TOPA KIANG AH KISIK IN CIAH KIK NI, I ZOMI NAM CIDAM NA DING IN
By Muana Khuptong
By Muana Khuptong
February 21, 2018 ni in Billy Graham in leitung nusia in a gengen vangam nuam ah I Topa kiang ah a zi Ruth Graham tawh tawntung nuntakna zang khawm ding in a address change in ong paisan ta hi. Kum 70 val bang Gupkhiatna lungdamna thu gen in leitung gam 128 val ah Crusade bawl in pai kawi kawi a, Kha Mangthang a veina hang in inn ah zong tawlnga man ngeilo in a zi leh tate khualzin san in Kha Mangthang zawng in a tha hat lai sung teng na zin kawi kawi hi. Azi Ruth Bell Graham in zong, “ka pasal in hong zin san den ahih manin meigong (single mother) tawh kibang in ka nuntakna ka zang hi” na ci liang hi. Dr Billy Graham in a dam sung in mihing 200 million kiang ah Lungdamna thu na gen a, mi tampi tak ama Pasian nasepna hang in hell tung ding lai vangam nuam tun lawh uh hi. Asih ni dong in lungdamna thu mah gen gen a, nasia takin Capitol Hill, Washington DC ah ki pahtawi in, kumpi ulian leh biakna makai tampi tak ten a kivuini zong uap in gaal uh hi. President Trump te nupa leh VP Pence te nupa in zong gaal uh hi.
Hih zaha Pasian nasem khat ki pahtawina leh mipi lungdamna pen lian lua mah mah hi. Mi tampi tak in America’s pastor na ci liang uh hi. America ah pen Pasian nasemte leh biakna makai lim lim te pen nakpitakin ki zahtak in kithupi sim ahih manin tua hang a zong Pasian thupha a sang uh ahih lam ong phawk sak hi. Billy Graham crusade bawlna hang in mi tampi te kikhel in USA ah mawhna tampi Pasian thang paihna ding tampi ong kipat khiat hang in Pasian lungdam na ding zong tampi mah ong piang khe veve mawk hi. Billy Graham a nuntak sung in US President a sem khempeuhin thudot in nei in zahtakna pia uh hi. USA gam cidamna ding tampi tak mah zong na gen khia in na sem khia hi. Hih banga Pasian nasemte thudot a a neih sung teng uh bel gam cidam to to ding a, a nungta Pasian leh ama nasemte a nawlkhin ni ni uh bel agamsung kisiat lam manawh a tai tai hi ding hi.
Taanglai Israel te zong Pasian in anasem kamsang te zang in thu na hilh a, kumpi te leh mipi ten kamsangte leh siampi te thugen thudon lo in, amau deihna ciat tawh apai uh tak ciang in a mi nam un galte khut sung ah sal na tang pah pah uh hi. Tua bek thamlo in Israel gam phel nih ki suah in Northern Kingdom (Israel nam 10) teng leh Southern Kingdom (Judah leh Benjamin suante) in ki phel khap uh hi. Pasian in athuman loh ciang un Egypt leh Assyria te khut sung ah a beisa in zong sal na tang sak hinapi in pil thei tuan mah mah lo uh a, Pasian thu zuih in neilo uh hi. Tumlam gam Northern Kingdom Israel zong Pasian in Assyria te zang in salmat galmat in na man hi (Kumpite Nihna 17:16-23). Judah gam nisuahna lam a te zong Pasian in kamsang te zang in a mawhna uh kisik a, a gam uh cidam na ding in Pasian kiang ah ciah kik ding in Jeremiah, Habakuk, Zephaniah te zang in thu na hilh a, ahizong in kumpi te hi ta leh mipi te hitaleh kuamah in kamsangte thugen thudon lo in om uh hi. Tua ahihman in Babulon sal ah na om leu leu uh hi. Pasian in ama nasemte a kamsang te leh a siampi a sathaunilh te ki saktheih pih mah mah a, a thumanglo a mite salmat galmatna na thuak sak hi. Topa Jesuh in sum haupa leh Lazarus thu a genna ah zong, Sum haupa in Hell sung pan in Khamangthang ong vei in Lazarus thokik in a inkuan pihte lungdamna thu va hilh ding in hell sung pan in mission ong khah sawm lai in zong Pasian in, “leitung ah kanasemte ka siampi te, ka kamsangte Moses te khong om hi, tua te thugen na ngai uh hen, tua te thugen a up kei uh leh, misi sa Lazarus va thokik in va gen leh zong um kei un teh” cih san hi. (Luka 16:19-31). Khang Tangthu Masa 16:22 leh Late 105:15 ah “Ka sathau nilhte sukha kei un; ka kamsangte tungah siatna bawl kei un,” ci hi
I minam sung ah zong Pasian in a AW NEEM tawh ong sam sam in a hehpihna (grace) hun sung ah hong om sak lai hi. Tulaitak in I minam sung ah namdangte simmoh leh mi nuai a I om detna, mipil tampi ki om na pi in, I kipumkhat theih lohna, mi hau tampi om napi in khang 2 khang 3 daih ding hauhna kip i neih theihlohna, I khantohna ding ong dal pen, bang dang hilo in, thu 2 bek ahi hi; khatna ah: Nule Pa te ki khasia sak; Nihna ah; Pasian nasemte thusim lo mi tampi tak ki om mawk hi. Efesa 6:2 leh Paikhiatna 20:12 sung ah “Honor your father and mother” na ci a, Tedim LST ah ‘na nu leh pa zahtak in’ na ci hi. Zahtak cih pen a khiatna manlo hi. Pahtawi cih ding ahi hi. “Na nu le pa pawhtawi in” cih ding ahi hi. Zahtak I cih leh pahtawi cih kammal ki bang lo hi. Nute ni Pate ni khong a letsong mantam pi pi I piak sang in a thu uh mang le hang tua pen I pahtawina sang pen pen ahi hi. I nu leh pa a hauh man, a pil man a hoih man a pahtawi ding na hi lo a, a hang (cause) om ngiat lo a nule pa te pahtawi ding na hi ngiat hi. A khasiat huai mah mah khat, Pasian zahtak lo nulepa ki tam mah mah ta a, nu leh pa zahtak lo tate ki tam mah mah mawk hi. Nulepa ten Pasian le (Pasian nasemte) thusimlo, zahtaklo a I om ciang in taten zong nulepa zahtaklo thusim lo ek thei mawk hi.
