NUPATE THEIH HUAI

NUPATE THEIH HUAI

1. Nupa ki-itna pen Innkuan kilam nadinga Pasian’ hong piak ahi hi. Thudangte i kivuknelh sakleh Innkuan kiling ding hi.

2. Nupa i cih pen Innkuan kingakna zawlpi a pua khuam tegel hi-a, a kithutuak mahmah ding kisam hi. Tua hi keileh zawlpi tunga tuang i tate kiakhia ding uh hi. Nupa ki-itna khit-a tate itna pen nupa ki-itna tungtawn-a hong kipia hizaw lai hi. Pawlkhatte tate tawh kopin a nu a lang bawl’ om thei in, tate tawh kopin a pa a lang bawl’ ki-om thei hi.

3. Khangluite in, “Suk-tum tungah zong nupakhat lumkhawm thei hi” a ci uh hi. Nupa kipumkhatna thu tel mahmah uhhi.

4. Mite’ thugen’ khat peuh tawh i nupa kal kiling sak ngam mawk ding hiam? I zi maw, i pasal maw, sangin a uphuai zaw khat i muhleh pen a lampial, et loh dingpi khat a en kha i hi ding hi.

5. ‘Nupa’ cih pen pumkhat a kici ahi hi. Khat in taklam sii’ in, khat in veilam a sii’ ahi hi.Tua pen pumkhat ahihna ahi hi. Veilam leh taklam kithutuak lo cih bang om lo hi. Nu zaw maw, Pa zaw maw khatpeuh in a pulak masak khat peuh, “He he” cih pah theih ahi hi.

6. Pasal in a maitang mu thei lo-in, a zi’ maitang a mu hi. Tua mah bangin a zi tawh kisai teng a en ding hi. Numei in zong a maitang mu thei lo-in a pasal’ maitang a mu hi. Tua mah bangin a pasal tawh kisai teng a en ding hi. A kikhai kimin a om’ keileh nupa cidam lo, innkuan cidam lo ahi ding hi.

7. Pasal in a ma’ lam bek en in, a thuneihna a zi’ tungah a zat lailaileh, zi-hai a neihleh, sila in zangzang thei dinga, zi laihawl a neihleh om khawmkhawm thei lo-in, zipil a neihleh a zi in sila lungsim tawh a pasal a om pihpih lel ding hi.

8. Nupa pawlkhat a kithutuak mahmah ding banga, ahizongin angaihsutna uh a kituah sung bek ahi hi. Bazarte ah vakkhawm hialhial uh a, aduh adeih uh a kibat loh ciangin a buai uh hi. Duhdan deihdan a kibatloh laitak pen nupa hihna i zat ding laitak hi zaw hi. Pawlkhatte bang pen a lawm ii’ mitlimlang lei dinga pai hi napi, a et sakleh a lu-vai keei ahih cianga, “Bulh thei kei niteh, piang kei,” ci-in lei’sak lo ziau hi.

9. Pasal cih pen i khanglui ngeina-ah, a zong ding, a van’ ding, a puapial dinga ngaihsut ahi hi. U sung nau sung khua sung vaite ah a pilvang ding ahi hi. Tua mah bangin khangluite in, “Pasal vakvak saliang pet” a ci uh hi. Tua ahihmanin zite in pasalte’ vahna peuh lung himawhin kankan se lo-in, “A neipa hiven, a neihsa behlap ding hilo dia” cilelin, “Humpisul leh pasal’ vahna kikan ngei lo” cihte thei-leh! Tua mah bangin pasalte zong zi leh tate’ a’dingin muanhuai pah-leh!

Numeite leuleu pen i pu i pate’ ngeina ah, vakvak lo zaw in, innsung vai, zin leh leeng vai, anhuan mehbawl vai, huangsung vai teng a sual dinga ngaihsut ahi hi. Thamlo-in numeite puapialleh ze-etna nanglah zaw deuh kici in, i pu i pate in, “Nupi vakvak thusia zong” a ci uh hi.

10. Pa in thupha a bawlna khat peuhah, “Ka zi ka tate in gengen uh-a” ci sese lel ding hi. Kipahtawi siam ding hi.

11. Nu in zong thupha a bawlna khat peuhah, “Ka pa un gengen ahi cianga” ci sese lel ding hi. Kipahtawi siam ding hi.

12. Tate in zong nu leh pa’ sawlna lo-a thupha a bawl ciangin, “Ka nu, ka pa deihdan ahih cianga” ci sese lel ding hi. Kipahtawi siam ding hi.

13. Pa pen khualzinin nu bek a om ahizongin, innsung khantoh nading vai khat peuh, sumgil, paaigil, vangil khat peuh neih theih nading munte ah, pate a om loh hangin vaihawm’ ngamna pen, “Nu” cing hihna ahi hi. “Nu” cing i cihte pen pate’ lungsim a telte ahi hi. Pate’ lungsim i tel keileh “Nu” cing hi zo nai lo cihna ahi hi. Tua bangte in bangmah vaihawm ngamlo ding ahihmanin, “Nu” a cing zo lo ahi hi. Pa’ om loh sunga a vaihawmnate khempeuh zong, pa mitsuana, pa hu-ngaiha a sep ahihmanin, “Pa’ hang mah hi” a cih theih ding ahi hi.

14. Pa in zong a om’ loh kal-a a innkuante’ vaihawmnate khempeuh ama’ vaihawmna mahin a thukim’ pah theih ding ahi hi. Banghanghiam cihleh innsung mimal khat in i lem’ hunhun-a na hoih i sep theih zel pen innkuan kitheih taangna hang’ hi a, pa in innkuan a suahtak sakna hang’ ahi hi.

Hih thu a telsiam lo pawlkhatte in pasalte om lo-a nalian a sem zite pen kimawhsak zawsopin, “Numei’ baangkua sung” peuh kicihsak thei mawk hi. Pa’ hangin tua zah a vaihawm ngam hizaw hi.

Pa pen a zinna panin a tun hunhunah a innsunga vaihawmna a om khempeuh pen encikin, thukimna letmat a thuh(Hoih hi cih) ding ahi hi. Tua innkuan khantohna pen, PA’ hang ahi hi.

15.

(1) Pa = Makaipi (President).
(2) Nu = Neihsa kem (Home Minister).
(3) Tate = Thu kikuppih (Committee member).
(4) Mipite = Nasepna mun (Mission Field).

Khristian Zomi Innkuan/ Tdkhen Tuuno Huang

June 2617