ZBCM THU THEIHHUAI PAWL KHAT

 ZBCM Thu pawlkhat 

UKhup nong lai khak sawn (forward letter) kei tel na dan in ong dawng ning.

1. 1995 April kha a Khuasak a kibawl ZBC ki khop pen kum 50 cin Jubilee hi kei, kum 3 a khatvei ta a ki nei delegate meeting hi. ZBC pen 1953 kum a kiphuan ahih manin tua 1995 kum in ZBC kum 42 pha pan.

2. ZBC nasemte in kum 6 (2 terms) a ki sem thei ahih manin pello a ki laih ding hun a cing hi nai kei. Tua laitak a ZBC Gen.Secy a sem Dr. Chum Awi in ZBC sum i.e CCOC Fund) Haka a innlam na dingin a ki thukim lo pipi, a ki geel kha lo nangawn na pia sim zel zel a, tua thu a thei tel Sia Cicin (AGS) leh ken tel lua ka hih manun na sa lua, man sa lo lua; ka gen uh hang amau Khalkha lam te EC ah tam kah zaw den in vote tawh ong zo pahpah ki tang theilo.

3. Tua ahih manin GS laih in ei lam khat in len leng la ZBC hoih tak kalsuan leh cih lunggulhna tawh Sia Cicin GS dinga ei lam teng in a ki dingsak hi.

4. Sia Cicin ZBC GS dingin ko Tedim lam ten deih ung ci a Khalkha te kianga a gen pen Rev. Thang Go Khup hi kei in kei hizaw ing. Amun leh ahun zong -Khuasak Zolai Sanginnpi sung a, nitak biak ki khop khit 10PM a Khalkha makaite leh Tedim makaite ki maituah a thu genna ki nei hi. Ei Tedim lam pan a thusung kei mah hing. A pat pan a tawp dong kei gen hi.

5. Khalkha makai teng tangin HBA GS in, “Thawng Khan Cin lo nong tah ding dang uh om lo maw? Ong ci. Bang ih ci dawn tam guai? Ka cih leh Rev Kham Suan Mung in,”om lo ci o, ei leh ei ki tuh lo ding” ong cih teh ken zong “ Sia Cicin lo ngal ko a sawm dang om kei ung,” ci in dawng kik ing.

6. Zan khat diah in a zingsang teh ZCLS Secy. Rev. Go Khen Thang tung tawnin Khalkha ten ong zasak kik in,” Chum Awi pen ko zong ka hawmthawhna uh om mah. Ahi zong Sia Cicin zong makai dingin lungtom lua sa ung. Chum Awi leh Cicin pen ka deihna uh leh ka deih lohna uh kikim. Chum Awi ih laih ding leh Dr. Do Sian Thang ahih kei leh Rev. Gin Khan Khual khat zaw zaw hi leh kitel kul lo in ong awn nung. Tua te gel ahih kei leh lah Chum Awi leh Thawng Khan Cin ka deihna uh leh deihlohna uh kikim lel pen ko ko-a pa mah pia nung. Khuasak Tualpi ah Khalkha leh Tedim bawhlung suih kidem bangin ih kidem kul ve” hong ci uh. (Ong gen uh kammal bang lian a kong gelh hi)

7. Tua khit teh kei kiangah “ Nang ong ding mai ve leh?” Ong kici. Ken, “kei ut keng. Ken gupkhiatna thu gen in vak kawikawi ning. Ka ut zongin ken u Cicin tuh peuhmah kei ning” ci in dawng ing.

8. Kitel ma in kei makai in Falam upa te tawh kiho in FBA in ong dinpih ding, vote ong piak pih dingin ki thukimna bawl ung.Kitel tak tak  ciang FBA in ong taisan. FBA sung pan LBA ki ci Ngawn kual tengin ong din pih, vote ong piak pih.

9. Kitel madeuh in zong mandat sung delegates mai ah kitel lo a GS ong awt dinguh thu gen dingin Rev. Son Khaw Kham ka seh uh, ong gen theihloh ciang kei dingto in gen veve lai ing.

10. FBA ong ciampel man in leh Chum Awi in Thantlang choir team nungak tangval tampi te delegate hilo pi delegate hi ci in vote a piak sak gawpna hang tawh vote tang tawmcik khat in en a lel hi hang.

11. GS ong piak noploh uh teh ei lam teng ki kaikhawm in, GS ong awnlo, ong pia lo uh ahih teh ih gelsa om bangin ding ni ci in ZBCM ki ding hi.

