2.1.2021 (Saturday) KUMTHAK KHEKLEH NI
Ko tanau sung panin Than Than Oo omna a thei dingin ka lamet ka pu Gotawng phone ka set pah hi.📞
Pu Tawng:👨🎓: “Hallo, Khup maw bang thu om ai hia?”
Khup: 🙏 “I Pu Thuan Sumte koi ah om ta? na thei kha hia?”
Pu Tawng:👨🎓: Nidang Hangken ah Sangsia ka sep lai-in Letpanchiaung khuanawl lamah teng uh hiven, Pu Thuan Sum bel si khin ta, a zi a dam lai diam thei kha nawn kei mai veng ee.🔒🔒🔒
Than Than Oo 👧🏻 muh nading baih tuak lo ahih manin Letpanchiaung lamah zon dingin ka khensat ta uh hi.
SIA DO KHUP A LIAMNA THU 🗡 🔪 ⚔️
Ka lawmte a om thei teng tawh Than Than Oo zong dingin ka kuan khia ta uh hi. Hausapa huhna tawh ka mukhia ngawngaw ta uh hi.
Khanglui ten “Si leh hing kimu” a cih bangin khut kilenin ka minte uh kilo ciatin, nakpipi-in ka nui lualua uh hi. Amah zong lungdam lua-in nui khia buabua keei hinapi thakhatin a maisuah hong kikhel diandian mawk hi. Kelkong lam a mitsuan gige lam ka mankhia thei pah hi. Kei zong ka lungnuam phalo ahih manin kelkong lam ka et leh papi cidam zu kham, a gitloh tuak mahmah khat singtawng liangpuak sa leh dakkhawng laklak kawmin hong lut a,🔥 🔥 🔥
Papi : 🙅🏿♂️ “Hihte kua tu kua ta? ka vak kal nangawn a na ut bang a na om man maw nang….?” 🤜 🤜 🤜 Than Than pasal nahi mawk hi.
Khup: 🙏 “A thu-in gen ni lawm aw, nang upmawh bang hipeuhmah lo hi, a sangkahpihte hi ung” ka ci samsam hi. Hong sat takpi ding ahih lam ka theih ciangin ka lawmte a liam sangin a vaihawm keimah in thuak zaw ning, ci-in ka lawmte ka dal hi.
Hong sat takpi mawk ahih manin lei ah ka puksuk a, ka maitang hong lum hut-hut pah hi. Ka khut tawh ka lawn leh si bekbek nahi mawk hi. Ka mit zong hong mang hiai-hiai pah mawk hi.
Than Than bel a lawmpa ngawng ah luai-in a kahna aw ka za a, ahih hangin ka mit maang lua ahih manin limtakin ka mu tel nawn kei hi.
Khua Hausate leh mipi zong hong tung uh a, inntekpa lencip uh hi. Ka lawmte in zong 🏃♂️“Pai ni, Pai ni, thu hoih kei”🏃♂️ ci-in ka ban langkhat tuak la-in hong liangbaat uh a, 🚘 mawtaw omna lamah hong taipih vingveng uh hi.
Than Than in a lawmpa a lente muanhuai ta hi, cih a theih ciangin mawtaw kiangah hong delh vingveng a, kisuang lua, pautau lua ahih manin ling keuhkeuh zawzen hi. Hehpihhuai ka sa mahmah hi.
Than: 👧🏻 “Khup aw, a na lua hia? ong anaa sam ing ei maw lawmlawm, kei’ nuntak zia hibang himai ei, hong thei kei vet le uh cin na lung uh nuam zaw mah ding hiven maw” ci-in a gingin hong kap khia gawp mawk hi.
Khup: 🙏 “Lunghimawh kei ou maw, kei zong na lawmpa bangin kum tampi na om ngei ing, theisiam lua ing, ni khat ni ciangin ⛪️ Pasian mizat suak lua ding kisa-a, Pasian nasemte a bawlsia phot hi ei maw”
📖*(Mite in a zahtak mihoihte a kisik nadingun a sam dingin hong pai ka hi kei a, mite in a pampaih mite a kisik nadingun a sam dingin a hong pai ka hi hi,” (LUKA 5:32) Na nupa buaina, na tate thuman lohna hangin lungneu lua pah nai kei in, Topa’ itna sungah lametna om lai lua hi.)*📖
Than: 👧🏻 “Kum 36 khit ciang a ei lawmta teng kimuh dan aw, nop kei si ee maw lawmlawm, kei mahmah kamsia lua ing lawmte aw.”
Khup: 🙏 “Ka lungtup khat a tun nadingin thuakna bekbek tawh tuciang a na kalsuan hing, Pasian in hong hehpih hi, hong mu ka hih manin ka lungkim mahmah ai maw Than”
Than Than kah tamlawhna in hong zo pian ciat a, mi’ pu hi zawzen ta lah kinehnosak ding hithei lo ahih manin khitui mualtuang gilgialin ka om gemgam pong uh a, mit sat khapkhap geuhin ka ki-en gualgual lel mawk uh hi.
🖥“Kum 36 sung kimansuah lawmtate kimuh kikna”🖥 cih thulu tawh Facebook leh Youtube ah live kikhah ahih manin thupiang khempeuh leitungbup in thei pah mawk hi. Comment tampha mahmah a, 📱
“Siapa nak liam si ee, Topa in na kem ta hen” a ci pawl zong omin;
“Putekpipi zawllui zong a pai hiven a thuak ding mah hi, a sih loh hampha lai” a ci pawl zong om hi.📱
Hih comment pen ka lawm ten zadah pian uh a, “Thuk ning aw lawm, i ci giap lel dia” hong ci mawk uh hi. “Thuk peuhmah kei vou” ci-in maitang si kai niainuai-pi mahin ka kho tantan hi.
📖*(“Mihing Tapa’ hangin mite in hong mudahin hong tuamkoih a, hong simmawhin migiloin hong seh ciangin thupha ngah na hi uh hi. Vantungah na thaman ding uh lian mahmah ahih manin tua bang na tuah uh ciangin nuamin lungdamin na diang un. (LUKA 6:22-23)📖
📖Khrih nungzui hihna hangin mite’ kosiatna na thuak uhleh note sungah a minthang Kha Siangtho ahi Pasian’ Kha Siangtho hong om ahihna lim ahih manin a hampha mahmah na hi uh hi. (1Peter 4:14).)*📖
💘Ka liamna nasia pian ahih manin ka lawm ten 💘
“Than Than 👧🏻 na pai mai nung maw, i lawmpa zato ah a liamma khui hamtang kul ding aih ciang”👨⚕️ ci-in 🚘mawtaw sungah hong lut pih uh a, ham zenin hong tai pih pah uh hi. Than Than in khitui taak keuhkeuhin a khut hong gal vaan diaidiai a, amah a neu semsemin ka mu a, mual ka khum ciaiciai mai uh hi. 🚘
Hih pen Than Than Oo zonna ah a piang thei ding lailunggelna masa hi a, lailunggelhna dangte zong a banbanin en lai ni maw.
No comments:
Post a Comment