THAWHKIK NA: (Resurrections)
Introduction:
Leitung gambuppi aom ZBCA gambupi khempeuh damciat dingin kilam-en hang. Tulaitak khuahun Covid 19 pulnatna hangin nasep khawlleh Stay Home Order tawh innpua pupial ngamlo zahdongin i om laitakin leitung vantungah a lianpen leh a sangpen kumpi te kumpi, Topa te Topa eite mawhna teng puakhia in thawhkik vaangliatna tawh hong thokik Topa Zeisu khazih in i innkuan, i mimal leh Zomi omna ciat-ah hongom in thathak hongguan ciatta hen ci-in thupha kongpaih hi.
Tuni Khazih in misite lakah agah masa bel suak aa, sihna pan a thokik zohi (I Kor 15:20).
Topa Zeisu hong sihna leh hong thawhkikna thubulpi in ei tapidaw upna laigil leh lungdamna thubulpi pen ahihi. Topa Zeisu pen ei mimawh te taangdingin hongsih hangin hong thokiklo hi leh i upna leh lam-etna khempeuh a mawkna suakdinghi.
Leitungah biakna tuamtuam te a pasian uh asih khit uh ciangin kuamah a thokik peuhmah om nailo hi. Ahi zongin ei thu-um tapidaw te Pasian ahih leh a gensa bangin ni thum ni-in hong thokik aa,hih thu hangin leitung linglawng sak aa, amah a upte adingin kikhelna, lam etna, gupna ngahna hi-in a umlo ten ahih leh misi sa thokik ding cihpen piangsak theilo ahih manin nialna ding thu tuamtuam a zong uhhi. Zeisu kinial na mun laisiangtho genna pawlkhat enpak leng:
• A thawhkik ding genkholhna:
Topa Zeisu in sihna zo-in a thawhkik ding na genkhol aa, hih thawhkikna in Messiah Gumpa ahihna “liim” ahihna Limgen phadiak hi. Mt 12:38, 40:16-21, 20:23, 20:18-19, 26:32, Mk 9:22, 9:27.
Professor T.J. Thorburn in Getsimane ah a thuakna zankim laitak aki matna thusit a thuakciang kisatna ki vuakgawp nate Pilat mangpa zum leh kumpi inn paina Zawma galkap ten khautep tawh a satna leh Kalani mual zuan aa, a paina lamsau lua ahih manin Zeisu a gimluatna hangin atha bei in ling keuhkeuh hi naci hi. A thah ma un adangtaak luatna bek zong mihing khat adingin sih theihkhopna hikhin napi a pangpi pan tui leh sisan hongluan khiatna pen sikhin zo cihna hi ci-in zato lam siamten gen uhhi.
• A kivuina han omzia:
Topa Zeisu hongsih ciangin a luangpen Azimate Zawtah in ama hanah vui hi(Mt 2:59-60). Tua han pen kuama kivui nailohna hanthak hi aa, suangtum kikhuak tawmkhat ahihi(Mt 15:46, Zh 19:41. Professor Alford in a genna ah hansuang kawhawm pen suangngeina hilo in suangtumpi ki khuattawm ahihi naci hi. Han ah kivui sabbath ni khit ciangin nupi pawlkhat han ah vahawh uhhi. Zeisu pen han ah kivui lo hileh han pai kullo dinghi. Mipil tampi tak leh tangthu tuamtuam kan ten thu tuamtuam paulap in anial uh hangin lungdamna thu gospel buli teng hongsang ta uh aa, Zeisu ki vuina, kicinna leh thawhkikna te nialzo tuanlo uhhi.
•Hancing ding kiseh:
Siampi liante leh Pharisee te in Pilat kiangah topa aw hih mi khempeuh in nithum khit ciang ka thokik dinghi ci-in a genna uh ka thei uhhi.Tua ahih manin nithum sung han hoihtak cintheihna ding thu hongpia in ci-in ngen uhhi. Pilat in galkap te cingsak unla a muanhuai theithei dingin nahih theih bangun hih un a cihi. Tua ahih manin han kongkhak hoihtak a ciapteh khit uh ciangin galkap te cingsak uhhi. Topa Zeisu pen han mawkmawk khat ah hong kivui hi leh a luang kigu theiding aa, hong thawhkikna zong kician lo dinghi.
