PIANGTHAK KHAT IN GUPNA ( SALVATION ) A TAAN THEI MAH DING HIAM?

 Piangthak khat in gupna (salvation ) a taan thei mah ding hiam?

“ Piangthak” i cih kammal tel masak kul ding hi. Thungen thei khempeuh piangthak hikhin lo hi. Biakinn ah a kikhawm khempeuh piangthak hikhin lo hi. Khristian innkuan sung panin a hong khankhia khempeuh zong piangthak hikhin tuan lo uh hi. Ahi zongin hihte khempeuh pen a piangthak taktak khat in a nungtakpih thute hi leuleu hi. Piangthak i cihte pen Jesuh Khris a Honpa leh Topa dingin umin, sang taktakin a sungah Kha Siangtho a neite ahi hi ( Johan 3:16; Sawltak 16:31; Efesa 2:8-9 ).

Tua ahih leh a sunga Kha Siangtho ( tuban siah KST ci-in kong gelh ding hi) a neisate in gupkhiatna a taan takpi ding uh hiam? Hih dotna pen a ngaihsuthuai mahmah thu ahi hi. Tua ahih manin LST in bangci gen hiam, cih enkhawm dih ni.

I. Piangthakte pen mithak ( new creation ) ahi uh hi. ( 2 Kor 5:17 Tua ahih manin mi khatpeuh, Khrih tawh a kipawl ciangin mi thak suak a, a mi lui ngeina bei-in a mi thak ngeina a neita ahi hi. ). Tua ahih manin piangthakte pen amau-leh-amau aa kipuahtawm ( an improved version of a person )hi lo uh hi. Tua ahih manin mi piangthak khat in a pianthakna ( gupna ) taan leh a mithak hihna ( new creature ) a bei ding ahih manin a piang thei lo thu khat hong suak hi.

II. Piangthakte pen manpiak-a a kitankhiate ahi uh hi. ( 1 Peter 1:18-19 Na pu na pate uh nuntakzia, bangmahin a kimang lo nuntakna panin a hong suahtaksak nadingin Pasian in note’ man dingin a piak pen a man a kiam thei ngun le khamte bang hi lo a, 19 tuuno bangin paubaanna a om lo, a manpha mahmah Khrih, biakna-in a hong kipiakna tawh Pasian in note a hong suaktasak ahi hi.) Jesuh in singlamteh tungah man piaka hong tatkhiatte ahih manin piangtak khat in gupna taan leh Jesuh hong tatkhiatna sisan pen man neilo a mawk napi suak ding hi. Thuciam Lui huna ganhing sisante tawh a kilamdanna om lo ding suak hi.

III. Piangthakte pen diktansakna ( justification ) a ngahte ahi uh hi. ( Rom 5:1 Tua ahih manin upna hangin diktansakna i ngahkhin uha, i Topa Jesuh Khris tungtawnin Pasian tawh i kilem uh hi.). ‘ Dik tangsak ‘ cih ciangin a mawhpi mah, a khialpi mah ‘ dik hi, khiallo hi, mawhlo hi’ cihna ahi hi. Tua ahih manin mi piangthak khat in gupna taan leh Pasian in ‘ dik hi, mawhlo hi’ ci-a a pulaaksa a kammal pen a dokkik suak dinga a piangthakpa/nu pen mimawh mah suakkik ding ahih manin Jesuh hong gupna pen a mawkna suak ding ahih manin ‘ gupna taan’ cih pen a piang theilo thu khat mah hong suak hi.

IV. Piangthakte in tawntung nuntakna ngah uh hi ( Johan 3:16 ). Pasian in Jesuh a umte tungah hong kamciam pen ‘ tawntung nuntakna’ ahi hi. Tua ahih manin piangthak khat in gupna taan leh Pasian in tua a kamciam ‘ tawntung nuntakna’ pen a thakin a ciamphat / bawlphat ( redefine ) kulkik hi. Tua ahih manin hih zong a piang thei lo thu khat ahi hi.

