MAKAI HOIH KISAM

MAKAI HOIH
Dr. Dam Suan Mung

Maikai cih pen nungzui anei te hi. Nungzui nei lopi’n “kei makai hi’ng” a cih leh a mah kia lamsiau hi lel hi. Makai i cih pen mi lungsim a huai zo mi a hihi. Koi mun koi mun ah mi’ lung sim a huai zo mi makai a om ciang in kithutuahna le khantohna om hi. Gam khat, minam khat,pawlpi khat khantoh na ding in makai tung ah kingapen ka sa hi.

Makai hoih a neih leh tua gam, tua pawlpi, tua minam,tua khua a khangto hi pah a,makai hoih a neih kei leh a hoihsa gam, khua,minam le pawlpi te nangawn kiam suk lam a manawh a hihi. Gtn: S’pore gam bang khua khat,tuikulhno khat hi lel hi. A gam sung vuah a piang bang mah om lo hi. Mehteh mehngah a ki-pan buhtang tang khat zong a pian lohna gam ahi hi. Ganno khawi theih nading mun zong om lo a, nahtang kung khat zong om lo hi. Dawn ding le kisil nading tuisik nangawn Malaysia panin tui pipepite tawh la-in a lei uh ahi hi.

Yangon taihkhante ah innkuan khat in tui puaktoh nadingin tuiset khat ta thuah kul a, S’pore gam a taihkhante ah tuiset thuah kulse loin tuimuk hong peuh le’ng tui deih zah in hong pai a, siangtho mahmah lai hi. Tui pai loh hun cih bang om lo hi. I zat zahzah tuiman kipia lel hi.

A tunga i gen mah bangin nahtang kung khat zong kisuan lo napi’n nahtang a limcipen te ne zo uh a, butang tang khat zong piang lo hi napi’n buh limpente ne zo uh hi.Lenggui kung khat zong ciing lo napiun lengngah bang a tang neite ne nuam loin a tang nei lote bek lei-in ne uh hi.

Tua mah bang in lengmaw,apple cihte zong a limcipente mah tua gamah ki puakin lei-in ne zo uh hi. Bangmah pian loh na gam hi napin S’pore gammi taktakten nisa khasa thuakin naham sem lo uh a, amau sep nop loh teng sem dingin sum thalawh nuamin gamdangmi tampi pai-in a na uh va sepsak uh hi. A gammite in a sepna a thaman uh kham mahmah uh hi.

Leitungah a kidawk zo lo ding, bangmah pian lohna tuikulhno khat bek hi na pi’n tu’n leitungah gam haupen khatin kiciamteh a, leitung mun tuamtuam panin mi tampi tak a va hawh nopna, na a va sep nopna gamhau khat gamnuam khat hong suak ta hi. A vanleng tualpi bang uh leitung ah vanglengtual hoih khatin kiciamteh a, S’pore vanleng bang leitung a vanlengte lak ah a hoihpenin kiciamteh hi. Leitungbup ah a khua siangthopenin zong kiciamteh hi. bangmah pian lohna tuikulhno khat ahi S’pore, bang hangin hong nuamsa-in bang hangin hong khang to hiam cih leh makai hoih a neih man uh ahihi.

Tua a hih ciangin gam khat, khua khat, minam khat,pawlpi khat khantoh nading pen makaite tung ah kinga vilvel hi. Lai Siangtho sung i et ciangin Israelte zong makai hoih, Pasian a zahtak makai a neih uh ciang in a gambup le a minambup khangto uh a, makai hoih lo, Pasian a zaktak lo makai a neih uh ciangin a gambup, a minam bupun kiamsuk lam manawh uh a, a galte un simin tuancilin sila ding in kum tampi man uh hi. Tua ahih manin Zomite in makai hoih i neih nadingin thu i nget ding thupipen ka sa hi. Makai hoih khat i neih khakna pen a manphatzia kiseh thei lo hi.

Samuel masa sung i et ciangin Israel mite in Pasian’ aw a zak loh uh hong sawt ta a, Pasian lamlahna ngah loin khuamail tawh a kibat laitakin Hannah thungetna Pasian in dawng hi. Pasian a zahtak, Pasian lamlahna a ngah makai hoih Samuel a ngah uh ciangin a gambup, a minambup hong kilamdang pah uh hi. Tua ahih man in ei Zomite in Pasian’ letsong lianpen ahi, Pasian a zahtak, Pasian’ lamlahna a ngah makai hoih i neih nadingin i munmun,i khuakhua, i pawlpi tekah a kisampen ahi hi. Makai hoih nei leng i khua, i pawlpi le i minam sung ah khantohna lianpi hong om ding hi.

Teci panna khat hong nei leng, tu laitakin Pasian hong hehpihna tawh ko Full Gospel Assembly pawlpi pen Kawl gam a khangtopen, khamangthang tam a manpen, sangmang nasepna a nakseppen, local pawlpi khat adingin hunbit Pasian’ nasem a tampen, sumpi zong tam a ngahpen le a piakhiapen pawlpi khatin a kiciamteh ahi hi. Hi bang ka gen ciang in kisialhna le kiphatsakna tawh ka gen hi peuhmah loin kiniamkhatna lianpi tawh minthanna khempeuh Topa tungah pia kawmsa’n a gen ka hi hi.

Tua bang khantohna tuamtuam hong pian theih nadingin a makai a hi kei pen cihlohna lethanemna tampi kawmkalah Pasian hong teel, Pasian hong sap ahih lam ka kitek hi. I munmun, i gamgam, i pawlpi tekah Pasian teel, Pasian sapna a ngah makai i neih ding kisampen ka sa hi. Ka makaihzia ding, ka hihzia ding Topa’n a Kha Siangtho tawh hong hilh hi. A malsimin kong gen ding haksa hi.

