KAWLONG THEOLOGY

Konglong (Kawlong)Theology( Ephet 4:14-15)

Thupatna:

Tu zing sang ka lungsim ah hih kammal ongsuak mahmah in lam dang kasa hi. A bang konglong (kolong)hi peuhmah hiam aw ci in ka lung ngai hi. Tu hun Chistiante i nuntak khuasak zia Zomi te i thupom ziate ong suak bang bang kikum khawm nuam hi hang!

Konglong (kolong)a khiatna pen kingak sitset lo, kol , kiplo cih a hih hi. Ki lingling thei, ki loklok thei , muanhuai buang muanhuailo buang om cihna hi. Khat peuh i nawksuk nawktoh a om dinmunkip taktaklo cihna ahi hi. Khat i gen mansa in amai ciang khat in a dang khat gen leh mansa leuleu in ei dinna ki tel khollo cih na hi. 

1. Kua Pawlpi ah om na hiam?

Pawlpi ih cih pen saptuam, teeltuam, a kisamkhia tuamte cihna hi. Thu- um lo leitung mite lak pan kisam khia, kiteel khia te hi. Pawlpi pen a kimu theilo i sung pan Jesuh gumpa le tanpa a sang te thalakna, thunget khopna, biakpiak khopna ding in Pawlpi ong piang a hi hi. Tua pen tu hun a pawlpi min, RC, Baptist, Lutheran , Methodist cihte hi lo hi.

Pawlp in vantung gam ong tun ding cih  a um pawlpi om hi. A siapa thupi salua a sih up pawl khat om a, A siapa thugen dan na ngawn a gen Pawlpi zong om hi. Pawlpi ah a om manin thupha a buk abak a ngahpah ding a lamen Pawlpi zong om leuleu hi. Pawl dang teng hell sung ong khia den Pawlpi zong om kawkawi hi. A lam a diangte a pai khial hi a ci Pawlpi a om mah bangin milim bang a tu gimgemte Khasiangtho neilo hi a ci Pawlpi zong om ve ve hi. 

Ei nopsak dan, ei pomdan ciat man kisa i hi hi. Kua Pawlpi man pen hiam cih sang Pawlpi mi khatciat in kei kua tawh  kipawl ka hiam cih i sit tel ding ka deih hi. I lungsim khempeuh, i hatna khempeuh , i pilna khempeuh, leh Kha tawh biakpiakna a deih Topa hi. Tua Jesuh tawh a zomte nuntak tawntungna a ngah ding hi. Na kikhop, na biakpiak manin vantung tung ding na hi kei a, a sisan  tawh ong lei Pasian

Tate in Pawlpi khat peuhpeuh ah a om i hi hi. Jesuh Pawlpi mi hih sawm ni.

2. Kua Thu gen um na hiam?

Sawltak Paul in pawlkhat in tuman thutak a zak noploh hun hong tung ding hi. Amau zaknop thu a gente bek a cial hun uh om ding hi na ci hi. Tu hun in Laisiangtho thu sang in kamsanna, nisim tuahkhak thute ki tam gen mah mah hi. Pawl khat in feeling , emotion lungsim thawhna bulphuh in tua pen Khasiangtho nasepna suaksak uh hi. Tua ama gen a umlote Kha nial hi, Khasiangtho dahsak hi ci uh hi.  

Leitung pianpih dangnal lo te, kampailote, a gen siamlote  ki thudonlo hi. Pasian sathau nilhna om lo ki sa pah hi. A thu hoih mahmah ta leh ki thupi laklo ki nuntakpih sawmlo sese hi. Ciammuih nuisuak khawng a ki hel kei leh zong Aa gen Pasian thu a hih lam, Laisiangtho kammal a hih lam kiphawk sak lo hi. Nasia kisa lo hi mawk hi. Thupha ngahna ding lam khawng bek ki zanuam hi. 

Mite cimloh na ding tawh thu a gentheite thupi a, A hi zong in a gen thu in Pasian thu a hih leh i pompih ding thupi hi. Pasia kammal Laisiangtho thuthuk ong gen leh tua pen i up ding a hi hi. Na nuntakna ah tha hongguan ding ong kipsak ding, hong lungdamsak thei thu in Pasian Kammal hi. A kipat cil in thu om hi. Tua Thu tawh i nuntak leh konglong lo ding hi hang.

3. Kua in nang honghuh hong panpih hiam!

Lei tungah pilna leh siamna thupi hi. Tuate in i nasepna tampi ong lawh cing sak hi. Hauhna zong a thupi mahmah khat a hi hi. Nahoih i sepnop hang in a sum om kei leh piangzo tuanlo mawk hi. Tua mah bang in thahatna cidamna zong kisam mahmah hi. Lawm leh gual zong kisam hi. Ong seppih ding ong huh ding pen pilna, siamna, hauhna, hatna, lawm leh gual tampi nei peuh leng Pasian in ong kumsuk in ong sem ding hilo hi a ci mi tampi om ta hi.

Kipawlna lianpi khat ah om peuh leng thu ngetnget lohsa in zong piang lel, thungenngen teng a muanglah teng hi a ci mi pawl khat om hi. Lawhcin na ding in ei, kei, nang a thupi pen hi a ci a pau eueu mitampi ki mu hi. A hi zong in a hauh zah in lungnuam tuanlo uh a, a pilzah a lawm neih zahnun mi lawhsam tampi om leuleu hi. Sum tampi nei uh hi. Lungkham veve hi. Neih leh lam kicing nei hi. Lungdam zo tuanlo uh hi.

Lungnopna leh lawhcinna taktak pen Pasian sungah om hi. Na theihloh kal in huhna na kisam den hi. Lungnopna, cidamna, khamuanna , tawldamna na kisam hi. Tuate pen neih leh lam tampi neihna pan hong pai lo a, Khasiangtho huhna, panpihna, thapiakna, hehnepna pan kingah bek hi. Thungen in Topa Jesuh aw hong huh in, Khasiangtho aw hong huh in , Ka Pasian Aw hong huh in ih cih den ding kisam hi. Tatsat lo a, ama huhna ih nget ding kisam den hi. Van leh lei a bawl Topa kiang pan eite huh na hong pai hi.

Thukhupna: 

Topa in eite a hoih ding, upna nei ding, lametna nei ding in hong deih hi. A suk hoi a to hoi dingte i hi kei a, a kip ding a dingtang ding i hihi. Mite khemsa leh dawi mangpa khemsa a om ding in Pasian in hong deih lo hi. Tua dingin zong ong bawl lo hi. Pasian muangin, thungen in, Khasiangtho sam in. Laisiangtho tawh mite thugente sittel in. Jesuh tswh na kizopna a man hiam ki-ap pha kik in. Na omna Pawlpi ah Topa tawh na kipawl khawm hiam, lungngai in. Lei tung huhna lamen ken la vanhauhna, Pasian huhna leh upna tawh om in. Tua hi leh kong long loin na kip ding hi. Topa in mimal kim thupha hong pia ta hen.

By: Sia Thangboih