V. Piangthakte pen KST tawh kiciamteh ( sealed ) hi. ( Efesa 1:13-14 Note in zong hotkhiatna a hong ngahsakthei Lungdamna Thu a man za-in Khrih na up uh ciangin, Pasian in a hong ciamsa bangin ama mi na hihna uh a kilat nadingin note tungah Kha Siangtho hong piakna tawh a hong ciamteh hi. 14 Tua Kha Siangtho pen, Pasian in piak dingin a hong ciamsa thu eite khempeuh in i ngah taktak ding a kician ahihna thu a hong lahna hi a, ama mi ahi taktak eite khempeuh pen a suakta takpi mite ihihna a kilat nading ahi hi. Tua ahih manin a kuamah peuh in Pasian phat ciat ni.). Mi khat peuh a pianthak ni / hun lianin vantung gam tung takpi ding cih lahna / guarantee piakna-in Pasian in KST tawh ciamteh pah hi. Piangthak khat in gupna taan mawk leh Pasian in a ciaptehna phiatkik, a KST lakhiakik, cihna tawh hong kibang ahih manin a piang thei lo thu khat mah hong suak hi.

Tua ahih manin piangthakte in gupna taan thei dingin up-huai lo hi. Ahizongin hih thu i gen ciangin dotna thupi mahmah khat hong om thei hi.

1. Piangthak kici napi-a a ut bangbangin ne-in dawnin a omte leh a gamtate e leh?

Piangthak taktakte pen a ut bangbangin gamta lo uh hi. Mawhna bawlbawl lo uh hi ( 1 Johan 3:6 Tua ahih manin Khrih tawh a kipawl mite in mawhna bawl nawn lo uh a, mawhna a bawl lai teiteite pen Pasian a mu ngei lo, a thei ngei lo ahi uh hi. ). 

LST in a upna a taisante pen a piangthak taktak lo, ci lel hi ( 1 Johan 2:18 Khrih’ gal ahi hih mite pen ei’ pawl hi ngei napi-in hong taisan uh hi. Ei’ pawl taktak hileh eite tawh omkhawm paisuak ding uh ahih manin, tu-in amaute paikhia uh ahih ciangin ei’ pawl taktak ahihlohna uh hong kilang hi.). 

A piangthak taktak leh a taktak lo pen a gah pan hong kilang lel hi ( Matthai 7:16 Amaute’ gamtatna tawh amau’ pianzia na thei ding uh hi. Lingvom kung panin leenggah kilo ngei a, sialtalling kung panin theigah kilo ngei ahi hiam? ).

Pasian hong itna panin hong khenkhia zo ding bangmah om lo hi ( Rom 8:38- Bangmah in ama hong itna tawh hong kikhensakzo het lo ding hi, ci-in ka thei hi. Sihna, nuntakna, vantung mite, vantung vangliatnate, tuhun nate le a hong tung ding nate, 39 leitung a om nate, leinuai-a om nate, Pasian’ bawlsa nate khat peuhpeuh in i Topa Khrih Jesuh hangin Pasian in eite hong itna tawh hong khenzo het lo ding hi.). Pasian’ khut sung panin bangmah in hong sutkhia zolo ding hi ( Johan 10:28-Tua ahih manin amaute tungah nuntak tawntungna pia ka hih manin si ngei nawn lo ding uh a, keima khutsung panin kuamah in amaute hong sut zo lo ding uh hi. 29 Ka khut sungah a hong pia ka Pa sangin a lianzaw kuamah om lo ahih manin ka Pa’ khutsung panin kuamah in lakhia zo lo ding hi.). 

Tuucing hoihpa in a mang a tuu zongin a muh ciangin a liangko tungah pua-a tuukulh dong damtakin ciahpih hi ( Luka 15:5-6 ). A mangthangte hong zongin hong mu i Topa Jesuh in vangam dong muanhuaitakin hong tunpih zo lua mahmah ding hi.

