LAI SIM THUPITNA

Laisim Thupitna. 
~~~~~~~~~~~~~~
Agelh : Lia Dim Boih

Laisim na pan in pil na tampi tak kingah aa, muh na zong khang in theihna zong khang sak hi. Leitung ah mi hau mizawngte kideidan lo-in a hih theih uh pen laisim hi. Mipawl khatte adingin a lungkham mahmah laitak un lungnopna a ngahna, pawlkhatte aadingin a lunglen hun uh ciang alungsim uh a la pen lai hi. Laisim na in nuntakna ah sia,hoih pen cileng zong kikhial lo ding hi. Laisim leh laisim lo a nuntakna uh kibang lo aa, a gamtatzia uh zong kikhai mahmah hi.

Mipilte in a sim uh laimal khat pen a nuntakna uh ah sin pah uh aa, a nuntakna uh zong kilamdang pah hi. Scholasticte in a gen, a gelhna uh ah, laibu om Innsung pan a khangkhia naupang khat leh laibu omlo inn sung pan hongkhang khia naupang a etkak uh ciangin laibu om innsung pan hong khangkhiate mah sang lai zong hat zaw aa, zong tel pahpah zaw hi ci hi.

Sang naupangte adingin a sanglai (textbook) uh bek sim ding hi lo aa, adang laibute zong sim ding thupi hi. Sang lai a hi lo adang laibute simna in, sang aa na sin khak loh theih huai thu tampi hong lak aa, na zak ngei lo laimalte hong musak in, khuak zong manlang sak hi. Laibu sai ka pai ciang naupang vive ka mu zaw deuh hi. Tuhun ciang technology khang sem sem in, nu leh pa a tam zaw in nau pang khem baih nading in phone kipia den thei hi. Zomi nu leh pate ka hanthawn nop in na inn uh ah na tate deih theih ding, uk theih ding laibu koih in. Phone, TV, Game cih ten na koih sang in laibu koih zaw in. Na tate laisim ding na kam tawh ban sawlsawl ken la, na tate’n laibu a sim theih nadingin na inn ah laibu koih zaw in.

Ka neulai-in textbook mu leng lotngah ding bek in kingaihsun hi. Tam lotngah zo leng sangah mat tam kingah ding cih bek kithei hi. Tu panpan in laibu sung ah thukhempeuh kigelhte pen lotngah ding na hih het lo aa sim in, sin ding ahih lamka tel panpan hi. Laibu sim dan a theite in laibu a sim mawk mawkte sang a zahtampi in laibu sim na ih a manphatna tam la thei zaw aa, pilna tam ngahzaw hi. Laibu a sim siamte laibu a simna sung pan pilna tampi ngah uh aa, pawlkhatte in laibu a simkhit ciang in bangthu kigelh hiam cih thei lo uh hi. Laisim dan a siamte in a simna sung pan in na dang khat mu khia thei hi. Gtn: Mangpau pau thei nuam in, ahih hangin manglai na sim nop kei leh mangkang khempeuh tawh na kiho thei kei ding hi.

Tuhun ciang in laibu tam kilen non lo aa, online ahih kei leh e-book pan in tam kisim zaw hi. Tua mah bang in facebook pan zong sim ding lai na om zel hi. Lawm te’ status zong kisim zel hi. Nisim na sim ding lai hoih tak na tel theih kul hi. Gtn: Facebook sung ah mi te status vive sim ding na tel leh nang ading phattuamna omlo ding hi. Laibu a telsiamte in a nuntakna ah sia hoih a ngah hi aa, laibu na tel khialh leh na muhna le na upna in zong hong zui paisuak ding hi.

Laibu ih sim ciang in mi khat ih khuak sung ah a kiguang hi aa, mihing khuak pen ih guan zahzah a ta hi. Ih khuak pen tu hun aa computer technology bang kasa hi. Bang hang hiam cih leh genteh na in, mual tawh kisai a thei nuam na hih leh , na laibu sim khak ngei a hi zong na zak thute ahi zong na muhngeite pan in mual tawh kisai na khuakin hong kaikhawm hi. Laisimna na neih kei leh na sung hawm ding aa, database om vet lo cih na hi. Na memory sung ah bang tawh kisai thu te guang nuam na hiam cih pen nang na teelsiam a kul ahi hi.

Tua bek tham loin, laibu simna in na lungsim hong tawldam sak zo hi. Mi pawlkhat in laibu pen lungnop na zonna uh, aih kei leh na lungsim sungkhiatna uh hi aa, a mau aading in laibu pen lawmhoih khat bang in ngaihsut uh hi. Hih mangkang gam ah a tam zaw pitek putekte in laisim tangtang uh hi; a cil in lamdang ka sa hi. Bang hang hiam cih leh laibu pen sangnau pang leh college, sum leh paii bawlte, siate bek ih sim ding ka sa ngei hi. Khangno pawl khat in lawm nei lo in, laibu sim in a mau bek om thei uh hi. Amau aadingin laibu pen a lawm uh hi aa, lai a sim uh ciang in a lunguh kim in kuamah phawk lo hi. Laibu pen pilna, lampi hong lak bek hi lo in tawldamna zong hong pia thei lai hi cih kimu khia mahmah hi

A tawp na leh a thupi pen kong gelhnop in, na nuntakna lungkim thei lo-in, kal suan ding haksa sa-in, na lungkia in na hih ding lah na theih tuan kei leh- kum tam, kum tawm tawh kisai lo hi. Kong gen nop khat in “Lai sim inla, sin dih in.” Na nuntakna kilam dang ding hi! Gtn: Mel Robbins ih laibu “5 seconds rule” lai bu na sim in la, sin pah in.

Laibu pawl khat in simin ciap teh ding om aa, pawl khat in lungnopna leh hong nui sak zo aa, pawl khat ciang in na nuntakna ah na sinkhiat ngiat ding kisam hi. Laibu siam theih nadingin laina sim kul ding hi. Na nuntakna na khelnop leh lai na sim kul hi. Na gual zawh nop leh lai na sim ding a kul hi. Nasep hoih na ngah nop leh laitam pipi na sim a kul hi. Mi tampi tawh na kitheihnop aa, mithupite tawh na kizop nop leh laisim in, na hopihna ding kammal na sung ah khol in. 

Note:-

Laigelh Lia Dim Boih pen Zolai, Zopau avei mahmah khangno liapaal khat hi in Tulsa, OK USA ah a innkuan un teeng uh hi. Apa pen Sia Khual Khai Naulak beh, Laibung khuami hi. Amah pen tulai tak collage akah laitak zong ahi hi. Ka kithuzakna leh ka ngetna tungtawn in "laisim thupitna" hong gelh khiat ahi hi. Ama tungah lungdam mahmah hang. I biak Pasian in hong zatsak semsem ta hen.....

Lungdam
editing: Siam Khaute

Source:-Cinpu Zomi
www.laibusaal.com

101417