi. Nungtasak hi.

Pasian in lauhuaina leh siatna panin David kembit den hi. A kibukna suanghawm sungah ompih hi. Kem hi. 

Pasian liim nuai-ah bitna om hi. Pasian in David keem hi. David bangin lungduaitakin a hun a cin dong Pasian hotkhiat ding ngak zo le’ng hoih pen hi.

Late 17:8-9

8-9 Kei a hong sugawp migilo, kei a hong umcih

a kihtakhuai mahmah

ka galte kiang panin mitnauta bangin hong kem inla, na kha liimah hong seel in.

Hih LST mun pen David thungetna ahi hi. Pasian khaliim nuai mah belhtak sa hi. Belhtak sa ahih manin Pasian in zong sih nading panin tamveipi mah na keem pah hi. Na suaktasak hi.

Isaiah 25:4

Bang hang hiam cih leh nang pen mizawngte adingin munmuanhuai,

a cimawh mite adingin

a lungkhamna uhah munmuanhuai, huihpi panin bukna le nisa panin niliim na hi hi.

2. PASIAN’ LIIM / LIAHNA NUAI AH TAWLDAMNA OM HI: A beisa hunin Covid - 19 pulnatna hangin nuntakna haksat luat manin Malaysia ah Kawlgam mite mi bangzah hiam khat in amau-le-amau kithat SUICIDE bawl hi, cih kigen hi. India gam leh gam tuamtuam ah nuntak haksat luat manin a kigui-awk lum mi tampi om ta hi. Hih bang mite in Pasian khaliim nuai- ah na bu lo uh ahih manin tawldamna na ngah zo lo uh a, a nuntakna uh a bei lawh ahi hi.

Pasian’ liim beel ni. Pasian muang ni. Ih vangikte Ama’ khephung ah tunpih ni. Ama’n tawldamna hong pia dingin hong kamciamsa ahi hi.

Matthai 11:28

Na semin vangik pua-in a gim mite khempeuh aw, ka kiangah hong pai ta un. Note tungah lungsim tawldamna ka hong pia ding hi.

Late 4:8

8 Nuamtakin lumin ka ihmu ta ding hi; bang hang hiam cih leh Topa aw, nangmah bek in lungmuanna munah na hong omsak hi.

Filippi 4:6 ah Paul in:

Thu khat peuhpeuhah lunghimawh lua kei unla, na kisap bangbang uh, lungdamna tawh Pasian kiangah na ngen un.