NUMEINOTE TAWH KISAI PILVANG HUAI MAHMAH

Pilvang Huai Mahmah

Numeinote tawh kisai thu

Zingsang khat laisim dingin thului gelhna website khat sung ka lut hi. Tua website sung ka lut ciangin hong dawk masa pen thului khat a thulu kha sim kha pah a, a tawp dong ka sim suak kha pah hi.

Tua thului sunga kigelh thu pen Thailand gam ah nai nih hal sim ta-in kum 15 nuai a pha pan numeino nih ta in naupai-in ta nei uh hi cih thu kigelh hi. Hih thu pen Thailand gam a om, nungakno naupaite le ta deih lo napi nau a pai kha nungaknote a huh a panpih a cing a kem kipawlna khat a thunei ahi Mr. Pakanan Krekaew in Oct. ni li ni-in gen khia hi ci hi. Hih thu pen kumpi thuneite tunga a kigen le a kizasak thu ahih manin thuman khat hi ci-in kiciamteh thei hi.

Thai gam pen a beisa kum sawm lai a kipan kum cing nai lo numeino naupai khang mahmah hi ci-in kiciamteh hi. Minute 4 hal ta bangin nungak kum sawm le kum sawmnih kikaal numei naupai om uh a, tua naupaite lak ah kum 15 a pha nau lo numeino khat ta kihel hi ci hi. Numei nau suak mi guk lak ah khat pen kum 15 cing nai lo numeino khat kihel den cihna ahi hi.

Thai UNICEF in a ciaptehna ah numei kum 15 pan kum 19 kikaal numei 1,000 lak ah 65 in naupai-in ta nei uh hi ci-in ciamteh uh hi ci hi. Tua banga kum sawm val deuh numaino naupai pen kum khat khit kum khat khang semsem hi ci-in gen uh hi.
Mr. Pakanan in a genna ah tua banga kum cing lo a nau a pai numeinote pen a zawng a tagahte le nu le pate tawh om khawm lo, nu le pa nei lo, nu le pate tawh om khawm lo, nu le pate ukna le makaihna nuai ah a khanghia lo a om lote le a nu a pate uh kikhen cihte tam pen hi ci hi.

Hih bang thute pen a bei sa sim tampi lai-in zong laibu sung hi ta leh muhna zakna mun tuamtuam pan theih dingin ging kawikawi mah hi. Ahi zongin ei Zomite omna Kawlgam tawh a kinai mahmah gam ahi thai gam ah hih bang siatna thute khang semsem ahih manin hih thusia in Kawlgam kongbiang hong sik taktak ta hi ci-in ka ngaihsun kha hi. Kawlgam kongbiang ding hong tung ta ahih manin Kawlgam laitangh tunga teeng ei Zomite adingin zong kongbiang dong mah hong tung hi ta hi.

Kum cing nai lo nungakno naupai a tam zawte pen bang hangin tua ci thei uh hiam cih leh hih bangin gamta leng bang siatna tuak thei ding, hih bang gamta leng mailam hun ah bang haksatna tuak thei ding, bang thu bang late in mailam hun ah hong muak ding cih theihna nei lo uh hi.

Laigelhpa keimah in hih thute ka gen ciangin siatna a gamtate tungah mawhsak nopna tawh thu a khen nuam ka hi kei hi. Amaute tungah thu a khen ding le a mawhsak dingin thuneihna zong ka nei kei hi. Ahi zongin siatna khatpeuh pen a gamta mite nuntakna sungah a hoihna le a hoih lohna in thukhen ding ahih manin ka Zomipih numainote in tua siatna a thuak ding uh ka deih kei hi. Tua hangin mailam hun ding thu sau ngaihsut lo a hun tomno sung nopsakna pen mawhna khialhna hi cih sangin tua nopsakna nung ah thuak ding le tuah khak ding dahna le lungkhamna thu theihtel dingin ka gen nuam zaw hi.

Tua banga kum cing nai lo a naupai numeite nuntakzia ih et tak ciangin kum cing nai lo a ta nei mi tampite lak ah mi tawmno khatte lo buang a dangte khempeuh a nuntak sung uh hun sawtpi mah dahna le lungkhamna in tuamcip uh hi cih kimu thei hi. Mi tawmno khatte bek mah in tua dahna le lungkhamna nawk suakin lampi thak khat sial zo uh hi. Ahi zongin tua bang ding mi pen ka gensa mah bangin a tampite lak ah tawmno khat bek mah om uh hi. Kum cing nai loin nau nei uh ahih manin nungak hun nuam cihte nei nawn lo uh hi. Kim le pam in zong tua bang mite kipom siam zo nai lo ahih manin kim le pamte nehpik le cilphih thuak ding uh hi.

Tua bek tham loin tua bang mite pen ama pumpi le lungkim a kikem zo lo mah suak uh ahih manin a lawm a gual pha zo khol lo uh hi. Amau le amau mahmah zong kimuanna nei zo nawn lo uh a, kimuanna nei zo mah uh le zong kim le pam muhna ah a kimuanna uh pen zum huai dai huai ci-in kinehpik lel ahih manin tua lunggimna thuak zo nawk zo a mainawk suak thei ding mi tawmno khat bek om uh hi. Pawlkhatte kim le pam midangte gen loh ama innkuanpihte le meltheih u le naute mahmah in zong pom zo lo sang zo lo ahih manin a it a ngai a pom a sang dinga kilawmte mah in nawlkhin masa zaw thei lai hi. Pawlkhatte in tua lunggimna le dahna thuak zo lo ahih manin sih ding lunggulh zaw zah dongin lungsim khensatna nei thei hi.

Tua ahih manin hih bang thute Zogam le Zomite sungah a om loh nadingin kipawlna tuamtuamte le biakna sungte ah pilna thu hilhcianna neih dingin hoih ka sa hi. Bang hang hiam cih leh hih bang thute pen mipilte in a genna ah a khangto cil gamte le minamte sungah hih bang siatna pung mahmah hi ci uh hi. Thailand gam pen a khantoh zawh uh a sawt nai lo a khangto thak gam khat ahih mah bangin Kawlgam le a sunga om ei Zomite zong a khangto dingin a kipan gam khat i hi hi.

Siatna a kipat zawh ciangin thuhilhna kipipat gawp sangin siatna a tun ma-in kiliah kidal zawh ding pen siatna nawk ding zia lampi man khat hi zaw hi ci-in ka mu hi. Pilna le thumuhna tawh a kithuah suahtakna pen a lungkim huai suahtakna ahi hi. Ahi zongin pilna le thutheihna om lo a suakta nuam mite pen ama gal lian pen a suahtakna hi kik zaw thei hi. Pilna le thutheihna thusim lo a suakta nuam mite pen a sawt loin suahtakna sungah amah le amah kol kibulh kik kha thei uh hi.

Job Cinpi
Zomi Laisiam Nuamte
Midangte sim theih dingin na share sawm in.
Lungdam.

Man or Lim nuai ah HOME link na mekin adangte zong nasim zel in!