CANAAN NUPI NU UPNA

 Kanan Numei’ Upna

Matthai 15:21-28

By Rev. Khuallam Cinmang

Phawk ding thu: Hih numei in “ bangcia pha a upna “ cih Jesuh tungah a lahna tungtawnin a tanu in damna ngah hi. A ngetna kipia hi. Tua mah bangin ei Khristiante in zong thu ih nget ciangin upna lianpi tawh lungduaitakin tawpsan loin ngen teitei leng Pasian in tua ngetna hong pia ding ahi hi.

Hih a tangthu ih et ciangin Jesuh pen Tyre leh Sidon khuate ah a om laitak ahi hi. Hih khuate pen Israel mite tenna hi loin Gentail mite tenna khuate ahi hi. Tua bangin tua gam Jesuh in a nawk laitakin nupi khat nakpitakin hong kikoin, “ David suan Topa aw, kei hong hehpih in. Ka tanu dawi in nakpitakin bawlsia hi, “ ci hi.

Hih Gentile numei khat hi napi-in Jesuh pen “ TOPA” ci-in sam hi. “ TOPA aw” ci-in kikoin a sap hangin Gentile mi ahih manin Jesuh in tua nupinu na thudon khollo lel hi. Na awlmawh lo hi. Na limsak lo hi. A taktakin hih nupinu pen huhna a kisam lua ahi hi.  Dawi bawlsiatna hangin a tanu si dektak hi. Hehpihhuai mahmah hi. A huhhuai lua ahi hi. Ahi zongin Jesuh in tua nupinu huhngetna thudonsak lo hi. A kikona na kizakmawhbawl hi. 

Nang zong khatveivei hih nupinu tawh kibang na kisak hun a om hiam? Ngenngen tale cin, thumthum tale cin kilamdang lo na kisak hun a om hiam? Na lung a kiat dikdek hun a om hiam? Khatveivei na thungetna kilamdang lo lua sa nahih manin na Pasian biaktak loh na sak hun khawng a om ngei hiam?

Hih nupinu in a kikoko hangin Jesuh in a thudon mel loh ciangin nungzuite kiang lam ah kihei-in a hih thei tawpin ngen leuleu hi leh kilawm hi. Hih nupinu in nungzuite kiangah, “ Na siapa uh kiangah hong ngetsak, hong thumsak dih ve vua,” ci-in gengen kha hi ding hi. Bang hang hiam cih leh nungzuite in Jesuh kiangah, “ Hih nupi i nung zui-in kikoko ahih manin a ciah nadingin sawl in,” ci-in thum uh hi. Jesuh bek hi nawn loin nungzuite na ngawn in zong hih nupinu nawngkai sa lua ta uh hi. 

Nungzuite zong pen mi lungduai nam hi khol kei leh kilawm hi.  Khatvei nute in a tate uh Jesuh in thupha a piak nadingin hong paipih uh ciangin nungzuite in nawngkaisa-in na hang gawp ngei uh hi. Na hawlkhia ngei uh hi. Tu-in zong hih Kanan nupinu pen nungzuite in nawngkai a sa luata uh ahi hi. Tua manin Jesuh kiangah, “ Hih nupinu ih nung ah kikoko ahih manin sawlkhia in,” ci uh hi. 

Mihingte in ih zaknop loh, ih deih loh kammal lianpenpente lakah khat in ‘ ki-aituambawlna ( favouritism ), kikhentuamna ( groupism ), kiguptuamna kammalte’ ahi hi. No pawl, ko pawl cih kammal ahi hi. Jesuh in hih nupi tungah, “ Tuu bangin a mangthang Israel mite lak bekah kei hong kisawl hi. Tate’ annek ding laksakin ui khawite piak ding kilawm lo hi,” ci-in na gen hi. Hih kammalte pen khauh mahmah mawk hi. Kikhen tuamna leh ki-aituambawlna ( favouritism ) kammal ahi hi. Jesuh in mun khat ah hih ki-aituambawlna tawh kisai-in a genna khat om lai hi. Matthai 10:5-6 ah 5 Jesuh in hih mi sawm le nihte sawl a, “Gentail mite gam sung ahi a, Samaria mite khua sungah ahi zongin lut kei un. 6 Tuu bangin a mangthang Israel mite lakah va paizaw un, ci-in na gen hi.

Hih nupinu in lungkia loin kikoin a nget tantanna pan dawnna a ngah masak kammal in “ Tuu bangin a mangthang Israel mite lak bekah kei hong kisawl hi,” cih ahi hi. Ahi zongin tua nupi hong pai-in Jesuh’ mai-ah khukdin a, “Topa aw, kei hong huh in,” ci-in ngenkik leuleu hi. A nihveina dawnna a ngah in, “ Tate’ annek ding laksakin ui khawite piak ding kilawm lo hi, cih hi leuleu a, Jesuh dawnkikna kammalte khauh semsem hi. Lungkiathuai mahmah semsem hi. Lawp-huai lo semsem hi. Ahi zongin hih nupinu lungkia vet nai loin, “ Hi mah hi, Topa aw; a topa sabuai tung panin a kia annengte, ui khawite in zong ne buang hi lo ahi hiam?” ci-in a thumveina dingin ngen leuleu hi. Hih a thumveina a nget kammal in Jesuh lungtang sukha hi. Dengkha hi. Bunsuk hi. Jesuh in lamdangsa hi. Hih a thumvei ngetna kammal in a tanu tungah damna piangsak hi. Tua ciangin Jesuh in tua nupi kiangah, “Nupi aw, na upna lian taktak hi. Na deihna bangin hong piang ding hi,” ci-in a dawn khit ciangin a tanu thakhatin dampah hi.

Hih nupi tung panin sin ding thu tampitak om hi. Hih nupi pen:

1. Lungkia lo

2. Lungduai

3. Kiniamkhiat

4. A upna khiam lo ( lungkiatna ding gensiatna leh kampaunate a om hangin a upna khiam lo hi. 

5. Citak hi.

Jesuh in a cillam / a bullamin hih Kanan nupi’ kikona / a huhngetna kizakmawhbawlin a thudon loh hangin a tawpna ah “ NUMEI AW NA UPNA LIAN TAKTAK HI” ci hi. Jesuh in “ UPNA LIANPI A NEI NUPI “ in mipi mai ah ciaptehna na pia hi. Amen.