KAMMAL HOIH PAWLKHAT
By: Rev. Pau Khan Khai
1. Siavuante’n a bawlna mun bek damsak thei a, Jesu in a natna mun khempeuh dam siangsak thei hi.
2. Taksa cidamna dingin kha leh lungsim a dam masak kul hi. Topan damna bukim nei hi.
3. Lungdamna Gospel thu buaipih mahmah leng, Gospel anei Jesu in ei hong buaipih zo mahmah ding hi.
4. Na mailam ading lampi abin mahmah leh Jesu tawh ton lecin lampi thak hong kihong ding hi. Jesu in lampi hi.
5. Pasian thusung ah Kha mi taktak ih cihte pen a lungkhamna, a hamsatnate zangtak in a puazote ahi hi.
6. Khuahun siatna tung ah kingakei-in la, khuahun khempeuh a uk Pasian tung ah kinga zaw in. Khuahun hoih a thak na mu ding hi.
7. Tuhun pen kigensiat hun hilo, kigalko hun hilo, kimawhsak leh kihawmthawh hun hilo, i omna tek pan nuntakna hotkhiat hun ahi hi.
8. Midangte tawh kigamla theithei in i om sungin, Pasian tawh a kinai theithei in i om hun suaksak leng Pasian vangliatna na mu ding hi.
9. Pasian in hong deihsakloh hangin hong phal nasep om a, ahizongin hong deihsak semleng kilawhcing zaw hi.
10. Pasian in a aw zakding hong deih a, Pasian a itlote aw zak ding deihlo hi.
11. Jesu na it mahmah leh Jesu in nang hong it mahmah ding mi hong koihsak ding hi.
12. Kumpi pa pahtawi leng i pahtawi lam hong theikhalo ding a, Jesu pahtawi leng mimal in hong thei sitset ding cihpen thangah huai lua hi.
13. Topa adingin paulap na zon kei nak leh nang kisap hun ciangin Topa hong manlang pah ding ahi hi.
14. Mi khatin hong gensiat leh midangte theih dingin hong tangko sak suak ahihmanin na thupitna hong kilang semsem ding hi.
15. Pasian maipha i zon laitakin i cimtak pahpah hangin, a maipha gah i ngah ciangin kihawmthawh theizel hi.
16. Leitung thu tamtheih lecin na lunggim ding a, Jesu thu tamtheih lecin na lungdam ding hi.
17. Jesu ei adingin hoihden ahihmanin, ei zong Jesu adingin ahoih dingin kiging ciat ni.
18. Pasian sapna tawh Pasian nasemte adingin leitung vangik tuamtuamte puaklah ding hilo hi, Hong sampa’n hong puakpih ding hi.
19. Na lungkhamna pen Topa hong itna sangin neuzaw den cih phawk in, tuni lungkhamna pen zingciang lungdamna suakthei cih phawk in.
20. Leitung asiat mahmah laitakin, ei Topa tawh i kizopna ahoih mahmah laitak ahihding thupi hi.
21. Limtak in Topa na it leh, Limtakin hong kem ding hi.
22. Topa adingin na kipiakkhiatna tam mahmah phot leh agah na at the hong kicing mahmah ding hi.
23. Zomi cih pen a neituam omlo hi, ahizongin a itdeuh, apuah nuam deuh, akhangto sak leh a kipsak nuam deih om thei ding hi.
24. Kipahtawina in hong thahat sak a, kigensiatna in hong kipsak hi.
25. Minuamsa ih cihte pen khuahunte ngaihsunsun hilo in, Topa thu a ngaihsunsunte ahi hi.
26. Khuahun tung a kingate buai mahmah ding a, Jesu tungah a kingate lungdam semsem lel ding hi.
27. Na lianpi leh na hoih khat nasep laitak in lungkiatna ding hong om leh Topa khut ah ap in, gualzawhna kahlei thak na mupah ding hi.
28. Ruth pen khuahun tung ah kingalo ahihmanin An sang kaikhawm dinmun panin Ansal zek dinmun ah Topa’n koih hi.
Credit: Siapa Facebook tung pan
lungdam
No comments:
Post a Comment