"TANU, TANU, TANU"

“TANU” (INNSUNG DONGTA)

Tanu cihtawh kisai tawmkha kikum dih ni. Pawlkhatte adingin tangkha tui zong suakkha mai thei ding hi. Tanu ih cihciangin i tanu, tapate agen nuam ihi masa kei a, ahizongin tuate tungtawn mahin ahong piang “dongtate” agen nuam ihi hi.

Tanu cihpen atuam2 om tua sung panin nidang lai katheih mial2 lai tanute nuntakzia leh tulai tanute nuntak zia anuai ah enkaksuk ni.

NIDANG LAI TANUTE PIANZIA

Tanu (Dongta)te pen tanumei mokhak maw ahih kei leh pa unau tanumei lamte mah innsung dongta dingin kizang masa hamtang hi. tualo adangte pen ahun zui le munlemual zui in kila hi.

Nidang lai tanute nuntakzia pen pilepute Inn ah sep leh bawl ding a-om ciangin (nasemte) akisam bang2 semdingte ahi hi. Tuamah bangin sepding bawlding akigen ciangin zingtho baih in gawhding, huanding, bawlding, sepding khempeuh sem uh hi. Kaneu lai in kapute Inn ah ka pai theizel a, tanu kapate in semtheih zel hi. Amau pen Lawki hilaiding in lam en ing, tua hunlai in. Sagawhna or Sa akiman a tanu in akiseh ciangin leh zulup, salup ciangin sepdingteng semin zu bawlsak in tepding lianin koih saka, kamkhat zong pi,pute tepma teplo, dawnlo uh hi. Uzaw or pipute zahtakna nei mahmah uh hi.

Mipi hongpai khawmin ankuang kilui a, tanute in an kuanglui in mipite khamdong nakhempeuh sem uh hi. Sangoi nangawn ciam ngamlo in mipi sung ah aneding kilawm upate pia kawi2 uh hi. tua bangin na semin om uh a, meh leh buh akicin keileh ngawl zawtham uh or inntekte ading akikoihte sacing, samulmat, sakawng, salu, cihbangte, inntekte in huankik un no mehding acih leh bawl kik in aminteh tanute in nepan hi. meh leh an lim2 kigusim cih bang omlo in, sem lasemin akicin kei leh ngawl zaw tham uh hi. Piak ding aom leh zong piakhia zaw masa, zawtham uh hi.Tanu cihteh amasa lam a kikoih loin kipiakhia ngaitin anunung lamah kikhoh in, semzaw in aom keileh ngawlzaw tham uh hi, hih pen tanglai tanu (dongta) te nuntakzia itna leh deihsakna, aneihdan uh ahi hi. Nidang lai tanute pen Itna nei mahmah in gamtat hoih mahmah cih ding hi.

TULAI TANU(DONGTA)TE NUNTAKZIA

Tulai tanu (dongta)te pen nidang ate bangin Hihding bawlding, sepding khempeuh nialsam lo uh a, I Mi masate bangin uzaw, or pipute zahtakna om khollo hi. Pasian hehpihna tawh ka Pa khangah sa gomun pawl leh Pawi neng, akipan Samat siam ahih manin ka innvuah tanu hong kisem mun mahmah ahih manin thupi sa ing, Kotanute pen genbanna ding ka nei kei a, mundang leh muntuam2 a tanu katheih khakte leh pawlkhat kamuhna pan leh tanu kasepna pan tulai tanu (dongta)te nuntakzia ka mu thei zel hi.

Tulai tanu (dongta) pawlkhatte nuntakzia pen sepding teng sem a, kisemsak luapah ban ah, itna tawh semlo in thaman ngahnopna leh keithu hi cih lungtang vom mawk uh hi. A tanu (dongta) sepnate thusangin ama thu paiding pen deihzaw tanu, dongta tam mahmah mawk hi. Sagawhna bangin gen leng, mipi an nek ma amau nekhin, sangawi leh upasa teng pilepute nekma duhteng malmang khin in, pawlkhat bang ZU mii ding ci-in sel mang thei, tuabang in nunta tanu tam mahmah ta a, Mipi in an anek teh sa or meh hawm ding kicing lo-in om thei mawk hi. Tu hun ciangin itna tawh tanu (dongta) kisem nawnlo in, phattuamna or, metna or ei hamphatna ding, ei gilpi vahmasa ding bekbek mah kingaihsun mawk hi. Itna taktawh tanu(dongta) kisepsaklo in eimah hamphatna ding bekin tanu(dongta) sem tam mahmah ta mawk hi. Mikim bel hisam lo na pin 5 lak ah khatlenih bangin tuadan hong hihnopteh mihing hihna tawh adangte lawh zo veve mawk hi. 

Tulai tanute bel kawlte danin angsung bek ngaihsun in, itna tawh na sem hi nawnlo, mehval bang om leh pilepute theihma a atawi ding aguangkhin tanu tam mahmah lai dep hi. Tulai tanu(dongta)te leh Nidanglai tanu(dongta)te ih etkak ciangin kilamdang lua mahmah ta hi. Itna cih pen kivom nawnlo hi. Angsung dingbek, kei phatuam peuh leng cihdan lungtang leh gamtatna tam lua mahmah ta hi. Kua hong lawh ahi tam cici mai ing. Nidang lai hunte peuh ngaihhuai zaw mai ta hi. Pute leh Mipi khualna tawh dongta kisem nawnlo ei phatuam peuh leng kici-in tha kisial mahmah ta mawk hi tula tanu(dongta) leh makaite.

SIM LE MAL A OM ZOMITE

Tanu I gen mah bangin simlemal, saklekhang, Kawlgam, India, Asia leh Western gamlam a om Zomite Dongta ih sepna ah kingaihsut huai mahmah hi. Biakna Pawlpi, Minam leh Innsung bangkua ah, na tanu (dongta) sepna ah Nidang lai “Dongta”te mah bangin Itna leh deihsakna tawh na ihsepding pen hoih ding hi. Dongta or Makai utpong in tulai tanute dan a, ei gilvahna ding bek, eiphattuamna ding bek, ngaihsun a, Zomi dongta, pawlpi dongta, ih sepkhak leh pen hoihna sang siatna hong tun a, midangte in hong thei veve hi. Muanna bei hi. “thusia in mualkua khum” kithei veve cihna hi.

Dongta=Makai cihpen misepma asem, mi nunghawl lo, amai ah pai, semding aom leh sem masa, piakding a om leh pia masa, na khatpeuh ah masa tawntung, lakkhia masa tawntung cihna hi a, angsung alutding lam masa saklo Makai kitangsam mahmah cihna hi. (tua pen Deihsakna tawh nasem or itna tawh gamta, nasem cihna hi.) thasial lo thaman deih pahpah lo cih ding hi.

Zomite koi mun koimual ah sepna bawlna innsung ah, Minam ah, Pawlpi ah, amakai bek utlo ih asempen hih ding kideihsak hang, Tulai tanu (dongta)te nuntakzia ih etet teh Nidang dongtate nuntakzia ngaihhuai kik mahmah mawk hi cih kei muhna ahi hi.

Zomi Dongta
Innsung dongta
Pawlpi dongta ihsepnate uh ki-enpha kik ni.

Mimal khatciatin nuntakpih kik dingin tanglai dongtate nuntakzia lungngai kik ni.

Lungdam

Siam Khaute

May 3, 2017

TUN PHAWKNA KAWM HI EI, YOU R MY SUNSHINE NUNU