LUNGDAM BAWL CHRISTMAS By. Pa Khupsang

LUNGDAM BAWL

Leitung kiuli aom Zomi u leh naute damtek dingin hong lam en ing. Kum 2019 beiding pen kalnih taangbek kisam lai in tukha zong pen lungdam huai diak kha leh maitai huaidiak kha ahihi. Ei mihing te ithuai na leh hoihna khatbeek omlo i hih laitak in Pasian takpi eite hongit luat man leh i manthan ding hongphalloh manin leitungah hongpai in suahna ding nangawn munngah lo in a niam penpen bawng annek na kuang sungah hongsuak ta zen honggum leh hong tankhia honpa Zeisu hongsuah na tawm kikum sukdih ni.

CHRISTMAS:

C=Christmas 

H=Herod

R=Redemption 

I=Imanuel 

S=Savior 

T=Three Wise men

M=Manger

A=Anger

S=Shepherd  cih bangin kikhia hi.

A SUAK JUDAH KUMPIPA KOILAI OM HIAM?

    Laisiangtho siamte in Thuciamlui ah Pasian in  mihing zong a, (pian 3:9). Thuciamthak ah mihing in Pasian zonghi(Matt 2:2) na ci uhhi. Khristian biakna pen biakna dangte tawh ki banghet lo a, biakna dangte amau pasian zongin bia uh aa, Khristian biakna ah Pasian in mihing zongin biasak hi. Tua manin Khristian biakna pen a tuampian biakna khat ahihi.

(1). Pasian in mihing zong masa hi.(Pian 3:9) 

       Pasian pen kha hi a, John4:24 muh theihloh lawn theihloh Pasian ahihi. biakna dangdang te bang hilo in a kipat cil in om khinzo Pasian ahihi. Tua Pasian ama minthangsak ding leh ama thupiak amang dingin mihing bawl aa, Pian 1:26 , Thuhilhna 12:13 mawhna neilo in Eden huan sungah koihhi.

  

    Dawimangpa khemna hangin deihtelna pan mi masa Adam leh Eve hongpuk ciangin mawh neite hongsuak uh aa, tua mawhna in Pasian tawh ki gamla sak in Pasian maidal in liahhi. Isai 59:2, Late 66:18. A hi zongin Pasian in a khutma tawh a bawlsa leitung mite itlua ahih manin Pasian in tua mawhna pan kisik a, amah zuan in i siantho theihna dingin Adam aw koi ah omna hiam? Pian 3:9 ci in hongsam hi. Hih kammal pen a lamdang mahmah kammal khat ahihi. 

    Pasian in mawhnei mihing te it in sam a, mihing te in mawhna hangin dawng ngamlo kithei sak nuam paklo uhhi. Biakna dangte in a pasian uh sam in hopih uh a, ei Pasian in ei hongsam zaw mawk hi. 

  Adam koi ah omna hiam? ci hi. Pasian in mun khempeuh mu in thei napi in Adam te nupa mulo leh theilo hiding hiam? Mu lua mahmah ding leh thei lua mahmah ding hi. Koi ah omna hiam cihna in a omna mun sangin a dinmun uh (Position ) dotna hizaw hi. Khasiat leh hehpih huai sakna pampaih sakna lam hizaw hi.

    Tua ahih manin Khristian te Pasian in mihing zong a awlmawh leh a it akhual alai na masa Pasian ahihi. Eden huan sungpan hongzon kipan a, mawhna hangin gamla pi kitung khin ahih manin thukham leh siampi te akipan minam khat zangin hongzon ciangin hong mu zolo hongkaih zawhloh teh a tapa khat neihsun Zeisu tawh Calvary mual ah hongkhiang tanin singlamteh tawh daai hongkai a, tua singlamteh tung sihna hangin a kimu kik, a ciahkik thei Pasian tapa tanu te i suak hi. Hih pen Pasian hongzon masakna ahihi.

(2).Mi in Pasian zongkik hi. Matt 2:2

       Thuciamlui sungah Pasian in anam tuamtuam tawh kizopna ding vaihawm ta leh mihing lampan cin zawhna aomloh ciang a tapa Zeisu zangin mawhnei mite hongzongin hong muta hi. Tua pen Thuciamthak kipat cilna ahihi. Luke 19:10 Zeisu mihing bangin hongsuah ciangin mipil te vantung mite a kipan tuucing te in muak in na bia uhhi. 

    Mipil te in Herod kumpipa kiangah “A suak Judah kumpipa koilai ah om hiam” Matt 2:2 hongci uhhi. Thuciamlui ah Pasian in mihing a zon pen Thuciamthak ah mihing te in Pasian mah ahi Zeisu zonna hong kipan ta uhhi. Gipzong leh khuai zong a cih bangin Pasian i zonna ciang tawh mihing te in gupna ngah zolo suakta zolo hangaa, mihing lampan in lungsim ki tamzaan a i zonkik ding hongdeih hi. Pasian in hongzong hetlo hi leh mihing te zonna bek tawh Pasian kimu zolo dinghi. Tua ahih manin Pasian in hongit in hongzong a, Zeisu a mah leh amah hong ki pulak tawmna tawh mihing ten i zonkikna amu thei i suak hi. 

Thukhupna:

  Pasian in tapa neihsun Zeisu tawh hongzon zawh kum (2019) bang phata aa, nang hongmu nai hiam? Nang na zongkik nai hiam? Na thudon nai kei kha hiam? A man hongzonzon hangin na zonkik tuan kei leh namu ngei kei dinghi. Nang hongzongzong pa in piaknop leh cihnop hongnei ahihi. Tapa taimangpa in a manthan lam kiphawk in ciahkik hunding a pa’n a ngak bangin Topa in na ciahkik ding hongngak gige hi. Zeisu in nang hongit in a sang vantung pan nang hongzong ahih leh nangzong “A suak Judah kumpipa koilai ah om hiam” ci inla zongkik ta peuh in namuh dingin a nai ah amah omhi. 

* Tuni in Lungdam bawl pawi ante ne in nuamsa in kumte beiding ngak bek hilo in hongsuak ding naungek eite tawh hong Emmanuel khawm Zeisu pen i pawlpi leh i khua leh tui, i mimal mahmah in kiging sa in dawn sawm ni. “A suak Judah kumpipa koilai ah om hiam” a ci thei kimciat dingin mimal kim Topa khasiangtho in honglawng tek tahen. Genkhelh om leh ngaihdam bawm ah maw.

Pa Khup Sang