•Hong thawhkikna leh A kilatna munte:
•Magadalah khua Mazih kiangah (Mt 1:9,
Zh 20:14.
•Han hawh nupi te kiangah (Mt 28:9-10).
• Pitazuh kiangah (Lk 24:34, I kor 15:5)
• Emus lampi minih te kiangah(Lk24:13-33)
• Nungzui te kiangah (Lk 24:36-48).
• Zakoh tungah (I kor 15:7).
• Galilee mual thu um mi 500 tungah
( I kor 15:6).
• Van kah laitak (sawltak :3-12).
• Pawlu kiangah (Sawltak 9:3-6, I kor 15:8
• Steven kiangah (Sawltak 7:55).
• Patmauh tuikulh Zawhang kiangah
( Mg 1:10-19).
• Thawhkikna hang phattuam nate:
Thawhkikna omlo hi leh Pentecost khasiangtho ki bua loding aa, eite sungah khasiangtho hong tengtheilo dinghi. Zeisu hongtho kik ahih man in leitung tangthute hong kikhel hi. Nidangin Sabbath ni in kikhawm uh a, a thawhkikni khit ciangin thawhkik ni-in ki khawm uh in khomun balnen uh hi.
Nungzuite nuntakna kilamdang hi. R.W, Sottin, “Nungzuite nuntakna kikhelna, kilumletnate i muh ciangin Zeisu a thawhkikna kilatkhiatna lianpi hi, ci hi. Dr Simin in Zeisu thawhkikna thuman lo hi leh nungzuiten hih kuhkal takin gengen lo ding, zong sihpih ngamlo dinghi naci hi.
• Zeisu a dingin anungta minih thu kikum ni:
(1). C.T. Studd, D.D. Criket kici bawling sat kimawlna a phuankhiapa hi a, Cambridge mipil sagih lakah akihel kumpi nam, mihau mahmah khat hi. DL Moody tungtawnin Zeisu tawh hong ki muh ciangin a kumpi thuneihna leh agamhluah dingte nusia-in Sengam leh Africa gam-ah missionary dingin bukno khat sungah teengin Zeisu thu gengen hi.
(2). Harper khua a Pastor (April 4th 2018) Hih pastor pa pen minthang khollo hi. A tanu tawh Titanci tembaw tungtuangin khualzin a, Tembaw tungah Pasian thu gengen hi. Zan khuavak a thugen zopa ci uh hi. Tembaw tuisungah tumding a kicih ciangin, mikhempeuh in a suahtak na dingun lifeboat kituh ngeingai uh hi. Hih pastor pa in hih atanu pen mi amuan khat tawh ap in, alife jacket zong mipia a, Pasian thugen tuaituai kawmin tui sungah tum hi. A ma tungtawn in mitampi piangthak man in Glasgow khua biakinn khat ama min tamhsak uhhi. Hih pastor pa-in a upna tellua ahih manin mitampi suakta sakin aman sihlawh zaw hi. Hih bang a kilamdang aki lumet nuntakna mi malkim tung ah hongtungta hen.
•Zeisu hong thawhkikna banghangin
thupi hiam?
Sawltak Pawlu in Zeisu hong thawhkikna a manphatna leh hong thokik lo hi leh i hehpihhuai ziading te 1Cor 15:12-19 ah siangtakin honggen hi. Khazih hong thokik ahih manin Pasian thu i gengen te mannei hi. Nungzui ten zong teci pang bek hi lo-in sihpih ngam uhhi. Zeisu sungah a si mite ading zong lametna lianpi om hi. Tua ahih man in tapidaw te pen mi hampha pente i hihi.
Sanggam aw, tuni-in na nuntakna a ki lamdangnai hiam? A ngei mah bangbang lai na hiam? Sihna letzawh loh a thokik Zeisu in na nuntakna hong ki lamdang saknuam hi. I Topa thawhkik vangliantna in mi malkim nuntakna hong ki lamdang sak ta hen, Amen!
* Topa’n hih thawhkik vangliatna hangin damlo te damna, suakta lo mite suahtakna leh tulaitak Covid 19 pulnatna hangin Topan mimal innkuan hongkem henla hong makaih den tahen. A men
Lungdamna lianpi tawh;
Pa Khup Sang
Tulsa, USA
No comments:
Post a Comment