Tua ahih manin makaiten Topa lamlahna tawh makaih ding ahi hi. Nisim in i zia i tong ding hong hilh thei Topa ahi hi. Nipi sim ka hunzat ding, ka thugen ding Pasian’ tuute Kha ankuang lui ding hong hilh hong pia Kha Siangtho Pasian ahi hi. Biakinnah hong kikhawmte, haksakna, buaina le lungkhamna tuamtuam tawh hong kikhop hangin ka sung pan hong luangkhia Kha Siangtho nuntakna guntui hangin Pasian’ tate, Pasian’ mite lungdamsa, vanzangsa, Pasian lawnna le hopihna ngahsa’n ciah kik tawntung uh hi.

Makai ahi kei tungah Pawlpi mite tung bangci lungsim pua ding cih zong Pasian in honghilh hi. Ka Pasian’ naseppih Siate tawh ahi zongin, ka kizopzia ding ka hopihzia ding, a maute ka makaihzia ding Topa’n hong hilh hi. Mite tungah itna ka neih theih nading ahi zongin kiniamkhiatna le nunnemna tawh ka kizop theih nading ahi zongin Topa’n hong hilh hi. A kulna munah pilna le hangsanna, kalsuan ngamnate hong pia hi.

Tua ahih manin ka pawlpi sung uh pen tu-in kum 23 bang pha ta a, pawlpi sung ah ki-itna kilemna kithutuahna le khat le khat nop kisakna, nosuahnate om tawntung ka sa hi, tua in Topa hong ompihna hang ahi hi. Makaite tawh Topa hong om ciangin pawlpi sungah Topa hong ompihna kingah pah a, nopcitna le suahtakna zong hong om pah hi.

Ka pawpi sung uh ah khangno lam hi taleh, nupi lam hi taleh, naupang sunday school lam hi taleh, Mission nasepna lamah hi taleh, amau mun tekah lawp thei mahmahin nuamsa thei mahmah uh a, khantohna tampi nei tek uh hi. Kei lam panin amau mun tektekah muanna tawh suahtakna ki pia a, tha ka piak sim loh ka va ukuk se kei hi. A khantohnate uh ka muh ciang in ka lungdam mahmah a, ka lungdamna ka kilangsak hi. Kei lam pan ka sep theih tua ciang bek hi a, ahih hangin mite amau munmunah suakta kisa-in lungdam thei mahmah uh hi.

Pasian a muang le a zantak Pasian’ tate ihih mah bangin i gam i minambup le i pawlpi tek a khantoh nadingin thungetna mah thupipen ka sa hi. Thengen le’ng Pasian tawh i kinai a, Pasian kiang panin lungsim siangtho, ngaihsutna navak, pilna le ciimna kingah hi. Tua in i makaihna hong matutpih ding thalianpen ahi hi. Thu i nget ciangin Pasian in sathau hong nilh a, tua ciangin i makaihna huang sunga om mite tungah zong ei zon ei hanciamtawm le ei kineihtawm hi loin thuneih zawhna i ngah hi. Mite in i thu hong mangin lungsim peulen cih bang om se nawn lo hi. Tua ahih manin makai cih pen Topa piak loh peuhmahin kingah zo lo ding hi.

Topa’n hong piak leh vanzang tak tawldam tak le maitai takin i makaih zo ding a, tua bang mite’ makaihna huang sunga om kha mite zong hampha kisa-in nuamsa mahmah ding uh hi. Lodum le tuiluang sialsial geia kikhah tuuno bang ding uh hi. Pasian’ sathau nilhna a ngah lo makai ahih leh a makaihna sunga om kha mite hingim mahmah ding uh a, mite kiphel loin kihen tektek ding uh hi. Pasian sathau nilh makaipa ahih leh mite kihen loin kiphel ding a, suaktain nuamsa mahmah ding uh hi. Pasian’ sathau nilhna a ngah lo khat in hun hong zat ciangin mipite thungaiten vangiksa-in ciahding uh a, Pasian sathau nilhpa in thu a gen ciangin mite in nuntakna, nopna, suahtakna, damna ngah ding uh hi.

Thupi mahmah ka sak lai khatah Pasian in ei koi munah hong koih a, hong zang nuam hiam cih i theih ding thupipen hi.I vekin Khazih’ pumpi nate vive ihi a, pumpi nate in amau om nading mun ciatah omin a pan nading mun tek panin ma hong pan uh ciangin pumpi cidamin nuamsa ahih mah bang in khazih’ pumpi sungah aom eite’n zong i pan nading mun tek thei-in i pan khak leh a cidam a nuamsa ihi ding hi. I pan nading lopi ah kilamen khialin i pan khak leh i gim mahmah ding a, i lawhcing kei lai ding hi.

Tua ahih manin la makai dingten la makaih tahen, hunzang dingten hunzang ta hen. Hunzang lo dingpi khat hunzat nading munah ding kei tahen. Pastor sem ding ten sem ta henla Pastor sem lo dingten sem kei ta hen. A uk dingte’n uk henla, a makai dingte’n makaih na sem ta hen. I sep loh nading munpi ah a pang kha lo dingin Topa’n thupha hong pia ta hen.

I gam le i minambup in Topa lamlahna(Pau.29:18) ngahin i panna ding tek pan ma pangin i gam, i minambup laamtoin i Pasian’ Kumpigam a tangzaisak Zomite i hih nadingin i biak Pasian in thupha hong pia kim ciat ta hen.

Rev. Dr. Dam Suan Mung
Senior Pastor
Full Gospel Assembly

Credit: - Zomidaily

2012