NA PIANNA NA NU LEH NA PA IT IN, ZAHTAK IN LA, LUNGKIM LUNGDAM SAK IN

NA PIANNA NA NU LEH NA PA IT IN, ZAHTAK IN LA, LUNGKIM LUNGDAM SAK IN (Pai 20:12, Ef 6:1, Pau 6:20,Pau 30:17, Pau 23:25, Pau 23:22).

Leitungah mi bangin i piankhiat theihna dingin Pasian in i nu leh pa thupha pia-in amau tungtawnin tate i piang hi. Tua ahih manin Pasian in nu leh pa it in zahtak a, a lungkim/lungdam sakte adingin thupha tampitak hong koihsak hi. Nu leh pa thu mangin, i lungkim/lungdam sakna tungtawnin leitungah cidamna, khansauna leh hauhna nopsaknate ki ngah hi. Nu leh pa a lungkim/lungdam sak tate in a khantawn un, khut dawhngen in vak ngei lo uh a, mi khan eng' ngeilo uh hi.

Nu leh pate tungtawn a, hong luang thuphate deih napi-in, ngahtheihna dingin nuntak, gamtat ding pen haksa kisa zel hi. Nu leh pate'n hong it mahmah uh ahih manin, tate'n it zo den kei mah ta leeng amau hong itna bei ngei lo hi. I nu leh pate it in i lungkim/lungdam sak ding pen a haksa lua hi lo hi. Nu leh pate'n hong itna uh a bei theih loh hangin, tate' tungah thupha hong piak dan uh kibang kim lo hi, cih i phawk gige ding kisam mahmah hi. Tua ahih manin na nu leh na pa a lungkim/dam sak pen hih sawm den ing. I u nau kimin tuabangin hanciam tek leeng, nu leh pate'n zong i unau kim mahin thupha hong pia ding uh a, i unau kim mahin i nuamsa ciat ding hi.

Leitung nuntakna sungah nu leh pate khasiat sakna pen a lauhuai mahmah leh adahhuai mahmah khat ahi hi. Nu leh pate simmawh in, khasiat sakna hangin ei khang bek hi lo, tu leh ta khang dongah supna leh buaina lianpi om thei hi. Noah in leenggah zu kham in, khua phawk loin guak tangin a om laitakin, a tapa Ham in mu-a, a pa' zumhuainate seel sak loin, a sanggamte kiangah va ko hi. Tua hangin a tapa Canaan in a sanggamte' sila ahi dingin ciamsiatna ngah a, ahi zongin a pa uh' zumhuainate a seel sak Shem leh Jafeth te tungah a pa un, thupha pia hi(Pian 9:18-27).

I nu i pate pen pilna siamna nei loin, midangte nu leh pate bang kei mah tale uh zahpih ko bawl se loh ding ahi hi. A hoih lohna uh a om leh gensia kha loin, itna takpi tawh i seel sak ding kisam hi. Nu leh pate pen a tawntungin i deih bangin kicing den zo sam lo ding uh hi. Ahi zongin i itna pen kiamsak lo a, i nu leh pate' tungah thupha bawlbawl in, i lungkim/lungdam sak det zawhna dingin hanciam tawntung ding ahi hi.

Absalom in, a pa David lehdo in langpan ahih manin khang lai pipi, thahat lai pipi mah in sihsia tawh khansih hi(2 Sam 18:9). I nu i pate langpanin lehdo kha kei ni. Simmawh in bawlsia kha kei ni. Pasian' deihna tawh a kituah loh banah tua bang gamtatna in, a lauhuai penpen nuntakna ahi hi. David in a tapa Absalom in bangzah takin langpan in, lehdo mah ta leh a itna kiamtuan peuhmah lo a, Galkap makai thum(Joab,Abishai leh Ittai)te tungah, "Keimah nong khualna-un tangvalpa Absalom hong dawm mahmah un,"ci-in vaikhak lai tazen hi (2 Sam 18:5). Nu leh pate hong itna pen thukin zai mahmah cih phawk ding kisam hi.

Pasian it in, a zahtak nu leh pate khempeuh in zong tate in bangzah takin simmawh in, langpan mah ta leh tua bang lungsim nei kim ciat uh hi. Nu leh Pate pen bangzah takin simmawh in, i langpan hangin hong itna uh bei tuan lo hi. Nu leh Pate tungah i bawlna zahzah tawh kutuak in, gentheihna ahi a, nopsakna ahi zongin hong tung ding hi. Eima bawl zia tawh kizui-in thupha ai kei leh hamsiatna cihte hong tung ding ahi hi. Deihdeih kiteel thei-a, teelkhial leeng tu leh ta khang dongah supna lianpi om in, teelsiam leeng tu leh ta khang dongah nopsakna om ding hi.

Tua ahih manin, cihmawhna, gentheihna, khangual en'na leh a deihhuai het lo, sihsia(khantomna)cihte tawh kipelh in, cithei-in nuamsa a, na khan a sau theihna dingin, "NA PIANNA NU LEH PA IT IN, ZAHTAK IN LA,LUNGKIM/LUNGDAM SAK IN," ci-in,aki hanthawn nuam ihi hi. A telsiam ding leh a hih zo ngiat dingin Topa'n thupha hong pia kim ciat ta hen. Amen!

Khazih sungah, David Tuang