( Juda 24-25 Ama minthanna mai-ah paubaanna om hetloin lungdam takin a hong paipih theih nadingin note na pukkhak nading panun a hong kem, 25 khat bek ahi eite a hong Hon Pasian in, tuma, tu laitak, le a tawntungin, minthanna, vangliatna, uk zawhna, le aana nei tawntung tahen. Amen. ). Hih LST mun in ei hong Gumpa Jesuh a muanhuaina, i pukkhak nading panin hong keem zo lua ding Gumpa ahihna hong gen phapha hi. Tua ahih manin a piangthak taktakte in gupna taan het lo ding uh hi.

Ahi zongin a tawp nadingin Matthai 25 sunga nungak ( virgin ) a pil ngate leh a hai ngate thu tawh ka khup nuam hi.

Matthai 25:1-

1 “Tua hun ciangin vantung ki-ukna zia pen zinei thak pa a uap dingin a meivak uh tawh a pai nungak sawmte tawh kibang ding hi. 2 Nungak sawmte sung panin nga pil uh a, nga hai uh hi. 3 Tua a haite in a meivak sung uhah a tui thunthuah lopi-in pai uh a, 4 ahi zongin a pil nungak ngate in a dimtakin thunin a pai uh hi. 5 Zineipa hong tunghak ahih manin a vekpi-un lusu-in a ihmu uh hi. 6 Ahi zongin zankim tak ciangin, ‘Zineipa hong tungta ding hi. Va dawn un,’ ci-in hong kiko hi. 7 Tua nungakte zong tho-in a meivak uh hong puah ciat uh hi. 8 Tua ciangin a haite in a pilte kiangah, ‘Ka mei uh mitta ahih manin na meitui uh hong hawm un,’ a cih ciangin 9 a pilte in, ‘Hong hawm le ung ko ading tawh kicing nawn lo ding ahih manin no ading va leitawm zaw un,’ ci-in a dawng uh hi. 10 Meitui lei dingin amaute a paikhiat kal sungin zineipa hong tung hi. A kigingsa-in a om nungakte in zineipa dawnin mopawi bawlna sungah a lutkhawm pah uh hi. Tua khit ciangin kong kikhak hi. 11 Tua khit ciangin nungak haite zong hong tung uh a, ‘Topa, Topa aw, kong hong hon in,’ a cih uh ciangin 12 amah in, ‘Note ka hong thei het kei hi,’ na cihsan hi.”

13 “Tua ahih manin a ni le a hun thei lo na hih manun na pilvang un.”

A kibatna uh leh a kibat lohna uh enkhawm ni:

I.A kibatna uh:

1. A vekpi-un nungak ( virgin ) kiciciat uh hi. Eite zong i vekpi-un Khristian / piangthak i kiciciat uh hi.

2. A vekpi-un Mopipa hong pai ding ngaklah tek uh hi. Khristian khempeuh in zong Jesuh hong pai ding ngak tek uh hi. 

3. A vekpi-un ngaklah un lusu tek uh hi. Eite / Khristiante zong i khalam ah thazawmin i lusuk hun uh om tham hi.

II. A kibat lohna uh:

1. Nga pil-in nga hai uh hi.

2. A pil ngate in namgim tui nei-in a hai ngate in nei lo uh hi. Tua mah bangin Khristian kici khempeuh in KST nei kim lo ding uh hi.

3. Namgim tui nei a pil ngate in a mei uh vaakin Mopipa zui pah uha, namgim tui a nei lo a hai ngate ahih leh kong pualam ah kinusia hi. Khristian i kiciciatta zongin KST neite bek vangam lut ding uh hi.

Tua ahih manin a piangthak takpi-a KST neite in gupna taan lo ding uh hi.

By: Rev.Khual Lam Cin Mang