Israel te makaih ding in Pasian in Moses na tel a, nasia tak in na zang in. Moses pen kamsiamlo, pau awk khat na hi sawn sawn lai hi. Hawm thawhna ding tampi tak om hi. Joshua na zang leu leu a, Israel namte makaih ding in Pasian tel na hi hi. Samuel a kamsang ding in na teel leu leu a, kumpi te sathau nilhpa “king maker” hi napi in a zi a tan a ukzo tuan sam lo hi. Hawmthawhna ding tampi tak na om veve hi. Thuciam thakah Pasian in Atapa Jesuh sisan tawh a leisa pawlpite makaih ding in Pastor te na zang leu leu hi. Sawltak Paul tungtawn in Timothy te Titus te na om uh hi. Tuni ciang in zong Zomi te kawlgam vaigam leh tuipi galah Christian ki om in, tua te makaih ding in amun mun ah Pasian in ama nasem ding in Pastor te na koih hi. Laisiangtho sung Rom 13 ah zong makai te thu na mang un na ci hi. Hebru 13:17 “Na makaite uh thu na mang un la, a genna uh bangin na gamta un. Pasian kiangah amaute in a nasepnate uh a pulak ding uh ahih manin tawlnga loin note hong lunghimawh tawntung uh hi. Amaute' thu mang le uh cin a nasepna uhah lungdam mahmah ding uh a, mang kei le uh cin dahpipi-in na sem ding uh hi. Dahpipi-in a nasepna uh note-a' dingin zong phattuamna a om tuan hilo hi.” Pastor te ei feeling tawh, ei deihna tawh kituak a kampau leh gamta a aom khak kei uh leh zong langpan pah ding hilo hi.
Pasian nasem pastor te pen Pasian in I makai ding a ong koihsak ahih manin va thu hilh hilh ding hilo hi. Laisiangtho bulphuh leh Khasiangtho lamlahna tawh ong kalsuan pih na bang uh va nial nial ding hilo hi. Pastoral care nuai ah hoih takin om thei leng I thupha ngah ding tam mah mah hi. Samuel zong Siampi gina hetlo, a tate zong a uk zolo Eli khut sung ah thumang takin na om ahih manin Pasian in thupha piak cih tak in pia in amin thanna ding in na zang hi. Pastor te Piangthak tak tak te a ding in tuu cing hi uh a, spiritual authority I tung ah nei mah mah uh hi. Ei deihna dan dan lian a a om kei uh leh gensia lang pan mawk lo ding hi hang. Mihing te maipha zong a Pasian maipha a zong lo pastor ahih khak ding uh lau huai mah mah hi. Pastor te pen ei thu thu a omsak sawm ding hilo a, amau thu leh Pasian deihna tawh kituak a I om ding hi zaw hi. A lungdam huai thu in Zomite pawlpi kim phial ah tu ciang ciang in Pasian nasem pastor te mipi atamzaw in zahtak in it thei ta hi. Ahizong in nakhat peuh peuh, thu khat peuh peuh, a hoih lam sang in a sia lam in zo zaw den mawk ahih man in pawlpi sung, minam sung ah zong nih leh khat thusia bawlna in tampi ahoih te lawh zo mawk ahih manin dah huai mah mah hi. Tucing te pen a tuten an piak sawm sawm ki tam kha thei mawk mawk hi.
I minam sungah icidam na ding leh vai haksa khat peuh peuh ah Pasian in ong ompih a, gualzawhna I ngahna ding in ei Christian ten I pastor te tawh khut kilen khawm in pang khawm ni. Israel te hunlai bang in pasian nasemte thugen I thusim kei a, I hawmthoh detkeei leh Pasian thupha tak tak ki ngah lo ding hi. Leitung thupha pen Satan in zong pia thei lua hi. I pastor te langpan lo in pawlbawl zo le hang Pasian deihna hizaw hi. Nulepa thu mang in I Pastor te thu hilhna te zong awlmawh leng hoih ding hi. Nulepa thumanlohna leh Pastor te thusimlohna leh langpanna pen mawhna lianpi ahih lam Laisiangtho sungah kimu hi. I gam leh minam I cidam na ding in I mawhna te Pasian kiang ah pulak in mawhmaina ngen ni. Topan ong damsak nuam hi. Khang Tangthu Nihna 7:14 “keima minin a kisam ka mite amau mahmah kiniamkhiatin, thu ngenin ka mai hong zong a, amau' gitlohnate panin a kihei uh leh, keimah in vantung panin ka za ding a, amaute' khialhna maisakin a leitang uh ka hoihsak kik ding hi.” Pasian kiang zuan in I mawh nate kisik kik in Topa maipha a zong kim ciat ding in hih lai asim kha khempeuh Topan thupha ong pia ta hen!
No comments:
Post a Comment