NA INNKUANPIHTE NA KAPKAP UH HI !

 NA KAP KAP UH HI"

(To Whom It May Concern)

Na zi sang in numei dang na lung lut zawk a, lawmngaih na neih san ciangin, “ Na zi leh na tate in a buaipih ding “ PA” neih ut lua in, “NA KAP KAP UH HI”.

NA zi sangin numei, nungak dang dangte ho kawi kawi in na zi leh tate lungnop nang leh na tate khamuan ding ngaihsun lo in, nang ut bang bang in na gamtat lai in, na zi leh na tate a hih leh lungsim nalua in  “NA KAP KAP UH HI”.

Innkuan sung Papen hi napi , innkuan sung neklehdawn silhlehten thudon lo in, zu na kham kham lai in, na zi leh na tate milak ah maizum lua in, “NA KAP KAP UH HI”

Na zi kiang sangin numei dangte kiangah nuam sa zaw in, na neih sum leh pai te zangh ziah ziah in, na zi leh tate haksatnate thudon lo in na om lai in, na zi leh na tate in nuntak haksa sa lua in “NA KAP KAP UH HI”.

Zi nei ngam sam in, innkuan sung a Pate mawhpuakna thudonlo in , nangma nopsakna bek zongin na vakthap ciangin, na zi na tate in “PA HOIH” lunggulh lua in NA KAP KAP UH HI”.

In sung Pa pen in , innkuan sung a zi leh tate thudon lo in, na phone leh na computer bek bek na kinbawl lai in, na zi leh na tate in, omcim liangvai kisa lua in NA KAP KAP UH HI”.

“Lawm aw , na zi leh tate kap pen kua in khem ding a, a lungkhamna haksatna e huh in, kua in hehnem ding in ngaihsun na hi hiam???

Innsang Pa pen inn kuan sung kisapnate ngaihsun lo a, na zi leh tate sangin numei dangte nopsak na ding bek ngaihsut na hangin a thuak khempeuh uh kua in dam sak ding in ngaihsun na hiam?

Kua in na zileh na tate  KAHNA LEH LUNGKHAMNA  a tung sak ? “ NANG” mah mah na hihna na phawk hiam? 

NANGMAH mah kiciatlohna hangin na zi na tate maizumna te kua in dam sak hen ci na hi hiam?

Na zi tung na muanhuai lohna hangin numei dangte in nangmah hangin na zi hamsiat uha, kamsiate zangh in na kobawl uh a, na zi maizum lua a maihum in a om, kua in honkhia hen ci na hiam? Kua mawhna hi ci na hiam? Na zi mite in a zahtak lohna a hang na ngaihsun ngei hia?

Na zi leh tate lungnopna, khamuanna pen NANGMAH tung kinga aive. Na zi mite in zahtak in a nopneh lohna dingin mawhpuakna  anei pen nang APA pen na hihna na thei kha hiam? A hih keileh na zi leh na tate mite in a ut bang bang un bawl in maizum sak mah mah ta leh nang nop na sak peuh leh hun sa lel na hiam? PA dinmun luah zo na ki sa hiam??? 

Na zi etlawmna leh lungnopna, na tate nopsakna leh khamuanna a bawlthei pen NANG mah bek na hihna na phawk kha lo na hiam le?

Limtak ngaihsun in. Nangma nuntakna siatna hangin na zi leh na tate na ngawn thuak ding pen na ut nak leh tumah mah in khawlsak thei na hihna naphawk kha hiam?

Na zi it pen in nei inla, mite neu-et leh thusimloh ding phal kei inla, tua bang a na zi vang na khual sakna ding in a kisam khat bek oma, tua in na zi tung “CIHTAKNA” bek tawh kicing lua hi. 

A khial khin na hih phial leh zong, innkuan nuam, leh nupa ki-it na hih theih na ding in na nuntakzia ah a hoihlote puahpha peuh lecin, kai nai lo a hi aw..

“NA ZI NA TATE KAHNA KHITUITE NUL SAK INLA, NA LUNGSIM NATNATE LEH A MAIZUMNA KHEMPEUH A THOIHDAM KIK DINGIN A KIPATNA PAN IN PAN KIK DIH VE..”

Midangte lungnopna ding na buaipih sangin na zi leh na tate lungnop khamuan na ding in bawlsak zaw hamtang in aw..

“ NA NUNTAK SIATNA HANGIN NA ZI NA TATE KAHNA KHEMPEUH LUNGDAMNA A TUN KIK THEI DINGIN NA KIPAN KIK DIH VE” “ TOPAN HONG OMPIH DING HI.

A nuai a na sim dihve…

BUKNO KHAT SUNG ZONG NUAMNA 

INNKUAN KI-IT LENG..

LUI GING BEK ZONG LA NGAIHPI,

VANDUM BEK ZONG MAITAINA

PASIAN VAN PAN HONG NUIH PIH

LUNGDAMNA DIM NUNTAKNA,

INNKUAN KI IT LENG………

Credit: Daniel Soute