12. Makai teng kikup khit teh Khuasak pai delegate teng TBA zinpi ah kaikhawm in thukim thukimloh ki dong hi. Delegate pai khempeuh thukim ahih manin ZBCM din ding Khuasak pai delegate tengin vekpi thukimna tawh kipsak hi.

13. ZBCM GS ding pen u Cicin mah hi ding ka cih ciat uh hi napi, aman,”Kei tu laitak min sia lua ingin Khualno nang kum khat sung ong sem inla, minsiat teng ong ven hun khat, mai kum ciang hiam ken ong laih ning a cih, ken sang zo pak hetlo in, ka khitui luang keuhkeuh hi. Upa ten,  “Sia Cicin lah minsiat khu nuamlo, pua nuam kei in, Sia Khual lah GS ut hetlo na hih leh khawl kik ni” a cih zezen ciangun, pasal hitan ta vaihawm khin nung kik buang lo e” ci a khitui luang keuhkeuh a ka na san, a mai kum teh TBA pen vai tuamtuam tampi hang tawh ong ki pawl thei nawn lo ahih manin u Cicin in ZBCM GS ong laih thei lo ong suak mawk. Ken gim leh tawl pipi ut masa hetlo pi, pasal khatvei kipat sa ci a ka na din, tuni dong a ki nahvawh lai suak ing ei u Khup. Tubang khawng a ZBCM pakpalh dia a kithawi teh ka sial tam ka phawk tam lua, ka khitui ka naptui, ka khua-ul kai a, zan ihmu theilo a ka khuisat sat lai, kolbulh khaukhih thuak dinga zumkong mangkong ah ong ki din sak lai, minsiat mindai a thuap thuap a ong ki khuk sak lai, u Cicin tawh thusim thulang ka kikup khop lai uh ka phawk tam a  u Cicin luang tungtang ah 

la phuak a ka minsial thu tampi ka khitna hi. 

14. 1994 September pan Birmingham, England a u Cicin sangkah kim lai ZBC GS a ah ding dinga ka vaikhakna pen September 1994 Falam pan a vai din khiat ni ding a zan nitak in u Hauno tawh ong hawh in, “mai kum ih ZBC delegate ah GS laih mai leng hoih ding ahih teh nang na ding in. Na ut kei leh pu Mung (Rev Sian Za Mung)

na ding leh la; no tegel a ut na om kei uh leh lah kei ong vaikhak mai un, ka sangkah man nai ta kei leng ong ciah ning” ci a lim tak a ong vaikhak hi. U Hauno leh a nu Man in zong ong zak pih uh hiven.

15. U Cicin  vaikhak ding maw vaikhak lo ding cih 1995 January kha bul lam khat in Mandalay pai vive ki sutuah in, Rev Thang Go Khup, Rev Isaac Zen Thawng, Rev Sian Za Mung, Rev Lian Khen Pau leh kei kikum ngelhngelh in ka vek vua ka thukimna uh tawh a ki vaikhak hi. A vaikhak dingin ka lawmte te tengin kei tavuan ong pia ahih man ken a sem a vaikhak suak ing.

16. U Cicin ong vaikhakna tektek tung tawn a ah tunga pasal 5, tua hun laitak a TBA makaipi nih leh KVBA makaipi nih, kei tawh 5 kikum ki thukim a ki vaikhak pen 1995 April kha TBA emergency GC (Tedim CMBC biakinn) ah CMBC pan a delegate khat in, “ Sia Cicin a sangkah man nailo pi a Sia Ngin Khan Khual in a sap khiat, Sia Cicin sum ngah lai ding a scholarship Kawlngam sum in Ks. 200,000/- tung ding ahih manin Sia Ngin Khan Khual in tua sum Ks. 200,000/- TBA ah tu mahmah in ong loh in” ong ci.

Zomi leh ZBC ka it luat man, thuman ka deih luat man, leh ZBCM hong pian khit teh ZBCM mahmah ka it luat manin, telkhialh, daisak, maitang kawk, leiba lopi leiba thangba a kisuat kingawhna, langmuh sik-etna a tuam tuam na thuak ing. Tuni dong thuman a tel nailo leh a tel nuam lo  pawl khat om lai. Ahih hang na khempeuh a neng a tawng.a tel Pasian om ahih man in kei leh kei ki hehnem ing. 

Lungdam. Gin Khan Khual